Dmak 20

O Rakat ni Pawlo a Tayra i Makitoniya ato Krisiya

1Yo mahrekto koya rawraw i, tahidangen ni Pawlo ko nisawawaan a misa'opo a pa'icel. Parikor sato cingra a somowal i cangraan ta lowad sato a tayra i Makitoniya. 2Rakaten ningra ko i tiraay a pala. Adihay ko nipipa'icel ningra to salikaka ta tayra sato i Krisiya. 3Tolo a folad ci Pawlo itira. Yo sakatayraan cingra i Siriya a pakalonan i, mahapinang ningra ko nika ira ko misa'adapaway i cingraan a Yutaya a tamdaw. Saka, sarocod sa ko faloco' ningra to sapakayraaw i Makitoniya a minokay. 4Ira a mihaklong cingraan ko wawa ni Pirus ci Sopater no Piriya ato tatosaay a Tisalonika a tamdaw ci Aristarkus aci Sikuntus ato ci Kayus no Tirpi aci Timoti ato nai Aciyaay a tamdaw ci Tikikus aci Trofimus. 5I 'ayaw cangra a lomowad. Tala han nangra kami i Troas. 6Yo mahrekto ko Ka^caan Pipatamod to ^Pang a Lisin i, pakalonan kami nai Filipi. Lima a romi'ad ta tahira kami i Troas a malalitmoh ato cangra. Pito a romi'ad kami itira.

O Saikoray a Piliso' ni Pawlo to Troas

7I kalafian to Pasla'an a Romi'ad#20.7 I kalafian to Pasla'an a Romi'ad -- ano ^ca i, i kalafian to pilipayan a romi'ad. masa'opo kami a mitahka. Itiya i, o lalomowad ci Pawlo to cila a romi'ad. Saka, salafii sa cingra a pakimad i 'alomanay. 8Adihay ko dawdaw noya tongroh a kasa'opoan niyam a loma'. 9Ira a maro' i sasingaran ci Yutikus hananay a kapah. Halafin ko sowal ni Pawlo saka, tokatok sato cingra. Marda' cingra a mafoti' saka, tfad sa cingra nai sakatolo a tongroh no loma'. Palowad han i, mapatayayto cingra. 10Nikawrira, ^pod sato ci Pawlo a tayra. Hinefa han ningra koya mapatayay a mitakec. <<Aka ka rawraw ko faloco' namo. Ma'oripayho cingra!>> han ningra cangra. 11Ta cakat sato cangra. Pcih sato cangra to ^pang a komaen. Tangasa i kata^ngadan ko nika halafin no caciyaw nangra ta liyas sato ci Pawlo. 12Ta krid hanto nangra koya ma'oripayto a kapah a patayra i loma' ningra. Saka, tadamahinom ko faloco' no 'alomanay.

Pakalonan nai Troas Tangasa i Militus

13Itiya i, <<Pakahadhad kako a romakat a tayra i Asos,>> saan ci Pawlo a mikton to sowal i tamiyanan. Saka, i 'ayaw kami a pakalonan a tayra i Asos. Ta o a itira i Asos kami a padakaw ci Pawloan i lonan. 14Saka, yo malalitmohto kami aci Pawlo i Asos i, padakaw hanto niyam i lonan cingra a tayra i Mitilini. 15Nanitira lomowad ko lonan niyam. Saka tosa a romi'ad i, tahira to i ka'ayaway no Kiyos a lawac. Sakatolo a romi'ad i, micafer i Samos. Sakaspat a romi'ad i, tahirato i Militus. 16To saka^caaw ka halafin ni Pawlo i Aciya saka, caay ko mamicafer kako i Ifiso saan ci Pawlo a mikton to faloco'. Nawhani makalah cingra to sakatayraaw i Yirusalim. Nanay matakop ako ko Pisalisinan to saka Lima a Polo' a romi'ad o sanay ningra. Saka, makalah ko rakat ningra.

