Hoixgara 21

1Egi herena wakitujewianaga hageja egi patire‐hawira, rojaxji Koos‐eja hagiwina, egi haininegi Rhodes‐eja hagiwina egi eja hakarawira Patara‐eja hagiwina.

2Egi eja waj hisha hiaewina Phenikiara howakere hikorohorna, hijomianagwina egi hakarawina.

3Egi jaja Kiprusra hajhawira egi Siria‐eja wawakarawina Kiprusra hoirajge hawireginank wawaikarawina egi Tirus‐eja unina, eja wajra ankijuna.

4Egi eja wironagra hiaewira, hambra shagowiha eja hipushawina. E Paulus wagairena Naxirag hiu, inke Jerusalem‐eja howaranikje.

5Egi jaja hambnanka wawaishibwira, wakitujawina egi khuwina. Egi khuwira hinkishu hahurawina hijawi wahirera egi ninkjang warninera wakarakishu jhinag jangeja hipa hajirena. Egi nijejeja huporo‐himianagwina egi hagikarajwina.

6Egi jaja hiakikaragi dushjawira waj‐eja homianagwina, egi jhira hakja howakarairena.

7Egi jaja Tirus‐eja hikiwarera wakaraishibwira Ptolomais‐eja hakiriwina, egi wakhinubwira waiakaragiwina egi hambisha wakishu hipushawina.

8Egi haininegi Paulus egi jarnaga wakishunanka wakishu hakarawina egi Kesarea‐eja hagiwina, egi Philip Ewangelist hisha herera hojhieja wakawawina, e wishagowina hisha herena egi hakishu hipushawina.

9Egi wang she‐e hinug wajegra jopiwi hinughina, e prophet‐nankshana.

10Egi hamb roha eja hipushawina, Judea‐eja prophet hisha howajina Agabus higairera.

11Egi jaja hiraijiwira, Paulus hipirag harnira russana, egi nab egi si warnira wakurusgijshana egi wena: Naxirag Wakanjangra deshesge ena: Shesgekjanena Jerusalem‐eja Judnanka wangjane hipirag de‐e harnira hirusgij‐hirekjaneshe, egi hirarujeja herera nab warnineja horushjane‐hirekjanena.

12Egi jaja washa de‐e naxguwina, ne‐winewianaga egi jarnaga eja hereaka inke Jerusalem‐eja howaranikje hagitawina.

13Egi Paulus horniharna: Jagu sh’uwingaja raxaxwishe egi najge wojhi hinawi? Hauna‐ianjena inke rusgij hierashana eshi shige jekjanena Jerusalem‐eja Hirukanara Jesus rash harnira hawau.

14Egi jaja inke taxurugwinira tashjawina wairena: Hirukanara woshga harnira e unkjanegaja.

15Egi hambnanka hageja wak’ira waheak’uwina egi Jerusalem‐eja wawatawina.

16Egi shige wironagra hota hinkishu harairawina Kesarea‐eja here, egi Mnason higairera Kiprus‐eja hereisha, wironag shag hisha herena, eja hinihahirawina, e hakishu hajhikjawige.

17Egi jaja Jerusalem‐eja hahiwira wakhinubwira wogishawa hinus‐hirawina.

18Egi haininegi Paulus Jakobga‐eja hinkishu hiwina, egi xetera harnaj hijarnankshana.

19Egi jaja wawikaragi rushjara, harnaj hirowajgus wawogiragshana Maura jagu hirarujeja herera wagiuna, wore harnira hiu.

20Egi jaja naxguinegi, Hirukanara rajankhirena, egi wagairena: Hikhinubwira hashjarna, hogihixete jarnaga Judra harnaxguangra egi harnaj woehira phi‐hina’ixjinankshana.

21Hungirag‐hirawina horninag hirena Judra harnaj washa waragigusgi, jarnaga hirarujeja herera horoghireja unankhi, Mosesga t’unairekje wawiragegi wa’sheshe, ninkjangnig warninera inke wamajhe hiranikje, inke shige woshgara e hiraruxe uinanikje.

