Naiˍ htangˍ 17

Hteˉsaˍlawˉniˆ vengˍ veu ang buinˉ kanˉ vaˍ jiˍ

1Hingˉ nawngˍ veu, Pawˉluˆ nae Siˍlaˆ yaˉ yetˍ Aˍhpiˉpawˉliˆ vengˍ nae Aˍpawˉlawˉniˆ vengˍ hingˍ na hpaiˍ yao, Hteˉsaˍlawˉniˆ vengˍ veu hkeu lae jiˉ. Hiˉ keung veu Yuˉdaˆ changˉ yawng beu Yuˉdaˆ changˉ ceuˉ hpawm lang kyaˉ ang ca. 2Pawˉluˆ yang ha myang jiˉ laˉ mae, yawng kawngˉ awngˉ lae yao, sumˍ sin veu tiˍ hkeu camˉ lik na cuˉ yao yawng kawngˉ sin cat lang yao ca jiˉ. 3Hkritˆ nawˍ tuk naeˉ hpan naeˉ hingˉ na ya hkamˉ yao, siˉ kyaˉ veu ya teˍ laˉ laeˍ nae, yawng naˉ bae beu tiˍ hkeu maˍ biˍ jiˍ. Ga nawng na hkai yao piˉ kyaˍ laˍ jiˍ ningˉ ngaˍ, Hkrit mangˍ yaˇ nae ciˍ jiˍ. 4Yuˉdaˆ changˉ htiˍ baˍ baˍ uiˍ, yumˉ saˉ laˉ yao Pawˉluˆ nae Siˍlaˆ yaˉ yetˍ kawngˉ pawˉ saw laˉ jiˉ. Hpaˍcaoˍ na koˉ koiˍ naeˍ Heˍlaˍsaˆ changˉ uiˉ ang byaˍ yumˉ saˉ laˉ yao, ang maengˉ ang ca hkaˍ ba yaˍ htiˍ baˍ uiˍ muiˉ yumˉ yao byaˍ laˍ jiˉ.

5Caˇ, Yuˉdaˆ changˉ htiˍ baˍ uiˍ hkoiˉ naeˉ uiˉ nuing ba ca yao, kanˉ baˍ yaˍ nae changˉ haiˉ htiˍ baˍ uiˍ na haoˉ yuˉ peunˉ yao, changˉ ang muˉ byaˍ uiˍ na piˉ hpawm nga lang biˍ yao, vengˍ hkaoˍ hingˍ keung ciˍ ciˍ caeoˍ caeoˍ nae ha jiˉ. Yawng Yaˍsonˍ nae maengˉ jiˉ yumˉ hingˉ na tangˍ yuˍ yao Pawˉluˆ nae Siˍlaˆ yaˉ yetˍ na changˉ ang byaˍ uiˍ mae kaˍ huˍ veu kuinˍ taw luiˍ naeˍ uiˉ saˍ laiˍ saˉ jiˉ. 6Yaˉ yetˍ na baˍ saˍ myangˉ nga nae yao, Yaˍsonˍ nae yang beu yumˉ naeˉ saˉ naeˉ uiˉ changˉ htiˍ baˍ na upˆ peungˍ naeˍ uiˉ kawngˉ chuingˉ nga laengˉ yao ciˍ jiˍ. Nuingˉ chaˍ hkaˉ hko laˉ hko na tiˍ suk tiˍ sak laˍ naeˍ uiˉ htiˍ baˍ uiˍ, ningˉ keung muiˉ hkeu lui byaˇ. 7Yaˍsonˍ nawˍ yawng na hap yuˉ byaˇ. Yeˍsuˆ nae haoˉ naeˉ awˍ htaˍ veu ang suingˉ ang huiˍ htiˍ hu nae yawng ciˍ yao, ang suingˉ Kaeˉsaˍ beu ang liˍ ang kawngˍ na baˍ yaˍ lang nae htiˍ baˍ uiˍ hkaˉ hko laˉ hko ha yao ca byaˇ nae haoˉ jiˉ. 8Vengˍ changˍ htiˍ baˍ uiˍ nae upˆ peungˍ naeˍ uiˉ, awˍ lawng ningˉ na ya kyaˍ beu, yawng nuing ba suk sak yao ca jiˉ. 9Yawng ngaˍ, Yaˍsonˍ nae awˍ htaˍ veu yaˍ changˍ mawngˉ namˉ uiˉ htiˍ baˍ uiˍ na hpuˉ piˉ kan na yao, piˉ hkamˉ nga yao, yawng na poiˉ laeˍ jiˍ.

