Dmak 27

O Pipakalonan ni Pawlo a Tayra i Loma

1Yo mahapinangto ko sakapakalonanaw niyam a tayra i Itali i, mapatorod ci Pawlo ato romaroma a marofoay i ci Yuliyusan hananay a kakridan no sofitay no Loma. O ccay no misimaway to hongti a sofitay cingra. 2Dakaw sato kami to mamicafer i lilis no riyar no Aciya a lonan no Atramitium a lomowad. Mihaklong i tamiyanan ci Aristarkus hananay a Tisalonika a tamdaw no Makitoniya. 3Cilasato a romi'ad i, micafer kami i Siton. Sanga'ayen ni Yuliyus ko nipidipot ci Pawloan saka, haydaen ningra ko nika tayra ni Pawlo a miliso' to widang ningra ato nipihalhal nangra ci Pawloan. 4Nanitira lomowad kami a pakalonan. Maco'a'ang no fali kami saka, paka'adi'ading sato no Sayprus a kanatal kami a pakalonan. 5Ta ta'lifen niyam ko tatodong no Kilikiya ato Pamfiliya a riyar. Ta micafer kami to Mira no Likiya. 6Matama no kakridan no sofitay itira ko tatayra i Itali a lonan no Aliksantriya saka, padakaw hanto ningra kami itira.

7Matayo ko rakat no lonan niyam to pinapi:na a romi'ad. O nipaci^cian ko sakatangasa niyam i tatodong no Knitus a niyaro'. Maco'a'ang no fali kami saka, caay ka nga'ay a tala'a'ayaw. Saka, pakayra sa kami i tatodong no Salmoni. Paka'adi'ading sa no Kriti a kanatal ko rakat no lonan niyam. 8Lilis han niyam ko lawac noya kanatal a tala'a'ayaw. O nipaci^cian niyam ko sakatahira i Nga'ayay a Pataminaan hananay. Ira i ngata nonini ko Lasiya a niyaro'.

9Halafin ko kaitira no lonan niyam. Mata'lifto ko pisaliwayan a romi'ad no Yutaya a tamdaw saka, kacalemcemanto ko pakariyaray a rakat. Saka, pa'ayaw hanto ni Pawlo 10cangra a pasowal, <<Kamo a ma^min, o kakatalawan ko pakalonan ita a romakat. O aira ko tata'angay a sipon no dafong ato lonan. O romasato, latek halotireng ita a mapatay saan ko harateng ako,>> han ningra. 11Nikawrira, caay pitngil to sowal ni Pawlo koya kakridan no sofitay. O sowal no parakatay to lonan ato cilonanay ko nitngilan ningra. 12Caay ka nga'ay to kasi^nawan konini a pataminaan. Saka, o harateng no 'alomanay a tamdaw i, <<Ano mama^deng, pakalonan kita a tayra i Foinik hananay a pataminaan no Kriti. Nawhani o pasitimotimolay a pasi'ami'amis#27.12 pasitimotimolay a pasi'ami'amis -- ano ^ca i, pasila'ed no wali ato 'amis, pasila'ed no wali ato timol, ko kasalihoc nonini a pataminaan a nengnengen a pasi^tip. Saka, manga'ay kita itira to kasi^nawan,>> saan cangra.

O Nika Faliyos

13Itiya i, friw sato ko safalat. Saka, i matini kita a lomowad saan cangra a ma^min. Saka, kakoy hanto nangra ko 'enor a pakalonan a mililis to lawac no Kriti. 14Nanoya, caho ka halafin i, ira ko <<nai waliay paka'amisay>> hananay a tata'angay a faliyos a pakayni i hadhad a matfo i riyar. 15Haflot hanto no fali ko lonan. Caay pakaco'a'ang to fali a tala'a'ayaw. Saka, pakonira hanto niyam ko nika likid no lonan. 16Tayra kami i 'ading no Kauta hananay a mamangay a kanatal. Itira kami a mipaci^ci a milosimet to mamangay a tamina. 17Pacakaten no palonanay i lonan konini. Faloden nangra to towaso ko tireng no lonan. Matalaw cangra to katalapangtaan no lonan i salawac no Surtis saka, tfad hanto nangra ko fayang no lonan a pakonira to nika likid no lonan. 18Satokinikinih han no faliyos kami. Saka, cilasato a romi'ad i, satapang sato koya palonanay a mifalah to pinaro no lonan. 19Sakatolo a romi'ad i, falahen nangra ko lalosidan no lonan. 20Pinapi:na a romi'ad a awa a ma'araw niyam ko cidal ato fo'is. Mangalef a mangalef koya faliyos a milfa saka, awaayto ko ka'ori'oripan niyam a pafaloco'an.

