Luk 14

Jisu Kechümia Puo Chü Pevikeshü

1Süsie sabat puo nhie Jisue Farisiko krütamia puo ki hietuoü vo balie, süki themiako puo meho terüpfü ba. 2Ru dzü nuonikepfümia puoe puo mhodzünu ba di ngulie. 3Sitse Jisu thezhokesiko mu Farisiko ki, “Sabat nhie mia chü keshürhokecü thezho mo mo ga?” idi ketso 4Sirei uko kemekrie zei bata. Sitse Jisu süu mengu ze phir di puo chü keshürhoshü, sidi puo ketsewa. 5Süsie puo uko ki, “Nieko mia puoe puo nuo morei thudo puo te kheho nu leta liro sabat nhie zorei kenourhei le süu teshü la par motuo me?” 6Siru uko die hau kela lalie lhota.

Ketseikevi mu Ngukemezhie

7Süki mia hienu di kieze vor kebako theba keviko pfhü ketuo ngu di puo dievi puo pie uko ki pushü. 8“Mia puo n bu nuyie he puo nu hienu n kiekecü ki, no vo theba kevithoko nu bata hiecie, puo n ki rei therhu pfükuokecümia kiepie ba rei silie kelho la; 9siro nnie kiekeshüu vor n ki, ‘N chüu periepie hau tsücie,’ sita ro, no menga phi di ke theba thelatho nu batatuo. 10Süla mia n kiekeshü ki, no vo theba thelatho nu balie, sitse n kiekeshüu vor n ki, ‘A zeu, no kho theba kerükrie gei baliecie,’ silie vi. Siliro no theheu nu hie kebako pete mhodzünu therhupfülietuo. 11Kekreilamonyü kehoupuorei puo thuo puo chü kerükrie kenyüu chü kerünuowatuo, tsiu kehoupuorei puo thuo puo chü kerünuolieyakezhau chü kerükrieshütuo.”

12Sidi puo sie puo kiekeshüu ki, “No khinhie morei theva mia ze hietuo üliro n khriethomia morei n siezedzürieko morei n se n yiemia morei n zanuomia mhakenyimiako kie zo hiecie, uko n kie ze vo n ze hie lawalie vikecü la. 13Derei no mia ze hietuo üro mhakejüko, lalhiko, phiyhoko mu mhicieko kieliecie. 14Siliro no thejapfülietuo, süko n pu su lalie kenjücü la, tsiu kemiathomia rheilakesie ki n pu chü lashü zotuocü la.”

Thehe Kezha Puo pie Kedievikeshü

(Mat 22:1-10)

15Süki hie kebako mia puoe puo die süko si di puo ki, “Ukepenuopfü kedi nu hieketuomia sü thejakepfütho.” 16Sitse Jisu puo ki “Mia puo thehe kezha puo keselie di mia kekra kieshü. 17Siro puo hieketuo teiki puo kituou bu vo kiepie kebako ki, ‘Vorliecie, mha pete kesepie bate,’ idi puketuo la ketseshü. 18Derei uko pete rei kemhie mhapuo kerüpu phreta. Kerieu sie puo ki, ‘A lietsa puo khrülie ru a tsu süu meho morosuolie; süla a ngumezhie di a kejo vashücie,’ si. 19Kekreimia puo sie puo ki, ‘A mithu vocie kepfü dziese pengou khrüpie ba, mu süko se tsu uko bu pfü dojü nyü balie; süla a ngumezhie di a kejo vashücie,’ sita. 20Kekreimia puorei sie, ‘A tsiedoki nu thenu lie di ba, mu süla a vorlie suote,’ ita. 21Süla kituo süu la vor di mha hako pete pie puo niepuu ki pushü. Sitse niepuu puo nou meyie di sie puo kituou ki, ‘No tuo rükri rünau chapfüchaüko mu chatseko nu volie, sidi mhakejümia, lalhimia, mhicieko mu phiyhoko ze hanu vorliecie,’ sita. 22Süsie kituou sie, ‘Kepethau, no chülienu pukeshüko chüliete, sirei tsie rei theba ba saluo.’ 23Süla niepuu sie kituo süu ki, ‘No tuo pra di chaüko mu chatseko nu mia kie bei ze vor a ki tshuliecie. 24A nieko ki pushütuo, pedzüperie kiepie kebako mia puo bu rei a thehe kesepie kebau methalie lho.’ ”

Siedzi Kethomia Chülie Morokesuo

(Mat 10:37-38)

25Süsie themia krodi puo ze vokezhü ki puo reipra uko ki, 26“Kehoupuorei a ki vor di puo puo siro puo zuo, puo kimia mu puo nuonuo, puo siezedzürie tsiu puo üpfünuoko mu puo thuo puo kelhou meliewa kemosie ae pethakeliemia chülie kenjü. 27Kehoupuorei puo thuo puo krus pie di a siemedzilie moro ae pethakeliemia chülie kenjü. 28Ki-a, nieko miapuonie kuda puo pfhe nyü kesie ki, ba chüsechülie di süu chüketuo la, tsiu puo süu chü tseilieketuo la mha ba mo mo shicü rhü mu leya kemo supuo ba ga? 29Si moliro, puoe puo mvüdzeu dzepie zhükelie sie kudau chü tseilie lhotatuo; mu mia süu kengu khe puo kre, 30di sie, ‘Themia haunuomia hau chü sede sie di chü tsolie lhote.’ 31Morei kedimia puo puo themia nyie ker ze kedi kekrei puo themia nyie mepfü ze di puo ze kegeituoü vorkezhüu ze kegeilie vituo mo lho shicü rhü mu le perieya kemo supuo ba ga? 32Mhanuü puo süu chülie kenjü üro, kedi kekreiu kepecie nu ketuo nu puo dieliemia ketsepie süu ki shü di vitho chüwaketuo die ketsoya. 33Süsütuoi, nieko kehoupuorei puo vie pete khawa kemosie ae pethakeliemia chülie kenjü.

Metsie Puo Kelhe Jüketa

(Mat 5:13; Mark 9:50)

34“Metsie-e vi zo, derei metsie zorei puo kelhe jüta ro, kedipuo pie chü pelhe lalie ta?#14:34 Moro kimhie di süu se mha va pevi se balie ta? 35Süu kijü la morei nyopfhükhru la rei puo kevi jütaya; sidi kelhoukewa zotaya. Kehoupuorei puo nyie nyi di rünyüketuomia bu rünyüliecie!”

Currently Selected:

Luk 14: ANBRBSI

Highlight

Copy