मति 21
21
यरुसेलेमता येसुहेङ मानिका
(मर्कु 11:1-11; लुक 19:28-40; युहा 12:12-19)
1जेलाउ येसु कालाउ वाको चात्यागेलाइ यरुसेलेम सहर भेरपाको जैतुन तिकारको बेथफागेता थुकालि लोहि, कालाउ येसु न्हेमि चात्यागेलाइहेङ इसिका दोअ्तेङ दिङगिल्हि। 2“नेलाइ भेरपाको देरा भारि हानेसु, इन्ता थुकातेसाङ नेलाइ एनोङ गधा कालाउ वाको चान धेउका निङस्वाना, इङकोहेङ खाइतेङ काङकोता चुमासु। 3हासु बुङ नेलाइहेङ हाइ दोङ दोनु, प्रभुहेङ याको खाचो हि, दोअ्सु। कालाउ वा तुरुन्तै इङको वा पिगिल्लावा।”
4परमेस्वरको बक्तापाहासो दोअ्का बचन पुरा जेनाको दोअ्तेङ या जेङका हि,
5“सियोनको द्याङगेलाइ दोअ्सु, खाङसु,
नेलाइको राजा नेलाइकोता लोदोङखे,
मोनोइ जेङतेङ गधा ह्रुता सवार जेङतेङ,
एनोङ गधाको चान ह्रुता धोल्तेङ।”
6कालाउ चात्यागेलाइ हानिहि, कालाउ येसु ओबालाइहेङ आराइका भाइपाङ पाहि। 7ओबालाइ गधाको चानहेङ चुम्तेङ येसुकोता घुरेतेङ लोहि, ओबालाइ गधाहेङ ताइको धाबा गुअ्पाहि, कालाउ येसु इङको ह्रुता धोल्हि। 8येसु यरुसेलेम सहर भारि हानिका दामा पाहा गधाता धोल्तेङ हानिहि, हेन्जाङ द्याङगेलाइ येसुको भाअ्सिङ दामाता धाबागेलाइ दाअ्पिका हिघाहि। बो द्याङगेलाइ चाहि सिङको दालेङ पाल्तेङ ल्हाफागेलाइ दामाता दाअ्पिका हिघाहि। 9झाराङ ह्रिकाइकाताङ हिघाहि, आधिमि द्याङगेलाइ येसुको आगा-आगाता तेघाहि। आधिमि द्याङगेलाइ येसुको न्हु-न्हु तेगिल्घाखे। कालाउ द्याङगेलाइ इसिका दोअ्तेङ ह्रिकाइलि तेङहि,
राजा दाउदको चानको जय ज्याको!
प्रभुको मिङता लोका धन्यको हि!
स्वर्गको परमेस्वरको बाखिन पासु।
10जेलाउ येसु यरुसेलेम लिता दुल्हि, गोताङ सहरको द्याङगेलाइ भाङ-भाङका जेङहि। इम्बालाइ हिअ्हि, “या हासुको?” 11येसु दोफाङ लोका द्याङ जोबाफ पिहि, वाते गालिल जिल्लाको नासरत देरासो लोका परमेस्वरको बक्ता येसु हि।
येसु मुन्दिरता
(मर्कु 11:15-19; लुक 19:45-48; युहा 2:13-22)
12कालाउ येसु परमेस्वरको मुन्दिरको साअ्लेङता हानिहि। वा दोङ इम्बालाइहेङ इङको इलाकासो धाअ्कालाइतेङ ओल्लेपाहि। जेदोङ द्याङगेलाइ बलि पालिको भाअ्सिङ गपुस कालाउ आरु आनेमाने चोल्का पिअ्का काम पातेङ हिघाहि। कालाउ वा दोङ ताका सोका चाङ चाउकि बुङ तुपिगिल्हि। कालाउ वा दोङ बलि पालिको भाअ्सिङ कुर्जा पिइका इङको द्याङगेलाइको कुरचि बुङ तुगिल्पिहि। 13येसु इन्ता हिका द्याङगेलाइहेङ दोअ्हि, धर्मसास्तरता इसिका लेखेका हि, काङको साअ् प्रार्थाना पाकाको साअ्। कालाउ नेलाइ चाहि परमेस्वरको साअ्हेङ डाकागेलाइको आरडाङ बानाइसुन्हा।
14आधे कान्हाँ कालाउ आधे लेङग्रा द्याङगेलाइ मुन्दिरता येसुकोता लोहि। कालाउ येसु इङको द्याङगेलाइहेङ एल्पा पिहि। 15इदोइ आचाम्माको कामगेलाइ तिङतेङ मुन्दिरता जामालाइ राजा दाउदको चानको जय ज्याको! दोअ्तेङ ह्रिकाइलि तेङहि कालाउ मुलि पुजारिगेलाइ कालाउ मोसाको व्यवस्था धिरपाका द्याङगेलाइ चेर ताम्पाहि। 16इम्बालाइ येसुहेङ दोअ्हि, उङको जामाललाइ हाइ दोअ्तेङ हि, हाइ नाअ् हिङना? येसु जोबाफ पिहि, एइ हिङदोखा हाइ नेलाइ हेलाउ बुङ धर्मसास्तरगेलाइता पढेका मान्थुसुना?
