Naiˍ htangˍ 18

Pawˉluˆ Kawˉrenˍhtuˆ vengˍ hkaoˍ veu ca jiˉ awˍ lawng

1Hingˉ nawngˍ veu Pawˉluˆ nawˍ Aˍhtenˍ vengˍ veu awkˍ taw aeˉ yao Kawˉrenˍhtuˆ vengˍ veu aeˉ jiˉ. 2Hiˉ keung veu, Poˍtuˆ ang meungˉ changˉ Aˍkuˉlaˆ nae maengˉ jiˉ Yuˉdaˆ changˉ htiˍ hu mangˉ na yang ya myangˉ lang jiˉ. Changˉ hiˉ maˇ, Yuˉdaˆ changˉ hkaˉ hko laˉ hko Roˉmaˆ vengˍ hkaoˍ veu ya awkˍ taw aengˉ naeˉ nae, ang suingˉ ang huiˍ Kaˍlawˉdiˆ ang tangˍ piˍ jiˍ pa nae, yang hkaˍ ba Piˉkiˉlaˆ yaˉ yetˍ Iˍtaˍliˍ ang meungˉ hiˉ keung veu hkeu lui lang jiˉ. 3Pawˉluˆ yaˉ yetˍ kawngˉ lae beu, yawng vaˍ naeˍ kangˉ hingˉ ngaˍ ang meunˉ lang nae yao, yang yaˉ yetˍ kawngˉ ca yao kanˉ vaˍ jiˍ. Aˉ mae yao nae baoˉ vaˍ, yawng ngaˍ saˍ hkaw kuˍ naeˍ uiˉ changˉ hpeuˍ jiˍ. 4Cu sin Yuˉdaˆ changˉ ceuˉ uiˉ hpawm lang kyaˉ veu, Yuˉdaˆ changˉ uiˉ na baˍ up, Heˍlaˍsaˆ changˉ uiˉ na baˍ up, maˍ taw naeˉ uiˉ saˍ laiˍ yawng na sing cat sangˍ jiˍ. 5Siˍlaˆ nae Tiˉmoˉseˍ Maˍkeˍdawˉniˆ ang meungˉ veu awkˍ taw luiˍ yao, Pawˉluˆ kawngˉ hkeu lui beu, ya caeˉ ang buinˉ maˍ yao, Yeˍsuˆ nawˍ Hkrit mangˍ yaˇ nae coˇ caˇ yao saˉ hkiˉ hkamˉ jiˉ. 6Yawng ngaˍ, yang na haenˉ tap yao haiˉ naeˉ uiˉ tangˍ ciˍ beu, Pawˉluˆ yang beu hkaˍ lao hingˉ na kyangˍ nga laeˍ yao ciˍ jiˍ, nawng beu ang si hingˉ nawng ang tuˍ htaˍ veu hkeu lui bu. Ga htaˍ veu baˍ ca laˇ. Miˉ nuing htaˍ veu gaˇ Changˉ ceuˉ htiˍ baˍ uiˍ kawngˉ aengˉ naˇ nae, ha biˍ jiˍ. 7Yang hingˉ keung veu awkˍ taw aengˉ yao, Hpaˍcaoˍ na koˉ koiˍ naeˍ Tiˉtuˆ Yuˉtuˆ nae maengˉ jiˉ changˉ htiˍ hu hingˉ mangˉ beu yumˉ veu aeˉ jiˉ. Yang beu yumˉ hingˉ ngaˍ ang buinˉ paˉ kyaˉ cawngˉ na ang htaeˉ lang nae duingˉ jiˉ. 8Kaˍliˉpuˆ nae maengˉ jiˉ ang buinˉ paˉ kyaˉ cawngˉ veu awn hoˉ htiˍ huˍ mangˉ beu, yumˉ changˉ hkaˉ hko laˉ hko uiˉ aˍ, Ang suingˉ Yeˍsuˆ na yumˉ saˉ laˉ jiˉ. Kawˉrenˍhtuˆ changˉ ang byaˍ Pawˉluˆ maˍ naeˍ na ya kyaˍ yao yumˉ naeˉ hkaoˉ veu baˆtiˆsamˍ hkamˉ yuˉ jiˉ. 9Muˍ hkiˍ beu, Ang suingˉ Hpaˍcaoˍ nawˍ, Pawˉluˆ na yuˍ paˍ yongˍ hkaoˍ veu maˍ biˍ yao ciˍ jiˍ, Naˇ baˍ hkae jo. Chuinˉ nae baˍ caw jo. Maenˍ nae maˍ bu. 10Ga nang kawngˉ ang ca yaˇ. Nang na tiˍ daˍ la naeˍ uiˉ changˉ baˍ saˍ baˍ nyamˍ nae ha laˍ naeˍ uiˉ baˍ aˍ. Aˉ mae yao nae baoˉ vaˍ, vengˍ ningˍ hkaoˉ veu ga beu changˉ ang byaˍ ang ca yaˇ nae, yang na ha biˍ jiˍ. 11Yang hiˉ keung htiˍ nuing pi nae hkoˍ ha ca yao, yawng na Hpaˍcaoˍ beu ang buinˉ tangˍ maˍ biˍ jiˍ. 12Aˍhkaˍyaˆ ang meungˉ#18:12 Heˍlaˍsaˆ ang meungˉ veu, Gaˍliˍoˍ ang suingˉ huiˍ hpeuˍ yao ca beu, Yuˉdaˆ changˉ uiˉ nuing ba htiˍ suiˍ laˍ mae chiˉ yao, Pawˉluˆ na tiˍ kang taw naeˉ uiˉ saˍ laiˍ hta laˉ yao yang na aˉ muˍ tatˆ kyaˉ lumˉ veu suiˍ yao lae jiˉ. 13Yawng ciˍ jiˍ, Changˉ niˇ maˇ changˉ yaˍ Hpaˍcaoˍ na koˉ koiˍ beu, ang liˍ ang kawngˍ veu baˍ yaˍ nae uiˉ hkaoˉ veu ang tuˍ mawt naeˉ uiˉ saˍ laiˍ tiˍ chaw yao ca ngaeˉ nae ciˍ jiˍ. 14Haeˉ mae beu, Pawˉluˆ hkaˍ muˍ saˉ hkai awkˍ luiˍ nae beu, Yuˉdaˆ changˉ uiˉ na Gaˍliˍoˍ ha biˍ jiˍ. Yuˉdaˆ changˉ htiˍ baˍ yawng veuˉ, ningˉ lawng ningˉ ngaˍ baˍ yaˍ baˍ keung nae, baˍ baoˇ ang haiˉ uiˉ ceuˉ keungˍ hpeuˍ baoˇ, ga otˆ yao nawng tangˍ na ang naˇ yaˇ. 15Caˇ, ciˍ tangˍ ningˍ uiˉ, ang maengˉ ningˉ uiˉ nawng beu ang liˍ ang kawngˍ na chaˍ lang naeˉ uiˉ awˍ lawng hpeuˍ naeˍ paˉ nae, nawng tawˉ nawng vaˍ vo. Ningˉ mae uiˉ awˍ lawng na ga aˉ muˍ baˍ tatˍ nae ha biˍ jiˍ. 16Haeˉ mae beu, yawng yang na aˉ muˍ tatˆ kyaˉ veu kaˍ taw aengˉ jiˉ. 17Haeˉ mae yao, yawng hkaˉ hko laˉ hko Yuˉdaˆ changˉ ceuˉ hpawm lang kyaˉ veu awn hoˉ Suˉtenˍ na hpui yao aˉ muˍ tatˆ kyaˉ paˍ langˍ huˍ veu tuiˍ jiˍ. Caˇ, Gaˍliˍoˍ nawˍ hingˉ lawng na iˉ yaˍ nae muiˉ baˍ kuitˍ. 18Hingˉ nawngˍ veu Pawˉluˆ Kawˉrenˍhtuˆ vengˍ veu iˉ yaˍ mangˍ ca laeˍ yao, yumˉ naeˉ saˉ naeˉ uiˉ changˉ na hpakˍ nga lang yao Suˉriˆ ang meungˉ veu heuˍ ta yao lae jiˉ. Piˉkiˉlaˆ nae Aˍkuˉlaˆ, yaˉ yetˍ muiˍ yang kawngˉ lae jiˉ. Yang saˉ caˉ chiˉ jiˉ lawˉ, Keˍcheˍ vengˍ veu hkeungˉ beu, yang beu ang tuˍ yangˍ seuk tiˍ laeˍ jiˍ. 19Haeˉ mae beu, yawng Eˉfeˉsuˆ vengˍ veu hkeu yao, yang yaˉ yetˍ na hingˉ keung veu chiˉ saˍ jiˍ. Yang Yuˉdaˆ changˉ ceuˉ hpawm lang kyaˉ veu awngˉ lae yao Yuˉdaˆ changˉ uiˉ kawngˉ sing cat lang ga jiˉ. 20Yawng kawngˉ iˉ yaˍ mangˍ naeˍ ca lao nae, yawng Pawˉluˆ na paˉ yao muiˉ, yang ca yao baˍ kaˍ nae ha biˍ jiˍ. 21Caˇ, yawng na hpakˍ lang beu, yang ciˍ jiˍ, Hpaˍcaoˍ a loˍ ca baoˉ vaˍ, nawng kawngˉ ga htiˍ cangˍ laˉ lae vaˍ nae ha biˍ jiˍ. Haeˉ mae beu, yang heuˍ ta yao Eˉfeˉsuˆ vengˍ hkaoˍ veu awkˍ taw aengˉ jiˉ.

