Dmak 25

O Pipacakat ni Pawlo to Dmak i Hongti no Loma

1Natomireng ci Fistus a mikowan toya pala, sakatolo a romi'ad i, miliyas cingra to Kaysariya a tayra i Yirusalim. 2Itiya i, pakokoten no kakridan no citodongay to ta'ong ato kakrikridan no Yutaya a niyaro' ci Fistus to dmak ni Pawlo. Ngitangiten nangra cingra, 3to sapido^doaw ningra to harateng nangra a milinah ci Pawloan a patayra i Yirusalim. Onini i, o sapisitalaaw nangra a mipatay ci Pawloan i fatad no lalan. 4Nikawrira, paca'of sa ci Fistus, <<Ira i Kaysariya ci Pawlo a masimaw. O nanarikay kako a tayra itira. 5Orasaka, ano ira ko maan a patlac ni Pawlo i, mamaan papihaklongen i takowanan ko kakrikridan namo a tayra a pakokot to dmak ni Pawlo,>> han ningra.

6Ma^deng falo a romi'ad, ano ^ca mo^tep a romi'ad ko nika itira ni Fistus i cangraan. Ta tayra cingra i Kaysariya. Cila sato a romi'ad i, tireng sa cingra i pisawkitan. Palimo'ot han ningra ko tamdaw a papipasadak ci Pawloan. 7Yo irato ci Pawlo i, likot han noya nai Yirusalimay a Yutaya a tamdaw cingra. Alapakokokokot sa cangra to adihayay a kartengay a raraw ningra. Awaay ko malowacay nangra tonini. 8Nikawrira, pa'ading saan ci Pawlo a somowal, <<Ano pakayniayto i Rikec no Yutaya a tamdaw, ano pakayniayto i Fangcalay Pita'ongan, ano pakayniayto i hongti no Loma i, awaay ko mararaway a dmak ako,>> han ningra.

9Nikawrira, mangalay ci Fistus a makahmek no Yutaya a tamdaw saka, pasowal sa ci Pawloan, <<Mangalay kiso a tayra i Yirusalim a maliclic i ka'ayaw ako to pakayniay tonini a dmak haw?>> han ningra.

10Pasowal sa ci Pawlo, <<O tomirengay kako i pisawkitan no hongti no Loma. Saka, a o i tini kako a maliclic. Awaay ko maan aca a patlac ako i Yutaya a tamdaw. Kafana'anto iso konini. 11Ano ira ko sakapastek ako i patay to nano tatiihay a dmak ako i, caay ka sapiliyasan kako to patay. Nikawrira, ano awaay ko lalngatan no pipakokot nangra to nano dmak ako i, caay ko papatoroden no nimanima kako i cangraan. Pacakaten ako konini a dmak a milongoc i hongti no Loma,>> han ni Pawlo.

12Itiya i, sasowasowal sato ca Fistus ato talicayan ningra a tamdaw. Ta paca'of sa a pasowal ci Pawloan, <<Pacakaten ako konini a dmak a milongoc i hongti no Loma sa kiso. Saka, o tatayra kiso i hongti no Loma,>> han ningra.

O Pitosil ni Fistus to Dmak ni Pawlo i ci Akripaan a Hongti

13Nanoya, mata'lif ko pinapina a romi'ad i, tayra i Kaysariya ci Akripa a hongti aci Perniki a mita'ong a mihamham ci Fistusan. 14Halafin ko nika itira noya tatosaay saka, pasowal han ni Fistus koya hongti to pakayniay ci Pawloan. Sowal sa, <<Ira ko ccay a tamdaw to nirofoanho ni Filis. 15Yo tayra kako i Yirusalim i, pakokot ko kakridan no citodongay to ta'ong ato kalas no niyaro' no Yutaya i takowanan to dmak ni Pawlo. Mingitangit cangra i takowanan to sapipastekaw ako i raraw cingraan. 16Paca'of han ako cangra a somowal, <Ano caho palalitmohen a miliclic ko mapakokotay ato pakokotay i pisawkitan, ano caho pa'ading ko mapakokotay a tamdaw to tireng ningra a somowal i ka'ayaw no pakokotay i, caay ka nga'ay a patorod a mipastek i raraw toya tamdaw saan ko pinangan no dmak niyam o Loma,> han ako. 17Orasaka, yo masa'opo i tini koya pakokotay a tamdaw i, caay panayanayaren ako ko romi'ad. Cila a romi'ad i, tireng sa kako i pisawkitan a papipatayni i pisawkitan toya tamdaw. 18Yo tomireng ko pakokotay a pasowal to dmak ningra i, caay ka matiya o niharatengan ako ko nisowalan nangra a raraw ningra. 19Deng o nika laliyaliyang nangra aci Pawlo to pakayniay i lisin nangra a dmak ato pakayniay i ci Yisan hananay a mapatayay a tamdaw. O miliyaway Cingra a ma'orip saan ci Pawlo a misa'icel a somowal. 20Awaayto ko pinang ako a miharateng tonini a dmak. Saka, licay han ako ci Pawlo, mangalay kiso a tayra i Yirusalim, ta itira a sawkiten. 21Nikawrira, mingitangit ci Pawlo to nika i tinienho kako, ka o hongti no Loma ko mamisawkit saan. Saka, palimo'ot hanto ako a mifo'ot cingra i pirofoan, tangasa i pipatayraan cingraan i hongti no Loma.>>

22Pasowal sa ci Akripa ci Fistusan, <<Mangalay kako a mitngil to sowal noya tamdaw,>> han ningra.

Saka, <<Ano hatira i, anocila sato kiso a mitngil,>> han ni Fistus.

23Cilasato a romi'ad i, ciriko' to kasnengan a riko' no hongti ci Akripa aci Perniki. Kasnengan ko rakat nangra a malahaklong ato tapatapang no sofitay ato kakitakitaan no niyaro' a tayra a micomod i kasa'opoan. Palimo'ot hanto ni Fistus ko tamdaw a papipacomod ci Pawloan. 24Ta pasowal sa ci Fistus, <<Akripa hongtiaw ato kamo o mikapotay a maro' a ma^min, nengnengen. Onini a tamdaw koya nipakokotan no polong no Yutaya a tamdaw i takowanan. Ano i tini ito, ano i Yirusalim ito i, caayto ko papa'oripen cingra, yahananay nangra a micli' konini a tamdaw. 25Awaay a matama ako ko maan aca a sapastek i cingraan i patay a raraw. Nikawrira, mapacakat ningra a milongoc i hongti no Loma konini a dmak saka, kton sato kako to sapatayraaw cingraan. 26Nikawrira, awaay ko ccaccay aca a mahapinangay ako a dmak ningra to malotatiliden ako a patayra i hongti no Loma. Orasaka, pataynien ako cingra i ka'ayaw namo. Kiso Akripa hongti ko cacitodong a miliclic. Ano mahrek kiso a miliclic a mihapinang i, latek ira ko malotatiliden ako a sapatayra. 27Nawhani ano caay po'lacen ko nipakokotan nangra a dmak i, caay ka nga'ay a patayra to marofoay saan ko harateng ako,>> han ningra.

Currently Selected:

Dmak 25: AMIS2019

Highlight

Copy