Beˍriˆ vengˍ hkaoˍ veu naiˍ htangˍ uiˍ ca beu awˍ lawng

10Yumˉ naeˉ saˉ naeˉ changˉ uiˉ muiˉ, Pawˉluˆ nae Siˍlaˆ yaˉ yetˍ na Beˍriˆ vengˍ veu muˍ hkiˍ beu piˉ aeˉ jiˉ. Yaˉ yetˍ hiˉ keung veu hkeu aeˉ beu, Yuˉdaˆ changˉ ceuˉ hpawm lang kyaˉ veu awngˉ aeˉ jiˉ. 11Changˉ ningˉ uiˉ aˍ, Hteˉsaˍlawˉniˆ changˉ uiˉ htaˍ chae ang kuitˆ hkiˍ nae, Hpaˍcaoˍ beu ang tangˍ hingˍ na yawng mawnˍ mawnˍ pyawˍ pyawˉ hap yuˉ jiˉ. Awˍ lawng ningˉ uiˉ ang yaˍ baˍ yaˍ nae yawng bae siˉ yao, yawng cu nuing camˉ lik na hpatˆ yao ca jiˉ. 12Haeˉ mae yao, yawng hkaoˉ veu Yuˉdaˆ changˉ ang byaˍ yumˉ saˉ laˉ jiˉ. Mun hpungˇ ang ca Heˍlaˍsaˆ changˉ ceuˉ hkaˍ ba yaˍ nae kaˍ hpaˍ yaˍ htiˍ baˍ uiˍ muiˉ, yumˉ saˉ laˉ jiˉ uiˉ byaˍ yao hkeˍ laˍ jiˉ. 13Pawˉluˆ nawˍ, Beˍriˆ vengˍ hkaoˍ veu Hpaˍcaoˍ beu ang tangˍ maˍ biˍ yao ca naeˉ na Hteˉsaˍlawˉniˆ vengˍ veu ca naeˉ Yuˉdaˆ changˉ uiˉ ya bae yao hiˉ keung veu muiˉ yawng lae yao, changˉ ang muˉ uiˉ na htuing nga lae biˍ yao ciˍ ciˍ caeoˍ caeoˍ nae piˉ hpeuˍ laˉ jiˉ. 14Haeˉ mae beu, yumˉ naeˉ saˉ naeˉ uiˉ changˉ ngaˍ, Pawˉluˆ na chaˍ maeˍ langˍ ba veu tiˍ hkeu ang vaiˍ nae piˉ lae jiˉ. Caˇ, Siˍlaˆ nae Tiˉmoˉseˍ yaˉ yetˍ na hiˉ keung veu ca saˍ biˍ jiˍ. 15Pawˉluˆ na sa aeˉ laeˍ jiˍ changˉ uiˉ aˍ, Aˍhtenˍ vengˍ veu tiˍ hkeu sa aeˉ laeˍ jiˍ. Siˍlaˆ nae Tiˉmoˉseˍ yang kawngˉ ang vaiˍ nae laˉ naeˉ uiˉ saˍ laiˍ, Pawˉluˆ yawng na ang tangˍ sangˍ yao yawng muiˉ laˉ laeˍ jiˍ.

Pawˉluˆ Aˍhtenˍ vengˍ veu ca beu awˍ lawng

16Pawˉluˆ Aˍhtenˍ vengˍ hkaoˍ veu Siˍlaˆ nae Tiˉmoˉseˍ yaˉ yetˍ na hawˍ yao ca beu, vengˍ hingˍ hkaoˉ veu awˍ hang sangˉ htuˆ na koˉ koiˍ naeˍ uiˉ htiˍ puing ca naeˉ na yang ya myangˉ yao, yang beu nuing ba hkaoˉ veu baˍ mawngˍ baˍ pyawˍ nae hpeuˍ jiˍ. 17Haeˉ mae yao, yaˇ Yuˉdaˆ changˉ ceuˉ hpawm lang kyaˉ veu Yuˉdaˆ changˉ nae Hpaˍcaoˍ na koˉ koiˍ naeˍ uiˉ changˉ na baˍ upˍ, cu nuing katˆ hkaoˉ veu myangˉ lang naeˉ changˉ uiˉ na baˍ up, sing lang cat lang yao ca jiˉ. 18Haeˉ mae beu, Eˉpiˇkuˆruˆ ang liˍ nae Saˍtawˉeˆ ang liˍ na caiˍ naeˍ pingˍ nyaˍ ang ca changˉ uiˉ, Pawˉluˆ kawngˉ sing cat lang ga jiˉ. Yawng htiˍ baˍ baˍ uiˍ ciˍ jiˍ. Hao tangˍ na kaw yao maˍ cangˉ naeˉ changˉ niˇ maˇ ba ceuˇ na ha siˉ naeˇ nae ciˍ jiˍ.

