Luk 4

Jisu Kedokecü

(Mat 4:1-11; Mark 1:12-13)

1Süsie Jisue Kemesa Ruopfü bu puo tshupfü di Jordan nunu la vorta mu Ruopfüu bu puo hü ze rayha nu vota, 2sidi Satan bu zha hiedia puo kedo. Siro puo süteikiko mhapuorei cü mo, süla teisozha süko tseita tse puo va merüta. 3Süki Satan puo ki, “No Kepenuopfü Nuou üro, ketsie hau ki pushü di puo bu niekhrüda meviliecie.” 4Derei Jisu sie puo ki, “ ‘Themia niekhrüda rübei la lhoulie lho,’ sidi thupie zhü zo.”

5Süsie Satan puo ze thechü kerükrie puo gei vo di va puo nu kijü nu kedirüvie pete thashü puo kie. 6Sidi Satan sie puo ki, “A hako zayieko mu hako mho kekuo kha n tsütuo; kekreilamonyü hako pie a tsüwate, mu a thuo khapie a medomia tsülie vi. 7Süla no tsu a rüsuo liro, mha hako pete sü n vieta zotie.” 8Sitse Jisu puo ki,

“ ‘No Niepuu n Kepenuopfü rüsuolie mu puo lie rübei chü zolie,’ sikecü thupie zhü.”

9Süsie rei Satan puo ze Jerusalem nu vo di puo bu rüsuokiu tsüle gei thalie, sidi sie puo ki, “No Kepenuopfü Nuou üliro, n thuo hau geinu tetsucie, 10kekreilamonyü ‘Puo teigeidielieko ketseshü di süko bu n rüguolietuo,’

11süsie rei,

‘N bu tsu ketsie geinu n kesewa molieketuo la uko dzie pie n memhilietuo,’

idi thupie kezhü la.”

12Derei Jisu puo ki, “‘No Niepuu n Kepenuopfü kedo lho,’ isikecü rei thupie zhü.” 13Siro Satan-e kedokecü neiüko se di Jisu kedo tseiwaketa sie, puoe puotei kevi puo ngulie kemo teiki la puo khawa di tuota.

Galil nu Jisu Mhatho Therieko

14Süsie Jisue Ruopfü kekuou bu puo tshupfü di Galil nu la vor, siro kijü sütsatie pete puo dze kepu bou vota. 15Puo uko sinagogko nunu mia petha, mu mia pete puo tshe phre.

Nazaret nu Jisu Melieketa

(Mat 13:53-58; Mark 6:1-6)

16Süsie puo lhou kesier rünau Nazaret nu vorlie, sidi sabat nhie puo zhoki chüyakezha tuoi sinagog nu le. Sidi puo phrütuoü sie thalie, 17mu mia Isaya siedzekesiu leshütshüu chüpie puo tsü. Sitse puo leshütshüu kelhalie mu süu nu thupie kezhü hako ngulie:

18“Niepuu Ruopfüu a gei tuo,

puo a bu dieliekeviu pie kejüko ki punu a kenhelieketa la.

Puo a bu miadie chüketuoko khashüwaketuo pushieshünu,

siro mhicieko bu mha ngu lalieketuo punu,

tsiu mia bu u pesekezhako khashünu,

19mu Niepuu u ngukemezhie teicieu pu pesinushü.”

