Dmak 19

O Nika itira ni Pawlo i Ifiso

1Yo i tiraho i Korinto ci Apolos i, pakahadhad ci Pawlo a tayra i Ifiso. Malitmoh ningra itira ko papinapina a nisawawaan. 2Licayen ni Pawlo cangra, <<Yo paso'lin kamo ci Kristoan i, milayapayto kamo to Fangcalay 'Adingo haw?>> han ningra.

Paca'of sa cangra, <<Cowa. Caho ka tngitngil niyam ko nika ira no Fangcalay 'Adingo,>> han nangra.

3Sowal sa ci Pawlo, <<Ano hatira i, o maan a ino'an ko nilayapan namo saw?>> han ningra i.

<<O ni Yohani a ino',>> han nangra a paca'of.

4Saka, pasowal sa ci Pawlo, <<O saki mipasasiyoray to faloco' a pasayni i Kawas a tamdaw ko nipipaino' ni Yohani. O paratohay cingra to sapipaso'linaw no finawlan to aira i ikor ningra a tamdaw ci Yis,>> han ningra.

5Mitngil cangra tonini i, mapaino' cangra pakayni i ngangan no Tapang ci Yis. 6Yo mikapa ci Pawlo i cangraan i, ma^pod i cangraan ko Fangcalay 'Adingo. Saka, pasowal cangra to no 'Adingoan a sowal. O romasato, pakimad cangra to sowal no Kawas. 7O polong nangra i, ma^deng tosa ko safaw cangra.

8Nanoya, micomod i kasa'opoan a loma' no Yutaya a tamdaw ci Pawlo. Tolo a folad cingra a pakimad to sowal no Kawas itira. Caay paska cingra a pasowal to pakayniay i Kitakit no Kawas a malaliyaliyang ato Yutaya a tamdaw a misolot to faloco' nangra. 9Nikawrira, 'atkak ko faloco' no romaroma nangra a caay paso'lin. Lokesen nangra konini a pakayraan i ka'ayaw no finawlan. Saka, papihaklongen ni Pawlo i cingraan ko fa^lohay a nisawawaan a papiliyas toya kasa'opoan a loma'. Itira sato cingra i pakimadan ni Tiranus to romi'ami'ad a mikrid to kalalicalicay. 10Tosa a mihca a mararid konini a dmak ningra. Saka, matngil no i tiraay i Aciya a Yutaya ato Krisiya a tamdaw a ma^min ko sowal no Tapang.

O Wawa ni Skifa

11Pakaynien no Kawas ci Pawloan ko nipidmak to tadamaanay a kafahka'an a dmak. 12Ano alaen ko sasifin ato pi'ayaw#19.12 pi'ayaw -- o roma i, ta'ayawan (katimol), pa'ayaw (Cangping), tanafayan (sawali). ni Pawlo a mitli i adadaay i, maadah ko adadaay, milaliw ko palafoay. 13Itiya i, ira ko papinapinaay a mirakatay to niyaroaro' a cikawasay a Yutaya a tamdaw a mifahfahay to palafoay. Tanamen nangra a micaliw ko ngangan no Tapang ci Yis a pasowal i maaro'ay no palafoay a tamdaw. <<Pakaynien ako i nipatnakan ni Pawlo a tamdaw ci Yis ko nipipalimo'ot i tamowanan,>> han nangra. 14Onini a mihaenay i, o papitoay a wawa ni Skifa hananay a kakridan no citodongay to ta'ong no Yutaya a tamdaw.

15Paca'of sa koya palafoay i cangraan, <<Mafana'ay kako ci Yisan. Mafana'ay kako ci Pawloan. Nikawrira, o maan kamo saw?>> han nira.

16Ta cakod sato i cangraan koya maaro'ay no palafoay. 'Nec han ningra cangra a pakakawang. Saka, tanodoka' sato cangra a milaliw toya loma'. 17Mafana' ko i tiraay i Ifiso a Yutaya ato Krisiya a tamdaw a ma^min tonini a dmak saka, matalaw cangra a ma^min. Mangalef ko pipahmek no tamdaw to Tapang ci Yisan. 18Tayra sato ko 'alomanay a mitooray ci Kristoan a tamdaw a patalahkal to nano dmak nangra. 19Patayraen no 'alomanay a cikawasay ko cudad nangra a misa'opo. Todohen nangra a mifalah konini i ka'ayaw no 'alomanay. Sa'osi han nangra ko 'aca nonini a cudad i, lima a 'ofad (50,000) a rimood no ^kim. 20Mahaen ko nika ci'icel a ci'icel ko sowal no Tapang a matnak.

