Rommiako 12

Khrista nu Kelhou Kesau

1Süla a siezedzürieko, Ukepenuopfü u ngukemezhieu la, a nieko bu nie phou pie perhei ruosuo kechü, mesa mu Ukepenuopfü bu lielie kesü chüpie puo tsünukecü nieko hüshüzhie ho, süusü nie ruopfü kelhou#12:1 Moro chüshü kezhü. rüsuo ketho-u zo. 2Kijü#12:2 Gk Tsie tei. hau rüliko mhieta hie, derei nie nou chü kesapie nie chü pekreilie, sitse nie Ukepenuopfü medo-u silie vi, süusü keviu, lielie kesüu mu vilotsokecüu zo.#12:2 Moro vi ücüu mu lielie kesü mu Ukepenuopfü medo touu.

3Ngukemezhie pie a tsükewau la a nie donu kehoupuo bu rei u thuo u le pezhata mo di mhale pesoulie, tsiu Ukepenuopfü kepele mejüpie kehoupuorei tsü phrekeshüu mhie selienu di nie ki puya. 4Kekreilamonyü themo puo tuoi u zatho kekra ba, mu süko pete u mhatho kemhie phre mo, 5sütuoi we kekreikecü kekra shierei, Khrista nunu mo puo zo, sidi mia puoe kekreiu ze kekhe phre. 6Siro ngukemezhieu nunu khakeshü u mhaphruo kekreikrei phre: süu siedzekesi mhaphruo üro, u kepeleu de ki ze mhachülie; 7lietho üro, süu se lietho chülie, süu kepetha üro, süu se mia pethalie; 8mia tahitarhokecü üro, se mia tarholie, mha khakeshü üro, mephruomevuoi di khashülie, krüta kechü üro, shürhei di chülie; mia ngumezhiekecü üro, u nei siei di chülie.

Khristamia Ketho Zasi

9Kethera mo di mia khrielie; mha kesuo rütselie, mha keviu rüyalie; 10siezedzürie huoniehuo khriekezha tuoi huoniehuo khrie philie; huoniehuo rhu rie nyü kekielie. 11Nie shürhei bu thachüta hie; nie nou le me balie, Niepuu lie chü ba zolie.#12:11 Leshü kewe huo nu puotei kevi ki mhachülie si. 12Nie siedze lepie nie nei siei ba zolie; kemezhiekecü ki rei shügeshühielie, cha sei balie. 13Kemesako tsopfhü vaphilie, mia peso nyü sieiliecie.

14Japie nie pechüpenyükezhako tsülie; mia rüse monyü japie mia tsülie. 15U neiyakezhamia ze nie neilie, krayakezhamia ze kralie. 16Huoniehuo ze kenourhelie, kezha nou pfüta mo di miaümia rei ze kekrotholie#12:16 Moro nie khapie mhatho kerünuoko rei chülie.; nie thuo nie üse mhasikuo üta hie. 17Mia mha kesuo puo chüshü rei mia gei sükemhie chü la hie, mia mhodzünu vi ükecüu u rhiechü di chülie. 18Nie chülie kevi chie mia pete ze kezevi di lhou balie. 19A khrieko, mia gei nie khepu hie zo di pie Ukepenuopfü noupfhüu tsatie shüwalie, kekreilamonyü süu dze thupie kezhü, “Khepu sü a mese, a thuo süu chüwatuo, Niepuue siya.” 20Sikecüumonyü, “N ngumvümia merütuo ro, puo vachüshülie, terhütuo ro mha pie puo dieshücie; no sishü ro mizhü ketu chüpie puo tsügei pfhekeshü mhie zotuo.” 21Mha kesuo bu n ki kuolie hieü, mha kevi se kesuou penyüliecie.

Currently Selected:

Rommiako 12: ANBRBSI

Highlight

Copy