O Pipaikor ni Pawlo to Sowal

17Ocoren ni Pawlo ko pakarongay nai Militus a patayra i Ifiso a papitahidang to ciwlo no kiwkay. 18Yo irato cangra i, pasowal sa ci Pawlo, <<Nai pisatapangan ako a tayni i tini i Aciya tahanini i, mafana' kamo to nika masamaan ko nipikapot ako i tamowanan. 19Sapo^neren ako ko faloco', talalosa' kako. Pakayni i nipisa'adapaw no Yutaya a tamdaw to tireng ako ko nipilifet ako to masamaamaanay a pades a matayal to no Tapang. 20Ano sakaci^poc namo i, caay paska kako a pasowal a pasifana' i tamowanan i kapolongan a sa'opo ano ^ca i, i pailomaloma' namo. 21Ano o Yutayato a tamdaw, ano o romato a finacadan i, songila'en ako a palimo'ot to sakasiyor no faloco' nangra, a pasayra i Kawas a papiti'er to Tapang ita ci Yisan. 22Sapitooraw to pikrid no Fangcalay 'Adingo ko faloco' ako saka, o tatayra kako i Yirusalim. Ano o maan ko aira a dmak ako itira i, caay ka fana' kako. 23O kafana'an ako i, deng o nipipahapinang no Fangcalay 'Adingo i takowanan i kasaniyaroaro' to nika, O mamarofo ato o mamapades kiso, saan i takowanan. 24Ano malahciayto ako ko dado^doen ako a tatayalen ato nipatorodan no Tapang ci Yis i takowanan a tayal a pawacay to Nga'ayay Ratoh to pakayniay i mikomi no Kawas i, awaayto ko limlamla ako to 'orip ako to mamamamang aca.

25<<Nao mirakatay kako i tamowanan a patnak to pakayniay i pikowan no Kawas. Ikor nonini i, caayto ko mamiliyaw kamo a ma^min a paka'araw to pising ako saan ko nika fana' ako. 26Orasaka, songila'en ako a somowal kamo anini, ano matkop no Kawas ko cima namo i, awaay ko raraw ako. 27Nawhani awaayto ko 'osaw ako a mipakafana' i tamowanan to nafaloco'an no Kawas a ma^min. 28Orasaka, na'onen ko tireng namo. Haratengen ko masaflaway a siri namo. Nawhani o nipatirengan no Fangcalay 'Adingo kamo a palamamidipot cangraan. Saka, dipoten ko nipatirengan no Kawas a kiwkay, oya nano nipalanotirenganto no Kawas a sa'opo pakayni i nika patay no Wawa Ningra.#20.28 pakayni i nika patay no Wawa Ningra -- ano ^ca i, pakayni i nika patay Ningra. 29Mafana' kako to nika i ikor no nipiliyas ako i, o aira a micomod i tamowanan ko mari'angay a oles a miforifor to masaflaway a siri. 30O aira i tamowanan ko pasowalay to ningra a niharatengan a masamaamaanay a dmak to sapikayhidaw to nisawawaan a papitoor i cangraan. 31Orasaka, kapalal kamo. Haratengen ko nika rarid ako a talalosa' a palimo'ot i tamowanan o kahaccaccay to dadaya to romi'ad to tolo a mihcaan.

32<<I matini sato i, o Kawas ato sowal Ningra to pakayniay i mikomi Ningra ko mamidipot tamowanan. Nawhani onini a sowal ko mipalatamdamdaway ato papikapotay tamowanan i nisafangcalan no Kawas a tamdaw a mipalmed. 33Caay ka 'anof kako to ^kim ato tada^kim ato riko' no nimanima. 34Mafana' kamo, kako ko matayalay to saka'orip ako ato saka'orip no mikapotay i takowanan. 35Pakaynien ako i masamaamaanay a dmak ko nipipahapinang i tamowanan to nika o hahaenen ita a matayal a mipadama ko rarimaay a tamdaw. O romasato, o haharatengen ita koya sowal no Tapang ci Yis toya, <Ikaka no nika lmed no milayapay ko nika lmed no mipafliay,> sanay,>> han ni Pawlo.

36Mahrek ci Pawlo a pasowal i, pitosor sato cangra a ma^min a mitolon. 37Alatangitangic sa cangra a ma^min a mitakec a micocop ci Pawloan. 38Oya, <<Caayto ko mamiliyaw kamo a paka'araw to pising ako,>> sanay a sowal ningra ko tadakararoman nangra. Nanoya, patangasaen nangra ci Pawlo i tamina a mipatono.

Currently Selected:

Dmak 20: AMIS2019

Highlight

Copy