Markus 15

Jesus komurungu wa Pilatus

(Mt 27:1-2, 11-14; Lk 23:1-5; Jhn 18:28-38)

1Omuhuka omunene ovapristeri oviuru va zuvasanene puna ovanene nozonongo zomambo notjira atjihe, ave pandeke Jesus nave mu twara, nave kemuyandja ku Pilatus. 2Pilatus we mu pura a tja: “Oove ngu u ri ombara yOvajuda?”

Jesus wa zira nai: “Opo mbo pu mo hee.”

3Ovapristeri oviuru ve mu pa ondjo moviṋa ovingi, 4nu Pilatus otje mu pura rukwao a tja: “Ko notjiṋa tji mo ziri are? Tara, owo mave ku pe ondjo moviṋa ovingi!”

5Nu Jesus ka zirire ko otjiṋa, nu Pilatus arire tja himwa.

Jesus ma pangurwa kokuṱa

(Mt 27:15-26; Lk 23:13-25; Jhn 18:39—19:16)

6Nu aruhe meyuva rOpaska Pilatus aa pitisa omundu ngamwa auhe motjovakamburwa ovandu ngu va ningire. 7Momayuva ngo mwa ri omundu wena Barabas, nu ngwa ri motjovakamburwa puna ovazunganise ovakwao, mba zepere omundu momazunganeno. 8Notjimbumba tjovandu tja worongana, natji ningire Pilatus kutja e ve tjitire otja tjinga ee ve tjitire aruhe. 9Pilatus we ve pura a tja: “Mamu vanga kutja mbi mu kuturire ombara yOvajuda?” 10Eye aa tjiwa nawa kutja ovapristeri oviuru va yandjere Jesus ku ye mena reruru.

11Nungwari ovapristeri oviuru va hohiza ihi otjimbumba tjovandu tji ningire Pilatus kutja e ve pitisire Barabas motjovakamburwa. 12Pilatus wa hungira rukwao kotjimbumba a tja: “Ingwi ngu mu tja ombara yOvajuda hi mu tjite vi?”

13Nowo va ravaera ave tja: “Mu papera kotjikoroise!”

14Pilatus a pura a tja: “Neye hapo wa tjita ouvi watjike?”

Nungwari owo va ravaerera ko ave tja: “Mu papera kotjikoroise!”

15Nu Pilatus mokuvanga okunyandisa otjimbumba omitima arire tje ve pitisire Barabas motjovakamburwa. Tjazumba tja za nokutonisa Jesus, arire tje mu yandja kutja a kapaperwe kotjikoroise.

Ovarwe wovita mave nyekerere Jesus

(Mt 27:27-31; Jhn 19:2-3)

16Ovarwe wovita va hitisire Jesus mondjuwo yombanguriro nave woronganisa otjimbumba tjawo atjihe tjovita. 17Owo va zarisa Jesus ombanda oserarovazu, ave ungura oruzenga rwomakuiya, nu arire tji ve ru twa kotjiuru tje. 18Tjazumba ave utu okumuminika ave tja: “Minikwa, Mbara yOvajuda!” 19Owo ve mu tona kotjiuru nokati, ave mu tjekere omate, ave wora ozongoro nave rikotamene ku ye. 20Tji va zu nokumunyekerera, ve mu hukura indji ombanda oserarovazu nave mu zarisa ozombanda ze omuini; tjazumba ave mu twara okukemupapera kotjikoroise.

Jesus ma paperwa kotjikoroise

(Mt 27:32-44; Lk 23:26-43; Jhn 19:17-27)

21 # Rom 16:13 Mondjira ovarwe wovita va hakaena nomurumendu wena Simon, ngwa zire kOkirene ngwaa hiti motjihuro okuza kotjikunino, ihe ya Aleksander na Rufus, nave mu ṋiṋikiza kutja a toore otjikoroise tja Jesus. 22Owo va twara Jesus koṋa ku ku za oGolgota, okutja “Okotjikongo tjOtjiuru.” 23Koṋa ngo oku ve kemupera omavinu, nga hovekua nemira, nungwari Jesus ke ye nwine ko. 24#Psa 22:18Nowo ve mu papera kotjikoroise, ave haṋasana ozombanda ze amave umbu ozohanga kutja auhe ma sokumuna iṋe. 25Yari omuvyu womuhuka tji ve mu papera kotjikoroise. 26Nu kotjikoroise kwa tjangwa omambo ngu maye raisa otjiṋa tja pangurirwa, ngu maye tja: “Ombara yOvajuda.” 27#Jes 53:12Owo wina va papera omarunga yevari puna Jesus, rimwe kokunene nekwao kokumuho kwe. 28Nomatjangwa otji ya yenenisiwa ngu maye tja: “Neye wa varwa puna ovarunde.”