Pawˉluˆ nawˍ Yeˍsuˆ awˍ lawng nae siˉ yao teˍ laˉ laeˍ naeˍ awˍ lawng maˍ biˍ yao, htiˍ baˍ baˍ uiˍ ciˍ jiˍ. Yaˇ awˍ htaˍ veu ang meungˉ uiˉ beu hpaˍcaoˍ htiˍ baˍ uiˍ awˍ lawng maˍ cangˉ naeˉ changˉ mangˉ yaˇ nae ciˍ jiˍ. 19Haeˉ mae beu, yawng muiˉ Pawˉluˆ na aˉ muˍ tatˆ kyaˉ awn hoˉ uiˉ myangˉ lang kyaˉ Aˍreˍ miˉ kuingˍ hingˍ keung veu suiˍ laengˉ yao naˉ jiˍ. Nang maˍ jiˍ awˍ lawng ang suiˍ ningˍ gu na muiˉ iˉ yaˍ maˍ lao. 20Aˉ mae yao nae baoˉ vaˍ, gu baˍ kyaˍ myang nae uiˉ ang ceuˉ htiˍ baˍ uiˍ nang hkai taw laˍ byaˇ. Hingˉ uiˉ ceuˉ beu a tekˆ paeˍ yangˍ aˉ mae jeuˇ nae gu bae siˉ naeˉ nae, yang na ha biˍ jiˍ. 21(Aˍhtenˍ vengˍ changˉ hkaˉ hko laˉ hko nae hkaekˆ changˉ htiˍ baˍ uiˉ, awˍ lawng ang suiˍ htiˍ ceuˍ ceuˍ na ya kyaˍ ya hkai naeˉ uiˉ saˍ laiˍ, yawng beu ang nyamˍ uiˍ piˉ hko yao ca jiˉ).

22Haeˉ mae beu, Pawˉluˆ nawˍ, sing cat lang kyaˉ Aˍreˍ miˉ kuingˍ kawngˉ nuingˉ veu cung yao ciˍ jiˍ. Aˍhtenˍ changˉ htiˍ baˍ yawng veuˉ, nawng ngaˍ hkaˉ hko laˉ hko ningˉ hkaoˉ veu hpaˍcaoˍ htiˍ baˍ ningˍ uiˉ na saˍ nyamˉ hkiˍ naeˍ na ga ya myangˉ nga byaˇ. 23Aˉ mae yao nae baoˉ vaˍ, ga htiˍ tawngˍ peunˉ yao htiˍ tawngˍ aeˉ yao nawngˍ koˉ koiˍ naeˍ ningˉ ceuˉ na hu yao, gu baˍ bae nae Hpaˍcaoˍ saˍ laiˍ nae taemˉ yao chiˉ jiˉ tanˍ seuˍ htiˍ lumˍ hingˍ na ga ya myangˉ yaeˉ. Nawng baˍ bae nae ang tuˍ mawt yao ca naeˉ Hpaˍcaoˍ htiˍ hu awˍ lawng ga nawng na maˍ laˍ vaˍ. 24Nuingˉ chaˍ nae nuingˉ chaˍ htaˍ veu hkaˉ ca naeˉ hkaˉ hko laˉ hko na peungˍ cawngˉ jiˉ mangˉ Hpaˍcaoˍ nawˍ, buingˍ htaˍ nae nuingˉ chaˍ yumˍ suingˉ mangˉ yaˇ. Yaˇ changˉ uiˉ beu laˍ puˍ nae taeng yao chiˉ jiˉ yumˉ hingˉ hkaoˉ veu ca naeˉ uiˉ baˍ aˍ. 25Changˉ uiˉ beu laˍ puˍ nawˍ yang saˍ laiˍ htiˍ ceuˍ ceuˍ vaˍ naeˍ uiˉ yang loˉ naeˉ uiˉ baˍ aˍ. Aˉ mae yao nae baoˉ vaˍ, yaˇ changˉ hkaˉ hko laˉ hko na a sak piˉ teˍ yaˍ yao, hkaˉ hko laˉ hko na pawngˍ van naeˉ. 26Yaˇ nuingˉ chaˍ htaˍ veu ku ti ti ca naeˉ uiˉ saˍ laiˍ, changˉ ceuˉ hkaˉ hko laˉ hko na changˉ htiˍ hu hkaoˉ veu naˇ peungˍ cawngˉ saˍ jiˍ. Yawng saˍ laiˍ cheˉ laeˍ taw naeˉ uiˉ ang nyamˍ na baˍ upˍ, yawng ca kyaˉ uiˉ na baˍ upˍ, yang haenˍ hangˉ yao chiˉ byaˇ. 27Aˉ mae ha yao, Hpaˍcaoˍ yang na saˉ naeˉ hkaoˉ veu saˉ hu aeˉ yao ya myangˉ naeˉ na baˍ upˍ, yang changˉ uiˉ na peunˍ cawngˉ saˍ jiˍ. Ningˉ mae ciˍ naeˍ ningˉ muiˉ, yaˇ gu na aˉ mangˉ na baˍ upˍ veuˍ yao ca naeˉ uiˉ baˍ aˍ. 28Aˉ mae yao nae baoˉ vaˍ, Yang paˉ nae gu ya teˍ yaˍ yao, uin uin an an nae ha cangˉ naeˉ yaˇ nae changˉ htiˍ hu ciˍ jiˍ. Nawng beu ang laiˍ cheuˉ naeˉ uiˉ changˉ htiˍ baˍ baˍ ciˍ naeˍ laˉ mae, Gu aˍ yang kawngˉ chaˍ lang yao lui jiˉ ang luˍ ang han uiˉ yaˇ.

