Markut 14

Ba rop ka̱nu a̱ ni pyyem Yesu

(Matta 26:1-5; Luka 22:1-2; Yohana 11:45-53)

1Ka̱ram iya ba bvat bu nom hwa a̱ nwa dihywa Swrap wwon ji bu dihywa ya burodi sang yisti ji. Ba̱cecet ba̱gado Ka̱za ba bu ba̱malam truwang ba a̱ nwa cat ryen na ba nin pyyem Yesu i ka̱nrang a̱ ku hywat i. 2Ba ya tyyei a̱ hywa, “Ki zi rak ba nwa dihywa ji zi si ku pyyem, ku ni tyyi ba̱nyet ba a̱suswak.”

Ba krok Yesu ba̱myyi i Baitanya

(Matta 26:6-13; Yohana 12:1-8)

3Yesu na̱ shyi Baitanya gbang Siman, a̱nyyi nu a̱ yin byyi gbap a ni. Ka̱ram ka na̱n shyi ya kyangya ni, a̱mbyring a̱yaan a̱ nyyai bu ka̱sham ba̱myyi a shep, ba byyi krum ba̱gingang. A̱ hwwei shep ji a̱ brak ba̱myyi ba a̱ krok Yesu mi diccu. 4Ba̱yanyet ka̱bvwa ka a̱ hok rya ya. A̱ nwa ya zzim, “A̱nzan a̱ yet a̱nyyi byyan ba̱myyi bani? 5Ba̱myyi bani a̱ maai ba ba̱ ryap krum pfong nom ncyi tsat a̱ ka ba̱nyet dizot krum ji.” Ba hok rya ya ba̱ nu ba̱gingang.

6Yesu a̱ hywa da̱ mba, “Yi ku ryok ba̱shinshwon. Hok a̱nzan yin ku dama? A̱ yya ka̱sham nkyang. 7Nyin kozan ka̱tuk yi shyi bu ba̱nyet dizot ba; ka̱ram ka yin cat ba̱ brang ni yi ba̱ brang. Wwon nzuk n shyi ba̱ nyin kozan ka̱tuk ba. 8Kyang a na̱ maai yya ni nkpa na̱ yya. A̱ n krok ba̱myyi bani a̱n tot ka̱ram ka ba ni nin nyat i. 9N cat yi swat bvwo ko ke i ka̱sa ka ni ban tyyei Ka̱sham Ba̱ryat kani, ba ni tyyei kyang a a̱mbyring a̱ni na̱ yya ni a̱nta̱mak, ba ga yring kyang a na̱ yya ni.”

Yahuda a̱ rop ryap Yesu

(Matta 26:14-16; Luka 22:3-6)

10Wwon Yahuda Iskariyoti nu, a̱ shyi ka̱yat ba̱pfong swak bu ba̱hwa Yesu ka ni, a̱ drok a̱ nat di ba̱cecet ba̱gado Ka̱za ba, a̱ ga si ba̱ brang ba pyyem Yesu. 11A̱ si ryat ba̱ mba, ba gwai ba̱gingang, a̱ ku ryi ka̱nu mba di ba ni ku tan krum. Wwon Yahuda a̱ nwa cat diwat ti na̱ nin wrak Yesu an bvak ba̱nyet Yahuda na ni.

Yesu a̱ ya Swrap wwon bu na̱won pfong nu na

(Matta 26:17-25; Luka 22:7-14, 21-23; Yohana 13:21-30)

12Ka̱tsitsrang nom ka ba nwa dihywa ya burodi sang yisti ji ni, ka̱tuk iya nka ba ryin hwak ba̱truk ba ba ni ya ka̱tuk dihywa Swrap wwon ka ni, na̱won pfong Yesu na a̱ ku zzim a̱ hywa, “Ke a̱mi an cat ba si na̱ jyi nkyangya Swrap wwon nwan na?”

13Yesu a̱ tun na̱won pfong na̱hwa a̱ tom, a̱ hywa da̱ mba, “Yi nat ka̱yat ka̱nkrang ka, yi ni mon ba̱ a̱ntyok a̱yaan na̱ ccok ka̱ssung ba̱shekwot. Yi ku tssup 14nat ka̱ryi ka na̱ si nwa ni, i hywa da̱ a̱ntyok ka̱ryi nu, ‘Malam a̱ hywa di zi bu na̱ zzim bat a nu bu na̱won pfong nu na ba nin za dihywa Swrap wwon ji ni.’ 15A̱ ni ya tyyei a̱gba̱dang bat ntazwa nu ba ka̱n jyi ni. Yi nwa i jyi nkyangya na ka̱ yemi.”

