मति 22

बिहुको भतियारको निङपिका

(लुक 14:15-24)

1येसु द्‍याङगेलाइहेङ बुझिपालिको भाअ्सिङ निङपितेङ दोअ्हि। 2परमेस्वरको सासन एमि राजा भाइका हि, जाइ ताइको चानको बिहुको भातियार तियार पाहि, 3राजा नेउता पिकालाइहेङ बिहुको भातियारता काइलि ताइको चाकारिया दिङगिल्हि। कालाउ ओबालाइ लोलि माकिहि।

4कालाउ राजा आरोङ चाकारियागेलाइहेङ एसा दोअ्तेङ दिङगिल्हि, “हानेतेङ नेउता निङकालाइहेङ दोअ्सु, भातियार तियार जेङहोइ, आसल गुपुसगेलाइ कालाउ बिसेस पातेङ तोइ-तोइका गुपुसगेलाइ भातियारको भाअ्सिङ सेअ्का हि। एला बिहुको भतियारता लोसु।”

5कालाउ निम्ताइकागेलाइ वास्ताङ मापाहि, उङको द्‍याङगेलाइ ता-ताइको कामता हानिहि। आधिमि ताइको मिलिङता हानेहि, कालाउ आधे चाहि ताइको ब्यापारको कामता हानेहि। 6आधिमि द्‍याङगेलाइ चाहि राजाको चाकारियागेलाइहेङ आपामान पातेङ न्हुसो सुताइतेङ सेअ्हि। 7जेलाउ राजा इन्सिका हिङतेङ मारेम्फाङ चेर ताम्पाहि। कालाउ राजा ताइको सेनागेलाइहेङ दिङगिल्हि, कालाउ उङको ज्यान मारागेलाइहेङ सेअ्लि लागाइहि, कालाउ इम्बालाइको सहर मे चोअ्पिहि।

8कालाउ न्हुसो राजा ताइको चाकारिगेलाइहेङ दोअ्हि, बिहुको भातियारते तियार हि। कालाउ काङको निम्ताइकागेलाइ चाहि इदोइ भातियार चालि सोबाइका मान्थु। 9ओदोङ भाअ्सिङ नेलाइ गोताङ थामेगेलाइ भारि हानेसु कालाउ जेथे दुसुकालाइहेङ भातियारता काइतेङ लोसु। 10कालाउ चाकारियागेलाइ गोताङ थामेगेलाइ भारि हानिहि। दुसुका कालाउ निङका रेम्का-मारेम्का जतिहेङ काइतेङ भातियारता चुमाहि। कालाउ बिहुको साअ् द्‍याङगेलाइहोइ गुल्सु-मुल्सुपा जेङहि।

11“जेलाउ राजा बान्सालाइहेङ खाङलि लोलाउ एमिहेङ बिहुता होङलि गोइका लोखोन माहोङसिङ लोका तिङहि, जेदोङ लोखोन वासेहेङ होङलि दोअ्तेङ पिका हि। 12राजा वासेहेङ हिअ्हि, ओइ सानाइति! नाअ् बिहुको लोखन माहोङसिङ हेसा लिता दुल्न्हा जेदोङ नासेहेङ पिका हिघाहि? कालाउ उङको द्‍याङ हाइ बुङ जोबाफ मापिहि।

13कालाउ राजा ताइको चाकारियागेलाइहेङ दोअ्हि ‘ते, याको खुर-खोकोइ जिङतेङ यासिहेङ बाहार थाइगिल्सु जेता कितिकितिकाता हि। इन्ता वा खारतेङ कालाउ तासिङ जितेङ ह्याको!’” 14न्हुसो येसु दोअ्हि, एइ नेउता हेन्जाहेङ पिका हि, कालाउ साल्का चाहि आतुइसा खिनिङ हि।

पोत ल्होपाकाको सिक्स्या

(मर्कु 12:13-17; लुक 20:20-26)

