Luk 3

Johan Mia Dzülukepfüu Kepetha

(Mat 3:1-12; Mark 1:1-8; Joh 1:19-28)

1Siro kediu Tiberiu Kaisar dikelie cie kerepengou cie; Pontia Pilat bu Judia kijü ahng chü mu Herod bu Galil kijü mho di, tsiu puo siezeu Filip bu Ituria mu Trakoniti mho di; siro Lisania bu Abilene kijü mho di, 2Siro Anna mu Kaifa unie bu zievokezhatho-u chü ba, süki Ukepenuopfü dieu rayha nu tuoyakezha Zakaria nuou Johan ki vor. 3Siro puo tuo Jordan rü khie merhie thechü pete nu vo di, kephouma valieketuo la thenoukedikecü dzülukepfü se mia petha tuota. 4Siro hau dze siedzekesiu Isaya leshüu nu rei thupie kezhü hamhie:

“Mia puo rayha nu shiekhoui di:

‘Nieko Niepuu cha keseliecie,

puo chatseko chü kemezhüliecie.

5Kijü kerünuo khe luowatuo mu kijüthou tsiu kijükhru pete bie kerünuowatuo,

tsiu kerüwiko chü kemezhüwatuo,

mu cha kesuoko chü peviwatuo;

6mu themia pete Ukepenuopfü kelakelieu ngu phretuo,’ ” si.

7Siro Johan-e puo bu dzülu khashü u tsünu di kevo themia kro-u üse, “Nieko prielepfü nuonuoko! Supuonie nieko bu vorkezhü noupfhüu nunu talienushü ga? 8Nieko noukedilie kesü siu vüliecie. Siro nie thuo nie üse, ‘Abraham sü hie pfutsau zo,’ ikecü pu hie; kekreilamonyü a nieko ki pushütuo, Ukepenuopfü ketsie hako geinu zorei Abraham yiemia pelhoushülie vi. 9Tsie zorei seidurü seiboko phi nu zhü zo; süla sei kehoupuorei puo si kevi vüshüya kemoko wiwatuo, sidi kelhoupie mi nu shüwatuo.”

10Sitse themia kro-u sie puo ki, “Siro hie bu kedipuo chülie morosuo ga?” idi ketsota. 11Sitse puo sie uko ki, “Kehoupuorei boulie kenie kenyimia bu ba kemomia ze kezaliecie; mu kehoupuorei kecüca kebamia bu rei sükemhie chülie.” 12Siro khezhanuo khruoyakezhako rei dzülupfütuoü puo ki vor, mu uko puo ki, “Kepethau, hieko bu kedipuo chülie morosuo ga?” 13Sitse puo uko ki, “Nieko bu khruonukeshü kezie cha hie.” 14Chüpahiko rei sie puo ki, “Hieko bu kedipuo chülie morosuo ga?” Sitse puo sie uko ki, “Mia kechükede, morei ketijü nu mia pejo di mia ki mha cha hie, siro nie kaza rei vi zo ükecü lelie,” sita.

15Süki themiako u kemerü kho seta mu Johan üse vortuo üketuo Khristau ta zo mo kishiü le phreta. 16Süla Johan sie uko ki, “A zo we dzü nunu nieko dzülu khashükezha zo, derei a ki zhakuokecü mia puo a sietsa vorzhie, a zo we puo phikoupha rei phreilie sü mo. Puo zo we Kemesa Ruopfü mu mi nunu nieko dzülu khashütuo. 17Puo zo we sieu he kemesa mpouwaketuo la lieherü puo dzie nu bata zo, sidi puo lhako chü kemesapie telhaki nu shülietuo, derei shübeko we pie mhetalie kelho mi nu thewatuo.”

18Sidi puoe tarhokeshü die kekra nunu dieliekeviu pupie themiako kieshü. 19Mu puoe, Herod kediu puo thuo puo siezeu kimiapfü Herodia ze keriketa la mu kerüzhü mhatho kekrei pete la rei puo pejo di kerhieshü, 20derei mhatho kesuo hako chükewa mho nu Johan tepie kedieki nu shüwa.

Jisu Dzülukepfü

(Mat 3:13-17; Mark 1:9-11)

21Siro themiako pete dzülupfükelie sie, Jisu rei dzülupfülie di kecha chü tha tse, tei koshü, 22sitse Kemesa Ruopfü mekhru rhi chüpfü di puo gei tsurta. Siro teigei nu mhapfhe puo, “No a Nuo zo, a khrietho-u, a n ngu a neithor,”#3:22 Leshü keweko nu No a Nuo, thie a n nguliete si. isi ker.

Jisu Puotsanuoko

(Mat 1:1-17)

23Jisue puo kelhouzha cie ser meseki puo mhatho chü sedevü. Siro (themia noule mhie ro) puo Josef nuo. Josef-e Heli nuo, 24süue Mathat nuo, süue Levi nuo, süue Melki nuo, süue Janai nuo, süue Josef nuo. 25Süue Matathia nuo, süue Amos nuo, süue Nahum nuo, süue Esli nuo, süue Nagai nuo. 26Süue Maat nuo, süue Matathia nuo, süue Semein nuo, süue Josek nuo, süue Joda nuo, 27süue Joanan nuo, süue Rhesa nuo, süue Zerubabel nuo, süue Shealtiel#3:27 Gk Salathiel. nuo, süue Neri nuo, 28süue Melki nuo, süue Adi nuo, süue Kosam nuo, süue Elmadam nuo, süue Er nuo, 29süue Joshua nuo, süue Eliezer nuo, süue Jorim nuo, süue Mathat nuo, süue Levi nuo, 30süue Simeon nuo, süue Juda nuo, süue Josef nuo, süue Jonam nuo, süue Eliakim nuo. 31Süue Melia nuo, süue Mena nuo, süue Matatha nuo, süue Nathan nuo, süue David nuo, 32süue Jese nuo, süue Obed nuo, süue Boaz nuo, süue Sala#3:32 Leshü kewe keviko nu Salmon iya. nuo, süue Nashon nuo. 33Süue Aminabab nuo, süue Admin nuo, süue Arni#3:33 Leshü keweko nu Aminadab, Aram nuou; huo nu süki krei. nuo, süue Hezron nuo, süue Perez nuo, süue Juda nuo, 34süue Jakob nuo, süue Isak nuo, süue Abraham nuo, süue Tera nuo, süue Nahor nuo, 35süue Serug nuo, süue Reu nuo, süue Peleg nuo, süue Eber nuo, süue Shela nuo, 36süue Kainan nuo, süue Arfasad nuo, süue Shem nuo, süue Noah nuo, süue Lamek nuo, 37süue Methusela nuo, süue Inok nuo, süue Jared nuo, süue Mahalalel nuo, süue Kainan nuo, 38süue Inos nuo, süue Seth nuo, süue Adam nuo, süue Ukepenuopfü nuo.

Currently Selected:

Luk 3: ANBRBSI

Highlight

Copy