Naiˍ htangˍ 16

Pawˉluˆ nae Siˍlaˆ kawngˉ htuˍ yaˍ laˉ mae Tiˉmoˉseˍ aeˉ jiˉ

1Haeˉ mae beu, Pawˉluˆ nawˍ, Deˍbeˍ vengˍ nae Luˉtaˍraˆ vengˍ veu hkeu aeˉ jiˉ. Luˉtaˍraˆ vengˍ hkaoˍ veu Tiˉmoˉseˍ nae maengˉ jiˉ ta peˍ htiˍ hu ca jiˉ. Yang beu ang muing maˇ yumˉ naeˉ uiˉ changˉ Yuˉdaˆ ang ba hpeuˍ yao, yang beu ang vangˉ maˇ Heˍlaˍsaˆ changˉ hpeuˍ jiˍ. 2Ta peˍ hiˍ maˇ, Luˉtaˍraˆ vengˍ nae Iˉkawˉniˆ vengˍ veu duingˉ naeˉ yumˉ naeˉ saˉ naeˉ uiˉ changˉ hkaoˉ veu ang maengˉ ang maenˍ uiˍ changˉ htiˍ hu hpeuˍ jiˍ. 3Pawˉluˆ nawˍ Tiˉmoˉseˍ na yang kawngˉ suiˍ yao lae siˉ naeˉ. Yang beu ang vangˉ Heˍlaˍsaˆ changˉ hpeuˍ naeˍ na hingˉ keung veu ca naeˉ Yuˉdaˆ changˉ uiˉ bae yao, Pawˉluˆ Tiˉmoˉseˍ na ang hkaw haen biˍ jiˍ. 4Yawng vengˍ htiˍ baˍ uiˍ beu hpaiˍ yao aeˉ beu, Yeˍruˆsaˍlaemˍ vengˍ veu ca naeˉ naiˍ htangˍ uiˍ nae changˉ awn hoˉ uiˉ tatˆ chae yao chiˉ jiˉ hingˉ uiˉ na vaˍ yao lae naeˉ uiˉ saˍ laiˍ, htiˍ chaˍ yawng na upˍ kyaˍ biˍ jiˍ. 5Haeˉ mae yao, Hkritˆ yanˍ ang muˉ uiˉ yumˉ naeˉ uiˉ hkaoˉ veu kaˍ ca laˉ yao, cu nuing changˉ byaˍ laˉ jiˉ.

Yuˍ paˍ yongˍ hkaoˍ veuˍ Maˍkeˍdawˉniˆ changˉ na ya myangˉ jiˉ

6Aˍsiˆ ang meungˉ hkaoˉ veu, ang buinˉ tangˍ baˍ ya maˍ naeˍ uiˉ saˍ laiˍ, ang hkawˍ laˉ ang seungˍ sangˉ yang na haenˉ tap yao, yawng Hpuˍgiˆ ang meungˉ nae Gaˍlaˍtiˆ ang meungˉ veu hpaiˍ yao lae jiˉ. 7Muˆsiˆ ang meungˉ veu hkeu lae beu, Beˍtuˆniˆ ang meungˉ hkaoˉ veu awngˉ lae naeˉ nae kuitˆ yao muiˉ, Yeˍsuˆ beu ang hkawˍ laˉ mangˉ yawng na aˉ hkvangˍ baˍ piˍ. 8Haeˉ mae yao, yawng muiˉ Muˆsiˆ ang meungˉ htang kaˉ seu hpaiˍ lae yao, Taˍroˆaˆ vengˍ veu hkeu lae jiˉ. 9Muˍ hkiˍ beu Pawˉluˆ nawˍ, yuˍ paˍ yongˍ hkaoˍ veu Maˍkeˍdawˉniˆ changˉ htiˍ hu cung yao ca naeˉ na ya myangˉ jiˉ. Pawˉluˆ na paˉ yao ciˍ jiˍ yang, Maˍkeˍdawˉniˆ ang meungˉ veu laˉ yao gu na pawngˍ lao nae ha biˍ jiˍ. 10Yuˍ paˍ yongˍ hkaoˍ veu yang ningˉ mae ya myangˉ peunˉ yao, Maˍkeˍdawˉniˆ changˉ na mawnˍ pyawˉ naeˉ uiˉ ang buinˉ tangˍ maˍ naeˍ uiˉ saˍ laiˍ, Hpaˍcaoˍ gu na haoˉ ngangˉ laˍ jaˇ nae ya bae yao, htiˍ chitˍ nae Maˍkeˍdawˉniˆ ang meungˉ veu ya aeˉ naeˉ uiˉ saˍ lai gu ha yae.

