Luk 13

Kephouma nunu Rüdilienukecü

1Siro sütei touki mia kro puo vor di puo ki Pilat-e Galilmia kro puo zie pie uko ruothoko sa kereikewako dze pushü. 2Sitse puo uko ki, “Nieko Galilmia hako sükemhie di kemezhiekelie-e Galilmia kekreiko pete ki rei phoumakuo ükecü leya me? 3A nieko ki pushütuo, si mo, derei nieko nie noukedilie kemosie nieko rei süko tuoi ka phretatuo. 4Siro Siloam tsiepfheu metsur mia kerethetha vakhriwaketa süko üse Jerusalem nu keba themia kekrei peteko ki rei phoumakuoücü nie leya me? 5A nieko ki pushütuo, süu si mo; derei nie thenoukedilie kemosie nieko rei süko tuoi ka phreta zotuo.”

Chiedebo Puo Dze Dievi

6Süsie puo dievi hau pushü: “Mia puoe khubelieu nu chiedebo puo leipie ba, mu puo süu geinu puo si pfhü vor ru puo si puorei ngulie mota. 7Süla puo sie tezie kepfheu ki, ‘Harie mehoshücie! A cie se rüso chiedebo hau si pfhü vorte, derei puosi puorei ngulie mo. Chiedebo-u wiwacie! Kiüdi süu bu kijü peka ba zotuo ga?’ 8Puo sie, ‘Kepethau, puo bu ciethie ba sa phicie, sidi a bu puo phi nu kepushü di nyorhu pie vashücie. 9Süsie puo si vülie ro vi zo, mota ro süze süu wi reiwacie.’ ”

Sabat Nhie Chiethoupfü Puo Chü Pevikeshü

10Sabat puo nhie puoe sinagog puo nunu mia petha. 11Siro süki cie kerethetha kechükenyü ruopfü bu puo ze tuoketapfü puo vor. Hapfüe puo chie kehoupfü di tosielie lho tuoya. 12Siro Jisu puo ngu tse, puo kielie di sie puo ki, “Thenupfü, n kechü nunu n phreishüwate ho.” 13Sidi puoe puo dzie chapie thenu süpfü gei shü tse, vapuonu puo peto lalieta di Ukepenuopfü tsheta. 14Derei Jisu sabat nhie mia chü keshürhokeshü la sinagog nu kezhau puo nei mo di sie themia kro-u ki, “U bu mhachülienukeshü zha sorou ba; süla zha süko nu vor di nie chü keshürholie, derei sabat nhie we silie kenjü!” sita. 15Derei Niepuu puo die kela di sie, “Nieko ketherakezhako! Nie kehoupuorei sabat nhie nie thu morei nie gada puo ki nunu phrei ze vo dzü krieya mo me? 16Siliro Satan bu cie kerethetha puo phapfü tuoketa Abraham yie hapfü rei sabat nhie phreishüwa zhü mo me?” 17Siro puo hau pushü tse, puo kepetsouko pete menga phreta; tsiu themia kro-u zo we puo u ngo zokecü chükeshü pete la u nei phi phreta.

Gakrie Tsia pie Kedievikeshü

(Mat 13:31-32; Mark 4:30-32)

18Süla puo sie, “Ukepenuopfü kedi kedipuo ze kemhie ga? Mu a bu kedipuo pie süu ze kemejüshütuo ga? 19Süu gakrie tsia yopuo mia puoe se tsu tezie nu prushü; sitse süu lhou zha sier seibo puo chülie mu perako vo di puo coko geinu u kru chülieketa mhie zo.”

Khrei pie Kedievikeshü

(Mat 13:33)

20Sidi puo la sie, “A bu Ukepenuopfü kedi pie kedipuo ze kemejütuo ga? 21Süu thenumiapfü puoe khrei se vashü di süu bu pou parkelie mhie zo.”

Kharu Kemereu

(Mat 7:13-14,21-23)

22Süsie puo rüna kecü rei kezha rei pfüthese mia petha di Jerusalem va vozhü. 23Sitse mia puoe puo ki, “Niepuu, mia keduoyo kelakelie zotuo me?” 24Sitse puo uko ki, “Nieko kharu kemereu ze lelieketuo nie rhie chüliecie; a nieko ki pushütuo, themia kekra süu nu leketuo pfhü hutuo, derei lelie lho. 25Süki ki niepuue sie kikha khalieta ro, nieko kitie tha di kikha ketou di, ‘Niepuu, kikha khrüpie hie tsücie,’ itse puo sie nie ki, ‘A nieko kirapuo nu vor shi si mo ho,’ idi kelatatuo. 26Süsie nie sie, ‘Hieko n ze mhacümhakrie vor zo, mu no hie chaüko nu rei petha,’ isituo. 27Derei puo sie, ‘A nieko kirapuo nu vor shi si mo. Nieko kesuo chüyakezhako tuo a thertacie,’ sitatuo. 28Sitse nieko Abraham mu Isak tsiu Jakob mu siedzekesiko pete Ukepenuopfü kedi nu ba di ngukelie ki mia nieko whuopie kitieshüwaketa la sünunu kra mu nie hu thegeipie batatuo! 29Sitse mia niathutsa mu niakratsa nu, pesotsa siro pekhrotsa nu vor di Kepenuopfü kedi heu nu batatuo. 30Ketho zo, kenuoko huomia rietatuo mu kerieko huomia nuotatuo.”

Jisu Jerusalem Khriekecü

(Mat 23:37-39)

31Sütei touki Farisiko huo puo ki vor di sie, “No haki nu tuotaliecie, Herod n dukhriwa nyü batacü la,” sita. 32Sitse puo uko ki, “Nieko vo a la meseru süu ki pushücie, ‘Rünyüliecie, a thie siro sodu terhuokesuoko whuo mu kechümia chü keshürho batuo, sidi zha se nhie we a mhatho tseitatuo. 33Siüderei a thie mu sodu tsiu nuonhieko tuoshüzhü zo morosuo, kekreilamonyü Jerusalem nu zo kemosie kekreira nu siedzekesimia dukhrilie lho zo.’ 34Harie, Jerusalem, Jerusalem, siedzekesiko dukhri mu ketsie pie n ki ketsekeshüko vayakezhapfü! Vükrüe puo nuonuo kekopie puo shü khro shülieyakezha tuoi a va kitsuokidepuo n nuonuoko kie kengulie nyü sie shi, derei no mvüte! 35Süla harie, nieko kiu khapie nieko dzie nu shüwatuo. Siro a nieko ki pushütuo, tsie yawinu nieko, ‘Niepuu za se vorkezhüu thejakepfütho,’ idi pu kemochie mhakipuorei nieko a ngulie lhote.”

Currently Selected:

Luk 13: ANBRBSI

Highlight

Copy