येसु जामाललाइ कालाउ दुदु चुका जामाललाइहेङ
बाखिन पालि लागाइना?
17कालाउ न्हुसो येसु इङको थामेहेङ लाअ्तेङ नगरसो बाहार बेथानिया देराता हानिहि कालाउ बेल्हालाउ इङताङ बासा हि।
आन्जिरको सिङ
(मर्कु 11:12-14,20-24)
18न्हु दिनाको ह्रिमाङ, येसु देरागेलाइ भारिसो घुरिलाउ येसु म्हुतुहि। 19वा दामाको काम्भे भेरपा लाब्राको सिङ तिङहि। येसु लाब्राको सिङ भेरपा हानितेङ सेका चालि मन पाघाखे। इङको सिङताते सेका कालाउ चाका हाइ बुङ मान्थुघाखे। इन्ता ते ल्हाफा खिनिङ हिघाहि, कालाउ येसु इङको सिङहेङ दोअ्हि, एला उसो नाङकोता सेका हेलाउ बुङ माजेनावा आचानक एन्सालाउ दोङ इङको सिङ चुहि कालाउ सिहि।
20चात्यागेलाइ इङको तिङहि, ओबालाइ भाङ-भाङहि ओबालाइ हिअ्हि, “हेसापा इदोइ लाब्राको सिङ सेङहि कालाउ ओदोङ घुरि सिहि?”
21येसु जोबाफ पिहि, नेलाइहेङ का जातिङ भारि दोअ्खा, जेसापा नेलाइता खाङधुरि हिनु कालाउ इङकोता साङखा मान्थुनु, इङको लाब्राको सिङहेङ जेसा का पाका भाइपाङ पालि दोअ्स्वाना, इङको झोको खिनिङ माको, नेलाइ इङको राहेङ समुन्द्रता हुल दोअ्नु एन्साङ जेनावा। 22जेसापा खाङधुरि पातेङ प्रार्थानाता जेदोङ ह्रेस्वाना पानु नेलाइ इङको निङस्वाना।
येसुको खाबाराता साङखा
(मर्कु 11:27-33; लुक 20:1-8)
23येसु मुन्दिर भारि हानिहि, कालाउ वा धिरपाका ताङ पालाउ मुलि पुजारिगेलाइ कालाउ द्याङगेलाइको आगुवा येसुकोता लोहि। इम्बालाइ येसुहेङ दोअ्हि, “केलाइहेङ दोअ्पि इदोइ कामगेलाइ पालि नासेहेङ हाइ खाबारा हि? इसिका खाबारा नासेहेङ हासु पिहि?”
