Dmak 26

O Pipa'ading ni Pawlo to Tireng i Ka'ayaw ni Akripa a Hongti

1Pasowal sa ci Akripa ci Pawloan, <<Nga'ayto a pasowal kiso to nano dmak iso,>> han ningra. Saka, laya' sa ci Pawlo to kamay ningra a pasowal a pa'ading to tireng.

2<<Akripa a hongtiaw, malmeday kako anini tona i ka'ayaw iso kako a pa'ading to tireng a pasowal to nano nipakokotan no Yutaya a tamdaw a dmak ako a ma^min. 3Nawhani matanengay kiso to pakayniay i lkakawa ato kalaliyaliyangan no Yutaya a tamdaw a ma^min. Saka, milongoc kako i tisowanan hadidi han a mitngil ko pipa'ading ako to tireng ako.

4<<Nano ka^mangan a dmak ako i kitakit ako ato dmak ako i Yirusalim i, mafana' ko polong no Yutaya a tamdaw to nika masamaan ko dmak ako. 5Ano sapipawacayan cangra to pakayniay i dmak ako i, yo ka^mangho ko 'orip ako mafana'to cangra to nipitoor ako i saca^desay a misaFarisayay a pitooran. 6O sakaliclic ako i matini i, o pakayniay i nisowalan no Kawas i tato'asan ita a pafaloco'an ako. 7Onini a pafaloco'an ko sakalalok no tosaay ko safaw a ngangasawan no finacadan niyam a mita'ong i Kawas to romi'ad to dadaya. Hongtiaw, onini a pafaloco'an ko sakapipakokot no Yutaya a tamdaw to dmak ako. 8Nawiro, caay ko papaso'linen saan kamo o Yutaya a tamdaw to nipipalowad no Kawas a pa'orip to mapatayay?

9<<Nao mahaenay kako i 'ayaw. Tada o papacolien ako ko pakayniay i ci Yisan no Nacali saan kako. 10Nilahcianto ako konini a dmak i Yirusalim. Namapafli no kakridan no citodongay to ta'ong kako to sakacitodong ako i, rofoen ako ko 'alomanay a mitooray. Caay konini a ccay. Kako ko mihaiay to nipipastek i patay cangraan. 11Kinapinapinato kako a mitfoc cangraan i kasa'opo'opoan a loma' no Yutaya a tamdaw. Paci^ci han ako cangra a papipasowal to sapisawadaw nangra a mitoor ci Kristoan. Marokrok ko kter ako i cangraan. Saka, tangasa i niyaroaro' no roma a kitakit ko nipikilim ako i cangraan a mikari'ang.

O Pitosil ni Pawlo to Nipifalic no Kawas to Faloco' Ningra

(Dmak 9.1-19; 22.6-16)

12<<Mahaenay ko dmak ako. Saka, namapatorod no kakridan no citodongay to ta'ong kako to sakacitodong ako i, lowad sato kako a tayra i Tamaskus. 13Hongtiaw, yo i fatad no lalan ma^deng kalahokan i, ma'araw ako ko nai kakarayanay a likat. Ikaka no cidal ko nika likat nonini a patdi i taliyok ako ato kapot ako a romakat. 14Mapolin kami a ma^min i sra. Itiya i, ira a matngil ako ko ngiha', misanoHipray a pasowal i takowanan, <Sawloaw, Sawloaw! nawiro mikari'ang kiso i Takowanan saw? Matiya o kolong kiso a micokar to macidemay a cokor no tapang iso, ano haenen iso i, kiso ko mamadoka'!> saan. 15Saka, licay han ako, <Tapangaw, cima Kiso saw?> han ako i. Sowal sa ko Tapang, <Oya nikari'angan iso ci Yis Kako. 16Kalomowad, katomireng! O sakapipa'araw Ako i tisowanan i, o sapatirengaw tisowanan a palamamatayal Ako. O papasowal kiso i tamdamdaw to ma'araway iso anini ato papa'arawen Ako i tisowanan i ikor nonini a dmak. 17O papa'oripen Ako kiso a paliyas nai pikari'ang no finawlan iso ato pikari'ang no roma a finacadan. O a ocoren Ako kiso a patayra i cangraan. 18O mamifohat kiso to mata nangra. O papasasiyoren iso cangra nai to'manay a pasayra i ta^ngaday. O papasasiyoren iso cangra nai sakowan ni Satan a pasayni i Kawas. Ta pakayni i nipiti'er nangra i Takowanan ko sakahpol no raraw nangra ato sakapikapot nangra to finawlan no Kawas saan.>

