Luk 12

Ketherakezhamia gei Menuolienukecü

(Mat 10:26-27)

1Süki mia soünyie krodi chü vor kengulie ru themia krathorta, süla uko huoniehuo phi kede zota, süki puo sie puoe pethakelieko ki, “Nieko Farisiko khreiu, süusü ketherakecüko la menuoliecie. 2Derei mhapuorei se mia pesipengulie lho üdi whepie keba jü; tsiu mia bu si motuo üdi keviepie kezhü jü zo. 3Süla nieko kezei nunu pukeshüko mia kezie nunu süko situo, tsiu nie kinutshekou nu pukeshüko pie kitsüko geinu shieshütuo.

Supuo Prei Zhü Shikecü

(Mat 10:28-31)

4“A kezeko, a nie ki pushütuo, themo-u dukhriwa rei süsie mhapuorei chü salie kenjükecü, nie mha süko prei hiecie. 5Derei a nie bu supuo prei zhü shikecü pushü nie kietuo: Dukhrikewa sie rei kelhoupie mizie nu shüwalie kevi kekuo kebau preiliecie. Ketho zo, a nieko ki pushütuo, puo prei zolie! 6Ciekhrienuo pengou pie priesa kenie nu zeya mo me? Siüderei Ukepenuopfü mhodzünu we süko yopuo rüli rei rükra motaya mo. 7Sizomonyü nie tsüthako pete rei phrüliete. Süla michiepie hiecie: nieko ciekhrie kekra ki rei vikuo eru!

Khrista Phra Kemvü

(Mat 10:32-33; 12:32; 10:19-20)

8“Siro a nieko ki pushütuo, themia kehoupuorei themia mhodzünu a phraya liro, Themia Nuou rei Ukepenuopfü dielieko mhodzünu puo phratuo, 9derei kehoupuorei themia mhodzünu a melieta ro, Themia Nuou rei Ukepenuopfü dielieko mhodzünu puo meliewa zotuo. 10Siro themia kehoupuorei Themia Nuou kepetsou die kepu la zowe vapie tsütuo; derei kehoupuorei Kemesa Ruopfüu tha ro vapie tsülie lho. 11Tsiu mia nie ze sinagogko nu, kezhako mu kekuokeseko mhodzünu kevo ki nie thuo nie rüguolieketuo la morei kedipuo putuo shicü le nie nou kemezhie hiecie, 12nie bu pu morokesuoko puotei touki nu Kemesa Ruopfü thuo khashü nie tsü zotuocü la,” sita.

Mhalekemo Kenyiu Dze Dievi

13Süsie mia krodiu donu mia puoe sie puo ki, “Kepethau, no a siezeu bu hienie thekau a ze kezalienushücie.” 14Derei puo sie süu ki, “Kezeu, supuo a bu nnie nyie kecütuoü morei nnie vieko kezaketuo chüshü ga?” 15Sitse puo uko ki, “Menuolie, tsiu mha kemehou pete nu nie kirei sei tuolie; themia kelhou ha puo kinyi kekra keba la rei balieya mo zocü la.” 16Süsie puo dievi puo pie uko ki pu di sie, “Kenyimia puoe puo lie nu mhatho si rüchü philie. 17Sitse puo thuo puo nou nu medo di, ‘A a mhatho siko kenguketuo thechü puorei jüte, a kedipuo chü ro vituo shi?’ 18Sidi puo sie, ‘A hau chütie, a a lhakiko rhuowa di süki zhakuokecü kro puo chülietuo, sidi süko nu a lhako pete mu a vieko kengupie balietuo. 19Sidi a a ruopfü üse, a ruopfü, no teicie kekra se morokesuo la mha kevi ba hute, mhachümhalie hie, cüükrielie, sidi n thuo n nei batalie,’ isi ba. 20Derei Ukepenuopfü sie puo ki, ‘No mhalekemo-u, tsiezhü n geinu n ruopfü zelietatuo. Sita ro no kengupie kebako pete supuo vie chütuo shi?’ 21Süla kehoupuorei Ukepenuopfü kitsa mhakenyi le mo di u thuo u kinyi kenguyakezhamia sümhie zotuo.”

Ukepenuopfü Khremerülienukecü

(Mat 6:25-34)

22Süla puo sie pethakelieko ki, “A nieko ki pushütuo, nie kelhou la, cüükrieketuo, morei nie mo-u la, pfhemenei seketuo dze lepie nie nou kemezhie hiecie. 23Kekreilamonyü nie kelhouu kecüca ki rei meyiekuo, tsiu nie mo-u nie pfhenei ki rei meyiekuo. 24Shüzhako rüli leshücie, uko tsia se tsu cieya mo, morei re reiya mo, süko mha kengupie baketuo bou morei telhaki rei jü; siürei Ukepenuopfü süko va thuo rei chüya! Nieko we perako ki rei vi phikuo zo! 25Siro nie supuonie puo noukenyü chükeshü geinu puo kelhouzha thu puo chie rei chü pechalie vi ta?#12:25 Moro puo cha thu puorei. 26Nieko mha kecü sikecü yopuorei chülie kenjü ro, mha kekreiko dze la thenou kenyü chü ba ki ta? 27Nha nu terhuobiepouko kimhie di memielieya shicü leshücie: süko mhachümhalie morei terhiterhie chüya mo. Sishierei a nieko ki pushütuo, Solomon zapuzayie kechü pete nu zorei süko yopuorei tuoi kerütso mo. 28Derei Ukepenuopfüe lie nu keba nhako thie lhou ba rei mia sodu chü kelhoupie miphu nu thewaketuoko rütso rei chüshü üro, nie kepele ketsako, süko ki rei puo nieko rütso chükuoshü motuo me? 29Süla nieko we kedipuo cü mu krietie shikecü pfhü ba zo hie mu nie nou meyhumezhie ba zo hie. 30Kekreilamonyü kijü hau seyiekoe mha süko pete pfhü baya zo, derei nie Puou nieko mha hako pete se morokesuo si ba. 31Sikecüumonyü, nieko puo#12:31 Leshü kewe huo nu Ukepenuopfü, si. kedi pfhüliecie, siro mha hako pete pie nie tsüshütuo.

