Naiˍ htangˍ 19

Pawˉluˆ Eˉfeˉsuˆ vengˍ veu ca jiˉ awˍ lawng

1Aˍpawˉluˆ nawˍ, Kawˉrenˍhtuˆ vengˍ hkaoˍ veu ca beu, Pawˉluˆ ang htaˍ kaˍ seuˍ ang meungˉ htiˍ baˍ uiˍ na hpaiˍ yao, Eˉfeˉsuˆ vengˍ veu hkeu aeˉ jiˉ. Hiˉ keung veu, ta peˍ uiˍ htiˍ baˍ uiˍ na yang ya myangˉ yao yawng na ha biˍ jiˍ yang, 2Nawng yumˉ yao ca beu, ang hkawˍ laˉ ang seungˍ sangˉ ya yaˉ laˍ nae naˉ jiˉ. Haeˉ mae beu, yawng tawpˍ laeˍ jiˍ yang, Ang hkawˍ laˉ ang seungˍ sangˉ ca naeˉ na gu baˍ kyaˍ myang nae ha laeˍ biˍ jiˍ. 3Pawˉluˆ ha biˍ jiˍ yang, Haeˉ mae baoˇ vaˍ, nawng ngaˍ aˉ mae uiˉ baˆtiˆsamˍ na hkamˉ ngaeˇ nae naˉ beu, Yoˉhanˍ beu baˆtiˆsamˍ htiˍ ceuˍ hingˍ na hkamˉ ngaeˉ nae yawng ha laeˍ biˍ jiˍ. 4Haeˉ mae beu Pawˉluˆ yawng na ha biˍ jiˍ, Yoˉhanˍ nawˍ naˍ hokˍ na kuitˆ puiˉ naeˉ uiˉ baˆtiˆsamˍ htiˍ ceuˍ hingˍ naeˍ naˇ piˍ yao, yang nawngˍ veu luiˍ laeˍ naeˍ mangˉ na ya yumˉ naeˉ uiˉ saˍ laiˍ, changˉ ningˉ mawt na yang maˍ biˍ jiˍ yaˇ. Changˉ hiˉ maˇ Yeˍsuˆ mangˉ yaˇ nae ha biˍ jiˍ. 5Ang tangˍ ningˍ na yawng ya kyaˍ beu, Ang suingˉ Yeˍsuˆ beu ang maengˉ hkaoˉ veu baˆtiˆsamˍ hkamˉ yuˉ laeˍ jiˉ. 6Pawˉluˆ yawng htaˍ veu laˍ puˍ boeˉ biˍ beu, Ang hkawˍ laˉ ang seungˍ sangˉ mangˉ yawng htaˍ veu lungˍ nga luingˉ biˍ jiˍ. Yawng ciˍ tangˍ ang byaˍ ceuˍ ciˍ yao Pa lawˉ hpaet laˉ mae ciˍ yao ang buinˉ tangˍ maˍ jiˍ. 7Yawng hkaˉ hko laˉ hko htiˍ cheˍ nyiˍ hu laˉ mawk ca jiˉ.

