मति 23
23
मोसाको व्यवस्था धिरपाका कालाउ फारिसिगेलाइको बिरोधता चेतानि पिलि
(मर्कु 12:38-40; लुक 11:39-52; 20:45-47)
1कालाउ येसु द्याङगेलाइको जेर कालाउ ताइको चात्यागेलाइहेङ दोअ्हि, 2व्यवस्था धिरपाका द्याङगेलाइ कालाउ फारिसिगेलाइ मोसाको व्यवस्थाको बिसोइता ब्याख्या पाकालाइ दोङ हि। 3ओदोङ भाअ्सिङ नेलाइ इम्बालाइको धिरपाका गोताङ काथा गिसु। कालाउ इम्बालाइ जेसा पाखे एन्सा चाहि मापासु, इङको चाहि मापासु हाइपालिपानु इम्बालाइ आरुगेलाइहेङते धिरपाखे कालाउ ताइमि चाहि इङको आन्सार मापाखे। 4इम्बालाइ आरुगेलाइहेङ चाहि गोताङ किसिमको नियम बानाइ पिखे जेदोङ द्याङगेलाइहेङ केम्लि गारो जेङखे। कालाउ ताइमि चाहि ताइको बानाइका नियमहेङ केम्लि कोसिस मापाखे।
5इम्बालाइ ताइको गोताङ काम द्याङगेलाइहेङ तिङपालिको भाअ्सिङ खिनिङ पाखे। इम्बालाइ पात्तारा बार्का बानाइखे जेदोङता धर्मसास्तरको बचनगेलाइ इम्बालाइ ताइको कापाल कालाउ खुरको नाडिता लागाइघाखे। कालाउ इम्बालाइको धाबागेलाइता दाइ-दाइका झुम्का लागाइखे। 6इम्बालाइ भोजता आदरको कालाउ यहुदिगेलाइको चाउघारा साअ्ता उत्तम थामेगेलाइता योम्लि खाङखे। 7हाते बाजारगेलाइता घुराइ गिल्लाउ बुङ द्याङगेलाइ ताइमिहेङ आदार इज्जत पाको कालाउ गुरु ज्यु दोअ्ताको दोअ्तेङ इम्बालाइ बिचार पाखे।
8नेलाइहेङ हासु बुङ गुरु ज्यु मादोअ्ताको हाइपालिपानु नेलाइते झाराङ दादा-ओनेगेलाइ बानाबोर हिसुना। नेलाइको एमि खिनिङ गुरु हि। 9जेदोङ आदार नेलाइ स्वर्गता हिका आबाहेङ पिसुखेना, इन्सिका आदार हासुहेङ बुङ इदोइ प्रिथिबिता माअ्पि। 10कालाउ नेलाइ हासुहेङ बुङ आगुवा मादोअ्सु, नेलाइको एमि खिनिङ आगुवा ख्रिस्ट हि। 11नेलाइता झाराङ खान्तेङ बारका चाहि, झाराङको सेवा पालि गोइयावा। 12हाइपालिपानु हासु बुङ ताइमिहेङ बारका बानाइखे, वासेहेङ लेता हु्ल्पावा, कालाउ ताइमिहेङ लेता हुल्पाका चाहि बारका बानाइयावा।
13“ओइ कपटिगेलाइ मोसाको व्यवस्था धिरपाका द्याङगेलाइ कालाउ फारिसिगेलाइ! नेलाइको भाअ्सिङ हेथे थिलि गोइका हि! परमेस्वर नेलाइहेङ हेन्जा साजाइ प्याङ, हाइपालिपानु नेलाइ दोङ द्याङगेलाइहेङ परमेस्वरको सासनता दुल्लि आनुमति मापिसुखेना। नेलाइ ताइमि बुङ मादुल्सुखेना कालाउ दुल्लि खाङकालाइहेङ बुङ दुल्लि मापिसुखेना।” 14नेलाइको भाअ्सिङ हेथे थिलि गोइका हि! मोसाको व्यवस्था धिरपाका द्याङगेलाइ कालाउ फारिसिगेलाइ, नेलाइते कपटि हिसुना! नेलाइ के सिकालाइको साअ् घिङसुखेना, कालाउ आरोङ तिङपालिको भाअ्सिङ सार्बाजानिक रुपता ह्रिङ-ह्रिङका प्रार्थाना पाका भाइपा खिनिङ पासुखेना। ओदोङ भाअ्सिङ नेलाइ बार्का दन्ड निङस्वाना।
