Markus 14

Ovajuda mave tyasana okuzepa Jesus

(Mt 26:1-5; Lk 22:1-2; Jhn 11:45-53)

1 # Eks 12:1-27 Nu nambano tjandje pa sewa omayuva yevari kOpaska na komayuva omanene wozomboroto nḓe hi nosurise. Ovapristeri nozonongo zomambo aave paha omuhingo wokukambura na wo Jesus movineya kutja ve mu zepe. 2Owo va tja: “Atu mu kambura momayuva womukandi wOpaska, otjiwaṋa ngaa tji zungana.”

Jesus ma twirisirwa mObetanie

(Mt 26:6-13; Jhn 12:1-8)

3 # Lk 7:37, 38 Jesus wa ri kObetanie mondjuwo ya Simon, ingwi omurumendu ngwa ri nomutjise wongana. Nu Jesus ngunda e ri potjiriro otji pa hita omukazendu ngwa ri nekende nda ungurirwe pewe nde urire nomaze omavawa, ngaa ye isanewa kutja omanarde. Omukazendu ngwi wa teya indi ekende, nu a tirire inga omaze omavawa kotjiuru tja Jesus. 4Ovandu tjiva mba ri mbo va pindika nave verihungirire oveni ave tja: “Ongwaye tji ma morosa omaze omavawa nai? 5Owo andakuzu ya randisiwa kovimariva ovisilveri mbya kapita omasere yetatu, nu imbi ovimariva avi yandjewa kovasyona!” Nowo arire tji ve mu kandaiza tjinene.

6Nungwari Jesus wa tja: “Mu eseye! Mamu mu kendisire tjike? Eye we ndji ungurire otjiungura otjiwa. 7#Deu 15:11Ovasyona aruhe mu ri pamwe, nu apehe pu mwa vangere mamu sora okuvetjitira ouwa. Nungwari ami hi nokukara puna eṋe aruhe. 8Omukazendu ngwi wa tjiti puma sora; eye wa twirisa orutu rwandje okururongerisira ombakero yandje. 9Nambano, tjiri, me mu raere kutja akuhe Ombuze Ombwa ndji ku mai zuvarisiwa mouye auhe, ihi eye tja tjiti wina matji kaserekarerwa komazemburukiro we.”

Judas ma itavere okuhorora Jesus movineya

(Mt 26:14-16; Lk 22:3-6)

10Nu Judas Iskariot, umwe wovahongewa omurongo na vevari, wa ya kovapristeri oviuru okukayandja Jesus momake wawo. 11Owo va nyanda tjinene tji va zuva imbi eye mbya hungira, notji ve mu kwizikira kutja mave mu pe ovimariva. Judas otja paha oruveze oruwa okuyandja Jesus ku wo.

Jesus ma ri Omariro wOpaska puna ovahongewa ve

(Mt 26:17-25; Lk 22:7-14, 21-23; Jhn 13:21-30)

12Nu meyuva etenga romayuva omanene wOzomboroto nḓe hi nosurise, indi eyuva aruhe muyamu punguhirwa ozondjona zOpaska, ovahongewa va Jesus ve mu pura ave tja: “Okutjiṋe ku movanga kutja tu kekuṱunine Omariro wOpaska?”

13Jesus wa hinda ovahongewa vevari na tja ku wo: “Twendeye kotjihuro, nu mamu kahakaena nomundu ngwa toora otjitjuma tjomeva. Mu kongorereye, 14nga kondjuwo mu ma kahita, nu mu katje nai komuini wondjuwo: ‘Omuhonge ma tja: Etuwo mu me rire Opaska puna ovahongewa vandje ri ri pi?’ 15Neye me mu urikire etuwo rokombanda nda ṱunwa nu nda harekwa nawa; nga rire mu mwe tu ṱunine avihe.”

16Ovahongewa mba va ya kotjihuro nave kavaza avihe avi ri otja Jesus pe ve raera; nowo va ṱuna Omariro wOpaska.

17Nu tja rira ongurova, Jesus weya puna ovahongewa omurongo na vevari. 18#Psa 41:9Ngunda averi potjiriro Jesus wa tja: “Tjiri, me mu raere, umwe weṋu ngu ma ri puna ami mba me ndji zepaisa movineya.”

19Nu ovahongewa va uta okuṱoruhoze nave utu okumupura koumweumwe ave tja: “kawami nu?”

20Jesus wa zira a tja: “Ma rire umwe weṋu, imba omurongo na vevari, ingwi ngu ma tjaveke omboroto ye puna ami motjiyaha. 21Omuna wOmundu ma ṱu otja tji mwa tjangwa momatjangwa, nungwari owee komundu ngo ngu ma zepaisa Omuna wOmundu movineya! Itja rira kokuwa andakuzu omundu ngo ke na indu wa kwaterwe!”

Omariro wa Muhona wOngurova

(Mt 26:26-30; Lk 22:14-20; 1Kor 11:23-25)

22Nu ngunda amave ri Jesus wa toora omboroto, e i sere ondaya, e i koyora, e i yandja kovahongewa ve na tja: “Kambureye, indwi orutu rwandje.”

