Markut 13

Yesu a̱ tyyei ka̱sak ka ba nin byyan bat Ka̱za na ni

(Matta 24:1-2; Luka 21:5-6)

1Ka̱ram ka Yesu na̱n wwut i bat Ka̱za na ni, a̱yanyet ka̱yat na̱won pfong nu ka a̱ hywa, “Malam! Kaai! Cyang na̱sham na̱nok ani bu taka̱i nkpang ani!”

2Yesu a̱ hywa, “Nom yaan bai, a̱cecet na̱nok ani yi ci-cyang ani ni ba ni na̱ hwwei, di kpang zaan zi bu ni swrang ka̱rek shyi nji ba.”

Ka̱ram ka̱bvung

(Matta 24:3-14; Luka 21:7-19)

3Na̱ bu si swrang tazwa tsok ka ban yei Zeitun nu ni, ti shyi a̱ta̱ssi bat Ka̱za ka, ba̱nyet Bitut bu Yakubu bu Yohana bu Andrawut a̱ ba di Yesu ka̱nrang. 4Ba bu zzim Yesu a̱ hywa, “Nkyang ani a ryat i, a̱nzan ka̱ram na ni i ba? A̱nzan zi ni ryi i gi bvwo ka̱ram ka yya?”

5Yesu a̱ hywa da̱ mba, “Yi ta̱rwam a̱yin na̱ bu ya tyyi digrap. 6Ba̱nyet ba̱gingang a̱ ni ba i diyrek nzuk a̱ hywa, ‘Nzuk n yet Kristi nu.’ A̱ si tyyi ba̱nyet ba̱gingang digrap. 7Yi ni pfong nkhang nzwang, ko shishrek ko gba̱gbang. Yi ryok hok ka̱wun ba, nkyang iya dolet na ni ba, a̱ngbom u a̱ si ba. 8Na̱byen a̱ ni kwan bu na̱yaan; a̱tityok a̱ ya yrek ba̱ a̱tityok. Na̱bvwa ba̱gingang i ka̱sa ka a̱ ni kyrim a̱ ta̱ruk. Ba ni yya zong ba̱gingang. Nkyang a ni ryi di ka̱hwa ron mbyin ka̱ssi ni.

9“Nyin yi ta̱rwam ba̱t. Ba ni ya kwak a̱ cong i a bat ntwrang. Ba ni ya pyyem a̱ tsot a a̱bat a̱duwa i diyrek nzuk. Ba ni ya kwak a̱ cong i a̱ta̱ssi ba̱cecet ba̱gwam. Yi ni sseng i ba̱ tyyei Ka̱sham Ba̱ryat nzuk ka. 10Ma kozan ba̱nyet a̱ ni yen hok Ka̱sham Ba̱ryat nzuk ka ka̱ram ka a̱ si yya. 11Ki ba ya pyyem a̱ nat i i bat ntwrang a, yi ryok yya a̱huhwa nkyang a yi ni hywa ni ba. Ki ka̱ram ryat nyin ka a̱ ba, yi ryat kyang a Tswa Ka̱za ji nji ni ryat. 12Ba̱yanyet a̱ ni pyyem ba̱wumbeyang mba a̱ wrak ba hywaai. Ba̱tyyi a̱ ni pyyem na̱won mba a̱ wrak ba hywaai, na̱won na̱yaan meyang a̱ ma̱ ni yya a̱mi bu ba̱tyyi mba ba. 13Koyan a̱ ni ya rak, rot yi yet ba̱ nzuuk. Ma a̱yin nu a̱ sseng a̱ si tat a̱ngbom u ni, nu a̱ ni kaat.”

Nkyang ka̱wun

(Matta 24:15-28; Luka 21:20-24)

14“Yi ni ryi a̱ka̱tuk na̱ sseng ka̱rek ka a̱ myyim ni ba, a̱ tyei dishishik. (A̱yin nu a̱ twang i na̱ hok a̱ maai!) To, ba̱nyet ba a̱ shyi Yahudiya ni ba tyong a̱ ban tsitsok. 15A̱yin nu a̱ shyi tazwa bat i, na̱ ryok cat kyrek ba ka̱yat ka̱ryi a̱ cat sook kyang ba. 16A̱yin nu a̱ shyi ka̱rek keyak ni na̱ ryok cat yen nat ka̱ryi a̱ ga si sook a̱godo ba. 17Ka̱tuk iya ka̱bvung a̱ ni tuk ba̱nyring na̱hwa bu ba̱naa zzwa na̱won. 18Yi naai Ka̱za nkyang a ni i ryok ba i dikwei ba. 19Ka̱bvung ka a̱ ni nwa ka̱ram iya ni ba ka̱n dyi taka̱i iya ba; nyyai Ka̱za kan yya ka̱sa ka hat bu tat ka̱pfun di ba bo ni ryi ba. 20Ma A̱gwam Ka̱za a̱ ka̱n ywwai ka̱tswa nom iya, rot ba̱nyet ba na̱ tssa ni. Ka nan dyuk yya a̱mi ba, da ba a̱yin nu a̱ ni kaat ni ba.