8Hingˉ nawngˍ veu, Pawˉluˆ nawˍ Yuˉdaˆ changˉ ceuˉ hpawm lang kyaˉ veu awngˉ nga laengˉ yao, nuing ba hatˆ naeˉ hkaoˉ veu sumˍ ha veu tiˍ hkeu maˍ biˍ jiˍ. Yawng kawngˉ sin cat lang yao Hpaˍcaoˍ beu ang meungˉ hingˉ na yumˉ laˉ naeˉ uiˉ saˍ laiˍ yang coˇ caˇ yao maˍ biˍ jiˍ. 9Caˇ, yawng hkaoˉ veu changˉ htiˍ baˍ baˍ nuing ba kaenˍ hka yao baˍ yumˍ. Yawng changˉ ningˉ mawk veu mae kaˍ huˍ veu Kaˉ ba ang liˍ ang kawngˍ lawng hingˉ na baˍ saˍ baˍ nyamˍ nae ciˍ jiˍ. Haeˉ mae beu, yang yawng kawngˉ awkˍ taw aengˉ yao, ta peˍ uiˍ na suiˍ yao Tuˆraˍnuˆ beu cawngˉ hkaoˉ veu cu nuing sing cat lang ga jiˉ. 10Yang nyiˍ nuing pi veu hkeu ningˉ mae ha yao, Aˍsiˆ ang meungˉ hkaoˉ veu hkaˉ ca naeˉ uiˉ changˉ hkaˉ hko laˉ hko, Yuˉdaˆ changˉ na baˍ upˍ, Changˉ ceuˉ htiˍ baˍ uiˍ na baˍ upˍ, Ang suingˉ Yeˍsuˆ beu ang tangˍ hingˍ na ya kyaˍ jiˍ.

Keˍvaˆ beu kaˍ hpaˍ yaˍ cetˍ hu

11Hpaˍcaoˍ nawˍ Pawˉluˆ na caiˍ yaˍ yao huiˍ sutˆ nae manˍ kyaˍ htiˍ baˍ uiˍ na ha taw laˉ biˍ jiˍ. 12Pawˉluˆ caiˍ yaˍ jiˍ hpaˍ cetˍ uiˉ na baˍ up, ang kaˍ tum na baˍ up, changˉ daˉ htiˍ baˍ uiˍ kawngˉ hao hanˉ nga aengˉ beu, yawng pyo laˉ laeˍ yao deˍ yaˍ ang haiˉ uiˉ muiˉ awkˍ taw aengˉ jiˉ. 13Haeˉ mae beu, deˍ yaˍ uiˍ na kaˍ taw cangˉ naeˉ Yuˉdaˆ changˉ htiˍ baˍ uiˉ aˍ, deˍ yaˍ ang haiˉ uiˉ awngˉ ngangˉ biˍ jiˍ uiˉ na ha biˍ jiˍ. Pawˉluˆ maˍ jiˍ Yeˍsuˆ beu ang maengˉ hkaoˉ veu ga nawng na piˉ awkˍ taw laˍ naeˍ yaˇ nae ciˍ yao, Ang suingˉ Yeˍsuˆ beu ang maengˉ na haoˉ jiˉ. 14Keˍvaˆ nae maengˉ jiˉ Yuˉdaˆ yit pa rawˉ hek ang kaeˍ htiˍ hu mangˉ beu kaˍ hpaˍ yaˍ cetˍ hu uiˉ muiˉ ningˉ mae ha cangˉ jiˉ. 15Caˇ, deˍ yaˍ ang haiˉ uiˉ yawng na ha laeˍ biˍ jiˍ, Yeˍsuˆ na ga ang