Dmak 23

1Pamotek sa ci Pawlo a minengneng to Lomaocay. Sowal sa, <<Salikakaaw, tahanini ko nika nga'ay no faloco' ako ato dmak ako i ka'ayaw no Kawas,>> han ningra. 2Itiya i, sowal han ni Ananiyas o sakakaay a citodongay to ta'ong ko tomirengay i tatihi ni Pawlo, <<Sti'en ko ngoyos ningra,>> han ningra. 3Pasowal sa ci Pawlo ci Ananiyasan, <<Matiya o nisaditan to 'apol a padal#23.3 padal -- o roma i, patih (ka'amis). kiso! O mamapalo no Kawas kiso! O citodongay kiso a mido^do to Rikec a misawkit takowanan i, nawiro pacolien iso ko Rikec a papisti' to tamdaw i takowanan saw?>> han ningra.

4Itiya i, pasowal koya i tatihiay ni Pawlo a tamdaw, <<Milokes kiso to nipatirengan no Kawas a sakakaay a citodongay to ta'ong saw?>> han nangra.

5Pasowal sa ci Pawlo, <<Salikakaaw, caay ka fanafana' kako to nika o sakakaay a citodongay to ta'ong cingra. So'linayto, <Aka pilokes to sowal i mikomoday to finawlan iso a tamdaw,> saan a matilid i Fangcalay Cudad,>> han ningra.

6Itiya i, mahapinang ni Pawlo ko nika iraay ko Satukay a tamdaw, iraay ko Farisay a tamdaw. Saka, cli' sa cingra i pilaocan, <<Salikakaaw, o Farisay a tamdaw kako, o wawa no Farisay a tamdaw kako. O sakaliclic ako anini i, o pakayniay i pafaloco'an niyam to nika o lalomowad ko tamdaw a ma'orip nai patay sanay!>> han ningra.

7Nahaenen ni Pawlo a somowal i, macacoli koya Farisay ato Satukay a tamdaw. Latosa sato koya Lomaocay. 8(Nawhani o Satukay a tamdaw caay paso'lin to kalomowad no tamdaw a ma'orip nai patay ato awaay ko coyoh ato 'adingo, saan. Nikawrira, paso'lin ko Farisay a tamdaw to nika ira nonini a tolo a ma^min.) 9Saka, mangalef a mangalef ko nika rarawraw nangra. Tireng sa ko papinapina a pasifana'ay to Rikec a Farisay a kasakapot. Sa'icel sa a somowal, <<Awaay a matama niyam ko maan a tatiihay nonini a tamdaw! Latek o nisowalan no 'adingo, ano ^ca i, o nisowalan no coyoh cingra!>> han nangra.

10Mangalef a mangalef ko nika cacolicoli nangra. Saka, talaw sato koya tapang no sofitay to sakapcasaw no tireng ni Pawlo. Saka, ocoren ningra ko sofitay ningra a paliklon a papiala nai cangraan ci Pawloan a pacomod i loma' no sofitay.

11Toya dadaya tireng sa ko Tapang i tatihi ni Pawlo a somowal, <<Ka cicdi kiso! O hahaenen o pipawacay iso i Yirusalim to pakayniay i Takowanan ko pipawacay iso i Loma,>> saan.

O Nipisa'adapaw ci Pawloan

12Yo dafak sato i, sakapot sa ko Yutaya a tamdaw, <<Ano caho ka patay ita ci Pawlo i, caay ko kakomaen, caay ko maminanom kita,>> saan ko nipikton nangra to faloco'. 13Oya mikapotay a misa'adapaw#23.13 misa'adapaw -- o roma i, misamamol (ka'amis). a tamdaw i, cisafaw ko spat a polo' a tamdaw. 14Tayra sato cangra i kakridan no citodongay to ta'ong ato kalakalas no niyaro'. Sowal sa, <<Ano caayho ka patay niyam ci Pawlo i, caay ko kakomaen kami to maan aca,>> saan ko nika 'atkak no nipikton niyam to faloco'. 15<<Orasaka, kamo i matini i, kapapadang ato Lomaocay. Samatiyatiya han o mamisongila' a miliclic ci Pawloan ko nipipasowal to tapang no sofitay to sapatayniaw ningra ci Pawloan i tamowanan. Ta yo caho ka tangasa cingra i tamowanan i, patayen niyam cingra,>> han nangra.