Pawˉluˆ Anˍtiˉokˆ vengˍ veu aeˉ laeˍ yao ang buinˉ tangˍ maˍ jiˍ

22Kaeˉsaˍriˆ vengˍ veu hkeu lae yao, yang Yeˍruˆsaˍlaemˍ vengˍ veu lae yao Hkritˆ yanˍ ang muˉ na myangˉ nga lae lang peunˉ yao, Anˍtiˉokˆ vengˍ veu aeˉ laeˍ jiˍ. 23Hiˉ keung veu iˉ yaˍ mangˍ ca yao, yang awkˍ taw aengˉ laeˍ yao, Gaˍlaˍtiˆ ang meungˉ nae Hpuˍgiˆ ang meungˉ hkaoˉ veu htiˍ tawngˍ peunˉ yao htiˍ tawngˍ ta peˍ uiˍ na kaˍ piˍ htaengˍ lae jiˉ.

Eˉfeˉsuˆ vengˍ hkaoˍ veu Aˍpawˉluˆ ang buinˉ tangˍ maˍ jiˍ

24Haeˉ mae beu, Aˍleˍsaˍduˆ vengˍ changˍ Aˍpawˉluˆ nae maengˉ jiˉ Yuˉdaˆ changˉ htiˍ huˍ Eˉfeˉsuˆ vengˍ veu hkeu lui jiˉ. Yaˇ hkaˍ muˍ muiˍ ang hkai hkiˍ nae, Camˉ lik na ang bae maˍ maˉ uiˉ changˉ htiˍ hu yaˇ. 25Yaˇ Ang suingˉ Yeˍsuˆ beu kaˉ ba awˍ lawng ya henˍ yao nuing ba chawˍ naeˍ hkaoˉ veu, Yeˍsuˆ beu awˍ lawng na maenˍ nae maˍ hkiˍ yao muiˉ, Yoˉhanˍ maˍ biˍ jiˍ baˆtiˆsamˍ hingˍ naˇ yang hkiˍ jiˍ. 26Yaˇ Yuˉdaˆ changˉ ceuˉ hpawm lang kyaˉ hkaoˉ veu nuing ba hatˆ naeˉ hkaoˉ veu tangˍ yao maˍ biˍ jiˍ. Piˉkiˉlaˆ nae Aˍkuˉlaˆ yaˉ yetˍ yang maˍ biˍ naeˍ ang tangˍ hingˍ na ya kyaˍ beu, yang na haoˉ yao Hpaˍcaoˍ beu awˍ lawng hingˉ maenˍ nae maˍ keung laeˍ biˍ jiˍ. 27Aˍpawˉluˆ nawˍ Aˍhkaˍyaˆ ang meungˉ kaˉ seu hpaiˍ yao lae siˉ beu, yumˉ naeˉ saˉ naeˉ uiˉ changˉ yang na kaˍ piˍ htaengˍ yao, hingˉ pakˍ kaˍ seu ca naeˉ uiˉ yang na hap yuˉ naeˉ uiˉ saˍ laiˍ ta peˍ uiˍ na ang laiˍ taemˉ yao piˍ jiˍ. Hiˉ keung veu ca naeˉ uiˉ changˉ ngaˍ, Hpaˍcaoˍ beu ang buinˉ pa nae yumˉ saˉ laˉ jiˉ. Yang hiˉ keung veu hkeu lae beu, yawng na ang byaˍ pawngˍ van jiˉ. 28Aˉ mae yao nae baoˉ vaˍ, Yeˍsuˆ nawˍ Hkritˆ mangˍ yaˇ nae, Camˉ lik hkaoˉ veu yang maenˍ nae hpuiˉ yao maˍ biˍ yao, changˉ hkaˉ hko laˉ hko uiˉ tawngˍ naˍ veu Yuˉdaˆ changˉ htiˍ baˍ na hteng lang naeˉ hkaoˉ veu yang kaˍ yaˍ jiˍ.

Currently Selected:

Naiˍ htangˍ 18: pyy

Highlight

Copy