Dmak 18

O Pipatnak i Korinto

1Nanoya, liyas hanto ni Pawlo ko Atin a tayra i Korinto. 2Malitmoh ningra itira ci Akuila hananay a i Pontusay a hofocen a Yutaya a tamdaw ato fafahi ningra ci Priskila. Saka, tayra sato ci Pawlo i cangraan. O fa^lohayho a nika folaw nangra nai Itali. Nawhani mapalimo'ot ni Klautius a hongti ko polong no Yutaya a tamdaw a papiliyas to Loma. 3Malcaday a o misakopangay ko tayal nangra saka, itira sato ci Pawlo i loma' nangra a mikapot a matayal. 4To paslasla'an a romi'ad i, malalicalicay ci Pawlo ato i tiraay a tamdaw i kasa'opoan a loma' no Yutaya a tamdaw. Soloten ni Pawlo ko faloco' no Yutaya ato Krisiya a tamdaw a papipaso'lin.

5Yo tahira ca Silas aci Timoti nai Makitoniya i, sarocod sato ci Pawlo a pasifana' to sowal no Kawas. O Kristo ci Yis saan cingra a pahapinang i Yutaya a tamdaw a somowal. 6Nikawrira, pacolien nangra ci Pawlo a milokes a somowal. Saka, fihfih han ni Pawlo ko riko' ningra. Sowal sa, <<Ano matkop kamo i, kamo ko cacitodong to raraw namo! Awaay ko raraw ako. I ikor nonini i, o tatayrato kako i roma a finacadan,>> han ningra. 7Saka, liyas sato ci Pawlo itira a tayra i loma' ni Titius Yustus hananay a mita'ongay to Kawas a roma a finacadan. I tatihi no kasa'opoan a loma' ko loma' ningra. 8O citodongay to kasa'opoan a kakridan ci Krispus. Paso'lin to Tapang cingra ato paro no loma' ningra. 'Aloman ko romaroma a Korinto a tamdaw a mitngil ta paso'lin cangra ta mapaino'.

9Yo ccay a dadaya ma'araw ni Pawlo i mapolosi ko Tapang. Sowal sa ko Tapang, <<Aka ka talaw. Kasomowal. Aka ka tomrep. 10Nawhani mikapot Kako tisowanan. Awaay ko mamikari'ang i tisowanan. Nawhani ira i tini tonini a niyaro' ko 'alomanay a finawlan Ako,>> saan. 11Saka, ccay ira ko pangkiw no mihcaan ko nika itira ni Pawlo a pasifana' i cangraan to sowal no Kawas.

12Nikawrira, yo ci Kalioho ko mikomoday to Akaya i, masa'opo ko Yutaya a tamdaw a mipacoli ci Pawloan. Rpet han nangra cingra a mitaroh a patayra i pisawkitan. 13Sowal sa cangra a pakokot, <<Papiliyangen nonini a tamdaw ko finawlan to rikec a papita'ong to Kawas,>> han nangra.

14Yo sakasomowalan ci Pawlo i, pasowal sa ci Kalio i cangraan o Yutaya a tamdaw, <<Ano ira ko patlac ato tata'angay a raraw i, kona kako ko cacitodong a mihapinang to pipakokot namo. 15Nikawrira, o pakayniay aca i sowal ato ngangan to matiliday i rikec namo konini a dmak saka, kamo ko cacitodong a milosimet tonini a dmak. Na'ay kako a misawkit to matiniay a dmak!>> han ningra. 16Saka, laplap hanto ni Kalio cangra nai pisawkitan. 17Rpet hanto no 'alomanay a tamdaw ci Sostinis o citodongay to kasa'opoan a kakridan a misti' i ka'ayaw no pisawkitan. Nikawrira, caay pikihakihar ci Kalio tonini a dmak.

O Pinokay ni Pawlo i Antiyok

18Nanoya, halafin ci Pawlo itira. Ta liyas sato cingra to salikaka. Mihaklong ca Priskila aci Akuila ci Pawloan. Ira ko niktonan no faloco' ni Pawlo i ka'ayaw no Kawas saka, pa'is'is sato cingra to fokes ningra i Kinkriya. Ta pakalonan sato cangra a tayra i Siriya. 19Yo tahira cangra i Ifiso i, siday han ni Pawlo ca Priskila aci Akuila itira. Ta micomod cingra i kasa'opoan a loma' no Yutaya a tamdaw a malaliyang ato Yutaya a tamdaw. 20Ngitangiten nangra cingra to sakahalafinaw ningra itira. Nikawrira, caay pihai cingra. 21Parikor han ningra cangra a somowal, <<Ano o nafaloco'an no Kawas, o mamiliyawho kako a tayni tamowanan,>> han ningra. Ta liyas sato cingra to Ifiso a pakalonan.

22Nanoya, tahirato cingra i Kaysariya. Ta tayra i Yirusalim a miliso' to kiwkay. Ta tayra cingra i Antiyok. 23Pacarcar sa cingra itira to pinapina a romi'ad ta lomowad cingra a mirakat to Kalatiya ato Frikiya a pala a pa'icel to polong no nisawawaan.

O Pipatnak ni Apolos i Ifiso ato Korinto

24Ira a tayra i Ifiso ci Apolos hananay a makimaday a Yutaya a tamdaw. O i Aliksantriyaay a hofocen cingra. Tada o mafana'ay cingra to Fangcalay Cudad. 25I tini i mitoro'an no Tapang a lalan i, o matanengayto ko pinanam ningra, o marokrokay haca ko faloco', mararid a masongila' ko nipipasifana' ningra i tamdaw to pakayniay i ci Yisan. Nikawrira, deng o nipipaino' ni Yohani ko kafana'an ningra. 26Caay paska ci Apolos a pasowal a pakimad i kasa'opoan a loma' no Yutaya a tamdaw. Matngil ni Priskila aci Akuila konini i, tahidang han nangra cingra a mikrid a patayra i loma' nangra. Ta songila'en nangra a mipakafana' ci Apolos to so'linay a dmak no mitooray to Kawas. 27Sakatayraan i Akaya ci Apolos. Saka, padamaen no Ifisoay a salikaka cingra. Patiliden nangra ko i tiraay i Akaya a nisawawaan a papihamham cingraan. Tahira cingra i, tata'ang ko nipipadama ningra to i tiraay a malmeday a mitooray ci Kristoan. 28Nawhani ci'icel ko pipasowal ni Apolos to Yutaya a tamdaw a malaliyang i ka'ayaw no finawlan. Pakaynien ningra i Fangcalay Cudad ko nipipahapinang to nika o Kristo ci Yis. Saka, malowidto ningra ko Yutaya a tamdaw.

Currently Selected:

Dmak 18: AMIS2019

Highlight

Copy