16Nikawrira, matngil no wawa no fafahiyan a salikaka ni Pawlo konini a nipisa'adapaw saka, tayra sato cingra i loma' no sofitay a pasowal ci Pawloan. 17Saka, tahidang hanto ni Pawlo ko ccay no kakridan no sofitay a somowal, <<Kriden konini a kapah a tayra i tapang no sofitay. Ira ko sasowalen ningra cingraan,>> han ningra. 18Orasaka, krid hanto noya kakridan no sofitay cingra a tayra i tapang no sofitay. Sowal sa, <<Mitahidang i takowanan koya marofoay ci Pawlo. Kriden konini a kapah a tayra i tapang no sofitay. Nawhani ira ko sasowalen ningra cingraan, han ningra kako. Saka, kriden ako cingra a tayni,>> han ningra.

19Saka, kayat hanto noya tapang no sofitay koya kapah a tayra i awaay ko tamdaw, <<O maan ko sasowalen iso i takowanan?>> han ningra a milicay.

20Itiya i, pasowal sa koya kapah, <<Mahrekto ko Yutaya a tamdaw a mikton to sowal saka, o mamisamatiyatiya cangra o misongila'ay a miliclic ci Pawloan a milongoc i tisowanan ano dafak to sapatayraaw iso ci Pawloan i Pilaocan. 21Nanay aka haydaen iso ko pingitangit nangra. Nawhani cisafaw ko spat a polo' no tamdaw to misitalaay ci Pawloan. Ano caho ka patay ita ci Pawlo i, caay ko kakomaen, caay ko maminanom kita, saan ko pikton nangra to faloco'. Mahrekto cangra a mipatala i matini. Dengto o nipitala to pihai iso,>> han ningra.

22Itiyasato, palimo'ot hanto noya tapang no sofitay koya kapah, <<Aka pasowal i cimacimaan to nipipasowal iso tonini i takowanan,>> han ningra ta papinokay hanto ningra koya kapah.

Mapatorod ci Filisan o Mikomoday ci Pawlo

23Ta tahidang hanto noya tapang no sofitay ko tatosa a kakridan no sofitay. Sowal sa, <<Patalaen ko tosa a so'ot (200) a romakatay a sofitay ato pito a polo' a paka^faay a sofitay ato tosa a so'ot (200) a ci'idocay a sofitay. Anini a dadaya siwa ko toki lomowad kamo a tayra i Kaysariya. 24Patalaen ko malopidakawan ni Pawlo a ^fa. Songila'en ko pipatangasa ci Pawloan i ci Filisan o mikomoday,>> han ningra. 25Ta tiliden no tapang no sofitay ko sapatilid.

26<<Nga'ayho kiso Filis, o mikomoday. Patilid kako ci Klautius Lisiyas i tisowanan. 27Onini a tamdaw i, o nirpetan no Yutaya a tamdaw. Yo mamipatay cangra cingraan i, mafana'to kako to nika o Loma a tamdaw cingra. Saka, krid hanto ako ko sofitay a tayra a pa'orip i cingraan. 28Nao maan ko lalngatan no nipipakokot nangra to pakayniay tonini a tamdaw saan kako, saka, nanoya krid hanto ako cingra a tayra i Pilaocan nangra. 29O lalngatan no nipipakokot nangra i, o pakayniay i nika laliyaliyang nangra to rikec no Yutaya a tamdaw. Awaay a matama ako ko sakapatay ato sakarofo ningra a raraw. 30Nikawrira, ira ko miparatohay i takowanan to nika ira ko misa'adapaway tonini a tamdaw saan. Saka, tangsol han ako a patayra i tisowanan konini a tamdaw. Mapasowalto ako koya pakokotay a tamdaw to sakapipakokotaw nangra i ka'ayaw iso to dmak ningra,>> han ningra a patilid.

31Orasaka, toor hanto no sofitay ko limo'ot ni Lisiyas a mikrid ci Pawloan a patayra i Antipatris toya dadaya. 32Cilasato a romi'ad i, mapaconohto i paka^faay a sofitay ko nipikrid ci Pawloan. Ta nokay sato koya romaroma a sofitay. 33Tahirato i Kaysariya ko paka^faay a sofitay i, pafli han nangra i mikomoday koya tilid. Ta patorod hanto nangra i cingraan ci Pawlo. 34Maharek a miasip ko mikomoday toya tilid i, <<Nai cowaay a niyaro' kiso?>> han ningra a milicay ci Pawlo. Yo mafana'to cingra to nika o Kilikiya a tamdaw cingra i, 35sowal sa, <<Ano tayni ito koya mipakokotay to dmak iso a tamdaw i, itiyato kako a misongila' a mitngil i tisowanan,>> han ningra. Ta palimo'ot hanto ningra ko sofitay a papisimaw i cingraan i loma' ni Hiroti o mikomoday.

Currently Selected:

Dmak 23: AMIS2019

Highlight

Copy