Luˆdiˆ yumˉ naeˉ uiˉ changˉ hpeuˍ laˉ jiˉ

11Haeˉ mae yao, gu Taˍroˆaˆ vengˍ veu ca yao Saˍmoˍtaˍraeˆ cunˉ veu keungˉ nae heuˍ ta yao lae yao, kaˉ nawngˍ hingˉ nuing veu Naˍpawˉliˆ vengˍ veu hkeu lae yaeˉ. 12Hingˉ vengˍ hiˍ keung ca yao awkˍ taw aengˉ yao, Hpiˆliˆpiˆ vengˍ veu hkeu lae yaeˉ. Vengˍ hingˍ nga Maˍkeˍdawˉniˆ ang meungˉ hkaoˉ veu Roˉmaˆ changˉ uiˉ chiˉ jiˉ vengˍ ang huiˍ hpeuˍ jiˍ. Gu hiˉ keung iˉ yaˍ ang mangˍ ca saˍ yaeˍ. 13Vanˍ sing nuing hkeu laˉ yao, Yuˉdaˆ changˉ uiˉ ang buinˉ paˉ kyaˉ ang ca baiˉ nae gu kuitˆ yao, vengˍ ang ngiˉ langˉ baˍ htang veu aeˉ yae. Gu hiˉ keung duingˉ beu, hkaˉ laˉ naeˉ uiˉ hkaˍ ba yaˍ uiˍ na maˍ biˍ yaeˍ. 14Haeˉ mae beu, Hpaˍcaoˍ na koˉ koiˍ naeˍ Luˆdiˆ nae maengˉ jiˉ Changˉ ceuˉ htiˍ baˍ uiˍ beu hkaˍ ba yaˍ maˇ gu tangˍ na naˉ yao ca jiˉ. Yaˇ ang huˍ hka yaeˉ sutˆ nae ang hpaenˉ naenˉ pangˉ nae hingˉ kawngˍ naeˍ Saˍtaˍraeˆ vengˍ changˍ yaˇ. Pawˉluˆ beu ang tangˍ hingˍ na naˉ yuˉ naeˉ nae Ang suingˉ Hpaˍcaoˍ yang beu nuing ba hingˉ na hpawng biˍ jiˍ. 15Hkaˍ ba yaˍ hiˍ maˇ, yang beu yumˉ changˉ uiˉ kaˉ hko laˉ hko baˆtiˆsamˍ hkamˉ yuˉ peunˉ naeˉ nawngˍ veu, yang gu na upˍ laˍ jiˍ yang, Gaˇ Ang suingˉ Hpaˍcaoˍ hkaoˍ veu saˉ caˉ yiˍ naenˉ naeˉ uiˉ changˉ hpeuˍ byaˇ nae nawng kuitˆ baoˉ vaˍ, ga beu yumˉ hiˉ keung ca lui voˍ nae ciˍ yao, gu na yang ya caeˉ paˉ laˍ naeˍ. (Tawngˍ tin veu gu aˍ yang haoˉ yuˉ laˍ naeˍ na hap yuˉ yaeˉ).

