Luk 18

Samipfü Puo mu Capimia Puo Dievi

1Siro Jisue dievi nunu uko bu kecha chü sei tuolienu mu u chamezieta hienukecü pu. 2Sidi puo sie, “Nadi puo nu capimia Ukepenuopfü mu themia rei preiya kemo puo ba. 3Mu nadi sünu samipfü puo rei baya ru tsiekenuo puo ki vor di, ‘No a kepetsoumia gei a khepushü di a bu a mezhüu nguliecie,’ idi pu seiya. 4Sirei capi süu puotei huo süu chü mvü vorta, derei kenuotsa puo thuo puo rüchü di sie, ‘A Kepenuopfü preiya mo mu themia rei rhuya mo ürei, 5sami hapfü a keyhukezhie sei vorketa la a puo bu puo mezhüu ngulieketuo chüshüwatuo, moro puo vor a kechakhriwatie.’ ”#18:5 Moro puo bu vor dziezhü shüpie a vüwa moketuo la. 6Sitse Niepuu sie, “Nieko mezhü kemo capiu die rünyüshücie. 7Siro Ukepenuopfü puo thuo puo nou cha zorei teisonhie teizeimetsei puo ki cha sei baya zocü puoe kedakelieko khepushü motatuo me? 8A nieko ki pushütuo, puo kenourhei sie uko khepu zotuo. Sirei Themia Nuou kevor ki kijüu gei kepele ba di puo bu ngulietuo me?”

Farisiu mu Khezhanuo Kekhruou

9Süsie rei puo mia kro puo u thuo u le kemiatho di kekreimiako üse mhaütuoya kemoko la dievi hau pushü: 10“Mia kenie-e kecha chütuo üdi rüsuokiu nu vo, mia puo Farisimia mu kekreiu Khezhanuo kekhruomia puo. 11Siro Farisiu tha di kecha chü di sie, ‘Kepenuopfü, a themia kekreimia, mia vie sekecümia, miatho kemomia morei pieü kechümia morei khezhanuo kekhruo hau rei mhiekemo la a n tsheya. 12A zhadoudo puo nu va kenie mevoya, tsiu a ngukelie pete geinu ker zau khashü n tsüya,’ si. 13Derei khezhanuo kekhruou kepetse nu tha di tosie teigei rei meholie lho, tsiu puo merü kepfhü di sie, ‘Kepenuopfü, no kephoumau a ha rei ngumezhiecie,’ si tha. 14A nieko ki pushütuo, themia hau mezhülie di tuo puo kinu vote. Kekreilamonyü themia kehoupuorei puo thuo puo chü pezhayakezhau chü kerünuowatuo, tsiu kehoupuorei puo thuo puo chü kerünuolieyakezhau chü pezhashütuo.”

Jisu Japie Nhicunuoko Ketsü

(Mat 19:13-15; Mark 10:13-16)

15Süsie mia puo bu puo dzie yhapie u gei shüketuo la nuoranuoko rei ze vor, sitse pethakelieko süu ngu di süko kerhieta. 16Derei Jisu süko kie di sie, “Nhicunuoko bu a ki vorlie, mu uko kha hiecie, Ukepenuopfü kedi-e hamhiecüko vie zocü la. 17A nieko ki pu toushütuo, kehoupuorei nhicumia yopuo mhie di Ukepenuopfü kedi lielie kemosie, mhakipuorei sünu lelie kenjü zo.”

Kenyimia Puo Mha Ketsokecü

(Mat 19:16-30; Mark 10:17-31)

18Süsie kezhamia puoe puo ketso di, “Kepetha keviu, a kechachie kerhei ngulieketuo la kedipuo chülie morosuo ga?” 19Sitse Jisu puo ki, “No kiüdi a üse keviu üya ga? Ukepenuopfü zo kemosie miapuorei kevi jü. 20‘No pieü chü lho, mia dukhri lho, rügu lho, ketijü zhapu chü lho; n puo n zuo rhulie’ idi diekhakeshüko no si batuo.” 21Sitse süu sie, “A a khriesa nunu hako pete chüüze sierte,” si. 22Siro Jisu hau sishü tse, puo ki, “No tsie rei mhapuo tso mo baluo. No mha keba pete zelie di rakako khapie mhakejüko tsüwalie, siro teigei n kinyi nyilietuo; sidi vor a siemedziliecie,” sita. 23Derei puo die hau silie tse, puo thesuo sieita, kekreilamonyü puo mhanyi phicü la. 24Siro Jisu puo meho di sie, “Kenyimia puo bu Ukepenuopfü kedi nu leketuo we re zotuo! 25Kenyimia puo bu Ukepenuopfü kedi nu kele ki rei ut puo bu thepremei nu kepra we rüükuotuo.”

26Süki puo die süu kesiko sie, “Di siro, suomianie kelalie vi ta?” 27Sitse puo sie, “Themiae chülie kelhoko Ukepenuopfüe chülie vi.”

28Sitse Pitor sie, “Harie, hieko we hieko ki rei khawa di n siemedzi tuote.” 29Sitse puo uko ki, “A nieko ki pu toushütuo, kehoupuorei Ukepenuopfü kedi la puo ki morei puo kimia morei puo siezedzürie morei puo krünuo morei puo nuonuo khawaketamia, 30tsiedo kelhou nu rei sü kezie phi ngulietuo, mu thiesie kechachie kerhei ngulietuo.”

Jisu Puo Se Dze Kepu Va Seu

(Mat 20:17-19; Mark 10:32-34)

31Süsie puo kerekenieko ze krei puo ki vor di uko ki, “Harie, úko Jerusalem nu khotuoüzhie, mu siedzekesikoe Themia Nuou dze thupie ketuoko chü tseilietuo, 32kekreilamonyü mia bu puo tepie Judakemoko dzie nu shüwatuo, sidi mia bu puo pie kethekre, puo kenga, tsiu puo mho mhitsietuo. 33Sidi uko puo vüwa di puo dukhriwatuo, derei zha se nhie puo rheisielietuo,” sishü. 34Derei uko mha hako ca puorei silie mota; puo pukeshüko uko kinu keviewatacü la, sidi uko puo kedipuo putuo shicü dze puorei situo mota.

Jisu Mhiciemia Puo Chü Pevikeshü

(Mat 20:29-34; Mark 10:46-52)

35Siro puo Jeriko penuo vozhü tse, mhiciemia puo cha khieki nu khruocü ba. 36Siro puo themia krodi vorkezhü sishü tse, kedipuo chü tuote shicü ketso. 37Sitse uko puo ki, “Nazaret-u Jisu vorzhülie.” 38Sitse puo shiekhoui di “David Nuou, Jisu, a ngumezhieshücie,” si. 39Süki rieketuoko puo kerhie di puo bu kemekrie balienuta; derei puo shie kechü sa di sie, “David Nuou, a ngumezhieshücie!” sita. 40Süla Jisu thalie di mia bu mhicieu ze puo ki vornushü; sidi puo puo penuo vor tse, puoe sie puo ki, 41“A bu n gei kedipuo chüshü nyüya ga?” Sitse puo sie, “Niepuu, a bu mha ngu laliecie.” 42Sitse Jisu puo ki, “Mha nguliecie; n kepele thuo n kelaliete ho.” 43Sishü mumetha themia süu mha ngu lalieta, sidi puoe puo siemedzi tuota, tsiu Ukepenuopfü tshe tuota.

Currently Selected:

Luk 18: ANBRBSI

Highlight

Copy