Johanes 15

Jesus omuvite watjiri

1“Owami omuvite watjiri, nu Tate omuungure wotjikunino. 2Eye ma teya orutavi ngamwa aruhe ndu ri mu ami nu ndu hi nokueta ovihape, nu ma pumbura orutavi ngamwa aruhe ndu maru eta ovihape, kokutja ru rire orukohoke nu ru etere ko ovihape ovingi. 3Eṋe mwa kohorowa rukuru i omahongero ngu mbe mu honga. 4Kareye mu ami, nami me kara mu eṋe. Orutavi kamaaru sora okueta ovihape ku rwo oruini; orwo maru eta ovihape indu porwe tji rwa kara komuvite. Momuhingo tjingewo eṋe wina kamaamu eta ovihape tji mu hi nokukara mu ami.

5“Owami omuvite, neṋe oweṋe otutavi. Ingwi ngu ma kambura mu ami, nami e kara mu ye, ma eta ovihape ovingi, orondu nokuhinaami kamu na tji mamu sora okutjita. 6Ingwi ngu hi nokukara mu ami, ma imbirahiwa otja orutavi na kukuta; otutavi otja itwi matu wongwa natu yumbwa momuriro natu ningiririsiwa. 7Tji mwa kara mu ami, nomambo wandje aye kara mu eṋe, mamu ningire ngamwa tji mamu vanga, nu mamu pewa. 8Ma rire ondjozikiro onene ku Tate indu tji mamu eta ovihape ovingi, nu momuhingo mbwi eṋe mamu rire ovahongewa vandje. 9Ami mbe mu suvera otja Tate tjinga e mu suvera; kareye morusuvero rwandje 10Tji mamu ṱakamisa omatwako wandje, mamu kara morusuvero rwandje otja ami punga amba ṱakamisa omatwako wa Tate ne kara morusuvero rwe.

11“Ami mbe mu raera omambo nga kokutja ondjoroka yandje i kare mu eṋe, nokutja ondjoroka yeṋu i urisiwe. 12#Jhn 13:34; 15:17; 1Jn 3:23; 2Jn 1:5Etwako randje oro ndi: Suverasaneye otja punga ambe mu suvera. 13Orusuvero orunenene omundu ndwe na ro komapanga we eendu tji meve yandjere omuinyo we. 14Neṋe oweṋe omapanga wandje indu tji mamu tjiti imbi mbi me mu rakiza. 15Ami hi tji nokumuisana ko ovakarere rukwao, omukarere tjinga e ha tjiwa kutja omuhona we ma ungura tjike. Nungwari ami me mu tja oweṋe omapanga wandje tjinga ambe mu raera omambo aehe ngu mba zuva mu Tate. 16Kaweṋe mbu mwe ndji toorora; ami ongu mbe mu toorora ne mu ziki kutja mu yende nu mu karuke ovihape ovingi, okutja ovihape mbi karerera. Nu Tate me mu pe ngamwa atjihe tji mamu ningire mena randje. 17Netwako rimwe porwaro, ndi me mu pe oro ndi: Suverasaneye!

Ouye mau mu tondo

18“Ouye tji we mu tondo, tjiweye kutja owo rutenga we ndji tonda. 19Andakuzu oweṋe ovouye, ouye itjau mu suvera otja ovanatje vawo. Neṋe tjinga amu he ri ovouye mbwi, nungwari ami tjinga mbe mu toorora mu wo, ouye opu wa zokumutonda. 20#Mt 10:24; Lk 6:40; Jhn 13:16Zemburukeye omambo ngu mba hungirire ku eṋe indu tji mba tjere: ‘Kape nomukarere omunene okukapita omuhona we.’ Tji ve ndji tatumisa, owo wina mave mu tatumisa, nu tji va ṱakamisa omahongero wandje, owo wina mave ṱakamisa omahongero weṋu. 21Noviṋa avihe mbi mave tjiti ku eṋe tjinga amu ri ovandje, orondu tji ve hi nokutjiwa ingwi ngwe ndji hinda. 22Owo katjave tjita ourunde andakuzu ami hi ere okuyekuhungira na wo; nambano owo kamaave tja kave nourunde. 23Ingwi ngu me ndji tondo, ma tondo Tate wina. 24Owo katjave tura ondjo yourunde andakuzu ami hi tjitire oviṋa mokati kawo mbi hi na vya tjitirwe i omundu warwe; nu nambano owo va muna imbi mbi mba tjita, notji va tonda eṱe na Tate atuyevari. 25#Psa 35:19; 69:4Notjiṋa hi hapo tja sokutjitwa, kokutja omambo nga nga tjangwa mOmatwako wawo ye yeneniswe, ngu maye tja: ‘Owo ve ndji tonda uriri nokuhinotjiṋa.’

26“Nu Omuvyonge meya, indji Ombepo youatjiri, ngu ma zu ku Tate. Ami me mu hindi ku eṋe okuza ku Tate, neye me ndji hongonona. 27Neṋe wina mamu ndji hongonona, tjinga amwa kara pu ami okuza kongarero yetu pamwe.

Currently Selected:

Johanes 15: HRR-UNI

Highlight

Copy