O Pitosil ni Pawlo to Nano Tayal Ningra

19<<Mahaenay saka, Akripa a hongtiaw, caay liyangen ako ko nai kakarayananay a nipa'arawan ni Yis i takowanan. 20Saka, satapang han ako a mipatnak i Tamaskus ta tayra i Yirusalim ato polong no Yutaya a pala, ta tangasa i roma a finacadan ko pipatnak ako. Papipasasiyoren ako cangra to faloco' nangra a pasayra i Kawas. Papipahapinangen ako cangra i dmak nangra to nika falic no faloco' nangra. 21Onini ko sakapirpet no Yutaya a tamdaw takowanan itira i Fangcalay Pita'ongan. Sapipatayan cangra i takowanan. 22Nikawrira, tahanini ko nipipadama no Kawas i takowanan. Saka, manga'ay ko nika somowal ako anini i ka'ayaw namo o tadamaamaanay ato sasafaay a tamdaw. Deng o sowal no pali'ayaway to sowal no Kawas ato sowal ni Mosi to pakayniay i aira a dmak a ccay ko sasowalen ako i matini. 23O mamapasemsem ci Kristo, o mamalasa'ayaway Cingra a lomowad a ma'orip nai patay. O papatalahkal Cingra to sapa'orip a likat i Yutaya a finacadan ato roma a finacadan sanay,>> han ni Pawlo.

24Yo mahaen ko nipipa'ading ni Pawlo a somowal i, cli' sa ci Fistus, <<Maapa kiso Pawlo! Maapaay no adihay a fana' iso kiso!>> han ningra.

25Pasowal sa ci Pawlo, <<Tadamaanay a Fistusaw, caay ko maapaay kako. O so'linay a masinanotay ko sowal ako. 26Mafana' kiso o hongti tonini a dmak saka, caay paska kako a somowal tisowanan. So'linay mahapinangto no hongti ko kahaccaccay no dmak, nawhani mafana'ayto ko tamdamdaw tonini a dmadmak. 27Akripa a hongtiaw, paso'lin kiso to pali'ayaway to sowal no Kawas haw? Mafana' kako to nipipaso'lin iso!>> han ningra.

28Pasowal sa ci Akripa ci Pawloan, <<Ano caacaay ka hakowa ko sowal i, ma^deng kako a palamisaKristoay cingraan saan ko harateng iso takowanan saw?>> han ningra.

29Pasowal sa ci Pawlo, <<O nika mamang ato nika adihay no sowal ko mimaanay. O nilongocan ako i Kawas i, o sapilcadaw iso i takowanan. Caay ka kiso a ccay. Halonini a romaroma a mitngilay to sowal ako anini a tamdaw. Nikawrira, aka pilcad to nika palit ako,>> han ningra.

30Itiya i, lowad sato ko hongti ato mikomoday aci Perniki ato kapot nangra a maro'. 31Namiliyas cangra i, sasowasowal sato, <<Awaay ko sakapatay ato sakarofo nonini a tamdaw a raraw,>> saan. 32Pasowal sa ci Akripa ci Fistusan, <<Ano caay pipacakat konini a tamdaw to dmak a milongoc i hongti no Loma i, kona matdalto cingra,>> han ningra.

Currently Selected:

Dmak 26: AMIS2019

Highlight

Copy