Rommiako 8

Ruopfü nu Kelhou

1Süla tsie we Khrista Jisu nu ketuoko pejokecü die jüte. 2Kekreilamonyü Khrista Jisu nu kelhou kerhei Ruopfü zho-u thuo kephouma mu kesia nunu a shüphraliete.#8:2 Gk No icüu mialiu pu: leshü kewe huo nu ro a morei úko si. 3Chüüphou kethachü la thezho-u chülie lhoketau Ukepenuopfüe chüshü: Süusü puo thuo puo nuou ketsepie puo bu kephouma chüu mevi di kephouma dzetsa la puo chüu geinu kephouma pejowate, 4sidi we chüüphou kitsa tuo monyü Ruopfüu kitsa tuoketako kelhou nunu thezho nu chü morosuo toucüko chü tseilieketuo la. 5Kekreilamonyü chüüphou kitsa ketuoko chüüphou rüliko medoya, derei Ruopfüu kitsa ketuoko Ruopfüu rüliko medoya. 6Siro chüüphou kitsa medokecüe kesia zo, derei Ruopfüu kitsa rüli kemedoe kerhei mu noune zo. 7Haha la u nou se chüüphouu kitsa tuoketae Ukepenuopfü ngumvü zo; süu Ukepenuopfü zho-u khrükhro baya mo; mu ba reilie lho zo, 8siro chüüphou kitsa ketuoko Ukepenuopfü nei chülieya mo.

9Derei nieko we chüüphou kitsa ba monyü Ruopfüu kitsa bate, Ukepenuopfü Ruopfüu nie nou lhou baketa la. Kehoupuorei Khrista Ruopfüu nyi kemomia puo vie mote. 10Derei Khrista nie nou bata ro, kephouma la nie mo thuo kesia kitsa bata zorei, kemiatho la nie Ruopfü kerheitsa bate. 11Mhanuü kesia nunu Jisu chü perheikelie Ukepenuopfü Ruopfüu nie nou lhou tuota ro, puo Ruopfüu nie nou lhou tuoketa la, kesia nunu Khrista chü perheikelieu thuo kerhei pie nie siataketuo chüümo chükepfüko rei tsü zotuo.

12Süla a siezedzürieko, we chüüphou medo ze lhoutuo üdi chüüphou pu pfü tuo mo, 13kekreilamonyü nie chüüphou medoko ze lhouya ro, nie sia zotuo, derei Ruopfüu pie nie chüüphou mhathoko biekhriwa ro, nie rheilietuo. 14Kekreilamonyü Ukepenuopfü Ruopfüu bu u shüta ze ketuo khe, süko Ukepenuopfü nuonuota zo. 15Siro nie michie laketuo die kechü ruopfü ngulie monyü, nieko peviepie puo nuo chükelie ruopfü nguliete, süla we “Abba, a Puo” idi kiekeshü ki, 16we Ukepenuopfü nuonuo chüta ükecü Ruopfüu thuo u ruopfüu ze kezhapuya, 17siro we puo nuonuota ro, puo kayieko reita zo, Ukepenuopfü kayieko mu Khrista ze karheko zo; we puo ze kemezhielie ro, puo ze zayie chü phretuo.

Thiesie Zayie Chüketuo

18A la zowe tsiedo kemezhiekecü hako se thiesie u pengushüketuo zayieu ze kemejükeliepfü mo. 19Mhachükeshü pete rei Ukepenuopfüe puo nuonuoko pie pengushüketuo pfhelie kelho chü baketa la; 20kekreilamonyü chükeshü pete pie kemethuo chüwate, süu si nyü di mo, derei süko kekhakelieu medo la zo, süu kemerü liro, 21chükeshü pete zorei khunhie puo cieürietaketuo dieu nunu shüphralie di Ukepenuopfü nuonuoko shüphrakelie zayieu ngulietuo. 22Mu tsie ketso rei chükeshü peteko nuonuovachü chü di keze meheimelo bakecü we si ba zo; 23siro chükeshü rübei monyü Ruopfü kitsa puosi kerieko, we ha rei meheimelo di Ukepenuopfü bu u peviekelie chüketuo, süu themo hau rhalieketuo pfhe ba zo. 24Kekreilamonyü kemerü bakecü la u kelakelie zo. Derei tsie ngulieketau üse kemerü ülie kenjü. Kekreilamonyü supuonie ngulieketau merü baya ga? 25Derei we mha ngu kemo-u merüya liro, we shügeshühie di süu pfhe baya.

26Süsü tuoi Ruopfüue u thachüko nu u khruohishüya; kekreilamonyü we chalie morokesuoko rei chalie siya kemo la, derei Ruopfüu thuo themia die nu pulie kelho nunu u la meheimelo baya. 27Mu Ukepenuopfü, thenou mehoyakezhau, Ruopfüu keleko rei si baya, kekreilamonyü Ruopfüue Ukepenuopfü medo mhiei kemesako la cha bayakezha la.

28Siro Ukepenuopfü khrieyakezhako puo mharhü la kiekelieko la zowe kehoupuo chü shierei u dze kevi la phre zokecü we si bate. 29Puo pedzüperie si tuoketa süko bu puo Nuo rhiu mhielieketuo la, süko la rhü sa se tuote, sidi puo bu kikru kezha süu nu nuorieu chüliete. 30Mu puo pedzüperie rhüse tuoketako, puo süko kie reiliete; siro puoe kielieketako, puoe süko chü kemiatholiete; mu puoe chü kemiatholieketako, puo süko bu zayie rei chüliete.

Ukepenuopfü u Kekhrie

31Siro we mha hako dze kedipuo pu ta? Ukepenuopfüe u kitsa liro supuonie u ngumvülie vi ta? 32Puo thuo puo Nuou zorei khrie mo di u pete la khashü üro, puoe mha kekrei pete puo Nuou sa khashü u tsü motuo me? 33Supuonie Ukepenuopfüe kedakelieko gei kenyalie vi ga? Süusü Ukepenuopfü thuo mezhü üwata zo. 34Supuonie mia pejolie vi ta? Süu Khrista Jisu, puoe siakeshüu, rheilasiekelieu, sidi puoe vo Ukepenuopfü zatsa ba di u la cha bate.#8:34 Moro Süu Jisu Khrista . . . u la me?. 35Supuonie Khrista u kekhrie nunu u chükho setalie vituo ga? Kemezhiekecü, morei u nou kehoukeruo kechü, morei u pechüpenyükecü, morei pekriekecü, morei methuokecü, morei kemichie, morei zhiecha me? 36Thiedzü thupie kezhü,

“Nieko la mia bu zhate hie dukhri;

mia hie üse tekuo ze vo dukhriwatuo ükezhü mhieya.”

37Derei mha hako pete nu hie khrieyakezhau la hie kuokeliemia ki rei kuokuo. 38Kekreilamonyü kesia rei, kerhei rei, teigeidieliemia rei, mia kekhakecüko rei, tsiedoko morei thiesie vorketuoko rei, kekuoko rei, 39morei kerükrieko rei, kesou rei, morei chükeshüko donu mhapuorei u Niepuu Khrista Jisu nu ketuo Ukepenuopfü u kekhrieu nunu u chükhowalie kenjükecü a si tou bata zo.

Currently Selected:

Rommiako 8: ANBRBSI

Highlight

Copy