Luk 17

Mia Chü Pesuokecü

(Mat 18:6-7,21-22; Mark 9:42)

1Süsie Jisu puoe pethakelieko ki, “Mia phi kemesü tei vor zotuo, derei ce, puo geinu süko se voryakezhau we chülietie. 2Themia süu bu kecü hako miapuorei chüpie kephouma nu shükewau ki rei mha kegetsie puo pie puo vo nu khelie di puo kelhoupie dzükezha nu shükewa we puo dze vikuo. 3Süla nie kireiliecie! Mhanuü pethakeliemia#17:3 Gk N siezedzüriemia. puoe kephouma puo chü ro puo kerhieshülie, derei puo nou kedilieta ro vapie tsüwalie. 4Siro themia süu khunhie zorei n gei va thenie kejo chü di va thenie la vor n ki puo kejo cha di ‘A kekrüte’ isi ro, no puo kejo vashü morosuo.”

5Sitse apostelko Niepuu ki, “Hie kepele chü penyi sashücie.” 6Sitse Niepuu sie, “Nie kepele gakrieshü de yopuorei ba liro, nieko sie khravübo hau ki, ‘N thuo rülou dzükezha nu le sepfü batacie,’ ishü zorei nieko die zetatuo.

7“Nieko mia puo, nie kituomia lie nu mhachü tuo morei tekuo pfhe tuo di vor mumetha sie ‘Rükri vo mhacülie,’ idi puya me? 8Sikecüumonyü nie puo ki, ‘No vo di a mhaca keseshücie, sidi pfhepie n chie phapfülie di a cüükrielie kemochie pfhe thalie, süsie nu no cüükrielie,’ siya mo me? 9Siro kituo süu puo kepuko chükeshü la puo thezieshütuo me? 10Nieko rei sümhie ze, mia nieko bu chünukeshüko chü phrelieta tse, ‘Hie kituo rei kituo kevimia mo, hie bu chünukeshükoyo rübei chükeshü zo,’ siliecie.”

Jisu Mpakechümia Ker Chü Pevikeshü

11Siro Jisu Jerusalem nu vokezhü ki puo Samaria mu Galil nie tierie nu vozhü. 12Sidi puo rüna nu le tse mpa kechümia mia ker puo ki vorzhü. Mu uko kepetse nu tha, 13Sitse uko shiekhoui di sie, “Jisu, kepethau, hieko ngumezhieshücie!” 14Sitse puo uko ngushü di sie uko ki, “Nieko tuo vo di zievoko bu nieko mehowacie.” Sidi uko tuo vozhü ru uko kechü menelieta. 15Sükisü uko mia puoe puo kechü menelieketa ngulie di melie puo rhiechü Kepenuopfü tshe di la vorta. 16Siro puo tsu Jisu phi ki zerepfü zhülie di puo thezieta. Mu puo Samariamia puo. 17Sitse Jisu sie, “Mia ker chü kemeneshü mo me? Siro mia thepfüko kira vota ga? 18Kiüdi chazoumia hau rübei sie kekreimia puorei la vor Ukepenuopfü tshe mota ga?” 19Sidi puo süu ki, “Sielie di tuo votalie; n kepele thuo n chü kemenewate ho,” sita.

Ukepenuopfü Kedi Vorketuo

(Mat 24:23-28,37-41)

20Va puo Farisiko sie Jisu ki kedikechükipuo Ukepenuopfü kedi vortuo shicü ketsoketa la, puo sie “Kepenuopfü kedi we mia bu ngulie kevi chü vorlie lho. 21Morei miapuorei sie, ‘Harie, haki ba!’ morei ‘Luki ba!’ idi pulie lho. Kekreilamonyü Ukepenuopfü kedi nie nou ba zokecü la.”

22Süsie puoe pethakelieko ki, “Nieko Themia Nuou kevor teisozha puo zorei ngushü nyükecü tei vortuo, derei nie süu ngulie lho. 23Süki huomia sie nieko ki, ‘Lere-i, luki!’ morei ‘Harie, haki!’ isi di putuo. Sirei nie vo hie, medzi rei hie. 24Tei melakeshü ki tietsapuo nu kekreitsatie zie mha votayakezha tuoi, Themia Nuou kevor rei sümhie zotuo. 25Derei puo kemezhiekecü ngu phi di thephou hau bu puo melie rietuo. 26Siro Noah teiki tuoi, Themia Nuou teisozha ki rei sümhie zotuo. 27Süki Noah rouu nu leketa nhie ketso mia mhacümhakrie, thenu lie mu thenyhü chü iba zo, sidi dzü bu sier süko pete pelheikhriwa. 28Siro Lot teiki tuoi zotuo: Ukoe mhacümhakrie, mhakhrümhaze, tsiu mha pelhou mu ki chü ba zo, 29derei Lot Sodom nunu tuoketa nhie teigei nu mi mu mitsie perüpie süko pete pekawa. 30Themia Nuou mia bu mhotsou puo nguketuo nhie rei sümhie zotuo. 31Sünhie kehoupuorei ki mho gei baketau bu puo kinu vienyako chülietuoü la ke hie; mu sümhie puo lie nu ketuomia bu rei rürei la vo hie. 32Lot kimiapfü rükrashücie. 33Kehoupuorei puo phouu pekrulieketuo leyakezhau süu pejüwatuo; tsiu kehoupuorei puo phou pejükeshüu süu pekrulietuo. 34A nie ki puya, süzhü mia kenie keze thezhü puo gei zhütuo, mia puo chüsetatuo, tsiu kekreiu khawatuo. 35Siro thenumia kenie keze mhage batuo; miapfü puo chüsetatuo, mu kekreipfü khawatuo.” 36(Mia kenie keze lie nu mhachü tuotuo; mia puo chüsetatuo mu kekreiu khawatuo.) 37Sitse uko sie, “Niepuu, kirapuo ya?” Sitse puo uko ki, “Kehourapuorei kesiamo kezhüra, chürhaüko rei vo sünu kengutuo.”

Currently Selected:

Luk 17: ANBRBSI

Highlight

Copy