15कालाउ फारिसिगेलाइ हानिहि, कालाउ येसुहेङ वाकोङ काथाता फासेपालि दाउ मिलिपाहि। 16इम्बालाइ येसुहेङ फासेपालि आधिमि ताइको चात्यागेलाइ कालाउ आधिमि राजा हेरोदको दल दोफा द्‍याङगेलाइ दिङगिल्हि। कालाउ उङको द्‍यायाङगेलाइ दोअ्हि, “गुरु ज्यु, नाअ् जेलाउ बुङ सत्ये काथा दोअ्खेना। केलाइ गिनाखे द्‍याङगेलाइ नाङको बारेता हाइ द्वाङ वाला दोअ्तेङ नादोङ मासोचिखेना। नाअ् झाराङ दोफा सामान ब्यभार पाखेना, चाहे वा हासुलाउ बुङ ह्याको। नाअ् सत्येसो परमेस्वरको दामा ठिक थेकापा धिरपाखेना, नाङको आगाता झाराङ द्‍याङ एनोङ दोङ हि। ओदोङ भाअ्सिङ नाङको बिचार चाहि हाइ केलाइहेङ दोअ्पि। 17रोमि साम्रातहेङ पोत तिरिलि ठिक हि या ठिक मान्थु?”

18कालाउ येसु थाहा गिहि इङको द्‍याङगेलाइ मारेम्का जालि पालि खाङखे दोअ्तेङ कालाउ येसु इम्बालाइहेङ दोअ्हि नेलाइ कपटिगेलाइ हिसुना। हिदोइ बुङ माजेङका काथाता धाताइका निउ पातेङ नेलाइ कासेहेङ फसिपालि खाङसुखेना? 19पोत तिरिका ताकाको थुरि कासेहेङ तिङपासु! उङको द्‍याङगेलाइ येसुहेङ एनोङ चान्दिको थुरि तिङपाहि। 20येसु आरोङ दोअ्हि, “ताकाको थुरिता हासुको चित्तरो हि? कालाउ हासुको मिङ इन्ता तापिका हि।”

21उङको द्‍याङगेलाइ जोबाफ पिहि, इदोइ रोमि साम्रातको चित्तरो हि कालाउ इन्ता रोमि साम्रातको मिङ हि। येसु आरोङ दोअ्हि, जेदोङ रोमि साम्रातको हि इङको रोमि साम्रातहेङ पिसु कालाउ जेदोङ परमेस्वरको हि परमेस्वरहेङ पिसु। 22उङको द्‍याङगेलाइ येसुको दोअ्का काथा हिङतेङ भाङ-भाङहि। कालाउ येसुहेङ इन्ताङ लाअ्तेङ इम्बालाइ हानिहि।

सिन्हुका कालाउ बिहु

(मर्कु 12:18-27; लुक 20:27-40)

23ओदोङ दिना आधे सदुकिगेलाइ येसुकोता लोहि। कि हिदोइ बुङ द्‍याङ सिकासो सिन्चाल्तेङ माल्होकाङ। सदुकिगेलाइ येसुहेङ प्रस्न हिअ्हि। 24इम्बालाइ दोअ्हि, गुरु ज्यु, मोसाको दोअ्का भाइपाङ हिदोइ बुङ द्‍याङ सान्तान माजेङसिङ सिनु, वाको दादाको भाअ्सिङ ओने बिहु पातेङ सान्तान जोलोम पालि उङको बेबालहेङ बिहु पालि गोइखे? 25केलाइ हेन्जा झना दादा-ओनेगेलाइ हिघान्हाहि। जेठा बिहु पाहि कालाउ सिहि, वाको हिदोइ बुङ जामाल मान्थुघाखे। ओदोङ भाअ्सिङ वाको ओने के सिका बेबाल भाउजिहेङ बिहु पाहि। 26कालाउ न्हुसो साइला ओने बुङ उङको बेबालहेङ बिहु पाहि, एन्सा पातेङ उङको न्हिमि दोङ सान्तानको 27जोलोम माजेङसिङ झाराङ सिहि, कालाउ न्हुसो उङको बेबाल बुङ सिहि। 28हाइपालिपानु न्हिमि दादा-ओनेगेलाइ उङको बेबाल दोफा बिहु पाका हिघाहि जेलाउ झाराङ आरोङ सिकासो सिन्हुताङ कालाउ वा हासुको बे जेनाङ?