16Na̱won pfong a a̱ nat a̱ ma̱ si shya kozan kyang ka̱sak ka Yesu na̱n ba̱ tyyei ni; ba jyi nkyangya dihywa na.

17Ka̱jenshring ka bu yya Yesu a̱ ba bu ba̱pfong nu ba, ba̱ mba swak bu ba̱hwa. 18Ka̱ram ka ban swrang an tebur a̱ shyi ya nkyangya na ni, Yesu a̱ hywa da̱ mba, “N ya tyyei naani, a̱yanyet ka̱yat nyin a̱ cat n pyyem a̱ wrak ba̱gado Ka̱za. Nu a̱mi a̱ ya ba̱ nzuk.”

19Ba̱pfong nu ba sa̱rei a̱ sook a̱ka̱tuk a̱huhwa, a̱ nwa ku zzim ba̱ yayring, “N bvwo nzuk ba, ka̱ni?”

20Yesu a̱ hywa da̱ mba, “A̱yin nu a̱ shyi bu ka̱yat nyin, swak bu ba̱hwa ba. A̱tuba nu a̱ ssop bvak nu i ryei yring ba̱ nzuk i, nu a̱mi. 21Ka̱won A̱neywu a̱ ni kwu ni di ba̱ryat Ka̱za ba ban za tyyei ni, ma a̱yin nu a̱ ku wrak i a̱ ni tyyi kyang kak. Ba da wu wi ku byin da ku ku ran.”

Jibi A̱gwam Yesu

(Matta 26:26-30; Luka 22:14-20; 1 Korinti 11:23-25)

22Ka̱ram ka ban shyi ya nkyangya na ni, Yesu a̱ sook dikwang burodi ti a̱ gwai Ka̱za mi a̱ sam a̱ ka ba̱pfong ba, a̱ hywa da̱ mba, “Yi nga; rwam nzuk a̱mi.”

23A̱ si bo sook ka̱bandyet ka, a̱ gwai Ka̱za mi, a̱ ba̱ ryi ba sswa ba̱sa̱rei mba. 24Yesu a̱ bo hywa da̱ mba, “Ba̱sok nzuk bambaa ni, ba̱nyyi ba ba weyang rot ba̱nyet ba̱gingang i. Mba a̱mi a̱n shyi ka̱nu nkyang ka Ka̱za ka yin dop a̱wwon bu ba̱nyet ni. 25Ka̱ryong n ya tyyei, n bo ni sak ka̱ndyet kani ka̱nu nzuk ba, se ka̱tuk ka n si n sswa a̱hwai u i Dityok Ka̱za ti ni.”

26Ba tyak, a̱ bvom a̱bvom, a̱ wruk a̱ nat an tsok ji ban yei Zeitun nu ni.

Yesu a̱ tyyei ka̱sak ka Bitut na̱ nin ku ton ni

(Matta 26:31-35; Luka 22:31-34; Yohana 13:36-38)

27Yesu a̱ hywa da̱ mba, “Yi ni tyong ba̱sa̱rei n wwon, rot ba̱ryat Ka̱za a̱ hywa, ‘Ka̱za a̱ ni hywat a̱ntyok a̱tsaai u, bvon-tsaap ji i rot hwwei.’ 28Ma ka̱ram ka Ka̱za ka ni n yrek ni, n ni yet ka̱son nyin i nat ka̱byen Galili.”

29Bitut a̱ hywa, “Ko ba̱nyet ba a̱ tyong ba̱sa̱rei a̱ na̱ wwon, nzuk i ni tyong nat ka̱rek ba!”

30Yesu a̱ hywa da̱ nu, “Se a bvwo a̱ta̱tuk ka̱pfun a ni ton da̱ a n bvwo ba bvwa ka̱tat, a̱ngbak na̱ ka̱n tyyak a̱ bvat ka̱hwa ba.”

31Bitut a̱ bo hywa di cet, “Ko ka̱nu dikwu n ni na̱ ton ba.”

Kpikpit ba̱pfong a i ma̱ hywa a̱mi sa̱rei mba.

Yesu a̱ yya a̱duwa a ka̱byen Gesamani

(Matta 26:36-46; Luka 22:39-46)

32Ba nyyai a̱ ba ka̱bvwa ka̱yaan, ba ka̱ yei Gesamani. Yesu a̱ hywa di ba̱pfong nu ba, “Yi swrang kyi n nat n yya a̱duwa.”

33Na̱ yei Bitut bu Yakubu bu Yohana ba nat ba̱ nu. A̱huhwa bu ka̱wun a̱ ku pyyem. 34Na̱ hywa da̱ mba, “N pfong a̱nye a̱huhwa a̱ ni n bvwa. Yi yen swrang kyi i cam.”