21“Ka̱ a̱yin a̱ hywa da̱ nyin, ‘Dyi Kristi a̱ nuu ni!’ ko ‘A̱ shyi ka̱yaa ni!’ yi ryok shim ba. 22Ba̱yanyet a̱ ni ba a̱ ya yei Kristi ko ba̱nyet tyyei ba̱ryat Ka̱za i diraa. Ba ni yya nkyang ka̱hat ba̱gingang a̱ tyyei cet mba na a̱ ga shya diwat raai ba̱nyet ba a̱ yet ba̱nyyi Ka̱za ni. 23Nkpa n ni ya tyyei maani ni yi gi bvwo ka̱sak ka yi nin ya tot i ka̱ram iya a̱ si wa bvwa a̱n ba.”

Bai Ka̱won A̱neywu

(Matta 24:29-31; Luka 21:25-28)

24“Ki a̱ka̱tuk nom a̱ywu a̱ seyak, nom nwa tyei ryin, di hywan ku bu ni sai ba. 25Na̱ta̱ngwat a̱ wwut nyyai ntazwa a̱ bu kwei, a̱cecet na̱bvwa nu ntazwa ka a̱ nwa zun. 26Ka̱won A̱neywu a̱ si hyok ka̱yat a̱ninyyan bu a̱gba̱dang cet bu shisham. 27A̱ ni tom ba̱pfong Ka̱za ba nwa ka̱sa ka sa̱rei a̱ tung ba̱nyet ba na̱ tssa ba yet ba̱ nu ba ni, sa̱rei a̱zi gba̱gbang -- dityin, a̱jenshring, bu ka̱za bu ka̱tak.”

Yi cam ka̱kon a̱bvap ka

(Matta 24:32-35; Luka 21:29-33)

28“N cat yi myyam kyang tazwa ka̱kon a̱bvap. Ka̱ram ka yin dyi a̱bvap na̱ trung a̱hwai a̱pipyyi ni yi bvwo dikwei bvat ba̱ cincong i kpa. 29A̱mi meyang, ka̱ram ka yin dyi nkyang ani ni, yi bvwo ka̱ram ka a̱ bvat ba̱ cincong. 30Yi ryok bring ba. Nkyang ani sa̱rei ni ba, ba̱nyet ba a̱n shyi ba̱nyying i ba ri sso. 31Tazwa bu ka̱byen ni tyak, ma ba̱ryat nzuk ba ni tyak ba.”

A̱yin a̱ bvwo ka̱ram ka ba

(Matta 24:36-44)

32“Ma a̱yin a̱n shyi a̱ bvwo nom iya ba, di ba̱pfong Ka̱za ba di Ka̱won ka. Se A̱tyyi nu ba̱diyin a̱ bvwo nom a. 33Se yi cam ansham rot yi bvwo ka̱ram ka ba. 34Ku ryi da̱ a̱ntyok ka̱ryi nu a̱ drok a̱ naat cyet, a̱ yei ba̱kwwa ba sa̱rei ka̱ryi ka koyan na̱ ku tyyi pfong nu. Wwon a̱ si tyyi a̱ntyok tot ka̱ryi nu cam a. 35Se yi cam ansham, rot yi bvwo ka̱ram ka a̱ntyok ka̱ryi nu na̱ nin brek ni ba. Shim na̱ ba a̱ jenshring, ko a̱kwop a̱ta̱tuk, ko a̱ta̱ntson, shim na̱ ba a̱shong a̱ntson ma. 36Ka̱ ya bvwa n bring, ku myyim na̱ bi shya yi shyi nda ba. 37Kyang a n ya tyyei naani nkpa n bo n tyyei koyan: Yi cam ansham!”

Currently Selected:

Markut 13: kaj

Highlight

Copy