15नेलाइको भाअ्सिङ हेथे थिलि गोइका हि! मोसाको व्यवस्था धिरपाका द्याङगेलाइ कालाउ फारिसिगेलाइ नेलाइते कपटि हिसुना! आरुगेलाइहेङ ताइको धर्मता चुमालि गोताङ थामेगेलाइता हानिसुखेना, आधिमिहेङ ताइको धर्मता चुमातेङ वासेहेङ दोब्बल नरकता हानिलि यग्यो बानाइसुखेना जेसाङ कि नाअ् ताइमिङ हिना।
16ओइ कान्हाँ आगुवागेलाइ नेलाइको भाअ्सिङ हेथे थिलि गोइका हि! नेलाइते मुन्दिर साइतेङ केरा चालाउ हाइ दोङ माजेङखे, कालाउ मुन्दिरको सोना साइतेङ केरा चालाउ चाहि केरा लोङस्वाना दोअ्तेङ धिरपासुखेना। 17नेलाइ हिसिका कान्हाँ कालाउ आनाइ हिसुना! बारका काथा चाहि हिदोइ हि, सोना ना सोनाहेङ चोख्याइका मुन्दिर? 18नेलाइ या बुङ धिरपासुखेना कि बेदि साइतेङ केरा चाहे पानु हाइ दोङ माजेङखे, कालाउ चढाइका बेदिको भेति साइतेङ केरा चालाउ केरा लोङखे। 19नेलाइ हिसिका कान्हाँ हिसुना! बार्का काथा चाहि हिदोइ हि कुनु, बेदिता चढाइका भेति कि भेतिहेङ पबित्तरो बानाइका बेदि? 20ओदोङ भाअ्सिङ बेदिको केरा चाकाते बेदि कालाउ इन्ता चढाइका गोताङ भेतिको केरा चावा! 21कालाउ एन्साङ पातेङ मुन्दिर साइतेङ केरा चाका चाहि मुन्दिर कालाउ मुन्दिरता हिका परमेस्वरहेङ साइतेङ केरा चाखे। 22जाइ स्वर्गको मिङता केरा ह्रुखे वा परमेस्वरको सिङहासन कालाउ इङको ह्रुता बिराजमान हिका परमेस्वरको केरा चाखे। 23नेलाइको भाअ्सिङ हेथे थिलि गोइका हि! व्यवस्था धिरपाका द्याङगेलाइ कालाउ फारिसिगेलाइ, नेलाइते कपटिगेलाइ हिसुना! नेलाइ पुदिना, सम्पोइ, कालाउ जिराको दसाङसा परमेस्वरहेङ पिसुखेना। कालाउ व्यवस्थाको मुलि न्याय, दाया कालाउ खाङधुरि योग्य भाइका काथागेलाइहेङ हेला पासुखेना। भरु इङको आरु काथागेलाइ दोफाङ न्याय, दाया कालाउ खाङधुरि यग्यो जेङतेङ हिसु। 24नेलाइ कान्हाँ आगुवागेलाइ हिसुना, हाइपालिपानु नेलाइ म्हुइका काथागेलाइ नियमको बारेता हेन्जाङ सावाधानि तिङपासुखेना। जेसाङ कि भुसुनाहेङ झोखे, कालाउ बुङ नेलाइ परमेस्वरको महत्व पुर्न आग्यागेलाइहेङ हेला पासुखेना! इङकोते उटहेङ निअ्का भाइका हि!
