Luk 5

Jisu Siedzimia Kielie Kerieko

(Mat 4:18-22; Mark 1:16-20)

1Va puo Jisu Genesaret zieu khieki tha tse, themiako puo kinu Ukepenuopfü die rünyütuoü vor puo getoutou zota. 2Sitse puo rüzieu khie rou kenie bakecü ngulie; mu khuoketekoe sünie khawa di vo u jal keshü tuota. 3Siro rou sünie puo Simon vie ru puo sünu lelie di puo bu khu zase rüzieu nu sa lelienuta. Süsie puo rouu nu balie di sünunu sier mia krodiu petha. 4Siro puo die pu thewa tse Simon ki, “Rouu khuse dzü kesou nu philie di khuotelieketuo la nieko jal kelhoushücie.” 5Sitse Simon sie, “Niepuu, hieko teizeizha pete hie rhiechü zo, derei mhapuorei ngulie mo. Sirei no siüro n die la a jal kelhou lashütuo.” 6Uko sishü tse khuo kekra bolie di uko jal pfürhawatuoüta. 7Süla uko dzieziepie rou kekreiu nu ketuo pezako kie di uko bu vor kekhruohinuta. Sitse uko vor di khuoko pie rou kenienie tshulie tse rounie rületatuoüta. 8Ru Simon Pitor süu ngushü tse, puo tsu Jisu phi nu khoutoulie di sie, “Tuo a therütayi, Niepuu, a kephoumamia zo mu!” sita. 9Kekreilamonyü puo mu puo ze ketuo kheko rei uko khuo kekra telieketa ngu di u ngo phreketa la; 10siro sütuoi Simon Pitor ze ketuo Zebedi nuo Jakob mu Johan unie rei u ngota; sitse Jisu sie Simon ki, “Michie hiecie; thie yawinu a n bu themia tetatuo.” 11Siro uko rounie teshüpie rüzie khie shüwa tse, uko vie pete khawa di puo siemedzita.

Jisu Mpa Kechümia Puo Chü Pevikeshü

(Mat 8:1-4; Mark 1:40-45)

12Siro va puo puoe vo nadiko puo nu ba ru mpa chü phiketuo puo rei sünu ba. Themia süu Jisu ngukelie ki, puo tsu kijü zerepfü di puo ki puo mezhiemelo di sie, “Niepuu, no n medo üro, no a chü kemesawalie vi zo!” 13Sitse Jisu puo dzie yhapie puo bie di sie puo ki, “A medowe, No mesaliecie!” Sishü mumetha puo geinu mpa kechüu vita. 14Siro puoe süu bu mia puo ki rei pu hienuwa. Sidi puo sie, “Sielie, di mezhü zievo-u ki vo di n thuo n pie zievo-u pekieshücie; sidi themia bu silieketuo la Mosa diekhakeshü tuoi no mesaketa ruotho-u chüwalie,” sishü. 15Derei puo rüli pu kemo-u monyü pu krakuo sata, tsiu puo die rünyütuoü mu u kechükenyüko nunu shürholietuo üdi mia krodi vor kengulieta. 16Sirei puo tuo rüdei themia kejüra vo di kecha chü bata.

Jisu Lasiamia Puo Chü Pevikeshü

(Mat 9:1-8; Mark 2:1-12)

