Hoixgara 20
20
1Egi woi‐ingesgera rushjanaga hageja Paulus wironagra wagigorna egi wanat’umbshana egi wakirujena Makedonia‐eja howarena.
2Egi jaja ma de‐e howaregi, egi wawigexji‐anaga Hellenos mainja hina.
3Egi eja daniha hiwusharna. Egi jaja Judra hirapexjinegi Siria‐eja wajowe howare hikorohogi, Makedonia‐eja hakja howarekje hirena.
4Egi Asia‐eja hakishu harairena Sopater Berea‐eja hereisha egi Aristarxus egi Sekundus Thessalonia‐eja hererena, egi Gaius Derbe‐eja hereisha, egi Timotheus, egi Tixikus egi Trophimus Asia‐eja hererena.
5De‐e jowera howarairanaga Troas‐eja hinperekjanihawina.
6Egi Philippi‐eja wajowe hakarawina waisgabduj winawohi rokani hamb hageja egi hambra sajahangaja wirakiriwina Troas‐eja, eja hambra shagowiha hipushawina.
7Egi hamb jornineja wironagra stoireshununa waisgab rujhe, Paulus wahokhuna, hainigi wakiruje‐kjanarnaga, egi hit’et’era hahekissag hipa ena.
8Egi jhiwang‐hakhohira hiratashakerehira roha hijakshana hajinja hostoirega eja.
9Egi hirohambisha eja wang‐hojiji‐isha Eutixus higairena eja minaganakshana, nanakshana. Egi Paulus wahokhuna s’ii e‐gi, naxjinakshana, egi jhiwang hidanieja shibra‐hurna, egi d’e rus‐hirena.
10Egi Paulus harnukanagshana egi hahimpshana egi nat’umbanaga wena: Inke wopuruna hiwinine, niambankshana.
11Egi jaja shige hogitigi egi waisgab rujhe‐anaga egi ruj‐shana, sixji wawokit’ena hambgu hipa, shesge wakirujhena.
12Egi wang‐hojinjira niamb harniakiriregi egi inke jowexjinig rukheg hirawinina.
13Egi joweja wajowe tawina egi Assos‐eja wajowe wawatawina, egi Paulus hijominaikjane hiarawina, shesge wawigege, mowe unkjanena (Assos‐eja hipa).
14Egi jaja Assos‐eja hinkihiwira, hijominag hagigiwina, egi Mitilena‐eja hahiwina.
15Egi eja wajowe hakarawira egi haininegi Xios‐eja hahiwina egi haininegi Samos‐eja hahiwina egi Trogillium‐eja hipushawina egi haininegi Miletus‐eja hahiwina.
16Paulus Ephesusra haixagje hirena Asia‐eja inke hagi hiwusharninage esge hikuhe wauanke Jerusalem‐eja Pentekost hambeja gi‐nainkjanege.
17Egi Miletus eja howahi Ephesus‐eja woragre‐wagigina egi wohokhu‐hojhieja xetera wagigorehina.
18Egi jaja hajiregi, wawagena: Hirapereswina Asia‐eja hambjorni hajira epa houna jasgeha harnikishu hauwira hoishib.
19Hirukanara wagitena warnai warnajojaisge hiu, egi hishjarni hakikshukshu egi wiunjara roha e hiraijinakshana Judra hiraipenankshana.
20Egi jagu hiniphinkjanihawira hinkisha hatukosnina, eshi ningipahawina egi harusharani washa ningiguswina egi jhira hirakiware wau,
21Wa’howakhuna Judra egi shige Hellenistra Maura eja hapahi najgera karateg hirekjege egi Hirukana harniwira Jesus Kristus harnaxgu hirekjege.
22Egi horuxujwire, shegunegi naxiragra rusgij Jerusalem‐eja wawakerekjanena, washa jagu eja wawekjanegi inke hiaperesnina.
23De‐eshana, Naxirag Wakanjangra jhinag hajinja herega hungiragjena, wena: Rusgijra egi hawera hinpejegi.
24Eshi washa de‐e inkisha naxirewinijena, inke shige wankshighoi harnira wakaragixetenina, hornag harnira wogishawa hiu waishibikjege, egi wore e Hirukanara Jesus eja hotusra woragphi Maura najwoja harnira hotaikjege.
25Egi horuxujwire shegunegi, hiaperessana harnaj inke hinupahana hishjaharnira hashjarnikjanihawina, jarnaga Maura hungma harnira hihornikhuwira.
26Esge hamb de‐e hornigitagwina inke wankshignagre hisha wa‐i harnira hishurnikjanena.
27Maura woshga harnira harnaj hornigitagwina inke washanisha hatukosnina.
28Esge hirakikara uwianje, egi hornihera harnaj wirakarawiaje, e Naxirag Wakanjangra wirakara niuwira, Maura wohokhu‐hojhi harnira waruj hokuwine e wa‐i harnira wawiruwina.
29Egi de‐e hiaperessana hakaranaga hageja shungiang wajexira horograwiregi howaji‐ahuirekjanena, inke hornihera hotawahiranikjanena.
30Egi shige nexji wangra nanashinkjanihawina, washa hokixajanke hish’ekjanihawina, wironagra warutiranaga, wironag‐hirekjanena.
31Esge hirakarawire, egi wewiwine ma daniha inkaga hatushjanina wakarashira harnaj, hahega egi hambga hishjarni hiu.
32Egi hikhinubwira, Maura eja hornitushjarehawina egi najoja hoit’e harnieja, E dire‐hi ninuxurughajena egi hoishjara hornik’unkjanihawina horogeja jarnagakhi e wakanjang‐wahira wogarna.
33Inke wankshignagre hisha shurasga egi shurasi egi wonashi roagigunina.
34Ne hirapereswina, nab de‐e wirehiauna jarnaga washara hiaunkjera egi wakishu hauanjane hiuinekjera.
35Washara harnaj hiperesniwina, warera jasge hare uwianaga kikurushagra washa wagijirawire egi Hirukanara Jesus hoit’e harnira wewiwine jagu era: Washa wogara e hiraijera wogishawa nankshana rusjega e inke shesgexjinijena.
36Egi jaja deshesge e‐gi, huporo himinagshana egi gikaraj harnaj wakishu una.
37Egi harnaj mashja xag‐hirena egi Paulus jashera nat’umbhirarnaga egi iokiwank‐hirena.
38Hoit’era jarnaga e‐ga de‐e hawau, hiraijera najgerateg hirena inke hinupahana hishja harnira hajairanikjanega. Egi waj‐eja hakishu hahirena.
Currently Selected:
Hoixgara 20: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
