Rommiako 10
10
1A siezedzürieko, a melou nu kemengu mu Ukepenuopfü ki kechau sü themia hako bu rei kelakelie ngulieketuou zo. 2Ukoe Ukepenuopfü kitsa u rhiechü phikezhü a zhapu chülie vi zo, derei süue mhasi ketho-u nu mo. 3Kekreilamonyü ukoe Ukepenuopfü kinu kevor kemiatho-u si mo, di u thuo u kemiatho-u bu metei balietuo üdi Ukepenuopfü kemiatho khrükhro lerlie mo. 4Kekreilamonyü themia kehoupuorei pelekelieu bu miatholieketuo la Khrista geinu thezho-u bu puo thela chüte.
Kelakelie Mia Pete la Zo
5Mosae thezho nunu miathokelie dze thu di “Kehoupuorei hako chüyakezhau rheilie zotuo,” sishü. 6Derei kepele geinu kemiatho paryakezhaue pucü, “N nou nu, ‘Supuoe teigei kho ta?’ ” (Puoca Khrista bu kerketuo) 7“morei ‘Supuo kijü khro kesou nu tsu ta?’ (Puoca, kesia nunu Khrista ze parketuo) idi le hie,” iya. 8Derei süu kedipuo puya ga?
“Dieu n penuo ba zo,
n tie nu mu n melou nu ba zo,”
si. (Puoca, we se puyakezha kepele dieu zo); 9kekreilamonyü no Jisu üse Niepuu zo ükecü n tie nunu puphralie mu kesiako donunu Ukepenuopfü puo chü perheilietacü n nou nu pele liro, n kelalietuo. 10Kekreilamonyü miatholieketuo la themia u nou se pelelieya, mu kelakelie ngulieketuo la u tie se phralieya. 11Kethodie-e pukecü, “Kehoupuorei puo pelekelieu bu thenga chütalie lho zo,” si. 12Kekreilamonyü Judamia rei Grikmia rei kekreilie lho; Niepuu sü themia pete mho Niepuu zo mu puoe puo ki chayakezha pete gei mephruomevuo phiya. 13Kekreilamonyü, “Themia kehoupuorei, Niepuu za kiekelieu kelalie zotuo.”
14Derei ukoe pele moliro kikidi puo kielie ta? Mu uko kimhie di puo dze si kemo puo pelelie ta? Siro miae puo dze pushü moro kikidi uko puo silie ta? 15Mu themia ketseshü moro kimhie di puo dze pushülie vi ta? Süu dze, “Dieliekevi se kevorko phi kide zivi shi!” idi thupie zhü. 16Derei mia pete dieliekeviu zelie mo; kekreilamonyü Isayae pucü, “Niepuu, supuonie hieko dielieu pelelie ga?” si. 17Süla kerünyü geinu kepeleu parya, mu rünyükelie süusü Khrista dieu geinu zo.
18Derei ae uko süu si mo zo me? idi ketso. Uko süu si tou zo; kekreilamonyü
“Uko pfhe kijü pete nu si vote,
mu uko dieko kijü vala ketso nu rei vote,”
isi. 19Siro Israel süu caüla silie mo me? Therie nu Mosae pucü,
“A seyie ketho mo zocü kro puo la,
nieko bu nie rokelie chüshütuo;
mu kenya seyie puo la nieko bu nie nou meyietuo.”
20Sitse Isayae thepfu se di pu sakecü,
“A pfhütuo kemo kro puo a nguliete;
a thuo a khapie a ki cha kemo kro puo pengushüte,” si.
21Derei puoe Israel ki, “Mia die ze kemo mu mha kepetsou themiako ki we teisozha pete a bounie yhapie kie tha zo,” si.
Currently Selected:
Rommiako 10: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