23Tjazumba wa toora otjinwino, a tja okuhepa ku Ndjambi, e ve pe, nowo arire tji va nu ko avehe. 24#Eks 24:8 Jer 31:31-34Nu Jesus wa tja ku wo: “Indji ombinḓu yandje, ndji mai tirahirwa ovengi, indji ombinḓu yomerikutiropamwe. 25Tjiri, me mu raere, himee nu ko omeva nga womuvite rukwao nga keyuva indi ndi me keyenwa mouhona wa Ndjambi.”

26Nowo tji va za nokuimbura eimburiro va pita nave i kOndundu yOmiṋinga.

Jesus ma tjivisa omapataṋeno wa Petrus

(Mt 26:31-35; Lk 22:31-34; Jhn 13:36-38)

27 # Sak 13:7 Jesus wa tja nai ku wo: “Eṋe amuhe mamu ndjesa, orondu omatjangwa maye tja: ‘Ami me zepa omurise, nozonḓu maze pizuka.’ 28#Mt 28:16Nungwari ami tji mba penduka movakoke me mu hongorere kOgalilea.”

29Petrus wa zira a tja: “Avehe nandave ku esa, ami hi na ku kwesa!”

30Jesus arire tja tja ku Petrus: “Tjiri, me ku raere, mouṱuku mbunombwi ohunguriva ngunda a i hiya vandara tuvari, ove tjandje we ndji pataṋa povikando vitatu.”

31Nungwari Petrus wa hungirira ko nomasa a tja: “Nandi mba ṱokuṱa puna ove, himee ku pataṋa ko!” Novahongewa ovakwao va hungira omuhingo tjingewo mbo.

Jesus ma kumbire mOgetsemane

(Mt 26:36-46; Lk 22:39-46)

32Nowo ve ya kotjikunino tjena Getsemane; nu Jesus wa tja nai kovahongewa ve: “Kareye pehi mba, ami ngunda ame kakumba.” 33Eye wa toora Petrus na Jakobus na Johanes okuyenda puna ye, neye wa uta okurikenda na ṱoruhoze tjinene, 34nu a tja ku wo: “Omuinyo wandje wa toora ombamisiro. Kareye katumba!”

35Eye wa ka wondja ohumburuko komurungu kaṱiṱi, a wire pehi na kumbu kutja, tji mape sorwa, oiri yomihihamo i varame na ye uriri. 36Nu otja kumba a tja: “Aba, Tate! Ove wa sora oviṋa avihe. Varamisa otjinwino tjomihihamo hi na ami. Nu a ha rire otja pu me vanga, nungwari nga rire otja ove pu movanga.”

37Jesus wa kotoka na vaza imba ovahongewa vetatu ava rara, nu arire tja tja ku Petrus: “Simon, wa rara are? Ko nokusora okukara katumba oiri imwe? 38Kareye katumba nu mu kumbe kutja amu ha hiti momarorero. Ombepo mai vanga, nungwari indji onyama otjingundi.”

39Eye wa yaruka rukwao na kakumba ama hungire omambo tjingewo. 40Tjazumba eye wa kotoka kovahongewa ne ve vaza rukwao ava rara, orondu tjandje omeho wawo ya pamisiwa i ozomboṱu. Nowo kave tjivirwe kutja ngave mu zire vi.

41Kombunda eye wa kotoka otjikando otjitjatatu, nu a tja ku wo: “Ingee mwa rara nu mwa suva are? Nambano opuwo, oiri ye ya! Tareye, Omuna wOmundu nambano ma yandjewa momake wovanauvi. 42Sekameye, tu yende! Tareye, ingwi ngu me ndji zepaisa movineya eye ngo meya!”

Jesus ma kamburwa

(Mt 26:47-56; Lk 22:47-53; Jhn 18:3-12)

43Nu Jesus ngunda ama hungire, Judas, umwe wovahongewa mba omurongo na vevari, weya mbo. Eye wa ri puna otjimbumba tjovandu mbe ripangiṋine nomangaruvyo noviti, nu mba hindirwe i ovapristeri oviuru, nozonongo zomambo, novanene votjiwaṋa. 44Ingwi omuhorore wa Jesus wa yandjere otjiraisiro kotjimbumba a tja: “Ingwi ngu me hupite onguri ye, mu kambureye mu mu tware a mamu mu tjevere nawa.” 45Nu Judas tje ya mbo wa ya ku Jesus tjimanga na tja: “Muhonge!” Ne mu hupite. 46Nowo va twa omake wawo ku ye nave mu kambura. 47Nungwari umwe wa imba mba kuramene mbo wa nana engaruvyo re, a kondo na ro omukarere wOmupristeri Otjiuru ne mu kondo okutwi. 48Nu Jesus wa hungira a tja nai ku wo: “Mwe ya nomangaruvyo noviti okundjikambura aayo owami omupunde woviṋa vyovandu are? 49#Lk 19:47; 21:37Omayuva aehe ami mba kara puna eṋe ame hongo ovandu mondjuwo ya Muhona, nu eṋe kamu ndji kamburire. Nungwari inga omatjangwa ye sokuyenenisiwa.”