35A̱ shek ba̱ cincong, a̱ kpa ka̱byen, a̱ naai Ka̱za ki ku myyim na̱ nwa i ka̱bvung ka a̱ shyi a̱ta̱ssi nu ni ba. 36A̱ hywa, “A̱tyyi nzuk! A̱tyyi nzuk! N tun i ka̱bvung kani. Kyang n shyi na̱ kaat ba, ma kyang a n cat i nkpa a ni yya ba, se kyang a a ryi ku myyim i.”

37Na̱ brek a̱ ba di ba̱pfong iya ba̱ mba ba̱tat, a̱ bu shya ba shyi nda. Na̱ hywa di Bitut, “Siman, a shyi ndaa? Ashe a ni maai swat a̱cet tat ka̱ram ka̱yring baa?” 38A̱ hywa da̱ mba, “Yi cam i yya a̱duwa ho yi bu nwa a shishik. Tswa zi cat, ma rwam a byyi cet ba.”

39A̱ bo brek a̱ nat a̱ bo si yya a̱duwa nu a̱ ryat di ka̱son ka ni. 40A̱ bo brek a̱ ba di ba̱pfong nu ba a̱ bu shya ba bo shyi nda, ba maai yrang a̱ssi mba na ba. Ba ma ryin kyang hywa.

41Na̱ bo brek a̱ nat a̱ bo si ba ka̱tat ka a̱ bu hywa da̱ mba, “Yi ri shyi ba̱ ndaa? Yi yem pfwi o? Nda na maai a̱mi! Ka̱ram ka a̱ yya! Ba̱nyying ka Ka̱won A̱neywu a̱ nwa an bvak ba̱ka̱tuk ba̱nyet. 42Yi ta̱za zi cong! A̱tuba nu a̱ cat n dyap a ni a̱ yemi a̱ ba!”

Ba pyyem Yesu

(Matta 26:47-56; Luka 22:47-53; Yohana 18:3-12)

43Yesu a̱ ka̱n tyak ba̱ryat ba ba, Yahuda a̱ nyyai a̱ ba, a̱ shyi ka̱yat ba̱pfong swak bu ba̱hwa Yesu ba. A̱ nyyai a̱ ba bu ka̱tswa ba̱nyet, ba̱yanyet ba breng na̱krong a̱kpat, ba̱yanyet shan. Ba̱cecet ba̱gado Ka̱za bu ba̱malam truwang bu ba̱nekwo a̱mi a̱ yin ba̱ tom. 44To, a̱tuba nu a̱ ku ryap i a̱ ka̱ ba̱ hywuk, a̱ hywa, “A̱yin nu yi bu ryi n ku krum i, nu a̱mi yi cat. Yi ku pyyem i ku breng ansham n nat.”

45Bu nyyai Yahuda a̱ si krum Yesu a̱ hywa, “Malam!” 46Wwon ba̱nyet Yahuda na i pyyem Yesu i ku breng ba̱kpunkpam. 47Wwon a̱yanyet i ba̱nyet ba a̱n shyi ka̱bvwa ka ni a̱ kwwat ka̱krong a̱n tyyak a̱kwwa a̱gba̱dang gado Ka̱za nu a̱ tyet pfwo na. 48Yesu a̱ hywa da̱ mba, “A̱nzan a̱ yet a̱nyyi ba n pyyem bu na̱krong bu shan? N brak n tyyi a̱kaat oo? 49Kozan ka̱tuk n zzek ka̱ yemi i bat Ka̱za na, a̱nzan a̱n ya bvwo n pyyem a? Ma, dolet ku cong ba̱ cicrak bu kozan kyang a ba̱ryat Ka̱za ba yin hywa ni.”

50Wwon ba̱pfong nu ba ba̱sa̱rei a̱ tyong a̱ ku wwon.

51Ka̱seyang ka̱yaan ka grang a̱jijyat a̱tro, a̱ tssup Yesu. Ba cat ka̱ pyyem a̱nta̱mak, 52ma na̱ tyong a̱ ba̱ wwon a̱tro nu, a̱ nat ka̱gbyang.

Ba nat bu Yesu a̱ta̱ssi ba̱cecet ba̱nyet Yahuda

(Matta 26:57-68; Luka 22:54-55, 63-71; Yohana 18:13-14, 19-24)

53Ba nat bu Yesu ka̱ryi a̱gba̱dang gado Ka̱za ka; ka̱ yemi sa̱rei ba̱gado Ka̱za ba bu ba̱malam truwang ba bu ba̱nekwo ba ban tung. 54Wwon Bitut a̱n tssup, ma a̱ cong gba̱gbang, a̱ si nwa ka̱ryi a̱gba̱dang gado Ka̱za ka. A̱ swrang bu ba̱nyet cam ka̱ryi ba a̱ wei rong. 55Ba̱gado Ka̱za ba bu sa̱rei ba̱nyet ka̱tung ba a̱ cat kyang a ba nin tyyi Yesu a̱bvun a̱ ga ku hywat i, a̱ si shya ba. 56Ba̱nyet ba̱gingang a̱ cong a̱ bvei diraa tazwa nu, ma nkyang a ba ryat i i si mon ba.