Teigei Kinyiko

(Mat 6:19-21)

32“Michiepie hiecie, nie themia ketsa kro-u, kekreilamonyü nie Puou puo kedi khapie nie tsütuo ükecü puo nei puo medote. 33Nie vieko zelie di khapie mia ngumezhiewaliecie. Nie thuo nie la suotalie kelho priesabou keseliecie, sidi katalie kelho nie kinyi teigei nu kenguliecie, sünu kerügumia rei vo tsolieya mo, morei shülhe rei cü pejüwalie lho. 34Kekreilamonyü nie kinyi kebara nie nou rei süra ba zotuocü la.

Pfheüla Bakelie Kituou

35“Nie chie phapfü di dojü balie, mu nie mitu petuse ba zolie, 36mia u niepumia nuyie he nunu la vorketuo pfhe bayakezha tuoi ba zolie, puo vor di kikha ketoushü ro, süko kikha khrü mhashü puo tsüya. 37Siro niepuu kevor ki puo kituoko puo pfhe ba di ngukelieko thejakepfütho; a nieko ki pu toushütuo, puoe puo chie phapfülie di süko bu mhacüketuo la ke balietuo, sidi puo vor mha ka kezapie uko tsütuo. 38Siro khisoteiluo morei teisotie nu shierei sükemhie ba di ngukelie kituoko thejakepfütho.

39“Derei hau siliecie: ki niepuue kerügumia vorketuo tei si keba sie mia bu puo ki rhie lelie lho. 40Süla nieko rei dojü baliecie, nie le mo keba nu Themia Nuou vor zotuokecü la.”

Kedietho mu Kerüzhü Kituo

(Mat 24:45-51)

41Sitse Pitor sie, “Niepuu, no dievi kepu hau hieko la mo pete la rei ga?” 42Sitse Niepuu sie, “Supuonie kituo kedietho mu mhakesemenuokezhau chü di puo niepumia bu puo chüpie puo kinu kezha chü di puotei touki mha khapie uko tsünutuo ga? 43Puo niepuue kevor ki sükemhie chü ba di ngukelie kituou thejakepfütho. 44A nieko ki pu toushütuo, puoe puo chüpie puo vienya peteko kemeho-u chüwatuo. 45Derei kituo süu puo nou nu ‘A niepuu vor menuotuo,’ idi kituo thepfu rei thenu rei vü, tsiu mhacümhakrie mu meze bata ro, 46kituo süu niepuu, puo le mokeba puo nhie mu si kemo tei puo nu vor puo dathe phaphawa di puo khapie pelekemoko chü nu shüwatuo. 47Kituo süu puo niepuu medo-u si, derei puo dojülie mo morei süu chü rei mo kebau, vü kratuo. 48Derei si mo di mia bu puo vüketuo thoko chükecümia zowe vü petsatuo. Sizomonyü khapie puo tsü krakeshümia kinu ngu kralie morosuo, mu mha pie u pele krashü ro, sümia kinu mia rei cha kratuo.

Themia Chükho Kekreikeshü

(Mat 10:34-36)

49“A mi khapie kijü gei shüketuo la vor; mu süu tsie tu parketa we a neituo. 50A dzülukepfü puo pie petselie morosuo ba, mu süu tseilie kemochie kiderei a nou kemezhietie shi! 51Nieko a ü kezekevi se kijü gei shütuo üdi vor ükecü leya me? A nieko ki puya, si mo, derei mia pfükhoketuo zo. 52Tsie yawinu mia pengou keba kikruu kepfüphrotatuo, sidi mia se bu mia kenie ngumvü mu mia kenie bu mia se ngumvü;

53“Uko kepfüphrotatuo:

Puo puoe puo nuo ngumvü,

siro puo nuo rei puo puo ngumvü,

puo zuoe puo nuopfü ngumvü,

tsiu puo nuopfü rei puo zuo ngumvü,

puo niapfüe puo miepfü ngumvü mu puo miepfü rei puo niapfü ngumvütatuo.”

Puotei Kevikesuo Sikelie

(Mat 16:2-3)

54Süsie puo themia kro-u ki rei pu di, “Nieko niakratsa nu kimhou sierkezhü ngu ro, ‘Teirü vortuo,’ idi puya; mu süu chütaya. 55Tsiu pekhrotsa nu teirükhrie vorta ro, nieko sie, ‘Teile vortatuo,’ idi puya, mu süu chütaya. 56Harie, nieko ketherakezhako! Nieko tei mu kijü zie kevikesuo silieya; siüro kiüdi nieko tsiedo ki rüliko ha puoca silieya mo ga?

U Kepetsoumia Ze Kemezhü Chü Lakelie

(Mat 5:25-26)

57“Nieko kiüdi nie thuo vi ükecüu pepilieya mo ga? 58Sümhie, no miapuonie n pejo di n ze dienya kecüyakezhau ki votuoüta ro, chala nu tuoluokecü nu puo ze kemezhü chüwalie, si moliro puo n ze dienyakeseu mhodzünu votuo, siro dienyakeseu n khapie kedieki nu kezhau dzie nu shütuo mu süu n khapie kedie chüwatuo. 59A nieko ki pushütuo, no priesa yopuorei su tseiwa kemochie sünunu parkelie jütatuo.”

Currently Selected:

Luk 12: ANBRBSI

Highlight

Copy