29Hingˉ mae nae, gu aˍ Hpaˍcaoˍ kawngˉ chaˍ yao lui jiˉ ang luˍ ang han hpeuˍ naeˍ paˉ nae, changˉ uiˉ kuitˆ hkiˍ ha hkiˍ naeˍ uiˉ awˍ hang sangˉ htuˆ htiˍ baˍ uiˍ, hkamˍ na baˍ upˍ, hpuˉ na baˍ upˍ, law ba na baˍ upˍ, Hpaˍcaoˍ nawˍ ningˉ uiˉ na ang meunˉ lang nae baˍ ya kuitˆ laeˍ. 30Caeˉ laˉ saˍ jiˍ hkaoˉ veu nawngˍ baˍ bae nae vaˍ jiˍ kanˉ htiˍ baˍ uiˍ na, Hpaˍcaoˍ baˍ cuiˍ yaˍ yao muiˉ, ya muiˉ aˍ, aˉ keung veu ca naeˉ changˉ uiˉ naˍ hokˍ na kuitˆ puiˉ laeˍ naeˍ uiˉ saˍ laiˍ Hpaˍcaoˍ ang tangˍ piˍ jiˍ. 31Aˉ mae yao nae baoˉ vaˍ, yang cheˉ yuˉ jiˉ htiˍ hu mangˉ na cuˉ yao, nuingˉ chaˍ yaˍ uiˍ na sui naeˉ pawng naeˉ hkaoˉ veu aˉ muˍ tatˆ naeˉ uiˉ saˍ laiˍ, yang nuing hpat yao chiˉ byaˇ. Ningˉ mangˉ na Hpaˍcaoˍ maˉ manˉ cheˉ yuˉ yao chiˉ jiˉ nae changˉ hkaˉ hko laˉ hko ya bae naeˉ uiˉ saˍ laiˍ, siˉ kyaˉ hkaoˉ veu yang na piˉ teˍ laˉ laeˍ byaˇ nae Pawˉluˆ yawng na maˍ biˍ jiˍ.

32Siˉ peunˉ jiˉ uiˉ changˉ teˍ laˉ laeˍ naeˍ awˍ lawng yawng ya kyaˍ beu, changˉ htiˍ baˍ baˍ uiˍ yang na ciˍ bawˍ bawˍ yao uiˉ jiˉ. Caˇ, htiˍ baˍ uiˍ ciˍ jiˍ. Nang ciˍ naeˍ awˍ lawng ningˉ gu htiˍ cangˍ naˉ laeˍ beun naeˉ nae ha biˍ jiˍ. 33Haeˉ mae yao, Pawˉluˆ yawng hpawm lang kyaˉ veu ca yao awkˍ taw aengˉ jiˉ. 34Changˉ htiˍ baˍ baˍ uiˍ, yumˉ saˉ laˉ yao Pawˉluˆ kawngˉ pawˉ laˉ jiˉ. Changˉ hingˉ uiˉ htiˍ baˍ hkaoˍ veu, Daˍyawˉnaˍsiˆ nae maengˉ jiˉ Aˍreˍ miˉ kuingˍ ang suingˉ huiˍ htiˍ hu, Daˍmaˍriˆ nae maengˉ jiˉ hkaˍ ba yaˍ htiˍ hu nae awˍ htaˍ veu changˉ uiˉ muiˉ ang ca.

Currently Selected:

Naiˍ htangˍ 17: pyy

Highlight

Copy