22Jasgekjaneshe? Worohana stoiregi phinana, naxguinekjena rakirira.

23Esge jagu hinigawire une, wangra jop harniwira, e washa manajnankshana.

24She‐e warusge wakishu phinkik’une egi woirowera hirowe‐wagigiaje najura wagirujgis‐hirekjena egi harnaj hiperes‐hirekjena washa jagu hinigaire wawogirag‐hiregi, inke shesgarnira, eshi nexji nishge hixgara phi‐rarajera egi woehira phi‐rarajera.

25Egi hirarujeja herera hiwawagawina, jarnaga harnaxgura, wawagax hiwagiuwina egi hiwauwina, inke shesge washa uinanikje, she‐eshana washa mau‐kik’u nabhigiruxajhire hinakewe khinekje, egi wa‐i, egi wanoijge doxiorushga russag egi hikikshaksha hinakewe khinekjege.

26Egi Paulus wangnanka warussana egi haininegi phinkik’u wakishu una egi wohokhu‐hojhixeteja hokewena egi horagshana hamb hophinkik’ura harnaj erehinihekjanegi jarnagananka nabhiruxajra harnaj hishashana nabhiruxaj‐hiregi epa.

27Egi jaja hamb hishagowira jowe harnaj herenagaja, Judra Asia‐eja howajiregi jaja Paulus wohokhu‐hojhixeteja hajairegi wankshigra harnaj warapuru‐hirena egi harukos‐hirena.

28Uwainena: Israel wankshigra hingijirawire, wang de‐e herena, e higu wankshig hajinja herera wagigusjena wankshig de‐e wakhirajena egi woehira egi jhi de‐e. Egi hiraijera wauna Hellenistra hishge wohokhu‐hojhixeteregi harni‐wokewena, egi jhi wakanjank de‐e shishig‐hirena.

29Egi jorni jhinag‐degi Trophimus hakishu unjau hajairena Ephesus wankshig hisha herena. E Paulus wohokhu‐hojhixeteregi harni‐hokeweguni hirairena.

30Egi jhinaganaka harnaj hixgana egi wankshigra nang‐hajire stoirena, egi Paulus rus‐hirena egi wohokhu‐hojhixete jangeja horutirena, egi higuana jhirobra wawornassairena.

31Egi jaja d’ehi hikorohoiregaja, manape hornihera hung xete harninera woragra hirahina, Jerusalemra harnaj woi‐ingesgakhi.

32E higuana manape russana egi manape hungra egi hija hornuwang‐hirena egi jaja manape hung xetera hajairegi egi manapera, Paulus hojira girushjainena.

33Egi manape hung xetera hiwusunsh higi egi Paulus russana egi mas‐hokiwaxuxugra nupiwi hirusgij wa’shina, egi peshe heregi hiwaxshana, egi jagu ungi.

34Egi worohanka horogeja hota uwainena washashana airena. Egi jaja inke washa wogisog hiperesnigi woxeake hawau, manape hojhixeteja harni hoikewe wa’shina.

35Egi jaja hirotieja higi, manapera ruainena, wankshignanka rokana wagiuinege esge.

36Wankshig worohanka wironagnankshana, uwainena: Nige hot’unawire.

37Egi Paulus manape hojhixeteja harni hoikawairekjanegi manape hung xetera wagena: Hornikit’ekjera? E wena: Hellenos hit’e shuruxurugshe?

38Jasge inke Egipt wankshig raninishe, e hojishana woi‐ingesgehira egi wankshig‐d’ehira hogihixete‐jop mojainainja warni hahirera?

39Eshi Paulus wena: Ne Judrisha winena Tarsus‐eja hereisha Silikia jhinageja, jhinag xeteisha eja winena, egi ningitarna, wankshignagre wokit’e hingigire.

40Egi jaja ungigigi Paulus hirotieja nashina egi nabra hik’uanaga wankshignanka wawigigussana. Egi jaja xapgunixjihiregi wawokit’ena, Hebraia hit’e wena:

Currently Selected:

Hoixgara 21: WIN

Highlight

Copy