21Halafin ko nika ^ca ka komaen niyam. Itiya i, tireng sa ci Pawlo a pasowal i cangraan, <<Kamo a ma^min, ano mitngilay kamo to sowal ako a caay piliyas to Kriti i, kona caay ka hatini ko pades ato sipon ita. 22Pasowal kako i matini, sanga'ayen ko faloco' namo. Awaay ko mamapatay ita to ccaccay aca. Deng o lonan a ccay ko mamalasawad. 23Nawhani ira i dadaya a tomireng i ka'ayaw ako ko coyoh no nita'ongan ako a Kawas. 24Sowal sa, <Pawloaw, aka ka talaw. Caay ka ^ca ka o tatomireng kiso i ka'ayaw no hongti no Loma. Sini'ada ko Kawas to kapot iso a madakaw to lonan. Saka, o papa'oripen Ningra kamo a ma^min a miadahay, saan i takowanan.> 25Orasaka, aka ka toled kamo a ma^min. Nawhani caay ka ^ca ka do^do ko nisowalan Ningra i takowanan saan ko pipaso'lin ako to Kawas. 26Nikawrira, caay ka ^ca ka o tatalahkal kita to i cowaay a kanatal,>> han ningra cangra.

27Sakaspat no safaw no dadaya yo malikid kami i Atriya hananay a riyar to tnok no lafii i, mato mingataay to i cowaay a hkal a haratengen no palonanay. 28Saka, tanam han nangra a mifakciw ko talolong no riyar i, tosa a polo' ko kongce. Tala'ayaw to mamang, fakciw han haca nangra i, lima ko safaw ko kongce. 29Matalaw cangra to saka tala'ongcoyaw no lonan saka, tfad han nangra ko spat a 'enor i kaikor. Ta tala han nangra ko nika ta^ngad. 30O sapilaliwaw noya palonanay saka, samato mitfaday sa to 'enor cangra i ka'ayaw no tamina. 'Arawhani, o nipi^pod nangra i riyar to mamangay a tamina ko dmak nangra. 31Orasaka, sowal han ni Pawlo ko kakridan no sofitay ato sofitay ningra, <<Ano caay ka i tini ito i lonan cangra o palonanay i, caay ko mamapa'orip kamo,>> han ningra. 32Saka, kton hanto no sofitay ko ka^red noya mamangay a tamina, pakonira hanto nangra ko nika likid nira.

33Yo sakata^ngadanto ko dafak i, pa'icelen ni Pawlo cangra to sakakomaenaw nangra a ma^min. Sowal sa, <<Spatto ko safaw a romi'ad kamo a mihadidi a caay ka komaen to maan aca. 34Saka, pa'icel kako i tamowanan. Kakomaen kamo. Nawhani o saka'orip namo konini. Caay ko mamalasawad ko ccaccay aca a fafokesan no fongoh namo,>> han ningra. 35Mahrek a somowal cingra i, tatoy sa to ^pang a mikansiya to Kawas i ka'ayaw no 'alomanay a tamdaw ta pcih sa to ^pang cingra a komaen. 36Mapa'icelto cangra a ma^min saka, paytmek sato cangra a komaen. 37O polong niyam o i lonanay i, tosa a so'ot pito a polo' ira ko ^nem (276) a tamdaw. 38Yo mafcolto a ma^min ko tamdamdaw i, falah hanto nangra ko ^mi i riyar a misakahmaw to lonan.

O Nika Tastas no Lonan

39Yo ta^ngadto i, ma'araw no palonanay ko kafokilan nangra a kasalihoc itira, nikawrira ma'araw nangra ira ko tafok i lilis no riyar, ta pacakataw ita itira ko lonan ita saan cangra. 40Yo mikton cangra to 'enor a mifalah i riyar i, itiya cangra a mitdal to safalod to sawihawih ta pacakat han nangra ko i ka'ayaway a fayang a pahalhal to fali ta pasayra sa i citafokay a patala'ayaw to lonan. 41Nikawrira, matatodong no lonan ko kalalitmohan no kalidkid a masataporoay a tafok saka, tahacanger itira. Co^nek sa i tafok ko ka'ayaw noya lonan saka, caayto ka dadmak koya lonan. Mastol no tata'angay a taplik ko kaikor nira. Saka, tastas sato ko kaikor noya lonan.

42To saka^caaw ka pidangoy noya marofoay a milaliw saka, patayaw ita cangra saan ko kasasowasowal no sofitay. 43Nikawrira, sapa'oripan ci Pawloan ko kakridan no sofitay saka, lalang han ningra konini a dmak. Ta sowal sa, <<Kamo o mafana'ay a midangoy i, i 'ayaw a mihitfo i riyar a midangoy a talahkal. 44Ta o 'osaw a tamdamdaw i, kacitahadoyan to sapad ato maamaan no lonan a talahkal,>> han ningra. Saka, mahaen ko nika mapa'orip kami a talahkal a ma^min.

Currently Selected:

Dmak 27: AMIS2019

Highlight

Copy