bae yaˇ. Pawˉluˆ awˍ lawng na muiˉ ga ang bae yaˇ. Nawng ngaˍ aˍ sangˍ yawng nae ha laeˍ biˍ jiˍ. 16Haeˉ mae beu, deˍ yaˍ ang haiˉ uiˉ awngˉ ngangˉ biˍ jiˍ uiˉ changˉ yawng ngaˍ, yawng na peuk hkangˍ piˍ yao, yawng hkaˉ hko laˉ hko na kaˍ yaˍ naeˍ hkaoˉ veu kaˍ haengˍ nae ha yao, yawng ya daˉ yao, yumˉ hingˉ hkaoˉ veu ca yao tawnˍ cawnˍ nae hpangˉ yao huinˍ jiˍ. 17Eˉfeˉsuˆ vengˍ hkaoˍ veu hkaˉ ca naeˉ uiˉ changˉ hkaˉ hko laˉ hko, Yuˉdaˆ changˉ na baˍ up, Changˉ ceuˉ htiˍ baˍ uiˍ na baˍ upˍ, ningˉ awˍ lawng na ya kyaˍ ya bae jiˉ. Yawng hkaˉ hko laˉ hko hkae yao, Ang suingˉ Yeˍsuˆ beu ang maengˉ na chiˍ huiˍ chiˍ mawng jiˉ. 18Yumˉ jiˉ changˉ uiˉ muiˉ ang byaˍ laˉ yao yawng tiˍ si jiˉ hingˉ na upˍ kyaˍ tum kyaˍ laˉ biˍ jiˍ. 19Piˉ tuˍ ang hkiˍ changˉ ang byaˍ hu uiˉ muiˉ, yawng beu ang laiˍ uiˍ na hanˉ na langˉ yao, changˉ ang byaˍ tawngˍ naˍ veu miˍ htawˍ hpi jiˉ. Ang laiˍ hingˍ uiˉ beu ang huˍ yang yawng sawnˉ ngangˉ yao, ngaˍ muinˍ pyaˍ laˍ mawk ca jiˉ. 20Hingˉ pa nae, changˉ uiˉ aˍ Hpaˍcaoˍ beu ang tangˍ hingˍ ciˍ laˉ yao, changˉ ang byaˍ uiˍ htaˍ chae nae tanˉ hkoˉ huiˍ naeˍ ang tangˍ hingˍ na yumˉ laˉ jiˉ. 21Ningˉ uiˉ hpeuˍ peunˍ laˉ naeˉ nawngˍ veu, Pawˉluˆ yang beu nuing ba hkaoˉ veu kuitˆ yao chiˉ jiˉ. Maˍkeˍdawˉniˆ ang meungˉ nae Aˍhkaˍyaˆ ang meungˉ na hpaiˍ peunˍ nga laengˉ yao, Yeˍruˆsaˍlaemˍ vengˍ veu lae naeˉ. Yang ciˍ jiˍ, Ga hingˉ keung veu hkeu peunˉ lae yao Roˉmaˆ vengˍ veu muiˉ ga ya aeˉ naeˉ nae ciˍ jiˍ. 22Yang na pawngˍ naeˍ uiˉ htiˍ baˍ hkaoˍ veu, Tiˉmoˉseˍ nae Eˉraˍtaˆ nyiˍ hu yaˉ yetˍ na Maˍkeˍdawˉniˆ ang meungˉ veu yang piˉ aeˉ peunˉ yao, yang ang to Aˍsiˆ ang meungˉ veu tiˍ hkaoˍ tiˍ nyamˍ ca saˍ jiˍ.