17Khunhie puo, puo mia petha keba ki, Farisiko mu thezhokepethako huo süki ba, (sükoe Galil, Judia mu Jerusalem rüna kheko nunu vor); mu mia chü keshürholieketuo Niepuu kekuo rei puo ze tuo. 18Süki mia kro puo thezhü puo geinu lasiamia puo toupie vor, mu uko süu pie kinu le di pie vo Jisu mhodzünu shütuoü sie, 19derei themia krathorcü la uko puo pie leketuo cha pfhü pejüta, süla uko puo toupie kikhru mho gei sie di süu biephalie di puo zhü geinu puo khapie themiako donu Jisu mhodzüki shü. 20Puo uko kepele ngulie tse puo sie, “A zeu, n kephoumako vashü n tsüwate ho.” 21Sitse thezhokepethako mu Farisiko kepu di, “Ukepenuopfü ketha die puyakezha themia hau supuote mu? Ukepenuopfü zo kemosie supuonie mia kephoumako valie ta?” 22Siro Jisu uko noudoko silie di sie uko ki, “Nieko kiüdi mha sükemhieko leya mu? 23‘N kephoumako vapie n tsüwate ho,’ idi kepuu, mu ‘Sie di cha tuoliecie,’ ikecü die sünie kiu pu rüükuotuo ga? 24Derei kijü nu themia kephoumako vashü tsülieketuo Themia Nuoue kekuo bakecü nieko bu silie kenyü la,” idi puo lasiau ki, “A n ki puya, no sielie, n zhü chü pielie di tuo n kinu votacie.” 25Sishü mumetha puo uko mhodzü nunu sie puo zhü chüpie di Ukepenuopfü tshe zo puo thuo puo kinu vota. 26Süla themia peteko u ngo phreta, sidi uko Ukepenuopfü tshe mu michie phi sa di sie, “Thie úko mha kethekhrükecü nguwata zo!”

Jisu Levi Kiekelie

(Mat 9:9-13; Mark 2:13-17)

27Mha hako sie puo tuo prazhü ru khezhanuo khruoyakezha Levi ükecü mia puo khezhanuo kekhruo ki nu ba di ngulie ru puo sie, “A siemedziliecie.” 28Sitse puo mha pete khawa di puo siemedzita.

29Süsie Levi puo ki nu puo la thehe kezha puo keseshü, tsiu sünu khezhanuo khruoyakezha kekra mu kekreimia huo rei sa di vo uko keze mizhü#5:29 Gk Vakhriepfü. geinu hie ba. 30Süki Farisiko mu thezhokepethako vor pethakelieko gei panya di sie, “Kiüdi nieko khezhanuo khruoyakezhako mu kephoumamiako ze mhacümhakrieya ga?” 31Sitse Jisu sie, “Keshürhomia darukesimia se morei vi; derei darukesimia kechümia la zo. 32A kemiathoko kietuo üdi vor monyü kephoumamia bu thenoukedilieketuo la kevor zo.”

Mevokecü Dze Ketsokecü

(Mat 9:14-19; Mark 2:18-22)

33Siro uko sie puo ki, “Johan-e pethakelieko we Farisikoe pethakelieko mhie di tsiekenuo mevo mu chakuo phi, derei noe pethakelieko we mhacümhakrie baya ze.” 34Sitse Jisu uko ki, “Mia puo thenu lie di mia ze hiekecü ki yasau keba nu puo khriethoko bu mevo balie vi me? 35Derei mia bu süko ki nu yasau zetaketuo tei puo vortuo; mu süze uko mevotatuo.” 36Siro puo uko ki dievi pu sa di, “Miapuorei pfhe kesa se pfhekrau pekhuoya mo; mhanuü sishü ro, pfhe kesau rei pfürhawatuo, tsiu pfhe kesayoe pfhekrau ze kemhie motatuo. 37Siro miapuorei zu kerünyie pie chüzhüsü kewe nu shüya mo, sishü üro, zu kesau chüzhüu pfü phawatuo, sidi zuu krutatuo, tsiu chüzhüsü rei pekawatuo. 38Derei zu kerünyie rupie chüzhüsü kesa nu shü morosuo. 39Tsiu miapuorei zu kewe krielieketa sie kesa mengu laya mo, kekreilamonyü puoe ‘Keweu vi,’ ”#5:39 Leshü keweko nu vikuo isi, kekrei huo nu khuso 39 ba mo. isiyacü la.

Currently Selected:

Luk 5: ANBRBSI

Highlight

Copy