Dmak 24

Mapakokot no Yutaya a Tamdaw ci Pawlo

1I ikor no lima a romi'ad i, malahaklong ca Ananiyas o sakakaay a citodongay to ta'ong ato papinapina a kalas no niyaro' aci Tirtulus hananay a midamaay a somowal a tayra i Kaysariya. Tayra cangra i mikomoday a pakokot to nano dmak ni Pawlo. 2Yo matahidang ci Pawlo i, pakokot sa ci Tirtulus a somowal,

<<Tadamaanay a mikomoday Filisaw, o nano miso ko sakarihaday niyam. Nano taneng iso ko sakafalic no dmak nonini a kitakit a manga'ay. 3Tada o karahkeran no faloco' niyam ko dmak iso i cowacowa a ma^min. 4Caay ka sapicaraan kami a somowal i tisowanan. Kamoko'en niyam ko sowal saka, hadidi han a mitngil. 5Mahapinang niyam ko nika o katalawan konini a tamdaw. O palowaday to rawraw no i cowacowaay a Yutaya a tamdaw cingra. O kakridan no misaNacaliay a kasakapot cingra. 6Sapipaackan cingra to Fangcalay Pita'ongan saka, rpet han niyam cingra.#24.6 Ira a matilid i katlangay a cudad konini a tosir, Kona do^doen niyam ko rikec a misawkit i cingraan. 7 'Arawhani, tayni ci Lisiyas o tapang no sofitay a mipaci^ci a mi'afas cingraan nai tamiyanan, 8 mipalimo'ot haca cingra to kalopakokotay a tayra i tini i tisowanan. 8Saka, ano liclicen iso konini a tamdaw i, o mamafana' kiso to tatodong no nipipakokot niyam to dmak ningra a ma^min,>> han ningra. 9Patoor sa ko romaroma a Yutaya a tamdaw a pasowal, <<So'linay, hatiraay kora dmak,>> han nangra a pakokot.

O Pipa'ading ni Pawlo to Tireng

10Itiya i, kawih han no mikomoday ci Pawlo a pakasomowal. Saka, pasowal sato ci Pawlo,

<<Mafana' kako to nika halafin iso a mikowan tonini a kitakit. Saka, lipahak kako a pa'ading to tireng ako i ka'ayaw iso. 11Ma^deng kiso a mihapinang to dmak ako. Natayra kako i Yirusalim a mita'ong i, tosaho ko safaw no romi'ad. 12Ano i Fangcalay Pita'onganto, ano i kasa'opoanto a loma' no Yutaya, ano i niyaro'to i, awaayho ko paka'araway to nika laliyang ako ato cima ato niparawraw ako to finawlan. 13O pakayniay i nipipakokot nangra to dmak ako i matini i, awaay ko malowacay nangra a patiri' i tisowanan. 14Nikawrira, mihai kako to ccay. O mitooray kako to pacfaay hananay nangra a pakayraan. Onini i, o pita'ong ako to Kawas no tato'asan niyam. Paso'lin kako to polong no matiliday i Rikec ni Mosi ato nitilidan no pali'ayaway to sowal no Kawas a cudad. 15O pakayniay i nika lomowad no nga'ayay ato tatiihay a tamdaw a ma'orip nai patay a pafaloco'an tona paso'lin cangra to Kawas i, malcaday ato nangra ko pafaloco'an ako. 16Saka, mararid kako a misa'icel to saka^caaw ka toro' no nga'ayay a faloco' ako i ka'ayaw no Kawas ato i ka'ayaw no tamdaw.

17<<Tona caay pinokay kako to pinapi:na a mihcaan saka, minokay kako a tayra i Yirusalim to sapafliaw to sapalada' i finacadan ako ato sapato'ayaaw ako i Kawas. 18Yo midmak kako tonini a mikorac to tireng i, ma'araw nangra kako i Fangcalay Pita'ongan. Itiya i, awaay ko finawlan, awaay ko rawraw. 19Deng o nai Aciyaay a papinapina a Yutaya a tamdaw ko iraay itiya. Ano ira ko maan a papakokoten nangra a raraw ako i, kona cangra ko tatayni i ka'ayaw iso a pakokot. 20Ano ^ca i, papipasowalen konini a tamdaw i matini to nihapinangan nangra a patlac ako yo tomireng kako i ka'ayaw no Lomaocay. 21Yo tomireng kako i ka'ayaw nangra i, deng ccay aca ko namicli'an ako a sowal, <O pakayniay i nika lomowad no tamdaw a ma'orip nai patay ko sakaliclic ako anini i ka'ayaw namo, han ako cangra,> >> han ni Pawlo.

22Talolong ko nika fana' ni Filis tonini a pakayraan. Saka, <<Ano tayni ko tapang no sofitay ci Lisiyas i, itiya kako a mihapinang to dmak namo,>> han ningra cangra a mipahrek to piliclic. 23Ta palimo'oten ningra ko kakridan no sofitay a papisimaw ci Pawloan, aka paliten cingra, aka lalangen ko nipiliso' no widawidang ningra a paini cingraan, han ningra.

I Ka'ayaw ni Filis aci Trusila ci Pawlo

24I ikor no pinapina a romi'ad i, malahaklong ci Filis aci Trusila hananay a Yutaya a fafahi ningra a tayra i Kaysariya. Ocoren ningra ko tamdaw a papitahidang ci Pawloan. Tngilen ningra ko nipipasowal ni Pawlo to pakayniay i paso'lin a miti'er i ci Kristo Yisan. 25Nikawrira, yo pasowal ci Pawlo to pakayniay i mo^celay a dmak ato pi'met to tireng ato aira a pisawkit no Kawas i, matalaw ci Filis. Saka, <<Pinokay i matini. Ano ira ko kanga'ayan ako a romi'ad i, tahidangen haca ako kiso,>> han ningra. 26O romasato, mangalay cingra a mapa'alofo ni Pawlo saka, sacnacna' han ningra a mitahidang ci Pawlo a malalicay.

27Mata'lif ko tosa a mihcaan i, croren ni Porkius Fistus ci Filis a malamikomoday. Mangalay ci Filis a makahmek no Yutaya a tamdaw saka, pararid han ningra ci Pawlo a mirofo.

Currently Selected:

Dmak 24: AMIS2019

Highlight

Copy