Pawˉluˆ nae Siˍlaˆ na Hpiˉliˉpiˆ htawngˉ hkaoˉ veu lawngˉ laeˍ jiˍ

16Hingˉ nawngˍ veu gu ang buinˉ paˉ kyaˉ veu lae laeˍ beu, maenˍ bawˍ ang bawˍ hkiˍ yaˍ cenˍ hkaˍ ba yaˍ htiˍ hu gu na lui yao hap yuˉ lui laˍ ngaeˉ. Hkaˍ ba yaˍ hiˍ maˇ maenˍ bawˍ ang bawˍ hkiˍ ang tawk hkiˍ nae yao yang beu yumˉ suingˉ mangˉ muiˉ ang byaˍ ca pang laˉ jiˉ. 17Hkaˍ baˍ yaˍ hiˍ maˇ, Pawˉluˆ nae gu kawngˉ laˉ yao, Changˉ ningˉ uiˉ aˍ, nawng na htaiˍ awkˍ naeˍ uiˉ kaˉ baˍ maˍ laˍ naeˍ, mawng yaeˉ sutˆ nae Hpaˍcaoˍ htiˍ hu beu yaˍ cenˍ mangˍ yaˇ nae yang haoˉ jiˉ. 18Ang nuing ang nyamˍ ang mangˍ yang ningˉ mae ha naeˉ pa nae, Pawˉluˆ baˍ otˍ taw nae hpeuˍ jiˍ. Yang hpap yao deˍ yaˍ uiˍ na ha biˍ jiˍ yang, Yeˍsuˆ Hkritˆ beu ang maengˉ hkaoˉ veu ga nang na kaˍ taw laˍ naeˍ yaˇ, yang hkaoˉ veu awkˍ taw aengˉ bao nae ha biˍ jiˍ. Haeˉ mae beu, tiˍ chitˍ nae deˍ yaˍ mangˍ awkˍ taw aengˉ jiˉ. 19Yang beu yumˉ suingˉ htiˍ baˍ uiˉ aˍ, yawng ca pang laˉ naeˉ nyamˍ baˍ ca jiˉ laˉ nae kuitˆ bae laeˍ beu, Pawˉluˆ nae Siˍlaˆ yaˉ yetˍ na yawng hpui yao, changˉ myangˉ lang kyaˉ veu ang suingˉ htiˍ baˍ uiˍ kawngˉ chuingˉ nga laengˉ jiˉ. 20Yaˉ yetˍ na Roˉmaˆ changˉ vengˍ na upˆ peungˍ naeˍ uiˉ kawngˉ suiˍ laenˉ yao ha biˍ jiˍ hingˉ ngaˍ. Changˉ ningˉ uiˉ aˍ, Yuˉdaˆ changˉ hpeuˍ yao, gu beu vengˍ ningˍ na ang byaˍ ceuˍ tiˍ suk tiˍ sak laˍ yao cangˉ byaˇ. 21Gu Roˉmaˆ changˉ uiˉ hap yuˉ yao baˍ kaˍ, vaˍ yao baˍ kaˍ nae uiˉ ang liˍ ang kawngˍ htiˍ baˍ uiˍ yawng maˍ biˍ yao ca byaˇ nae ha biˍ jiˍ. 22Changˉ ang muˉ ang byaˍ uiˍ muiˉ, Pawˉluˆ nae Siˍlaˆ yaˉ yetˍ htaˍ veu naˍ hokˍ ya caeˉ chiˉ jiˉ.