57Ba̱yanyet a̱ ta̱za a̱ bvei diraa tazwa Yesu, a̱ hywa, 58di ba hok na̱ hywa, “N ni hwwei bat Ka̱za nani ba̱nyet ba nok di mbvak i. Ka̱yat nom tat n nok nyyi na a̱neywu na̱ drok a̱ nok ni ba.” 59Ko mba ma ba ma̱ si kok ba̱ryat mba ba, ba ka bvwon-bvwon.

60A̱gba̱dang gado Ka̱za nu a̱ ta̱za a̱ sseng a̱ta̱ssi ba̱nyet ka ba̱sa̱rei a̱ hywa di Yesu, “A̱nzan a byyi ni hywa tazwa nkyang ka ni ba ryat a̱ na̱ kwot i ni?”

61Yesu a̱ swat ba̱ nyong a̱ rak krang a. A̱gba̱dang gado Ka̱za nu a̱ bo ku zzim a̱ hywa, “Nwan yet Kristi, Ka̱won A̱gwam Tazwa kaa?”

62Yesu a̱ hywa, “Nzuk a̱mi ba̱t! A bo ni ryi Ka̱won A̱neywu ka swat an bvak yak A̱ntyok Cet Sa̱rei, a̱ bo si bvwot a̱ bai ka̱yat a̱ninyyan tazwa.”

63A̱gba̱dang gado Ka̱za nu a̱ pyyem a̱tro nu nu a̱ seyak a̱zi diryen, a̱ hywa, “Ba̱neywu, ba̱ryat bani a̱ maai! A̱nzan shaida zi bun cat, ba̱nyet? 64Yi hok a̱kpot ba̱ryat nu nu, ka̱ni? A̱nzan yi ryi ba yya ba̱ nu?” Sa̱rei mba ba shim da̱ a̱ maai ba ku hywat.

65Ba̱yanyet a̱ nwa ku tang ba̱ncwwa, a̱ ku rop a̱ssi na, a̱ ku tsot, a̱ yya da̱ nu, “Tyyei a̱yin nu a̱ na̱ zzu ni!” Wwon ba̱dogari ba a̱ ku ra a̱ rot a̱zanson a̱ tsot a̱ naat i.

Bitut a̱ ton da̱ a̱ bvwo Yesu ba

(Matta 26:69-75; Luka 22:56-62; Yohana 18:15-18, 25-27)

66A̱gba̱dang gado Ka̱za nu a̱ byyi a̱kwwa ka̱neyang. Ka̱neyang iya a̱ nyyai a̱ bu shya Bitut ka̱ yemi ka̱ryi a̱gba̱dang gado Ka̱za ka. 67Bitut na̱ shyi wei rong, ka ku cyang a̱ hywa da̱ nu, “Nwan meyang, a yin shyi bu Yesu, a̱ntyok Nazarat u!”

68Ma Bitut a̱ ton, a̱ hywa, “Kaaai, n bvwo a̱yin a̱ywu ba. N bvwo kyang a a ryat i ba.” A̱ drok a̱ wruk a̱ nat an gra ji; a̱ngbak a̱ ma̱n tyyak.

69Ka̱neyang iya a̱ bo ku ryi a̱ bo nwa yya di ba̱nyet sseng ba ka̱bvwa ka, “A̱ cong ba̱ mba.” 70Bitut a̱ bo ton.

Ka̱baram ba̱ cincong, ba̱yanyet ba sseng ka̱ yemi a̱ hywa di Bitut, “A maai i ton da wi cong ba̱ mba ba, rot nwan a ma̱n nyyai ka̱byen Galili ka.”

71Bitut a̱ ssing, a̱ hywa, “Ka̱za ma a̱ bvwo diraa n bvei ba. N bvwo a̱yin a̱ywu yi ryat i ba.”

72Nyyai na̱ ka̱n muk ka̱nu ka ba, a̱ngbak a̱ bo tyyak nkrang a̱mba̱hwa. Bitut a̱ yring ka̱sak ka Yesu na̱ ka̱n hywa da̱ nu, “A ni ton da a n bvwo ba bvat ka̱tat, a̱ngbak na̱ ka̱n tyyak a̱ bvwa nkrang ka̱hwa ba.” Na̱ nwa ka̱nak, a̱ kprang ka̱byen.

Currently Selected:

Markut 14: kaj

Highlight

Copy