29येसु इम्बालाइहेङ जोबाफ पितेङ दोअ्हि, नेलाइ गलत हिसुना हाइपालिपानु नेलाइ मागिसुखेना कि परमेस्वरको धर्मसास्तरता हाइ दोअ्खे, कालाउ ना ते परमेस्वरको सरबुङको बारेता बुझिका हिसुना? 30हाइपालिपानु जेलाउ सिकालाइ सिन्हुतावा, ना ते वाबाल ना ते बेबालाइ बिहु पावा, इम्बालाइते स्वर्गता हिका स्वर्गदुतगेलाइ भाइपा ह्यावा। 31ओदोङ भाअ्सिङ सिकासो सिन्हुकाको बिसोइता परमेस्वर नेलाइहेङ हाइ दोअ्का हि, “इङको पढेका मान्थु सुन्हा? 32परमेस्वर दोअ्का हि, का आब्राहामको परमेस्वर, इसाहाकको परमेस्वर, कालाउ याकुबको परमेस्वर सिका द्‍याङगेलाइको परमेस्वर माको, भरु बान्चिकालाइको परमेस्वर हि।”

33जेलाउ जेरगेलाइ हिङहि कालाउ येसुको सिक्स्याता ओबालाइ आवाइ तुअ्हि।

झाराङ खान्तेङ माहान आग्या

(मर्कु 12:28-34; लुक 10:25-28)

34येसु सदुकिगेलाइहेङ एसापा जोबाफ पितेङ इम्बालाइहेङ सिकापा बानाइ पिका हिङतेङ फारिसिगेलाइ वाको भेरपाङ जोम्हि। 35एमि व्यवस्था धिरपाका द्‍याङ येसुहेङ जाचिलि बिचार पातेङ वासेहेङ हिअ्हि। 36कालाउ वा येसुहेङ हिअ्हि, “गुरु ज्यु, मोसाको व्यवस्थाता झाराङ खान्तेङ बार्का आग्या हिदोइ हि?”

37येसु वासेहेङ दोअ्हि, नाअ् परमप्रभु नाङको परमेस्वरहेङ नाङको गोताङ ह्रदयहोइ, गोताङ प्रानहोइ कालाउ गोताङ मनहोइ प्रेम पालि गोइखे। 38इदोइ दोङ लाङ कालाउ झाराङ खान्तेङ माहान आग्या हि। 39न्हेतेङ आग्या चाहि लाम्फाको भाइका हि, ताइको देरागेलाइहेङ ताइमिङ भाइपाङ प्रेम पासु। 40गोताङ मोसाको व्यवस्था कालाउ परमेस्वरको बक्ताको सिक्स्याको आदार इदोइ न्हेनोङ आग्यागेलाइ दोङ।

येसु हासुको चान?

(मर्कु 12:35-37; लुक 20:41-44)

41जेलाउ इन्ता फारिसिगेलाइ जोम्तेङ हिघाहि, येसु इम्बालाइहेङ हिअ्हि, 42ख्रिस्टको बिसोइता नेलाइको हाइ बिचार हि कुनु? वा हासुको चान कुनु? कालाउ फारिसिगेलाइ दोअ्हि, ख्रिस्ट राजा दाउदको चान?

43येसु इम्बालाइहेङ दोअ्हि, एन्सा पानु राजा दाउद आत्माता वासेहेङ प्रभु दोअ्तेङ हेसा दोअ्लि द्वावा? राजा दाउद दोअ्हि,

44“प्रभु काङको प्रभुहेङ दोअ्हि,

काङको दाम्पाहा योम,

जेलाउ थेकापा का नाङको

सतुरुगेलाइहेङ पुर्न रुपता माहारिपा धाउ।

45राजा दाउद ख्रिस्टहेङ प्रभु दोअ्खे पानु, एन्सा पानु हेसा वा राजा दाउदको चान जेङहि?” 46हिदोइ बुङ फारिसिगेलाइ येसुको इङको प्रस्नको जोबाफ पिलि मादोअ्हि। कालाउ ओदोङ दिनासो हासु बुङ येसुहेङ आरोङ हेन्जा प्रस्नगेलाइ हिअ्लि साहास मापाहि।

Currently Selected:

मति 22: DHINT

Highlight

Copy