Eˉfeˉsuˆ vengˍ hkaoˍ veu suk sak laˉ jiˉ awˍ lawng

23Ang nyamˍ hingˍ hkaoˉ veu Ang suingˉ beu ang liˍ ang kawngˍ hingˍ pa nae Eˉfeˉsuˆ vengˍ hkaoˍ veu suk sak naeˉ uiˉ ang byaˍ taw laˉ jiˉ. 24Aˉ mae yao nae baoˉ vaˍ, Deˍmeˍtaˍriˆ nae maengˉ jiˉ hpuˉ htae naeˉ uiˉ changˉ htiˍ hu ang ca. Yawng hpuˉ yuˉ yao Aˍteˍmiˆ hpaˍcaoˍ ang ba na htawˉ kyaˉ htae yao, yang pa nae hpuˉ htae naeˉ uiˉ changˉ ang byaˍ ca pang laˉ jiˉ. 25Yaˇ hpuˉ htae naeˉ uiˉ changˉ na nae haeˉ mae uiˉ kanˉ na vaˍ naeˍ changˉ uiˉ na haoˉ chawnˉ yao ciˍ jiˍ, Ang changˍ yawng veuˉ, kanˉ ningˉ pa nae gu ca pang laˉ jiˉ na nawng ang bae yaˇ. 26Pawˉluˆ niˇ maˇ, changˉ yaˍ uiˍ laˍ puˍ nae hkaˉ taeng jiˉ uiˉ hpaˍcaoˍ htiˍ baˍ uiˍ na hpaˍcaoˍ baˍ aˍ nae ciˍ naeˍ. Caˇ, ningˉ mae ciˍ naeˍ ningˉ ngaˍ Eˉfeˉsuˆ vengˍ hkaoˍ veu naeˍ baˍ aˍ, Aˍsiˆ ang meungˉ naiˍ hkaoˍ veu changˉ ang byaˍ uiˍ na yang tiˍ kaeˍ kaeˍ biˍ yao, nuing ba hpak laˉ naeˉ uiˉ yang ha naeˉ na nawng ya kyaˍ ya myangˉ nga byaˇ. 27Hingˉ pa nae, gu beu kanˉ ningˉ kang hpya laˉ naeˉ na kuitˆ manˍ kyaˍ ca naeˉ htaˍ veu muiˉ, huiˍ mawng ngaeˉ sutˆ nae Aˍteˍmiˆ hpaˍcaoˍ na htawˉ kyaˉ hingˉ htiˍ ceuˍ ang buinˉ baˍ caˍ nae laˉ mae hpeuˍ yao Aˍsiˆ ang meungˉ nae nuingˉ chaˍ htaˍ nawˆ hkaˉ hko laˉ hko koˉ koiˍ naeˍ Aˍteˍmiˆ hpaˍcaoˍ ang ba mangˉ beu ang maengˉ huiˍ yao chaw kangˍ nga aengˉ vaˉ na muiˉ kuitˆ manˍ laeˍ byaˇ nae yang ciˍ jiˍ. 28Ang tangˍ hingˍ na ya kyaˍ beu, yawng nuing ba inˍ cuiˍ cuiˉ yao, Eˉfeˉsuˆ changˉ uiˉ beu hpaˍcaoˍ ang ba maˇ huiˍ mawng ngaeˉ sutˆ yaˇ nae ciˍ yao haoˉ jiˉ. 29Hingˉ mae ha yao, vengˍ hingˍ hkaoˉ veu baˍ taepˍ baˍ yuing nae htiˍ puing hpeuˍ laˉ yao, Pawˉluˆ kawngˉ hkeˍ cangˉ naeˉ uiˉ Maˍkeˍdawˉniˆ changˉ Gaˍyuˆ nae Aˍriˍtaˍhkuˆ nae mangˉ yaˉ yetˍ na yawng kuinˍ awngˍ yao, changˉ ang byaˍ myangˉ lang kyaˉ hingˉ keung huinˍ awngˍ nga laengˉ jiˉ. 30Pawˉluˆ nawˍ, changˉ ang muˉ uiˉ kawngˉ lae siˉ yao muiˉ ta peˍ uiˍ yang na haenˉ jiˉ. 31Pawˉluˆ beu ang changˍ Aˍsiˆ ang meungˉ na up naeˉ uiˉ ang suingˉ htiˍ baˍ uiˍ muiˉ, poiˍ kyaˍ hiˍ keung baˍ awngˍ aeˉ jo nae, changˉ na tawk yaˍ yao yang na ha lae biˍ jiˍ. 32Hpawm lang naeˉ ang muˉ uiˉ, baˍ taepˍ baˍ yuing nae hpeuˍ yao, htiˍ hu htiˍ ceuˍ haoˉ jiˉ. Yawng ba ceuˉ lawng na hpawm lang jiˉ na muiˉ baˍ bae. 33Haeˉ mae beu, Yuˉdaˆ changˉ uiˉ aˍ, Aˍleˍsaˍduˆ nae maengˉ jiˉ htiˍ hu mangˉ na changˉ hiˉ mawk veu mae kaˍ huˍ veu naengˍ awngˍ yao yang hkaˍ muˍ hkaiˍ naeˉ uiˉ saˍ laiˍ, changˉ ang muˉ hkaoˉ veu changˉ uiˉ yang na kaˍ piˍ jiˍ. Haeˉ mae yao yang changˉ ningˉ mawk ningˉ na hkaˍ muˍ hkai biˍ siˍ yao, yang laˍ puˍ kang laeˍ yao maˍ biˍ jiˍ. 34Caˇ, yaˇ Yuˉdaˆ changˉ nae yawng ya bae beu, Eˉfeˉsuˆ changˉ uiˉ beu Aˍteˍmiˆ hpaˍcaoˍ ang ba maˇ, huiˍ mawng ngaeˉ sutˆ yaˉ nae nyiˍ naˍ riˍ laˍ mawk changˉ hkaˉ hko laˉ hko htiˍ htaeˍ laˍ mae haoˉ jiˉ. 35Hingˉ nawngˍ veu, vengˍ veu ceˍ leˍ longˉ maˇ, changˉ ang muˉ uiˉ na, Kyapˆ nae ca voˍ nae ha biˍ yao, yang yawng na ha biˍ jiˍ. Eˉfeˉsuˆ changˉ yawng veuˉ, Eˉfeˉsuˆ vengˍ hingˍ ngaˍ, huiˍ sutˆ mawng yaeˉ sutˆ nae Aˍteˍmiˆ hpaˍcaoˍ na htawˉ kyaˉ hingˉ na baˍ upˍ, buingˍ htaˍ veu kla luiˍ naeˍ awˍ hang sangˉ htuˆ na baˍ upˍ, hak sa naeˉ vengˍ hpeuˍ naeˍ na baˍ bae nae maˇ aˍ sangˍ. 36Ningˉ awˍ lawng ningˉ na hteng lang seuˍ baˍ ca nae yao, nawng kyapˆ nae ca kyaˉ hingˉ htaˍ veu muiˉ, baˍ kuit lae nae vaˍ naeˍ hingˉ na kuitˆ puiˉ laeˍ kyaˉ yaˇ. 37Changˉ ningˉ uiˉ aˍ, htawˉ kyaˉ hingˉ hkaoˉ veu ang keungˍ na hkaoˍ naeˍ nae naemˉ baˍ aˍ, gu beu hpaˍcaoˍ ang ba mangˉ na baˍ saˍ baˍ nyamˍ nae ciˍ naeˍ uiˉ muiˉ baˍ aˍ. Caˇ, yawng na nawˆ kuinˍ awngˍ nga langˉ byaˇ. 38Haeˉ mae yao, Deˍmeˍtaˍriˆ nae yang beu ang changˍ hpuˉ htae naeˉ uiˉ yawng ngaˍ, htiˍ hu hu na kanˉ sing lang baoˉ vaˍ, lumˉ ca yao, ang meungˉ kaˉ seu ang suingˉ huiˍ muiˍ ang ca yaˇ. Yawng taw yawng kanˉ sing nga lang bu. 39Ningˉ htaˍ veu nawng ha siˉ baoˉ vaˍ, ang tangˍ sing naeˉ uiˉ awn hoˉ uiˉ ya ciˍ chae naeˉ. 40Aˉ mae yao nae baoˉ vaˍ, miˉ nuing baˍ taep baˍ yuing nae ha jiˉ ningˍ ngaˍ, htiˍ ceuˍ a tekˆ paeˍ baˍ ca nae pa, hao gu htaˍ veu naˍ hokˍ chiˉ laˍ vaˍ na ang hkae yaˇ. Ba ceuˉ ha yao ningˉ mae hpawm lang naeˉ nae hao naˉ laˍ beu, gu htiˍ ceuˍ hkai laeˍ biˍ seuˍ baˍ ca nae, changˉ hiˉ mawk hingˉ na yang ha biˍ jiˍ. 41Yang ningˉ mae ciˍ peunˍ yao, hpawm lang naeˉ changˉ uiˉ na yang piˉ aeˉ laeˍ jiˍ.

Currently Selected:

Naiˍ htangˍ 19: pyy

Highlight

Copy