20Süsie puo leshütshüu keziwa di pie chalieu tsüwa, sidi ke bata. Siro sinagog nu kebako pete puo meho terüpfü bata. 21Sitse puo sie uko ki, “Thie Kethodie hau nieko donu chü tsei vorliete.” 22Sitse uko pete rei puo pu pevita mu puo tie nu kepar mia ngukemezhie dieko la uko ngo phreta, sidi uko sie, “Themia hau Josef nuou zo mo me?” 23Sitse puo uko ki, “Darukesiu, n thuo n chü keshürholiecie, idi mhasidie hau kepu tuoi nieko süu a ki pu zotuo. Mu nieko sie, ‘No Kapernaum nunu mhachükeshü hie sikeshüko n rüna hanu rei chüshücie,’ isi zotuo.” 24Siro puo sie, “A nieko ki pu toushütuo, siedzekesimia puorei puo thuo puo rakhe nu zo we mia puo rhuya mo. 25Derei ketho-u sü hau, thiedzü Elija teiki Israel nu samimiapfü kekra tuo mu süki teicie se di khrü sorou teirü mota di kijü pete nu pekrie kemerie chü; 26sirei Elija ketsepie Sidon nu Zarefat nu samimiapfü puo ki keshü sie kekrei puo ki rei shü mo. 27Siro siedzekesiu Elisha teiki Israel nu themia kekra mpa chü, siürei Siriamia Naman ükecüu rübei sie uko miapuorei chü keshürhoshü mo,” sishü. 28Siro sinagog nu keba pete die hako sishü tse u nou rüpeta. 29Sidi uko sie di rünau nunu puo whuowa mu puo merhashü ze uko rüna khie kijüthou puohe kechü puo gei vo di süu geinu puo nekelhouwaketuo le tuota. 30Derei puo themiako donunu tuose puo thuo puo cha nu vota.

Mesa kemo Ruopfü Ze ketuou

(Mark 1:21-28)

31Süsie puo tuo Galil nu Kapernaum nadi nu vota, sidi sabat nhie uko petha. 32Sitse uko puo kepethadieko la u ngo phita, kekreilamonyü puo kekuo nyi se di mha puketa la. 33Siro sinagog nu mia puoe mesa kemo kesuo ruopfü ze tuoketa puo ba ru puo shiekhoui di sie, 34“Hieko kebvü hiecie! Nazaret-u Jisu no hieko ze kedipuo chü nyüya ga? No hieko pekawaketuo le vor me? No supuo shi a n si ba, no Kepenuopfü Kemesau zo.” 35Derei Jisu puo kerhie di, “Kemekrie di puo geinu prataliecie!” Süki terhuokesuou themiau pfü kelhoupie uko mhodzünu zhüwa, derei puo bie kerüzawa mo di puo geinu prata. 36Sitse uko pete u ngo phreta, sidi sie huoniehuo ki, “Die hau die kicüpuota mu? Puo ahza mu kekuo se di mesa kemo ruopfüko ki mha pu ru süko puo die ze di pratacü ha!” 37Süsie sütsatie rüna kheko nu puo dze kepu mhapuochü tuota.

Jisu Mia Chü Keshürhokecü

(Mat 8:14-17; Mark 1:29-34)

38Süsie puo sinagog nunu tuo Simon ki nu vo. Süki Simon kimianuo zuopfü ruki phizhü, sitse uko puo ki hapfü dze ketsota. 39Süsie puo süpfü khieki phi di rukiu kerhieshü tse süpfü ruki mota. Sitse hapfü mhai sielie di uko lie chü merei bata.

40Siro niaki letazhü tse, themiako kechükenyü neiü nunu mhachü kebako ze puo ki vor; sitse puoe puo dzie yhapie süko mia puopuo gei rei shü di süko chü keshürhoshü. 41Süki terhuokesuoko kekra rei ruorüi di, “No Kepenuopfü Nuou zo,” isi di mia kekra geinu prata. Siro puo terhuokesuoko kekhawa di süko bu die pu mvüta, kekreilamonyü süko puo üse Khrista zo ükecü siketa la.

Jisu Sinagog nunu Mia Pethakecü

(Mark 1:35-39)

42Süsie teiso pi par tse puo tuo mia tuokemora vota. Sitse themia krodi puo pfhü tuota; sidi uko vo puo tsolie ru uko puo kha ze bata nyülie. 43Derei puo uko ki, “A Ukepenuopfü Kedi dze dieliekeviu se nadi kekreiko nu rei pushü morosuo; kekreilamonyü süu la a ketsekeshü zo.” 44Süla puo vo Judia#4:44 Leshü keweko nu Galil si. kijütsa sinagogko nu mia petha tuota.

Currently Selected:

Luk 4: ANBRBSI

Highlight

Copy