Markut 12

Ba̱nyet keyak nkrum

(Matta 21:33-46; Luka 20:9-19)

1Yesu a̱ bo nwa ba̱ zzek ka̱yat misalai, a̱ hywa, “A̱yanyet a̱ jyi ka̱byen ba̱lemu nu, a̱ ka̱ krang da̱ a̱guk. A̱ jyi na̱bvwa hywu ba̱lemu na ansham. A̱ si bo tyyi ka̱bvwa tot. A̱ wwon an bvak ba̱nyet keyak nkrum, a̱ drok a̱ nat nkwan. 2Ka̱ram kpyei lemu ka a̱ bu yya, na̱ tom a̱kwwa nu di ba̱nyet keyak ba, na̱ bu san disum ti. 3Ba̱nyet iya a̱ si ku pyyem a̱ ku tyyi tsot a̱ ku tun mbvak kwot. 4Na̱ bo tom a̱kwwa a̱yaan. Ba bo si ku pyyem di tsot sa̱rei diccu ti a̱ ku tyyi nsum ba̱t. 5Na̱ bo tom a̱yanyet, ba si ku hywat. A̱mi na̱ bo tssop ba̱kwwa ba̱yaan. Ba ba̱ tsot, a̱ hywaai ba̱yanyet. 6Ba̱nyying, a̱ ma bvat ba̱ a̱yanyet a̱yring. Nu a̱ yet ka̱won ka na̱n byyi rya ni. Na̱ ka̱ tom a̱ hywa, ‘N bvwo ba ma̱ naat a̱ si ku san a̱za̱n shok.’ 7Ma bu hyok nu ba̱nyet keyak ba a̱ rop ka̱nu a̱ hywa, ‘Ka̱won nu ka a̱ yemi a̱ bai. Zi ka̱ hywat i kok digado ti.’ 8Ba ka̱ pyyem a̱ hywat a̱ ka̱ sook a̱ ta a̱ma a̱guk ka.

9“To, a̱nzan yi hwa da̱ a̱ntyok ka̱byen nu a̱ ni yya? A̱ ni ba bu ba̱ hywaai a̱ san ka̱byen ka a̱ wrak ba̱yanyet. 10Ashe yi ka̱n twang ba̱ryat Ka̱za bani baa, ka̱sak ka ban hywa,

‘Kpang ji ba̱nyet dinok ba rak i

nji a̱mi ba si sak zi yet ka̱gwut ka.

11Nkpa A̱gwam Ka̱za na̱ yya; ku za yet kyang ka̱hat.’ ”

12Ba̱cecet ba̱nyet Yahuda ba a̱ hok kyang a na̱ ryat i a̱ maai. Mba a̱mi na̱ ryat a̱ ba̱ kwot i. Ba nwa cat ryen ku pyyem, ma a̱ bo pfong ka̱wun ba̱nyet ka; rot a̱mi ba drok a̱ ku wwon.

Trang diga̱ndu da̱ a̱gwam Rom

(Matta 22:15-22; Luka 20:20-26)

13Ba tom ba̱nyet Farisa a̱yaan bu ba̱nyet tssup Hirudut ba si zzim Yesu nkyang nzaan a̱ ku tssem. 14Ba ma̱ nyyai a̱ ba, a̱ bu hywa da̱ nu, “Malam, zi bvwo a ryat ka̱ryong; a tyong a̱ssi ba̱nyet ba, da̱ nwan pfong ka̱wun a̱yin ba. A zzek nkyang a Ka̱za ka cat ba̱nyet a̱ yya ni di ka̱ryong. Zi cat a za tyyei, ku myyim zi trang diga̱ndu njit ti da̱ a̱gwam Rom? Ku myyim zi trang o, ki zi ryok trang ba?”

15Yesu a̱ ryi a̱ bvwong ka̱sak ka ban cat ku tssem a ni. A̱ hywa da̱ mba, “A̱nzan a̱n byyi yin ba n tssem a? Yi ba di krum ji ban trang diga̱ndu ti ni zi yen dyi.”

16Ba ku ryi a̱yring. Na̱ ba̱ zzim, “Ma̱nwwuk a̱nyan bu diyrek a̱nyan shyi an krum jini?”

Ba hywa, “Ba̱nyyi a̱gwam Rom sa̱rei.”