O Rawraw no Finawlan i Ifiso

21I ikor nonini a dmak i, mikton to faloco' ci Pawlo#19.21 mikton to faloco' ci Pawlo -- ano ^ca i, mapafaloco' no Fangcalay 'Adingo ci Pawlo ta mikton. a somowal, <<Pakayra kako i Makitoniya ato Akaya a tayra i Yirusalim. Ta ikor no nika tayra ako i, caay ka ^ca tayra kako i Loma,>> saan. 22Ocoren ningra ko tatosa no padamaay cingraan ci Timoti aci Irastus a patayra i Makitoniya. Itira saho i Aciya ci Pawlo a pacarcar.

23Itiya i, ira a mapalowad i Ifiso a niyaro' ko tata'angay a rawraw to pakayniay i mitooray to Tapang a pakayraan. 24Ira ci Timitrius hananay a misa^kimay a tamdaw. Sanga'en ningra to ^kim ko faco no pita'ongan ci Artimisan a fafahiyan a kawas. Onini a tayal ko pa^tanay to matayalay ningra. 25Sa'opo han ningra ko matayalay ningra ato romaroma a malcaday ko tayal a tamdaw. Sowal sa, <<Mafana' kita to nika o sakaci^tan ita konini a tayal ita. 26Mafana' kamo, matngil namo ko dmak ni Pawlo. O sowal ningra i, <caay ko Kawas ko nisanga'an no tamdaw a kawakawas> saan cingra a misawi to faloco' no 'alomanay a tamdamdaw. O Ifiso a ccay a mimaan. O polongto no Aciya a masawi ningra. 27Ano hatira i, caay konini a tayal ita a ccay ko mamasipon. Latek halopita'ongan toya tadamaanay a fafahiyan a kawas ci Artimisan a caayto ko mamasikol. Hato mamalasawadto ko nika tadamaan noya nita'ongan no polong no Aciya ato polong no hkal a tadamaanay a fafahiyan a kawas,>> han ningra.

28Mitngil ko tamdamdaw tonini i, tata'ang ko kter nangra. Cli' sa, <<O satadamaanay i tini i Ifiso ci Artimis!>> saan. 29Saka, rarawraw sato ko finawlan no niyaro'. Rpet hanto no finawlan ko haklong ni Pawlo a romakat a Makitoniya a tamdaw ci Kayus aci Aristarkus. Safleng sato cangra a tayra i piki'arawan. 30Sapiraodan ci Pawlo toya finawlan, nikawrira, caay haydaen no nisawawaan. 31Haloya i Aciyaay a mikomoday a widawidang ni Pawlo a miocor to pakarongay a papilalang ci Pawloan to saka^caaw ka paci^ci ningra a tayra i piki'arawan. 32Nanoya, rarawraw saan koya masa'opoay. Masasiromaroma ko picli' nangra. Onini i, o nika fokil no 'alomanay to tatodong no nika sa'opo nangra. 33Itiyasato, ckrohen no Yutaya a tamdaw ci Aliksantor a patala'a'ayaw. Saka, latek onini a tamdaw ko lalngatan nonini a dmak saan ko finawlan. Saka, kawih sa ci Aliksantor to kamay a sapasowalan to finawlan a pa'ading to tireng. 34Nikawrira, yo mahapinang nangra ko nika o Yutaya a tamdaw cingra i, laccay sato cangra a pangiha', <<O satadamaanay i tini i Ifiso ci Artimis!>> saan cangra a mararid a micli' to tosa a tatokian.

35Itiya i, pakatomrep hanto no citodongay a mitiliday no niyaro' ko finawlan a somowal, <<Kita o Ifiso a tamdaw, cimaho ko mafokilay ita to nika kita o Ifiso a niyaro' ko misimaway to tadamaanay a kawas ci Artimisan atoya matfaday nai kakarayan a faco no tireng nira a fokloh saw? 36Awaay ko pakomangahay tonini. Orasaka, katomrepto kamo. Akato patdo to dmak. 37Oya nikidkidan namo a tamdaw a patayni i, caay ko mitakaway to maamaan no pita'ongan, caay ko milokesay to fafahiyan a kawas ita. 38Orasaka, ano ira ko maan a sasowalen ni Timitrius ato kapot ningra a matayalay to pakayniay i cimaanan i, ira ko pisawkitan a romi'ad. Ira ko mikomoday itira. Saka, kaitira a masasipakokot kamo. 39Ano iraho ko maan a lalongocen namo i, o papasadaken i pilaocan no lomaocay konini a mihapinang. 40Pakayniay tonini a rarawraw anini i, o cacisikining kita a maliclic. O caayay katama a ma^min konini a kararawraw, awaay haca ko sapasowal ita to o manan ko lalngatan,>> 41han ningra ko sowal a paliwasak toya masa'opoay.

Currently Selected:

Dmak 19: AMIS2019

Highlight

Copy