29 # Psa 22:7; 109:25 Mk 14:58; Jhn 2:19 Ovandu mbaa ve kapita mbo aave taka oviuru nave yamburura Jesus amave tja: “Ahaa! Ove ngu mo haṋa ondjuwo ya Muhona, nokuitunga rukwao moure womayuva yetatu! 30Nambano riyama omuini heruka kotjikoroise!”

31Momuhingo tjingewo mbo wina ovapristeri oviuru nozonongo zomambo va nyekerera Jesus amave raerasana nai: “Eye wa yama ovakwao uriri, nungwari ingwi okuriyama omuini eye ke nokuyenena! 32Omutwirisiwa, Ombara ya Israel, nga turuke kotjikoroise nambano nai kutja tu mu mune nu tu kambure mu ye!”

Nu imba vevari mba papererwe puna Jesus, owo wina otjinga ave mu yamburura.

Onḓiro ya Jesus

(Mt 27:45-56; Lk 23:44-49; Jhn 19:28-30)

33Nu moiri oitjamurongo na mbari yomutenya kwe ya onḓorera mehi arihe, noyo ya kara ko oure wozoiri ndatu. 34#Psa 22:1Mondatu yomapeta Jesus wa ravaera neraka enene a tja: “Eloi, Eloi lema sabaktani?” Okutja “Ndjambi wandje, Ndjambi wandje, we Ndjesire tjike?”

35Ovandu tjiva mba ri mbo ve mu zuva nave tja: “Purateneye, ma isana Elia.” 36#Psa 69:21Nu umwe wawo wa tupuka na katjaveka otjiyave momavinu omayake ne tji kutu kohonga yoruu. Tjazumba otje tji ṱizira komiṋa vya Jesus ama tja: “Kurameye, tu tarere kutja Elia meya okumuturura kotjikoroise!”

37Jesus wa ravaera neraka enene, nu arire tja ṱu.

38 # Eks 26:31-33 Erapi etjizikize rondjuwo ya Muhona ra tauka motumbembera tuvari okuza kombanda nga kehi. 39Omunane wovita ngwa kuramene mbo momurungu wotjikoroise, tja muna kutja Jesus wa ravaere na ṱu, arire tja tja: “Tjiri, omundu ngwi wa ri Omuna wa Ndjambi!”

40 # Lk 8:2, 3 Wina pa ri ovakazendu tjiva mbu yave tarerere kokure; nu mokati kawo mwa ri Maria Magdalena, na Maria, ina ya Jakobus omuṱiṱi na Joses, na Salome. 41Owo va kongorerere Jesus tja ri mehi ra Galilea nave mu karere; nu wina pa ri ovakazendu varwe ovengi mbe ere puna Jesus kOjerusalem.

Ombakero ya Jesus

(Mt 27:57-61; Lk 23:50-56; Jhn 19:38-42)

42Oro ra ri eyuva romerirongerero, okutja eyuva rokomurungu wesabata. Nu tja rira ongurova, 43Josef wa Arimatea weya mbo. Eye wa ri omurumendu omuyozikwa nu wina ohongora motjirata, nu ngwaa undju ouhona wa Ndjambi; wa kahita moya Pilatus nokuhinemuma, nu e kemuningira orutu rwa Jesus. 44Pilatus wa kuminwe tja zuva kutja Jesus wa ṱu tjimanga nai. Neye wa isana omuhongore wotjimbumba tjovarwe wovita, ne mu pura kutja Jesus wa ṱu rukuru. 45Nu tja za nokutjiwa avihe mu ingwi omuhongore wotjimbumba tjovarwe wovita, Pilatus arire tja yandja orutu rwa Jesus ku Josef. 46Josef wa randa erapi ewa eheze, a katurura orutu rwa Jesus, e ru manga merapi ne ru twa meyendo nda kororerwe moruuwa. Tjazumba otja kunguzurira po ewe potjinyo tjeyendo. 47Maria Magdalena na Maria, ina ya Joses, tjandje mave tarere orutu rwa Jesus pu maru tuwa.

Currently Selected:

Markus 15: HRR-UNI

Highlight

Copy