Rommiako 9
9
Ukepenuopfü Israel Kedakelie
1A Khrista nu ketho touu puya, a tijü ba mo; mu Kemesa Ruopfü geinu a noule süue mezhü zo ücü zhapu chüya. 2A nou kemezhie mu a melou chütei-i tuoya. 3Chülie vikecü sie we a chü a phou tsatie a themiako#9:3 Gk A siezedzürieko. mu a se a yieko kelalieketuo la a bu rüsepfüta di Khrista kitsa a khawanu sie zotieciü. 4Sükoe Israelmiako zo; mu uko peviepie nuothonuo chülieketako, zapuzayie, dietseidiekhoko, thezho-u khakeshü, rüsuokecü, mu pupie kezhüko rei süko vie; 5upuonuoko rei uko vie, chüüphou tsa nu le vo ro uko geinu Khrista, mha pete mho kebau lhou vor, kechachie thetshepfülie kesü sü Ukepenuopfü zo. Amen.
6Ukepenuopfü dieu chü tso mota mo zo. Kekreilamonyü Israelmiako pete rei Israel ketho zo mo, 7mu Abraham nuonuo pete rei puo nuosenuoyie ketho phre mo; derei “Isak geinu n seyiemia za kiesietuo,” isi.
8Hau ca liro chüüphou nuonuokoe Ukepenuopfü nuonuo mo, derei pupie kezhü nuonuoko üse puosepuoyie üte. 9Hau la phrakeshü dieu pukecü, “Ha meseki a la vortuo mu Sara thepfunuomia puo penuolietuo,” si. 10Siro sü rübei zo mo; Rebeka rei puo nupfu u puotsau Isak nuonuoko nuonipfükelie ki rei sükemhiecü puo chü. 11Puo nuonie penuokelie mhodzü kevi morei kesuo puorei chüwa mo zoluocü nu (Ukepenuopfü kedakelie mharhüu bu ba seilieketuo la, 12mhathoko la monyü puo u kiekelie la zo) puoe pukecü, “Phichüue nhicuu lie chütuo,” isi. 13Süu thupie kezhü,
“A Jakob khrie,
derei Esau ngumecü,” si.
14Siro we kedipuo pu sa ta? Ukepenuopfü gei kethoca ba mote me? Si mo zo! 15Kekreilamonyü puo Mosa ki,
“A ngumezhieketuomia ngumezhie zotuo,
mu a khrieshüketuomia khrieshü zotuo.”
16Süla süu themia medo morei u rhiechükecü geinu mo, derei Ukepenuopfü u ngukemezhieu la zo. 17Kekreilamonyü kethodie-e Faro ki pukecü, “A n geinu a kekuo pesishü di a za pie kijü pete nu pushüketuo la a n se sierkeshü zo.” 18Sidi puoe puo medomia ngumezhieya mu puo thuo puo medomia nou chü perewaya.
Kepenuopfü Noupfhü mu Ngukemezhie
19Süla nieko a ki, “Siüro kidi puo mia kejo pfhülie vi ta? Kekreilamonyü supuonie puo medo-u perhielie vi ta?” idi putuo nhie! 20Sirei no themia zo di Ukepenuopfü prülikezha ha supuo ga? Chükelie mhanyau sie puo chükeshüu ki, “No kedipuo la a chüpie hiwa ga?” ilie vi me? 21Lithomia puoe rügau se puo medo chü di huo chüpie therhu li chü mu huo chüpie therhu phikemo li chülie kevi puo kekuo jü üme? 22Di siro mhanuü Ukepenuopfü puo noupfhü mu puo kekuo pie mia pekieshüketuo la pekawaketuoko gei puo nou cha ba üro mha puote me? 23Mu puoe pedzüperie zayie chüketuo la kedase tuoketako bu puo zayieu kinyiko nguketuo la sita üro, 24mu sünu Judamia donu rübei zomonyü Judakemomia donu rei kiekelie úko rei sata üro, we mha huo pulie vi me? 25Puoe Hosea nu pukeshü:
“A themia kemoko ü, ‘A themiako’ üdi kielietuo,
mu a khriekemopfü ü, ‘A khriepfü’ üdi kietuo.”
26“Siro thiedzü, ‘Nieko a themia mo’
idi uko ki pukeshüra nu,
uko üse rhei tuoyakezha Kepenuopfü nuonuo üdi kietuo,” isi.
27Siro Isaya Israelmia dze pu shiekhoui di, “Israel nuonuoko thuo krapie dzükezha khie huocanyo mhie zorei, lhiekeliekoyo rübei kelakelie zotuo; 28kekreilamonyü Niepuu pecha mo di kijü hau ze mhachü kemezhüketuo dienyau pepi mhatuoü bate.”#9:28 Leshü kewe huo nu puoe puo mhatho chü tseiwa, mu kemiatho nu süu da pedzüwatuo, Niepuue kijü nu thenyieu chü pedzüwaketuo la si. 29Mu Isayae pukeshü tuoi,
“Krodiko Niepuu thuo huomia khapie u tsia chüshü kemosie,
we Sodom mhieta mu u chüpie Gomora tuoiwa zotuo,” si.
Israel Pele Kemvü
30Siliro we kedipuo pu ta? Judakemomia, kemiatho pfhü kenounyü mo zocüko, süu nguliete, süusü kepele la miatholiete; 31derei Israelko, thezho-u medzi di kemiatho la thehiechü tuo di thezho-u chü tseiütsolie mote. 32Kedipuo la ga? Kekreilamonyü u kepele sa mo di uko mhathoko geinu ngulie thenyüsieketa la. Uko mia phi kemesü tsieu geinu uko phi mesüwate. 33Süu dze,
“Harie, a mia phi kemesü tsie puo,
mu mia perhekhrüwayakezha tsie puo pie Zion gei zhü ho,
sirei themia kehoupuorei puo pelekelieu#9:33 Moro süu pelekelieu. thenga chütalie lho,” idi thupie zhü.
Currently Selected:
Rommiako 9: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
