Rommiako 5
5
Kepenuopfü Ze Kezevikelie
1Siro kepele geinu u chü kemiatholie di we rei u Niepu Jisu Khrista la Ukepenuopfü ze kezeviliete, 2puo geinu we ngukemezhie tha nu thakelie cha ngulie, mu we Ukepenuopfü zayieu kezaketuo kemerüu se u mhokuo chüya. 3Mu sikecü rübei zomonyü we kemezhiekecüko nu rei u nei tuoya, kekreilamonyü kemezhiekeshü geinu shügeshühielieya, 4siro shügeshühiekelie geinu u zho vilieya, tsiu u zho vikelie geinu kemerü nyilieya, 5mu kemerü hau u nou chü pesuowa lho; kekreilamonyü pie u tsükewa Kemesa Ruopfü nunu Ukepenuopfü kekhrie rupie u nou shüwaketa la.
6We thachü ketuo ki, Khristae puotei tou ki pelekemoko sou chü siawate. 7Khatho zo moro miapuorei kemiathomia puo sou chü sia lho, derei lakipuo huomia themia kevimia puo la sia rei michie molie vi nhie. 8Derei we kephoumamia chü ketuo nu rei Khrista bu u phousou chü siakeshü geinu Ukepenuopfü u khriekecü tha toushüwate. 9Sizomonyü we tsie puo zie la u chü kemiatholieta üro, we puo la Ukepenuopfü noupfhüu nunu u kelalietuo ükecü si kemeciekuota zo. 10Mu we puo ngumvümia chü ketuo ki thuo rei puo Nuou se la u bu Ukepenuopfü ze kezevilie liro, puo ze kezevikelie sie puo kerheiu la u kela reikuolie zotuo. 11Sü rübei monyü we tsie puo la kezevikelie u Niepu Jisu Khrista lanu Ukepenuopfü geinu u nei rei sa bate.
Adam la Kephouma mu Khrista la Kelakelie
12Siro mia puo la kephouma kijü vor, tsiu kephouma la kesia vor, mu themia pete phoumaketa la kesia rei themia pete gei vorta, 13thezho-u mhodzü kephouma kijü nu tuo, derei thezho-u ba kemo ki kephouma rei si mo. 14Sirei Adam geinu vo Mosa ketso kesia themia mho di, Adam kephouma kemhie chü kemoko gei zorei, Adam-e mia puo vortuoü ketuou rhiu zocü la.
15Derei methuo pie u ketsüu we phoumakewa mhie mo. Kekreilamonyü mia puo phoumakewa la themia kekra siata liro süki rei Ukepenuopfü kinu kepar ngukemezhieu mu mia puo süusü Jisu Khrista u ngukemezhie la methuo khakeshüu we themia kekra kelhuo chükuotuo. 16Siro methuo kha u ketsüu we mia puo phoumakewa mhie mo. Kekreilamonyü mia puo phoumakeshü geinu pejokewa vor, derei themia kekra phoumakewa la methuo khakeshüue chü kemezhükelie se vorshü. 17Kekreilamonyü mia puo phoumakewa geinu kesia bu u mho di tuota liro, süki rei Jisu Khrista la ngukemezhie mu kemiatho methuo khapie u ketshukelhuo chükeshüue u kelhou gei di kuotatuo.
18Süla mia puo kephouma la mia pete pejokewa tuoi, kemiathomia puo mhatho la themia pete bu mezhülie mu rheilie. 19Mia puo dieze chü mokeshü geinu mia kekra chü kephoumakewa mhiei mia puo dieze chükeshü geinu mia kekra bu miatholietuo. 20Derei thezho-u vorta, mu süki ze thezho kevarhuo rei kra parta; derei kephouma krakecü ki ze ngukemezhieu rei krakuota, 21sidi kephouma la kesia bu diketuo tuoi, chü kemezhükelie#5:21 Moro chü kemiathokelie. geinu ngukemezhie bu di, sidi u Niepu Jisu Khrista geinu kechachie kerhei ngulie vite.
Currently Selected:
Rommiako 5: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More