Luk 16

Dietho Kemo Kinyikeseu

1Sitse Jisu pethakelieko ki, “Kenyimia puo mia bu puo vie pete mehoyakezha puo nyi, ru mia vo puo ki themia haue puo kinyiko se kehoukeruo chüya ükecü puta. 2Süla puoe puo kielie di puo ki, ‘A n dze kesi hau kiüta ga? No mha mehoyakezha thoko chü kemesa tseipie a tsücie, n bu a kinyiko keseu chü salie kenjüketa la.’ 3Sitse kinyi kemeho-u puo thuo puo nou nu, ‘A mhatho nunu a niepuu a khawatuoü bate, mu a kedipuo chü ro vi ta? A kijü dutuoü mu metei mo, tsiu khruocütuoü mu mengae. 4A kinyi mehoyakezha tho-u nunu a khawaketa sie mia bu a ze u kinu tuolie kevi thedo puo a leliete.’ 5Süla puo sie puo niepuu pu pfükezhüko mia puopuo kie ze vor di therieu ki, ‘No mha kidepuo a niepuu pu pfüzhü ga?’ idi ketso. 6Sitse puo sie, ‘Oliv tier bou krie puo.’ Sitse puo sie puo ki, ‘N thepu leshüu pielie, ke balie di hiepengou thushülie!’ 7Sitse puo sie mia kekreiu ki, ‘Ki-a no thepu kidepuo pfüzhü ga?’ idi ketsoshü. Ru puo sie, ‘Thoulha kemejü bou krie puo.’ Sitse puo sie puo ki, ‘Thepu leshüu pielie di hiethetha thulie!’ 8Siro puo niepuue mhakemeho mezhü kemo-u üse puo do vi phi di mhachü üta; kekreilamonyü tsiedo nuonuoko u thuo u tshümia teiki leshütuo üro kezieu nuonuoko ki u do vikuo. 9Siro a nieko ki pushütuo, ketho kemo kinyiko#16:9 Gk Mamon. se nie khrietho pfhüliecie, siliro kinyi süko jüketa ki mia kechachie baketuo kiko nu nieko zelietuo.

10“Kehoupuorei mha ketsa keduoyo nu rei mia bu puo pelelie kevi chü liro, mha kekra nu rei mia bu puo pelelie vi; mu kehoupuorei mha ketsa keduoyo nu rei mia bu puo pelelie suota ro, mha kekra nu rei mia puo pelelie lho. 11Süla nieko ketho kemo kinyi nu dietholieya mo üliro kedipuo mhie di ketho kinyiu pie nie pelelie vituo ga? 12Siro nieko mia vie gei thuo rei diethoshülieya moliro, supuonie nie vieu pie nie tsütuo ga? 13Kituomia puorei niepumia kenie kituo chü keduolie kenjü; siliro puo mia puo ngumecüta mu kekreiu khrietatuo, morei puo mia puo kitsa bata di kekreiu thitatuo. Nie Ukepenuopfü mu mamon kituo chü keduolie kenjü.”

Jisu Kepetha Die

(Mat 11:12-13; 5:31-32; Mark 10:11-12)

14Sitse Farisiko shükeiraka kemehouko die süko pete si di uko krenyüta. 15Süla puo uko ki, “Nieko mia mhinguki we nie thuo nie üse mezhü ütuoya, derei Ukepenuopfü nie nou si ba; themia mhodzüki mha kezha ükezha puoe Ukepenuopfü mhodzünu kerütse zocü la.

16“Johan kevor mhodzü thezho-u mu siedzekesiko tuo; süsie Ukepenuopfü kedi dieliekeviu pupie mia petha vor, sidi themiako kehoupuorei chüsechü sünu ler nyü sie. 17Derei thezho-u nu thupie kezhü kethushü kevi yopuo chü pejüwaketuou ki rei tei mu kijü bu rüdiketa we rüükuo.

18“Themia kehoupuorei puo kimia khawa di thenu kekrei puo ze keri lata ro pieü chüta zo; tsiu miapuonie mia puo khakewapfü ze keri lakecüu rei pieü chüta zo.

Kenyimia Puo mu Lazar Dze

19“Thiedzü kenyimia puo pfhe meriemegekecü mu linen kevipfü dzie di teisonhie hie puo theguo chü baya. 20Siro Lazar ükecü kejümia puo kechüpfü thuo tshupfü di puo care ki baya, 21puo kenyiu mizhü geinu kecüca rürie ketsuko cü nyü sieipfü baya; sidi tefüko zorei vor puo gei kechüpfüko meyo baya. 22Sitse mhakejüu siata mu teigeidielieko puo pie vo Abraham merü gei bawa. Siro kenyiu rei siata di khruwa. 23Sidi puo vo Hades nunu kemezhie phi bata, sidi puo tosie ru vo ratsa Abraham merü gei Lazar ba di ngulie. 24Sitse melie puo rhiechü di sie, ‘Apuo, Abraham, a ngumezhiecie, no Lazar ketsepie puo bu puo dziekinuotie se vor dzü selie di pie a meü se pekoushücie, kekreilamonyü a miü hau nunu meyhumezhie baketa la.’ 25Derei Abraham sie, ‘A nuo n thuo rei rükrashücie, no n kerhei ki mha kevi khe nguwate, sirei Lazar we mha kesuo kheko ngu, derei tsie we puoe puo nouluo, mu no we kemezhie bate. 26Sizomonyü hieko mu nieko donu kheho kesou se puo bate, süla hatsanu miapuorei tuo nie kitsa pfükelie jü mu miapuorei cütsanu hieko kitsa vorlie kenjü.’ 27Sitse puo sie, ‘Siro apuo, no a ngumezhie zo di puo ketsepie a puou kinu shücie, 28a siezedzüriemia pengou baluo mu uko bu kemezhiekecü chü hanu vor molieketuo la puo bu uko ki pushücie.’ 29Derei Abraham la sie, ‘Uko Mosa mu siedzekesiko ba, uko bu süko die rünyüliecie.’ 30Sitse puo sie, ‘Molie, apuo Abraham, mia puo kesia nunu rhei lalie di uko ki vo ro, uko rei uko nou kedilietuolie.’ 31Derei puo sie puo ki, ‘Uko Mosa mu siedzekesiko die thuo rei rünyü moro, mia puo kesia nunu rheilie di vo zorei uko pelelie lholie.’ ”

Currently Selected:

Luk 16: ANBRBSI

Highlight

Copy