Johanes 16

1“Ami mbe mu raere omambo nga, kokutja eṋe amu ha poka kongamburiro yeṋu. 2Eṋe mamu rambwa mozosinagoge, noruveze maru ya auhe ngu me mu zepa tji ma tjangovasi mokutjita nao eye ma karere Ndjambi. 3Ovandu mave tjiti oviṋa mbi ku eṋe, owo tjinga ave hi nokutjiwa eṱe na Tate. 4Nungwari ami mbe mu raere otjiṋa hi, kokutja oruveze tji rweya owo mu mave tjiti oviṋa mbi, eṋe mu zemburuke kutja mbe mu raera.

Oviungura vyOmbepo Ondjapuke

“Nu komautiro ami hi mu raerere oviṋa mbi, orondu tjandje tu ri pamwe. 5Nungwari ami nambano me yaruka ku ingwi ngwe ndji hinda nu kape na ngu me ndji pura kutja me i pi. 6Nambano tjinga ambe mu raere, omitima vyeṋu vya toora oruhoze tjinene. 7Nungwari ami me mu raere ouatjiri: Okokuwa ku eṋe ami tji me i, orondu tji mbi ha ire, ingwi Omuvyonge ke nokuya ku eṋe. Nu tji mba i, ami me mu hindi ku eṋe. 8Nu eye tje ya, ma raisa kovandu mouye kutja owo ve ri posyo mourunde na mu imbi mbi ri ovisemba na mombanguriro ya Ndjambi. 9Owo ve ri posyo mourunde, tjinga ave ha kambura mu ami; 10nu ve ri posyo mu imbi mbi ri ovisemba, ami tjinga ame yaruka ku Tate, neṋe tjinga amu hi nokundjimuna rukwao; 11nu ve ri posyo mombanguriro, omuhonapare wouye mbwi tjinga a pangurwa rukuru.

12“Ami ingee mbi noviṋa ovingi okumuraera, nungwari nambano eṋe kamaamu vi uru. 13Neye tje ya, indji Ombepo youatjiri, me mu hongorere mouatjiri auhe. Eye ke nokuhungira mouvara we omuini, nungwari ma hungire imbi mbi ma zuu ne mu raere oviṋa mbi mavi ya. 14Eye me ndji yozike, tjinga ama yakura omambo nga ngu me mu pe ne ye zuvarisire eṋe. 15Avihe Tate mbye na vyo ovyandje; opu mba zokutja eye ma yakura omambo nga ami ngu memu pe, neye me ye zuvarisire eṋe.

Oruhoze nenyando

16“Eṋe mokaruveze okaṱiṱi kamu tji nokundjimuna, nu mokaruveze okaṱiṱi rukwao otji mamu ndji munu.”

17Ovahongewa ve va purasana ave tja: “Omambo nga maye hee tjike? Eye me tu raere kutja mokaruveze okaṱiṱi eṱe katu tji nakumumuna, nu mokaruveze okaṱiṱi rukwao otji matu mu munu; nu wina ma tja: ‘Orondu tji me yaruka ku Tate.’ 18Hapo omambo nga ‘okaruveze okaṱiṱi’ maye hee tjike? Katu nokutjiwa kutja eye ma hee tjike!”

19Jesus aa tjiwa kutja owo mave vanga okumupura, nopa tjera ku wo: “Ami mba tja: ‘Eṋe mokaruveze okaṱiṱi kamu tji nokundjimuna, nu mokaruveze okaṱiṱi rukwao otji mamu ndji munu.’ Omambo nga ongu mamu purasana are? 20Tjiri, tjiri, ami me mu raere, eṋe mamu riri nu mamu tjeme, nungwari ouye owo mau nyanda; eṋe mamu ṱoruhoze, nungwari oruhoze rweṋu ndwi maru karira enyando. 21Omukazendu tji ma panduka, u kara noruhoze, oiri ye yozongama tjinga aya yenene; nungwari tja zu nokupanduka okanatje, u zemba inḓa ozongama ze, tjinga e nenyando rokutja mouye mwa kwatwa okanatje. 22Otjinga ape ri nao na eṋe: Nambano mu noruhoze, nungwari ami me mu munu rukwao, nomitima vyeṋu avi urisiwa nenyando, indi enyando ndi mu hi na maamu yekwa i omundu.

23“Eyuva ndo tji re ya, eṋe kamu nokundjiningira otjiṋa. Tjiri, tjiri, ami me mu raere, Tate me mu pe ngamwa atjihe tji mamu mu ningire mena randje. 24Ngamba kamuya ningira otjiṋa mena randje; ningireye nu mamu pewa, kokutja enyando reṋu ri urisiwe.

Ami mba toṋa ouye

25“Omambo nga ami me ye hungire ku eṋe momiano. Noruveze maru ya ami mu mbi hi nokuhungira momiano, nungwari mu me mu hongononene Tate ongahukiro. 26Eyuva ndo tji re ya, eṋe mamu mu ningire mena randje; nu hi nokutja ami me mu ningirire ku ye, 27orondu Tate omuini we mu suvera, eṋe tjinga amwe ndji suvera nu tjinga amwa kambura kutja ami mba za ku Ndjambi. 28Ii, ami mba za ku Tate, nu otji mbe ya mouye; nambano ouye me u esa nu me yaruka ku Tate.”

29Okuzambo ovahongewa ve ave tja ku ye: “Tara, nambano mo hungire nawa ongahukiro, ko nokuhungira momiano. 30Nambano twa tjiwa kutja ove u tjiwa oviṋa avihe; nu ko nakuhepa okupurwa omapuriro i omundu. Nopu matu zu okukambura kutja ove wa za ku Ndjambi.”

31Jesus we ve zirire a tja: “Nambano opu mamu kambura are? 32Oruveze maru ya, nu nai rweya, eṋe amuhe tji mamu pizuka, auhe koye, nami e sewa erike. Nungwari hi nokusewa erike, Tate tjinga e ri mu ami. 33Ami mbe mu raere omambo nga, kokutja eṋe mu kare nohange moruwano na ami. Mamu munu ouzeu mouye. Nungwari yanḓipareye! Ami ouye mba toṋa!”

Currently Selected:

Johanes 16: HRR-UNI

Highlight

Copy