17Yesu a̱ hywa, “Yi wrak a̱gwam Rom kyang a yet nnu ni i ma̱ wrak Ka̱za ka̱sak nka.”

Ka̱hat i ba̱ pyyem ba̱gingang.

A̱mbyring u a̱ yreng ba̱wumbeyang a̱tiyring ni

(Matta 22:23-33; Luka 20:27-40)

18[Ba̱nyet Sadusi a̱ ma̱ yet ba̱nyet Yahuda. Ba zzek da̱ a̱yin a̱ na kwu ba ku nyat, da̱ bo ta̱za ba.] Ba ba di Yesu a̱ bu hywa da̱ nu. 19“Malam, Musa a̱ yin za jem i di ka̱ a̱yin a̱ kwu a̱ wwon a̱mbyring na̱ ku byyi ka̱won ba, a̱wumba nu nu a̱ sak a̱mbyring u a̱ ga ku shya byik. 20A̱yanyet a̱ yin byyi na̱won a̱tiyring. A̱yekwo ka̱won nu a̱ bvwa a̱mbyring; ma a̱ kwu na̱ ku byin ka̱won ba. 21A̱tuba nu a̱ sak a̱za̱ nu ni a̱ ma̱n sak a̱mbyring u, a̱ ma̱n kwu na̱ byin ba. A̱mi meyang a̱mba̱tat u. 22Kpikpit a i ma̱ saai a̱mbyring u a̱ kwi hat si tat a̱mba̱tiyring u di ba shya ka̱won ba. A̱ngbom u a̱mbyring u a̱ ma̱n kwu. 23To, ka̱tuk ka ba̱nyet ba̱sa̱rei ba nin ta̱za ni a̱nyan a̱ ni yet a̱ntyok a̱mbyring a̱ywu? Ba̱ntyok iya ba̱ mba a̱tiyring a̱ ka̱n ku breng.”

24Yesu a̱ hywa da̱ mba, “A̱nzan a̱ ya ba? Kyang ba, se bu wi n tyyi a̱ccu nyin i twang ba̱ryat Ka̱za. Nkpa n byyi yi wai bvwo cet Ka̱za. 25Ka̱ram ka ba̱nyet ba nin drok a̱yabyen ni ba ni swat di ba̱pfong Ka̱za ni. A̱ra̱ntyok a̱ ni bvwa a̱mbyring ba, da̱ a̱mbyring na̱ ni yreng ba. 26To, da̱ni di ba̱ryat ta̱za ba̱nyet a̱kukwi ni, ki yi bu yring ka̱yat ba̱ryat Ka̱za ka Musa na̱ yin jem ni, ka̱ram ka Musa na̱ yin dyi ka̱hwwong ka ka ya rong a ni, Ka̱za a̱ hywa da̱ nu, ‘Nzuk a̱mi n yet Ka̱za ba̱nyet Ibrahim bu Ishaku bu Yakubu.’ 27(Zi bvwo ba̱nyet bani a̱ ri shyi bu sucet, rot) zi bvwo a̱ yet Ka̱za nkom ba, se ba̱nyet nsso. Yi ywap ba̱gingang.”

A̱gba̱dang truwang

(Matta 22:34-40; Luka 10:25-28)

28Malam truwang a̱yaan a̱ yin shyi ka̱bvwa ba̱ryat kani a̱ hok ka̱sak ka Yesu na̱ shim ba̱nyet Sadusi na zzim mba na ansham ni. Na̱ ma̱n zzim Yesu a̱ hywa, “A̱nzan a̱ yet a̱gba̱dang truwang nu Ka̱za ka za ryi ni?”

29Yesu a̱ hywa da̱ nu, “Kyang a a cat hok ani ku yem ee? Da̱ hok! ‘Yi rot a̱pfo i hok, nyin Isreila! Ka̱za nka ba̱diyin a̱ yet A̱gwam njit u. 30A nin tyyi rya nwan, bu sso nwan, bu pfwa nwan na, i tun sa̱rei cet nwan na, nka̱ gwai.’ 31A̱mba̱hwa na̱nu a̱ yet: ‘A ni gwai a̱wumba nwan ka̱sak ka an ya gwai ni.’ Kyang yaan i shyi Ka̱za ka cat da̱ njit a̱ ran bu nkyang hwa na ni ba.”

