Popular Bible Verses from Rommiako 12

Share

Kijü hau rüliko mhieta hie, derei nie nou chü kesapie nie chü pekreilie, sitse nie Ukepenuopfü medo-u silie vi, süusü keviu, lielie kesüu mu vilotsokecüu zo.

Süla a siezedzürieko, Ukepenuopfü u ngukemezhieu la, a nieko bu nie phou pie perhei ruosuo kechü, mesa mu Ukepenuopfü bu lielie kesü chüpie puo tsünukecü nieko hüshüzhie ho, süusü nie ruopfü kelhou rüsuo ketho-u zo.

Nie siedze lepie nie nei siei ba zolie; kemezhiekecü ki rei shügeshühielie, cha sei balie.

Mha kesuo bu n ki kuolie hieü, mha kevi se kesuou penyüliecie.

siezedzürie huoniehuo khriekezha tuoi huoniehuo khrie philie; huoniehuo rhu rie nyü kekielie.

Kethera mo di mia khrielie; mha kesuo rütselie, mha keviu rüyalie

Nie chülie kevi chie mia pete ze kezevi di lhou balie.

A khrieko, mia gei nie khepu hie zo di pie Ukepenuopfü noupfhüu tsatie shüwalie, kekreilamonyü süu dze thupie kezhü, “Khepu sü a mese, a thuo süu chüwatuo, Niepuue siya.”

Nie shürhei bu thachüta hie; nie nou le me balie, Niepuu lie chü ba zolie.

Ngukemezhie pie a tsükewau la a nie donu kehoupuo bu rei u thuo u le pezhata mo di mhale pesoulie, tsiu Ukepenuopfü kepele mejüpie kehoupuorei tsü phrekeshüu mhie selienu di nie ki puya.

Mia mha kesuo puo chüshü rei mia gei sükemhie chü la hie, mia mhodzünu vi ükecüu u rhiechü di chülie.

Huoniehuo ze kenourhelie, kezha nou pfüta mo di miaümia rei ze kekrotholie; nie thuo nie üse mhasikuo üta hie.

Sikecüumonyü, “N ngumvümia merütuo ro, puo vachüshülie, terhütuo ro mha pie puo dieshücie; no sishü ro mizhü ketu chüpie puo tsügei pfhekeshü mhie zotuo.”

Japie nie pechüpenyükezhako tsülie; mia rüse monyü japie mia tsülie. U neiyakezhamia ze nie neilie, krayakezhamia ze kralie.

Kemesako tsopfhü vaphilie, mia peso nyü sieiliecie.

Kekreilamonyü themo puo tuoi u zatho kekra ba, mu süko pete u mhatho kemhie phre mo, sütuoi we kekreikecü kekra shierei, Khrista nunu mo puo zo, sidi mia puoe kekreiu ze kekhe phre.