Ang suingˉ huiˍ htiˍ baˍ uiˉ aˍ, yaˉ yetˍ beu ang kaˍ tum yang chit lakˍ biˍ yao, tamˉ hpeˍ saˉ yao tuiˍ vo nae ang tangˍ piˍ jiˍ. 23Yaˉ yetˍ na ang byaˍ cangˍ tuiˍ peunˍ yao, htawngˉ hkaoˉ veu lawngˉ nga yao, yaˉ yetˍ na maenˍ nae hawˍ yao ca voˍ nae htawngˉ hawˍ hu awn hoˉ htiˍ hu mangˉ na ang tangˍ piˍ jiˍ. 24Htawngˉ hawˍ naeˍ awn hoˉ htiˍ hu mangˉ muiˉ, hao ang tangˍ piˍ naeˍ lawˉ, yaˉ yetˍ na htawngˉ kawngˉ nuingˉ ang hawngˉ hiˉ keung lawngˉ nga yao, laˍ hkuiˍ veu muiˉ tamˉ hpeˍ taeng nga jiˉ kangˉ kan na yao sawˉ hpiˍ biˍ jiˍ.

25Muˍ hkiˍ tiˍ hkuinˍ laˉ mawk ngang beu Pawˉluˆ nae Siˍlaˆ yaˉ yetˍ ang buinˉ paˉ yao Hpaˍcaoˍ na cheuˉ yao chiˍ mawng yao ca jiˉ. Htawngˉ hkaoˉ veu ca naeˉ changˉ uiˉ yaˉ yetˍ beu ang tangˍ hingˍ na naˉ yao ca jiˉ. 26Tiˍ chitˍ nae miˍ siˉ uin haengˍ laˉ yao, htawngˉ tawngˍ pawk yangˍ uin uin an an hpeuˍ laˉ jiˉ. Langˉ kaw hkaˉ hko laˉ hko uiˉ hpawng hko laeˍ yao, changˉ hkaˉ hko laˉ hko uiˉ na hpui yao chiˉ jiˉ samˉ laˍ tuiˍ uiˍ muiˉ hpuiˉ hko laeˍ jiˍ. 27Htawngˉ veu awn hoˉ mangˉ tiˍ chitˍ nae dungˍ laˉ beu, htawngˉ veu langˉ kaw uiˉ hkaˉ hko laˉ hko hpawng hko laeˍ jiˍ na ya myangˉ jiˉ. Htawngˉ changˉ uiˉ hpangˉ hko baoˉ nae kuitˆ yao yang beu mya hingˉ sawt tawngˉ laeˍ yao yang ang to hingˉ na htuing saeˍ laeˍ naˇ nae ha jiˉ. 28Pawˉluˆ kaˍ haengˍ nae haoˉ yao ciˍ jiˍ hingˉ ngaˍ, Nang ang to hingˉ na htiˍ ceuˍ baˍ ha laeˍ jo, gu hkaˉ hko laˉ hko ningˉ keung ang ca yaˇ nae ha biˍ jiˍ.

29Haeˉ mae beu, htawngˉ changˉ awn hoˉ maˇ, yang beu changˉ uiˉ na miˍ htawˍ cawˍ luiˍ lao nae haoˉ yao huinˍ awngˍ nga laengˉ jiˉ. Yang hkae did did naeˉ hkaoˉ veu Pawˉluˆ nae Siˍlaˆ yaˉ yetˍ tawngˍ naˍ veu bawk ngangˉ lae jiˉ. 30Yang yaˉ yetˍ na suiˍ taw aengˉ yao, Ang suingˉ yaˉ yetˍ veuˉ, htaiˍ awkˍ naeˍ ningˉ na ya naeˉ uiˉ saˍ laiˍ ga aˉ mae ya ha naeˇ nae naˉ jiˉ. 31Yaˉ yetˍ ha biˍ jiˍ hingˉ ngaˍ, Ang suingˉ Yeˍsuˆ na yumˉ bao. Nang nae nang yumˉ changˉ uiˉ muiˉ htaiˍ awkˍ naeˍ uiˉ na ya naeˉ yaˇ nae ha biˍ jiˍ. 32Haeˉ mae beu, yaˉ yetˍ muiˍ, htawngˉ awn hoˉ nae yang beu yumˉ changˉ uiˉ na muiˉ Ang suingˉ Hpaˍcaoˍ beu ang tangˍ maˍ biˍ jiˍ. 33Hingˉ hkiˍ hingˍ hkaoˉ veu yang Pawˉluˆ nae Siˍlaˆ na suiˍ laengˉ yao, yaˉ yetˍ beu ang daˉ hpaˉ paw uiˉ na chiˍ biˍ jiˍ. Peunˉ na yao, yang nae yang yumˉ changˉ uiˉ hkaˉ hko laˉ hko uiˉ muiˉ tiˍ chitˍ nae baˆtiˆsamˍ hkamˉ yuˉ jiˉ. 34Hingˉ nawngˍ veu Pawˉluˆ nae Siˍlaˆ yaˉ yetˍ na yang yumˉ veu suiˍ laengˉ yao, taeng ci yao piˉ yaˍ jiˍ. Hpaˍcaoˍ na yumˉ peunˉ naeˉ pa nae, yang nae yang yumˉ changˉ uiˉ hkaˉ hko laˉ hko mawnˍ pyawˉ jiˉ.

