Luk 15

Tekuo Jüketayo

(Mat 18:12-14)

1Süki khezhanuo khruoyakezhako pete mu kephoumako puo die rünyütuoü penuo vor. 2Sitse Farisiko mu thezhokepethako panya di sie, “Themia hau kephoumamia rei zelie di uko ze mhacüya.”

3Süla puo uko ki dievi hau pu di: 4“Nieko miapuonie tekuo krie puo ba di süko puo pejüwa ro, puo hiethepfüethepfüko khapie rayha nu bawa di vo jüketayo ngulie kemochie pfhüya kemo supuo ba ga? 5Sidi puo süyo ngulieta tse pie puo boukanie gei shülie di puo nei phitaya. 6Sidi kinu vor tse, puo zeko mu zanuoko kie kengulie di uko ki, ‘Nieko rei a ze nie neiliecie, a a kuo jüketayo ngulieketa la,’ isiya. 7A nieko ki pushütuo, süsütuoi thenoukedikecü se morei vikecü kemiathomia hiethepfüethepfüko ki rei kephoumamia puo thenou kedikelie la teigei u neituo.

Priesa Pejükewayo

8“Morei miapfü puoe rakachü kapie ker ba di süko donu puo pejüwa liro, puo mibou petulie di süyo ngulie kemochie kitsho di pfhüya kemo supuo ba ga? 9Siro puo süyo ngulie tse, puo khriethokhriechümia mu puo zanuomia kie kengulie di sie, ‘Nieko rei a ze nie neiliecie, a a kapie pejükewayo ngukelie la.’ 10Sütuoi a nieko ki pushütuo, kephoumamia puo thenoukedikelie la Ukepenuopfü dielieko u nei baya.”

Jüketa Nuou

11Jisu sie, “Mia puo puo nuo kenie nyi. 12Ru nhicuue sie puo puo ki, ‘Apuo, mha a yako pie a tsüwacie,’ sita. Süla puo puoe puo vieko kezapie unie tsüwa. 13Zha huoyo sie nhicuue puo yako pete selie di rüna kepecie puo nu vota, sidi puo sünunu rügerüzhü di puo vieko pete ketsiwa. 14Siro puoe puo vie pete zecü thelie tse, rüna sünu pekrie kriedi sierta mu puo mhajülieta. 15Süla puo vo rüna sünu khenumia puo kivo chüta, sitse themia süu puo ketsepie puo bu lie nu thevo pfhe. 16Süki puo thevo ca chüyakezha rücüpreiko rei pie puo valuo chükelie mengu zo bata; sirei miapuorei mhapuorei se puo tsü mo. 17Derei puoe puo melou mecielie tse puo thuo puo rüchü di sie, ‘A puonuomia mia zhakhrü ze puo kituo chüyakezhako thuo zorei kecüca u kelhuo kezie ba, derei a we haki nu thekhepfü siatatuoü bate! 18A sielie di tuo a puo ki vo di puo ki, “Apuo, a teigeiu mhodzünu mu n mhodzü rei phoumawate; 19a n bu a ü n nuo ücü rei kielie sü mote, a bu n kituo zhakhramia puorei chüliecümu, situo.” ’ 20Süla puo sielie di tuo puo puo ki vota. Derei puo ratsa tuoluocü nu puo puoe puo ngushü di puo noumezhieta, sidi ta vo puo ciepielie di puo mebota. 21Sitse puo nuou sie puo ki, ‘Apuo, a teigeiu mu n mhodzü rei phoumawate, n bu a ü n nuo ücü rei kielie sü mote.’#15:21 Leshü kewe huo nu a üse no zhakhrü ze keba n kituomia puo rei mhieliecü mu icü sa. 22Derei puo puoe puo kituoko kielie di sie, ‘Nieko mhai vo pfhe kevitho-u se vor puo bu dzielie; siro dziekha puo pie puo dziekinuo gei shüshülie mu phikou rei puo bu nyülie. 23Siro vo u thunuo puo phou kevithoyo dukhrilie, sidi úko keze cüükrie u nei khe; 24kekreilamonyü a nuo hau siata ru, rheiliete; puo jüta ru nguliete.’ Sidi uko keze u nei bata.

25“Süki puo dzürieue tsu lie nu tuo di tuo ki penuo vorkezhü ki puo mia ütsali chü mu nashü keba silie. 26Süla puo kituoko mia puo kielie di kedipuo chü ba shicü ketso. 27Sitse puo sie, ‘N siezeu la vorte, mu n puo mithunuo puo phou kevithoyo dukhripie thehe chü balie, n siezeu vishürhotuo di la vorlieketa la.’ 28Sitse puo puo nou meyie di kinu le mvüta. Süla puo puoe par di puo se beita. 29Derei puo sie puo puo ki, ‘Harie rünyüshücie! A teicie hatsuohachie n lie chü vor, mu mhakipuorei n die vacieya mo; sishierei no khunhie puorei temvü yopuorei pie a tsü di a bu a zeko rei ze a neikecü chü mo. 30Derei n nuo hau thethenuko ze tuo di n vieko peka cülie, di la vor ru puo la u thunuo puo phou kevithoyo dukhri bate le!’ 31Sitse puo puoe sie puo ki, ‘A nuo, no sü a ze sei baya, mu a vieko pete sü n vie zo. 32Derei n siezeu siata ru rheiliete; puo jüta ru nguliete, süla we u nei mu u noumvü keba mese ze.’ ”

Currently Selected:

Luk 15: ANBRBSI

Highlight

Copy