24येसु जोबाफ पिहि, “का बुङ नेलाइहेङ एनोङ काथा हिअ्लि मन पाखा, जेसापा नेलाइ कासेहेङ जोबाफ पिसुना पानु, का हिदोइ खाबारासो इदोइ कामगेलाइ पादोङखा, दोअ्तेङ दोअ्ताङका। 25युहान्ना द्याङगेलाइहेङ बप्तिस्ता पिका खाबारा हिसोसो निङहि, स्वर्गको परमेस्वर पाहासो ना द्याङगेलाइसो लोहि? कासेहेङ दोअ्सु।” जेलाउ इम्बालाइता-ताइमिता नाइसुलि तेङसुहि कालाउ दोअ्हि, जेसापा केलाइ स्वर्गको परमेस्वर पाहासो दोअ्नु वा दोङ केलाइहेङ हिअ्तावा आरोङ “नेलाइ हाइ पालि वाको ह्रुता खाङधुरि मापासुन्हा?” 26कालाउ जेसापा केलाइ इङको द्याङगेलाइ पाहासो दोङ दोअ्नु, कालाउ केलाइहेङ द्याङगेलाइ सेअ्ताङबे दोअ्तेङ थिनाखे, कि हाइपालिपानु झाराङ द्याङगेलाइ युहान्नाहेङ परमेस्वरको सत्ये बक्ता मानिखे। 27कालाउ न्हुसो इम्बालाइ येसुहेङ जोबाफ पिहि, “केलाइहेङ फोम मान्थु।” कालाउ येसु दोअ्हि, “का बुङ हिदोइ खाबारासो इदोइ कामगेलाइ पादोङखा इदोइ नेलाइहेङ मादोअ्ताङका।”
न्हेमि चानको निङपिका
28नेलाइ या निङपिका को बारेता हाइ बुझिसुना? एमि द्याङको न्हेमि चान हिघाहि। उङको द्याङ ताइको जेठा चानहेङ दोअ्हि, ओइ चान हाने कालाउ हानेतेङ नानि आङगुरको बारिता काम पाअ्। 29वा जोबाफ पिहि, का मान्हाङका। कालाउ न्हुसो वाको जोबाफता पास्ताइहि कालाउ काम पालि हानिहि।
30कालाउ न्हुसो आबा भेनेङ चानदोफा हानिहितेङ एन्साङ दोअ्हि, चान हाने कालाउ नानि काङको दाख बारिता काम पाअ्। चान जोबाफ पिहि, ते आबा, का हानितेङ काम पाङका। उङको चानते मान्हेहि। 31एला इदोइ न्हेमि चानगेलाइसो हासु चाहि ताइको आबाको आग्या केम्हि। इम्बालाइ जोबाफ पिहि, जेठा चाहि। कालाउ येसु इम्बालाइहेङ दोअ्हि, जातिङको का नेलाइहेङ दोअ्खा, पोत ल्होपाकागेलाइ कालाउ कासिबिरिगेलाइ ते नेलाइ खान्तेङ लाम्फा परमेस्वरको सासनता दुल्लावा। 32हाइपालिपानु बप्तिस्ता पिका युहान्ना ठिक जिबन धिरपाका उपाय तिङपालि लोका हिघाहि। कालाउ बुङ नेलाइ खाङधुरि मापासुना। भरु पोत ल्होपाकागेलाइ कालाउ कासिबिरिगेलाइ खाङधुरि पाहि। इदोइ काथागेलाइ तिङतेङ बुङ नेलाइ ता-ताइको पाप पालि मालाअ्सुन्हा कालाउ वासेहेङ खाङधुरि मापासुना।
मोहिगेलाइको निङपिका
(मर्कु 12:1-12; लुक 20:9-19)
33या निङपिका हिङसु, हिदोइ बुङ द्याङको मिलिङ हिघाहि। वा इङको बारिता आङगुर लागाइहि। वा आङगुरको बारिता कोरपाहाङ बेरेम खोराइहि। कालाउ इन्ता आङगुर पेलेका कोल बानाइहि। कालाउ बारि ह्रुम्लि एनोङ चान्चा धाम्हि एसापा वा दोङ ताइको मिलिङ किसानगेलाइको जिम्माता लाअ्पितेङ वा इन्तासो परदेस हानिहि। 34जेलाउ बालि ल्होपाका सोमोइ लोहि, कालाउ उङको द्याङ ताइ चाकारियागेलाइहेङ सेकाको ताइ भाग चुमालि दिङगिल्हि।