50Tjazumba ovahongewa ve avehe arire tji ve mu esa nave tupuka.

51Nu omuzandona umwe worive wa kongorera Jesus e nombanda oheze uriri korutu. Owo va vanga okumukambura, 52nungwari eye wa isa indji ombanda momake wawo na tupuka muzu.

Jesus komurungu wombanguriro

(Mt 26:57-68; Lk 22:54-55, 63-71; Jhn 18:13-14, 19-24)

53Nu Jesus wa twarerwe kondjuwo yOmupristeri Otjiuru, nu imbo opu pa woronganena ovapristeri oviuru nozonongo zomambo novanene wombongo. 54Petrus wa kongorera Jesus e ri ohumburuko nga tja kahita morupanda rwondjuwo yOmupristeri Otjiuru. Neye a kahaama pomuriro puna ovatjevere na woto omuriro. 55Ovapristeri oviuru notjira atjihe va paha omahongonona wokurondora na wo Jesus kutja ve mu zepe, nungwari kave yemwine ko. 56Ovandu ovengi va hungirira Jesus omahongononeno wovizeze, nungwari omahongononeno wawo nga kaaye i kumwe.

57Nu tjiva vawo va sekama nave hungirire Jesus omahongononeno wovizeze amave tja: 58#Jhn 2:19“Eṱe twe mu zuva ama tja nai: ‘Ami me haṋa ondjuwo ya Muhona ndji ndja tungwa nomake wovandu, nu moure womayuva yetatu e tungu yarwe ndji ha tungirwe i ovandu.’” 59Nungwari omahongononeno wovandu mba wina kaaye i kumwe.

60NOmupristeri Otjiuru wa kuramene momurungu wawo avehe, a pura Jesus na tja: “Ko na tji mo ziri koviṋa imbi mbi mave tja wa tjita?”

61Nungwari Jesus wa mwina nu a ha ziri ko embo nangarire rimwe. Ingwi Omupristeri Otjiuru we mu pura rukwao a tja: “Oove ngu u ri Omutwirisiwa, Omuna wa Ndjambi oMutangwa?”

62 # Dan 7:13 Jesus wa zira a tja: “Ii, owami ngu mbi ri ye, nu amuhe mamu munu Omuna wOmundu a haama kokunene kwa ingwi Omunamasaaehe, nu ama yende movikamba vyeyuru!”

63Omupristeri Otjiuru arire tja taura ozombanda ze na tja: “Ovahongonone mbu matu hepa ovatjike rukwao? 64#Lev 24:16Eṋe mwe rizuvire oveni indu tja yamburura Ndjambi. Nambano eṋe mamu tja vi?”

Nowo avehe arire tji va i kumwe kutja eye omunandjo nu wa pwiro kuṱa.

65Nu tjiva va utire okutjekera Jesus omate, ave mu kutjire omurungu nave mu tono ozongomi amave tja: “Tu raera kutja owaṋi ngwe ku tono!” Nu imba ovakarere ve mu twara nave yende amave mu tono otupyu.

Petrus ma pataṋa Jesus

(Mt 26:69-75; Lk 22:56-62; Jhn 18:15-18, 25-27)

66Nu Petrus ngunda e ri morupanda pendje otji pe ya umwe wovakarere ovasuko wOmupristeri Otjiuru. 67Nomusuko ngwi tja muna Petrus ama woto omuriro, we mu tara osemba na tja: “Ove wina wa ri puna omurumendu ngo ngwa za kOnasaret, Jesus!”

68Nungwari Petrus wa pataṋa a tja: “Ami hi nokutjiwa kutja mo hungire tjike.” Neye wa pita pendje a i moruhito rokuyenda komuvero worumbo rondjuwo. Nohunguriva arire tji ya vandara.

69Nomusuko ngwi tja muna Petrus, wa tja nai rukwao ku imba mba kuramene mbo: “Ingwi iumwe wawo!” 70Nungwari Petrus wa pataṋa rukwao. Nu kombunda yanao kaṱiṱi imba mba kuramene mbo va tja ku Petrus: “Ouatjiri, oove umwe wawo, orondu ove wina oove Omugalilea.”

71Nungwari Petrus wa tja: “Tjiri me yana kutja me hungire ouatjiri! Nu Ndjambi tjiri nge ndji senge ndovazu hi nokuhungira ouatjiri. Ami hi nokutjiwa omundu ngu mamu hee ngo!”

72Tjimanga ohunguriva arire tji ya vandara porutjavari, nu Petrus arire tja zemburuka omambo Jesus nga tjere nai ku ye: “Ohunguriva ngunda a i hiya vandara tuvari, ove tjandje we ndji pataṋa tutatu.” Neye wa uta okurira tjinene.

Currently Selected:

Markus 14: HRR-UNI

Highlight

Copy