25नेलाइको भाअ्सिङ हेथे थिलि गोइका हि! व्यवस्था धिरपाका द्याङगेलाइ कालाउ फारिसिगेलाइ, नेलाइते कपटिगेलाइ! नेलाइ इसिका भान्डागेलाइदोङ जेदोङ बाहारसो जाहाँका हि, कालाउ लिता चाहि न्हाम्का हि। इङको इदोइ दोङ कि नेलाइ ताइमिहेङ रेम्का द्याङगेलाइ भाइका तिङपासुखेना। कालाउ नेलाइको ह्रदय दिका स्वार्थाहोइ पोङघाका हि। 26ओइ कान्हाँ फारिसिगेलाइ! लाम्फा नाअ् दिलि कालाउ स्वार्था जेङलि लाअ् जेलाउ नाअ् आसल काम पालि द्वाना। या एनोङ इसिका भान्डा भाइका जेनावा जेदोङ भान्डा बाहार कालाउ लिता न्हेपाहाङ जाहाँका हिखे।
27नेलाइको भाअ्सिङ हेथे थिलि गोइका हि! व्यवस्था धिरपाका द्याङगेलाइ कालाउ फारिसिगेलाइ, नेलाइते हेथे कपटिगेलाइ हिसुना! नेलाइ चुना तेका तोमगेलाइ भाइका हिसुना, जाइहेङ बाहारसो रेम्का तिङखे। कालाउ लिता चाहि सिका आइका द्याङगेलाइको हारागेलाइ आसुद्द थोकगेलाइ हिखे। 28नेलाइ बुङ इन्सिकाङ बाहारसो नेलाइहेङ धर्मि भाइपा देखाल जेङसुखेना, कालाउ लिता चाहि नेलाइ कपटि कालाउ दुस्टहोइ पोङघातेङ हिसुखेना।
29“नेलाइको भाअ्सिङ हेथे थिलि गोइका हि! व्यवस्था धिरपाका द्याङगेलाइ कालाउ फारिसिगेलाइ, नेलाइते हेथे कपटिगेलाइ! नेलाइको पुर्खागेलाइ जेदोङ परमेस्वरको बक्तागेलाइहेङ सेअ्का हिघाहि। ओबालाइको तोमहेङ बानाइसुखेना कालाउ धर्मि द्याङगेलाइको तोमहेङ साजाइ सुखेना। 30कालाउ नेलाइ दोअ्सुखेना, उहिलेको केलाइको आबा-पुर्खागेलाइ ते परमेस्वरको बक्तागेलाइहेङ सेअ्हि। कालाउ केलाइ बुङ ओबालाइ दोफा हिका नुते केलाइ चाहि इन्सिका काम पालि इम्बालाइहेङ मासाघाइधाङ।” 31एसापा दोअ्तेङ नेलाइ ताइमिहेङ उङको परमेस्वरको बक्तागेलाइहेङ सेअ्का हारागुतियाकेलाइ दोङ दोअ्तेङ सुइकार नेलाइ पासुखेना। 32ओदोङ भाअ्सिङ एला नेलाइ बुङ पुर्खागेलाइको जात्तरा पाका काम पुरा पास्वाना। 33ओइ बिस हिका पुय्याँको जामालाइ भाइका! नेलाइ नरकको न्यायसो बान्चिलि मादोस्वाना। 34ओदोङ भाअ्सिङ का नेलाइहेङ दोअ्खा रेम्फा हिङसु, का नेलाइकोता परमेस्वरको बक्तागेलाइ, बुद्दिमान द्याङ कालाउ सत्ये व्यवस्था धिरपाका द्याङगेलाइ दिङगिल प्याङका। इम्बालाइ मघ्ये नेलाइते हेथेहेङ सेअ्स्वाना, हेथेहेङ क्रुस्टा तोइस्वाना, हेथेहेङ चाहि यहुदिगेलाइको चाउघारा साअ्ता द्वालिहोइ म्हेतावा कालाउ हेथेहेङ एनोङ सहरसो भेनेङ सहरता गिलगिल्लावा। 35प्रिथिबिता होपाका गोताङ धर्मि जनगेलाइको हिति निरदुसि हाबिलको सेअ्न्हाकासो चुम्तेङ बरखियाको चान, जकरियाको सेअ्न्हाका थेकापा, जाइहेङ नेलाइ मुन्दिर कालाउ बेदिको माझाता सेअ्सुन्हा, इङको को दुसिका नेलाइको ह्रुता परियावा। 36जातिङ भारि का नेलाइहेङ दोअ्खा, इदोइ गोताङको सेअ्का को दुसिका इदोङ पुस्ताको ह्रुता आइलागियावा।
37ओइ यरुसेलेम सहरको द्याङगेलाइ! परमेस्वर दोङ दिङगिल्का बक्तागेलाइहेङ नाअ् उन्ठुइहोइ तोअ्तेङ सेअ्सुखेना। जेसाङ कियाको भुन्दि किचानगेलाइहेङ पोमावा का बुङ नाङको चान-चामिन्दिगेलाइहेङ बान्चिपालि खाङघा कालाउ नाअ् माकिन्हा। 38खाङसु, नाङको साअ् भाइ भाइयावा का नासेहेङ दोअ्ताङका, 39जेलाउ थेकापा नाअ् दोङ धन्यको प्रभुको मिङता लोका मादोअ्ताना एन्सालाउ थेकापा नाअ् कासेहेङ मातिनाना।
Currently Selected:
मति 23: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
