Mhasidie 8
8
Mhasi Tshekeshü
1Mhasi-e puo thuo shiekhouiya mo üme?
Tsiu kesikele-e puo pfhe chü ba mo üme?
2Puoe thechü kerükrieko zü gei baya,
chadzako nu thaya;
3puoe rüna nu kele ki kharuko nu,
tsiu kikhako khie kevor ki shiekhoui di.
4“Harie themiako, a nie kieya,
mu a pfhe ha themia nuonuoko la ho.
5Harie, miamomiako,
mhasi ca siliecie;
harie mhalekemoko, nie melou bu tseiphreiliecie.
6Rünyüliecie,
kekreilamonyü a mha kevitho dze puya;
a tie tiehiekesie ki mha puotoukecüko puya;
7a tie-e ketho-u pu zotuocü la;
kerüzhüe a tie nu kerütse zo.
8A me nu dieko pete kemiatho nunu zo,
sünu mhapuo nu rei kerüzhakecü morei miarei kemo tuo mo.
9Puocapuola silieyakezhamia mhodzüki we süko pete mecietsuoi zo,
mu mhasi mhalelieyakezhamia mhodzüki we süko puotou zo.
10Rakachü mo di a kepethadie lieliecie,
tsiu suna kevipfü mo di mhasimhale lieliecie;
11kekreilamonyü mhasi-e cümenyie ki vikuo,
mu nie-e mha mehoumenguyakecü pete rei pie puo ze kemejükeliepfü mo.
12Ae mhasiu, kemenuou ze lhou baya,
sidi mhasi kesa dze pfhü se parlieya.
13Jihova khrükepreie mha kesuou ngumecükelieu zo.
Kemiakokecü, kelhiekecü, mha kesuo chau,
tsiu die kesuo kepu a ngumecüya.
14Ae kepetha mu mhasi puotoukecü ba,
ae puocapuola silieyakecü mu kekuo kebau.
15A geinu kedimiako di baya,
kezhako bu thezho puotoukecü se parlieya,
16a geinu kedimia nuonuoko mu pehümiako kijüu kekhase baya.
17A a khrieyakezhamia khrieya,
tsiu thehiechü a pfhü ketuomia a ngulietuo.
18Kinyi mu therhu a gei ba,
balieketuo kinyi tsiu kruolieketuo rei sa.
19A si vükelieu we suna kevi ki rei vikuo,
mu a mhayiekoe rakachü kevipfü ki rei vikuo.
20Ae kemiatho cha nu voya mu ketho capiko nu tuoya:
21Süusü a khrieyakezhamia bu kinyi ngulieketuo,
mu u kinyibouko ketshu chülietuo.
22Jihovae sietse nu mhachükeshü mhodzü puo thuo puo chau nu a peviese tuote.
23Kerieki, sietse nu,
morei kijüu chülie kemonu puoe a chüshüwata zo.
24Thiedzü dzü kesou kejü teiki,
thiedzü dzüluo dzü kru par kemonu a chüshüwate.
25Kijüthou kerükrieko chülie kemonu,
kijükhruko rei chülie kemonu a chüliete;
26puo kijü mu lieko chülie kemonu,
morei kijü nu nyophe puorei parlie kemonu.
27Puoe teiko chükeshü ki, a süki tuota zo,
puoe dzü kesou whi vokeshü ki,
28puoe teigei kimhou chükeshü ki,
puoe kesou nu dzüluoko chükeshü ki,
29puoe dzükezha bu puo die tseta motuoü die khakeshü ki,
puoe kijüu bodeko dekeshü ki,
30süki a puo ze tuo,
puo ze mhachüyakezhamia puo tuoi mu teisonhie ae puo keneiu,
puo mhodzüki a nei siei vor zo.
31Kijüu ze a nei vor mu a kenei themia nuonuoko gei tuo.
32“Süla a nuonuoko,
tsie a pfhe rünyüliecie;
kekreilamonyü a zho zeyakezhamia thejapfülieya.
33Kepethadie rünyülie di mhasiliecie,
mu süu meliewa hie.
34A pfhe rünyüyakezhamia,
teisonhie a kharu nu pfhe balieyakezhamia,
a kicieko vareipfü thayakezhamia theja ngulietuo.
35Kekreilamonyü a ngukeliemia kerhei ngulieya,
mu Jihova khriepfülietuo.
36Derei a petsouyakezhamia puo thuo puo ruopfü pekawaya,
a ngumecüyakezhamia pete kesia khrieya zo.”
Currently Selected:
Mhasidie 8: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