35Buingˍ paenˉ laˉ beu, Roˉmaˆ changˉ na upˆ peungˍ naeˍ uiˉ muiˉ, paˍ lekˆ uiˉ na piˉ aeˉ yao, changˉ yaˉ yetˍ na poiˉ nga bao nae ha aeˉ biˍ jiˍ. 36Haeˉ mae beu, htawngˉ awn hoˉ htiˍ hu ciˍ tangˍ hingˍ na Pawˉluˆ na ha biˍ jiˍ yang. Naˉ yetˍ na poiˉ nga voˍ nae Roˉmaˆ changˉ na upˆ peungˍ naeˍ uiˉ changˉ na caiˍ ya laˍ jaˇ. Hingˉ pa nae ya muiˉ awkˍ taw aengˉ yao kuitˆ mawnˍ kuitˆ pyawˉ naeˉ hkaoˉ veu aeˉ voˍ nae ha biˍ jiˍ.

37Caˇ, Pawˉluˆ yawng na ha biˍ jiˍ yang. Gaˉ yetˍ Roˉmaˆ ang meungˉ changˉ hpeuˍ yao muiˉ, aˉ muˍ baˍ tatˍ ngangˉ beu, hao tawngˍ naˍ veu gaˉ yetˍ na tuiˍ laˍ yao htawngˉ hkaoˉ veu lawngˉ nga laˍ jiˍ. Ya muiˉ kyap kyap nae hkaoˉ veu gaˉ yetˍ na poiˉ laˍ naeˍ la. Ningˉ mae baˍ aˍ. Yawng na luiˍ biˍ yao gaˉ yetˍ na poiˉ lui lao nae yawng na ha biˍ jiˍ.

38Pa lekˆ htiˍ baˍ uiˍ, Roˉmaˆ changˉ na upˆ peungˍ naeˍ uiˉ na hkai kyaˍ lae biˍ beu, yaˉ yetˍ aˍ Roˉmaˆ changˉ jiˉ leˍ nae ya kyaˍ yao yawng hkae jiˉ. 39Yawng yaˉ yetˍ kawngˉ laˉ yao, yawng beu ang si hingˉ uiˉ poiˉ a lao nae paˉ jiˉ. Haeˉ mae yao, yaˉ yetˍ na yuˉ awkˍ luiˍ yao, vengˍ hingˍ hkaoˉ veu awkˍ taw aengˉ voˍ nae paˉ jiˉ. 40Haeˉ mae beu, yaˉ yetˍ htawngˉ hkaoˉ veu awkˍ taw aengˉ yao, Luˆdiˆ beu yumˉ hkaoˉ veu aeˉ jiˉ. Yaˍ changˍ mawngˉ namˉ uiˉ na ya myangˉ beu, yawng na kaˍ piˍ htaengˍ peunˍ yao, yaˉ yetˍ vengˍ hingˍ hkaoˉ veu awkˍ taw aengˉ jiˉ.

Currently Selected:

Naiˍ htangˍ 16: pyy

Highlight

Copy