Rommiako 11
11
Ukepenuopfü Israel Ngukemezhie
1Sitse a sie, Ukepenuopfü puo themiako meliewate me? Si mo zo! A rei Abraham yiemia, Benjamin seyiemia geinu lhou kesier Israelmia ze. 2Ukepenuopfü thiedzü puo themia siketuoko khawa mo. Nieko kethodie-e Elija dze kedipuo pu shi si mo me? Kimhie di Israel kepetsou la Ukepenuopfü ki cha shicü. 3“Niepuu, uko n siedzekesiko dukhriwa, uko n ruosuobako bie pesuo phrewa; a rübei lhiekeshü ze, mu uko a kerheiro pfhü tuote.” 4Derei Ukepenuopfüe kedipuo se puo die kelashü ga? “Khoutoutsu Baal rüsuo kemo a thuo a la mia nyie thenie khapie baluo,” si. 5Süsü tuoi tsie rei ngukemezhie la kedakelie themia kro puo lhiepie baluo. 6Derei süusü ngukemezhie lanu zo üliro, mhatho la mote, si kemosie ngukemezhie üse ngukemezhie ülie lhote.
7Siro kita? Israel-e pfhü ketuou ngulie mote. Sirei kedakelieko süu nguliete, derei keshako nou chü perewate, 8süu thupie kezhü,
“Ukepenuopfü uko nou chü kerüvowate,
thie ketso rei uko mhi se ngulie kelho,
mu uko nyie se rünyülie kelho chü tuote.”
9Mu David rei pucü:
“Uko mizhü bu uko la kebie mu ciephrie chütalie,
uko phi kemesü tsiu uko pechüpenyükewa puo chücie;
10uko mhi bu zeita di mha ngulie kelho chüwacie,
mu uko chie bu chiethou sei tuotacie,” si.
Judakemoko Kelakelie
11Siro a putuo, uko bu krütaketuo la uko phi perheshü üme? Mo zo! Derei uko krüketa geinu kelakelie se vor Judakemoko tsü, sidi Israel bu puo rolieketuo la. 12Uko krükeshü#11:12 Gk Kejokemou. la kijüu chü penyilie, mu uko thalie moketa geinu Judakemoko chü penyilie üro, uko sa tseikeshü we kiderei krakuotuo shi!
13A tsie Judakemoko ki mha puya. A Judakemoko la apostel puo chü ketuo chie a mhatho-u bu zayie chü zotuo, 14süusü a themiako chüpie u rolie di uko huomia kelalietuo. 15Uko meliekewa la kijüu bu kezevilie liro, uko ze lakelie-e kesia nunu rheikelie puo zo mo üme? 16Mhanuü thoulha pie ruosuo kechü za puo pie puo si kerieu üdi khakeshüu mesata üro za kekrei pete rei mesata zo; mu seimieu mesata üro, puo coko rei mesata zo.
17Derei puoco huo biechukewa la, no nha oliv zokecüu biepie biechukewako chü nu pfepie phashülie di olivbo-u mie keviu ze kerhete, 18süla puo coko gei kemholie hiecie. No kemholietuoü sie liro, no puo mieu toupfü ba monyü puo mieu thuo n toupfü ba zocü rükraliecie. 19Siro no sie, “Puoco huo biechukeshüe a bu süko pfelieketuo la zo,” isi sietuo. 20Süu ketho zo. Sükoe pele kemo la biechuwate, derei no n kepele la thakelie zo. Süla kemiako hieü michie sieiliecie. 21Kekreilamonyü Ukepenuopfüe lhenu the kepar coko thuo rei biewa khrie moro, no we lhieshülie lhociü. 22Siro Ukepenuopfü mia ngukemezhie mu puo die kere rei leshücie: tetsuketako gei puo die re, derei nie puo ngukemezhieu nu tuolie liro, puo nieko ngumezhietuo; moliro puo nieko rei sawa zotuo. 23Siro Israelko zorei, uko pele kemvü khawa liro, uko pie phi puo pfelietuo, kekreilamonyü uko pie phi puo pfe lalieketuo Ukepenuopfüe puo kekuo ba. 24Kekreilamonyü no nha oliv co rükouketa lhenu the kepar-u mo di se vo olivbo ketho-u pfe kesapie phalie di pethelieta liro, puoco zokecü hako pie vo uko olivbo ketho-u geinu pethe laketuo we rüükuotuo.
Ukepenuopfü Mia Pete Ngukemezhie
25A zeko, a nieko bu kemhasita molieketuo la, a nie bu mha kesou hau si nyü: Judakemoko kra lotsolie kemochie, Israelko huo u nou re tuotuo. 26Sidi Israel pete kelalietuo; süu thupie kezhü,
“Zion geinu Kelakelieu vortuo;
sidi Jakob geinu kerüzhüko chüwatuo.”
27“A uko kephoumako chüseketa ki,
a uko ze dietseidiekhokelie hauhatuo.”
28Nieko la, dieliekevitsa we uko Ukepenuopfü ngumvüko zo; derei ukoe uko puonuoko la kedakelietsa liro uko Ukepenuopfü khrieko zo; 29kekreilamonyü Ukepenuopfü mha methuo pie mia ketsü mu mia kiekecü puo nou kedi lataya mo. 30Thiedzü nieko Ukepenuopfü die ze tuo mo, derei tsie we uko puo die ze kemo la nieko ngukemezhie ngukelie tuoi, 31sütuoi nieko ngumezhiekeshüu la süko bu rei ngukemezhie ngulieketuo la, uko tsie puo die ze mo bate. 32Ukepenuopfü themia pete bu mia die ze kemo die chüwa, sidi pete ngumezhie ketsoshüketuo la.
Ukepenuopfü Ketshe
33He-i, Kepenuopfü kinyiko mu mhasi tsiu kesikeleko sou zalie! Kimhie di puo capiko pfhü mu puo zhoko le ketsolie ta!
34“Kekreilamonyü supuonie Niepuu nou silie ga?
Morei supuonie puo ketarho-u ga?”
35“Morei supuonie mha merü la di,
mha methuo kha puo tsü ga?”
36Kekreilamonyü puo kinu tsiu puo geinu mu puo lanu mha pete rei ketuo zo. Puo bu kechachie zayie chücie. Amen.
Currently Selected:
Rommiako 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