35आध्यारागेलाइ इङको चाकारियागेलाइहेङ रिम्हि कालाउ एमिहेङ दानाइहि, “भेनेङहेङ सेअ्हि आरोङ भेनेङहेङ चाहि उन्ठुइहोइ दानाइतेङ सेअ्पिहि।” 36आरोङ इङको मिलिङको गिह्रि आध्यारागेलाइकोता भेनेङ चाकारियागेलाइ दिङगिल्हि। वा लाम्फाको खान्तेङ हेन्जा चाकारियागेलाइ दिङगिल्का हिघाहि। कालाउ बुङ आध्यारागेलाइ ओबालाइ दोफा बुङ इन्सिकाङ बेउरा पाहि। 37कालाउ न्हुसो वा “ताइकोङ चानहेङ आध्यागेलाइकोता दिङगिल्हि। वा दोअ्हि, आध्यारागेलाइ काङको चानहेङ आदार पावा।”
38“आध्यारागेलाइ ता-ताइमिता साल्लाहा पाहि, याते गिह्रिको चान कि रो! या मिलिङ वाको जेनावा। केलाइ यासिहेङ सेअ्नु या मिलिङ केलाइकोङ जेनावा।” 39कालाउ आध्यारागेलाइ चानहेङ रिम्तेङ वासेहेङ आङगुरको बारिता बाहार सेअ्तेङ थाइगिल्पिहि।
40एला इङको आङगुरको बारिको गिह्रि लोतेङ इङको आध्यारागेलाइहेङ हाइ पावा?
41इम्बालाइ जोबाफ पिहि, इङको दुस्टगेलाइहेङ वा हेसा पालाउ बुङ सेअ्तावा। कालाउ न्हुसो वाको आङगुरको बारि आरु भेनेङ आध्यारागेलाइहेङ चैइलि प्यावा। जाइ सेकाको फल सोमोइता गिह्रिहेङ वाको भाग बुझाइलि चुमावा ओबालाइहेङ इङको मिलिङ कामाइलि प्यावा।
42येसु इम्बालाइहेङ दोअ्हि,
जातिङको नेलाइ धर्मसास्तर पढेका हिसुना,
जेदोङ उन्ठुइहेङ मिस्तिरिगेलाइ थाइगिल्हि,
इङको ओदोङ मुलि उन्ठुइ हि,
जेदोङ पुरा साअ् धाम्लि मुलि उन्ठुइ जेङहि,
इङको प्रभुसो जेङका हि,
कालाउ केलाइको द्रिस्टिता या भारभुसाइका हि।
43ओदोङ भाअ्सिङ का नेलाइहेङ दोअ्खा, “परमेस्वरको सासन नेलाइकोसो घिनावा। कालाउ न्हुसो परमेस्वर इसिका गैर-यहुदिगेलाइ प्यावा, जाइ परमेस्वर ताइको सासनता गोइका भाइकाङ फलपाकल सेपावा।” 44कालाउ हासु बुङ इङको उन्ठुइ ह्रुता हुल्लावा वा टुक्रा-टुक्रा जेङतेङ पोङन्हावा, कालाउ इङको उन्ठुइ हासुकोङ बुङ ह्रुता हुल्नु इङको वासेहेङ धुलाको तोले भाइपाङ बानाइयावा।
45येसु दोङ निङपिका पाहासो दोअ्का को माने मुलि पुजारिगेलाइ कालाउ फारिसिगेलाइ हिङहि, येसु ओबालाइको बिसोइता धुइदोङखे दोअ्का काथा इम्बालाइ बुझिहि। 46इम्बालाइ येसुहेङ रिम्लि दाउ भोगिल्तेङ हिघाहि, इम्बालाइ चाहि द्याङगेलाइसो थिघाहि। हाइपालिपानु द्याङगेलाइता येसु चाहि एनोङ परमेस्वरको बक्ता दोअ्तेङ खाङधुरि पाघाखे।
Currently Selected:
मति 21: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
