Rommiako 7
7
Kishükiya nu Thakie Puo
1Harie, a siezedzürieko, nieko si mo me? A thezho-u kesimia ki mha putuoükezhü la. Mia puoe rhei keba ki rübei thezho-u bu puo phase tuoyakezha zo. 2Siro kiyaketapfüe puo nupfu rhei keba chie thezho-u bu puo phapfü baya; derei puo nupfu siaketa sie puo nupfu la puo phase ketuo zho-u nu ba sa mote. 3Sütuoi puo nupfu rhei keba nu puo thepfu kekrei puo ze lhou ro, puo üse pieüpfü puo ütatuo, derei puo nupfu siata ro, puo thepfu kekrei puo ze keri zorei puo thezho-u nu mezhü zo, puoe pieüpfüta mo zo.
4Sükemhiei, a zenuoko#7:4 Gk Siezedzürieko., nieko rei Khrista mo-u la thezho-u kitsa siate; nie bu kekreimia puo vie chülieketuo la, süusü kesiako donunu rheilasieketau vie chüketuo, sidi u bu Ukepenuopfü kitsa u si vülieketuo la. 5Siro we chüüphou medo ze lhouketuo ki kesia bu rüchü parlieketuo la thezho-u bu kehükeshü kephouma menguko chüüphou geinu chü vor. 6Derei tsie we u phaseketuou kitsa siaketa la we thezho süu khro tuo sa mote; sidi we thukelie zho leshü keweu monyü Ruopfüu geinu kelhou kesau die chüte.
Thezho-u mu Kephouma
7Siro we kedipuo pu ta? Thezho-u üse kephouma ütuo me? Suotuo! Thezho-u kemosie, a kephoumae kicüpuo shi silie lho. “No mha mehou lho,” ikecü thezho-ue pushü kemosie kemehoue kikecüpuo shi a silie lho. 8Derei kephoumae puo hievi chü diekhakeshü zho-u la a gei mha kemehou neiüko chüshü. Thezho-u sa kemosie kephoumae siata zo. 9A rei va puo thezho-u sa mo di lhou, derei diekhakeshü zho-u vor tse kephouma chü perheiwa, 10mu a siata, tsiu kerhei khashütuoü phrakeshü thezho-u a la we kesiata zo. 11Kekreilamonyü kephoumae puo hievi chü di diekhakeshüu geinu a sewa mu süue a dukhriwa. 12Süla thezho-ue mesa, mu diekhakeshüu mesa tsiu mezhü mu vi zo.
13Di siro mha kevi süu kesia se a gei vorshü me? Mo zo! Kephoumae mha kevi süu geinu kesia se vor a gei mhachü, sidi kephouma üse phouma ülie mu diekhakeshüu nunu kephoumae suothorkecü pekieshü.
Themia Nou Keperhie Ketuo
14Thezho-u ruopfü dzetsa zokecü we si ba; derei a zowe chüüzie zo, mu a zepie kephouma khrükhro shüwate#7:14 Gk Kephouma nu zewa.. 15A a thuo a mhathoko siya mo; kekreilamonyü a mhachü kenyüu chülieya mo, derei a ngumecükezhau chütaya. 16Siro a chü nyü kemo-u chüta ro, a thezho-u üse viü ba zo. 17Süla a chüyakezha süu a monyü a nou keba kephouma thuo zo. 18Kekreilamonyü a gei, süusü a chü a phou nu mha kevi puorei ba mokecü a si ba. A mha puotoukecüu mengulie vi, derei a süu chülie lhotaya. 19Kekreilamonyü a chü nyü keba mha keviu a chü monyü, a chü nyü kemo mha kesuou ae chütaya. 20Süla a chü nyü kemo-u ae chütaya liro, süu chükezhaue a monyü a nou keba kephouma thuo zo.
21Süla a mhapuo sikelieu sü a mha kevi chü nyü kesie ki mha kesuou a khieki bataya. 22Kekreilamonyü a nou zowe Ukepenuopfü zho-u a nei tuoya, 23derei thezho kekrei puo a chü a phoutsa nu a nou keba zho-u ze keperhie di a teze vo a chü a phou gei keba kephouma zho-u die chüwayacü ngulie. 24A themia hieshiehieruo za puo ho! Supuonie kesiamo hau nunu a kelashü ta? 25U Niepu Jisu Khrista geinu Ukepenuopfü peziewe.
Süla, thenoutsa we a Ukepenuopfü zho-u diemia chüte, derei a chü a phou zowe kephouma zho-u diemia chüte.
Currently Selected:
Rommiako 7: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
