Markus 13

Jesus ma hungire omanyoneno wondjuwo ya Muhona

(Mt 24:1-2; Lk 21:5-6)

1Jesus ngunda ama piti mondjuwo ya Muhona, omuhongewa we umwe wa tja nai ku ye: “Muhonge, tara ouwa oumanise womawe wondungiro onene ndji!”

2Jesus wa zira a tja: “Ondungiro onene ndji mo i munu? Kamaaku sewa ewe nangarire rimwe kombanda yekwao; aihe mai nyanyaurwa.”

Omaumba nomatatumisiro

(Mt 24:3-14; Lk 21:7-19)

3Nu Jesus wa haama pehi kOndundu yOmiṋinga ouhunga nondjuwo ya Muhona, indu Petrus na Jakobus na Johanes na Andreas tji ve ya ku ye peke. 4Owo ve mu pura ave tja: “Tu raera kutja oviṋa mbi mavi tjitwa ruṋe, nokutja otjiraisiro matji rire tjiṋe, oviṋa mbi avihe tji mavi utu okutjitwa?”

5Jesus we ve zira a tja: “Ṱakamiseye nawa, ape ningi omundu ngu me mu pukisa. 6Ovengi mave ya mena randje ave tja: ‘Owami ngu mbi ri Kristus!’ Nowo mave pukisa ovandu ovengi. 7Nu tji mamu zuu ombosiro nozombuze zovita, amu uruma ko. Oviṋa mbi mavi sokutjitwa, nungwari ovyo kavi nakuheya kutja inga omaandero ye ya. 8Otjiwaṋa tjimwe matji sekamene otjiwaṋa otjikwao, nouhona umwe mau rwisa ouhona oukwao. Mamu kara omanyinganyingiro wehi momahi pekepeke, nourumbu wina. Oviṋa mbi mavi sana nozongama ozondenga zombandukiro.

9 # Mt 10:17-20; Lk 12:11, 12 “Neṋe oveni ritjevereye nawa. Mamu kamburwa, nu mamu twarewa kotjombanguriro; mamu tonenwa mozosinagoge, nu mamu kurama komurungu wovahonapare nozombara motjimbe tjandje okuveserekarera indji Ombuze Ombwa. 10Nungwari inga omaandero ngunda aye hiye ya, indji Ombuze Ombwa mai sokuzuvarisiwa koviwaṋa avihe. 11Nu eṋe tji mwa kamburwa namu twarewa kotjombanguriro, amu rikende kutja mamu katja tjike; oruveze tji rweya, hungireye imbi mbi mamu pewa oruveze ndo, orondu inga omambo ngu mamu hungire kaweṋu, nungwari maye rire owOmbepo Ondjapuke. 12Erumbi ma yandja omuangu we kokuṱa, nu ihe otjinga ama tjiti tjingetjo komuatje we. Ovanatje mave sekamene ovanene vawo nave ve zepa. 13#Mt 10:22Avehe mave mu tondo mena randje. Nungwari ingwi ngu ma panḓere po nga komaandero ma yamwa.

Eyayu romanyoneno

(Mt 24:15-28; Lk 21:20-24)

14 # Dan 9:27; 11:31; 12:11 “Eṋe tji mamu munu eyayu romanyoneno ari ri poṋa pu ri ha sokukara.” (Ngu ma rese omambo nga, nga zuve nawa.) “Nu imba mbe ri mOjudea, ngave taurire kozondundu. 15#Lk 17:31Nu ngu ri komututu wondjuwo ye, ngaa heruka okukahita mondjuwo, nu ngaa katoora otjiṋa mondjuwo okutwaerera. 16Ingwi ngu ri mehi romakunino ngaa yaruka kondjuwo okukatoora ombanda ye. 17Owee kovakazendu ovingundi na ku imba mbe nyamisisa momayuva ngo! 18Kumbeye ku Ndjambi kutja oviṋa mbi tji mavi tjitwa, a ha rire mokupepera. 19#Dan 12:1; Omav 7:14Orondu momayuva ngo mamu kara ozombamisiro ozonene tjinene nḓe hi na indu za karere po okuza kombutiro Ndjambi tja ungura ouye nga ku nai, nu kamaaze kakara po rukwao. 20Nu Muhona andakuzu ka susuparisire omayuva ngo, katjape kara ovandu mbe nomuinyo, nungwari omayuva nga eye we ye susuparisira ovatoororwa ve.

21“Nu tji pena omundu ngu ma tja nai ku eṋe: ‘Tareye, Omutwirisiwa eye ngwi, tareye eye ngwina,’ eṋe amu kambura ko. 22Orondu tjinga a mamu penduka ovatwirisiwa voposyo novaprofete voposyo. Owo mave tjiti ovihimise noviraisiro ovinene okupukisa na vyo nangarire imba ovatoororwa va Ndjambi, indu andakuzu mape sorwa. 23Ritjevereye nawa! Ami mbe mu raerere po oviṋa avihe, omayuva ngo ngunda aye hiye ya.

Omeero wOmuna wOmundu

(Mt 24:29-31; Lk 21:25-28)

24 # Jes 13:10; Joel 2:10, 31; 3:15; Omav 6:12 Jes 13:10; Esek 32:7 “Omayuva ngo, kombunda yombamisiro, eyuva mari zorere, nomueze kau nakuyera. 25#Jes 34:4; Omav 6:13 Joel 2:10Ozonyose maze u keyuru, nomasa nge ri mevaverwa ma ye kurakurisiwa. 26#Dan 7:13; Omav 1:7Nu ovandu otji mave munu Omuna wOmundu ama yende movikamba nomasa omanene nouvara. 27Nu eye ma hindi ovaengeri ve okukawonga ovatoororwa va Ndjambi komikuma poune wavyo vyehi, okuza kotjikoro tjimwe tjouye nga kotjikwao.

Omahongero womukuyumbwa

(Mt 24:32-35; Lk 21:29-33)

28“Nu rihongeye omasanekero womukuyumbwa. Otutavi twawo tji twa rire otutarazu, nu tji twa twako omaso, otji mamu tjiwa kutja okurooro kwe ya. 29Momuhingo tjingewo mbwi wina eṋe tji mamu munu oviṋa mbi amavi tjitwa, mamu tjiwa kutja omayuva ngo ye ri popezu. 30Tjiri, me mu raere, omuhoko mbwi kamaau koka, nga oviṋa avihe mbyo tji vya yenenisiwa. 31Eyuru nehi mavi yanda, nungwari inga omambo wandje kamaaye yanda ko.

Kape na ngu ma tjiwa eyuva noiri

(Mt 24:36-44)

32 # Mt 24:36 “Nungwari kape nomundu ngu ma tjiwa eyuva ndo na indji oiri, nangarire ovaengeri meyuru, nangarire ingwi Omuna; posi na Tate porwe ongumatjiwa. 33Ṱakamiseye, kareye katumba, orondu eṋe kamu nokutjiwa kutja omayuva ngo maye ya ruṋe. 34#Lk 12:36-38Mape kara otja omundu ngwa ya mouyenda, a isa ondjuwo ye, na yandja ouvara kovakarere ve, indu tja zu nokuyandja ku auhe otjiungura tje nokuraera omutjevere wopomuvero okukara katumba. 35Otji mamu sokukara katumba, tjinga amu hi nokutjiwa kutja omuini wondjuwo meya ruṋe, ngahino ongurova poo omokati kouṱuku poo ohunguriva ngunda a i hiya vandara poo omuhuka omunene. 36Tjaa eye meya tjimanga, e mu vaza amwa rara ozomboṱu. 37Nu ihi tji me hungire ku eṋe otjinga ame hungire ku avehe kutja: Kareye katumba!”

Currently Selected:

Markus 13: HRR-UNI

Highlight

Copy