32Malam a̱ywu a̱ hywa di Yesu, “Kaai, Malam, n na̱ jyat i! Ka̱ryong a̱mi a hywa, A̱gwam Tazwa ba̱ nu a̱ yet Ka̱za njit ka; zi byyi Ka̱za ka̱yaan ba. 33Koyan a̱ ni gwai Ka̱za di rya nu sa̱rei, bu cet a na̱ byyi ni, a̱ si bo gwai ba̱wumbeyang ka̱sak ka na̱ ya gwai ni. Nkyang nhwa na ni ran bvon ji zi hwak i bu nkyang nzaan na zi cong n yya Ka̱za ba̱hyum ba ni.”

34Yesu a̱ ryi ka̱sak ka na̱n ku ssip i ansham i, a̱ hywa da̱ nu, “A bvat ba̱ cincong i san Dityok Ka̱za ti.”

Ba bu tyak ba̱ryat mba ba, kpikpit ba̱nyet a i hok, koyan a̱ nwa pfong ka̱wun ba bu zzim Yesu nkyang nzaan.

Yesu a̱ yya ni a̱n yet ka̱mbvon Dawuda?

(Matta 22:41-46; Luka 20:41-44)

35Ka̱ram ka Yesu na̱n shyi zzek a i bat Ka̱za na ni, a̱ ba̱ zzim a̱ hywa, “A̱nzan a̱n byyi ba̱malam truwang ba ba nan hywa di Kristi a̱ yet ka̱mbvon Dawuda? 36Tswa Ka̱za ma yin tyyei Dawuda, na̱ hywa,

‘A̱gwam Tazwa a̱ hywa da̱ A̱gwam nzuk u,

Swrang an bvak yak nzuk a,

se ka̱ram ka n ni tyyi ba̱ra̱ndwan nwan sa̱rei ka̱tak ka̱ntai tak nwan ka ni.’

37Ki Dawuda a̱ ku yei A̱gwam, a̱ bo ni cong ni a̱n yet ka̱mbvon Dawuda?” Ba̱nyet ba̱gingang a̱ yin tung, a̱ hok ansham zzek nu na.

Yesu a̱ kam ba̱malam truwang

(Matta 23:1-36; Luka 20:45-47)

38Na̱ shyi ba̱ zzek a a̱ hywa da̱ mba, “Yi ta̱rwam bu ba̱malam ba a̱ zzek Truwang ji ni, mba ba̱nyet tssup ba̱cecet ba̱tro, ki ba swrap ka̱nu nkasuwa ba̱nyet a̱ ba̱ byei a̱ myyi ka̱byen a̱ ba̱ kok ntong. 39Mba a̱ na tssa a̱cecet na̱bvwa sswak a a̱bat a̱duwa bu na̱bvwa dihywa. 40Mba a̱ na bvuk ba̱nyring sang ba̱ntyok, a̱ ssang na̱sa mba na. A̱wwon a̱ si sseng a̱ nwa a̱jinjing a̱duwa. Ka̱za a̱ ni ba̱ nyyek a̱ ra̱u koyan.”

Ka-kyang a̱kukwo a̱mbyring

(Luka 21:1-4)

41Yesu na̱ swat a̱mbeyang bat Ka̱za ka shishrek bu ka̱bvwa saai nkrum ka, a̱ cyang ba̱nyet ba wwat ka-kyang na. Ba̱nyet byyi zwa ba̱yaan a̱ kwot krum ba̱gingang. 42A̱kukwo a̱mbyring a̱yaan, a̱ byyi a̱ntyok ba, a̱ nyyai a̱ bu ndot kobo. A̱ yin byyi dizot ba̱t. 43Yesu a̱ yei na̱won pfong nu na sa̱rei ka̱bvwa ka̱yring, a̱ hywa da̱ mba, “Yi ryi a̱kukwo a̱ra̱mbyring a̱ni. Kyang a na̱ krok ka̱bvwa kwot krum kani ku ra̱u nkyang a kpikpit ba̱nyet a ba wwat i. 44Rot ba̱nyet nzwa ba a̱ tun ba̱ cincong ka̱yat a̱ duniya ka ba byyi ni. Ma a̱kukwo a̱ra̱mbyring a̱ni a̱ wrak sa̱rei kyang a na̱ byyi i swat ka̱sa nu ka ni.”

Currently Selected:

Markut 12: kaj

Highlight

Copy