Luk 19

Jisu mu Zakia

1Süsie puo Jeriko nu lelie di süu pfüthe vozhü. 2Sünu Zakia ükecü puo ba; puo khezhanuo kekhruoko donu kezhau mu puo mhanyi phi. 3Siro puoe Jisu supuo shicü mehotuoü sie, derei themia krathorta mu puoda rünuonyhicü la puo ngulie lhota. 4Süla puo ta rie vo di puo mehotuoü khravübo puo lisielie, kekreilamonyü puo süu chatsa vorkezhü la. 5Siro Jisu thechü süki vorlie tse tosie puo ki, “Zakia, mha kerlie; kekreilamonyü a thie n kinu vo ba morosuoketa la,” sishü. 6Süla Zakia mha kerta mu puo nei phi di puo pesolie. 7Siro süu ngukecüko pete rei panya di, “Puo vo di kephoumamia puo sochü bate.” 8Sitse Zakia siethalie di Niepuu ki, “Harie, Niepuu a a vie ketoupuo khapie mhakejümiako tsüwatuo, tsiu a huomia vie sekedalietaü mha liro, a süde dia kha lashüwatuo.” 9Sitse Jisu puo ki, “Thie kelakelie ki hanu vorte, kekreilamonyü puo rei Abraham nuo puo zocü la. 10Themia Nuou jüketamia pfhü mu sümia kelalietuoü vor zocü la.”

Rakabou Ker pie Kedievikeshü

(Mat 25:14-30)

11Siro uko die süko rünyü tuo mu puoe dievi puo pu sashü, kekreilamonyü puoe Jerusalem penuo votazhü, tsiu ukoe Ukepenuopfü kedi mhai zo vorta thenyüsie di le tuocü la. 12Süla puo sie, “Kezhamia puo vo kedi kechü kekuo ngulie di la vortuoü rüna kepecie puo nu vota. 13Süki puoe puo kituomia ker kie ze vor di mina#19:13 Mina puoe thekhrü se zhakra mese. ker khapie süko tsüshü di uko ki, ‘A vor kemochie hako se thelhi chü bacie,’ sishü. 14Siürei puo ramia thuo puo ngu mecü di puo sietsa nu dieliemia kro puo ketseshü di uko bu sie, ‘Hie themia hau bu hie mho kedi chü nyü mo,’ iwa. 15Süsie puo kedi kechü kekuo ngulie di la vor tse, puo raka pie kituomia kro puo tsükeshüko kienushü, süko puo raka pie thelhi chü di prakelieko si nyü di. 16Sitse kerieu vor di sie, ‘Niepuu, n rakako pie süde ker praliete.’ 17Sitse puo sie puo ki, ‘Siyazemu, no kituo kevi! No mha kecütho yopuo nu rei diethokelie la, nadi ker mhokezha chülie.’ 18Siro kenieu vor di sie, ‘Niepuu, n raka pie süde pengou praliete.’ 19Sitse puo sie süu ki, ‘N bu nadi pengou mhokezha chütuo.’ 20Kekreimia puo vor di sie, ‘Harie, Niepuu n raka haki tuowe. A pfhenyhie yopuo nu kezilie di khapie zhü zo, 21a n preite, kekreilamonyü no themia kepacü sekecü puo, no n vie kemoko rei chülieya, tsiu no prushü kemora rei relieya.’ 22Sitse puo sie süu ki, ‘No kituo kerüzhüu! A n tie nunu kepar n dieu pie n pejotuo! No a ü kepacü secü puo, tsiu a vie kemo-u rei chülieya mu a prushü kemora rei relieya ücü sita tele? 23No kiüdi a rakako khapie rakaki nu rei zhüwa mo ga? Sipie zhü ro a la kevor ki a raka pra rei ngulietieciü.’ 24Sidi puo khieki kethako ki, ‘Nieko hau dzie nunu rakako lielie di se vor mina ker kebau tsüwaliecie.’ 25(Sitse uko puo ki, ‘Niepuu, süu mina ker bate.’) 26‘A nieko ki pushütuo, kehoupuorei mha kebau khapie puo tsü satuo; derei ba kemo-u puo vie kebau rei puo dzie nunu chüsetatuo. 27Derei a ngumvüko a bu uko mho kedi chü nyüyakemoko ze haki vor di a mhodzü nunu süko dukhriwalie.’ ”

Jisu Meyiemeluo Jerusalem nu Kele

(Mat 21:1-11; Mark 11:1-11; Joh 12:12-19)

28Siro puo die hako pushükewa sie, puo Jerusalem nu votuo üdi uko mhodzü rie vota.

29Siro puo tuo Betfage mu Bethani rünanie kepenuoki Oliv Kijüthou gei vorlie tse, puoe pethakelieko mia kenie ketseshü, 30sidi sie, “Nnie tuo nnie mhodzütsa keba rünau nu vocie; mu nnie sünu le ro, miapuorei sie puo gei ba mo zoluocü gada yopuo khepie ketha ngulietuo. Süu phreilie di ze vorlie. 31Mhanuü huomia, ‘Nnie kedipuo la süu phrei tha ga’? idi ketso ro, ‘Niepuue puo se morosuoyalie!’ siliecie.” 32Süla unie tuo vo ru mha pete rei puo unie ki pukeshü kemhie tou di ngulie. 33Sidi unie gadayo phrei tha tse, süu niepumia vor di sie, “Nnie kiüdi gadau phreiya ga?” idi ketsota. 34Sitse unie sie, “Niepuu puo se morosuoyalie.” 35Sidi unie süyo ze Jisu ki vorshü; sidi uko u pfhe rhuopie gadayo gei khrashü di Jisu bu pfü balie. 36Siro puo vokezhü ki, themiako rei u pfhe rhuopie cha nu khrashüshü vota. 37Süsie puo tuo Oliv Kijüthou phi nu ker tse pethakelie themia krodiu mha kezha chükeshü nguwaketa la u nei di Ukepenuopfü tshe u rhiechü, 38di sie,

“Niepuu zanu vorkezhü kediu bu thejakepfüu chücie!

Teigei rei keviu chülie,

mu tei pesotho gei kebau bu zayie chücie!” ituota.

39Süki themia krodiu donu Farisiko huo puo ki, “Kepethau, noe pethakelieko kekhawacie,” sita. 40Sitse puo la sie, “A nieko ki pushütuo, mhanuü hako kemekrieta shierei ketsieko thuo zorei shie partatuo.”

Jisu Jerusalem la Krakecü

41Siro puo nadiu penuo vorlie tse, süu ngushü di süu la krata, 42sidi sie, “No thie ha zorei nouneu la se morokesuou no si ücü we! Derei süu n mhi kinu keviewate. 43Siro teisozhako n gei vortuo, süki n ngumvümia vor seikhrie dze rükrie kho n houlie, tsiu n khapfülie mu n khie lutsahatsa nu n geteipfü lertuo. 44Süko no mu n gei keba n nuonuoko vütshiepie kijü zhüwatuo, siro n gei ketsie puo bu rei kemhosepfü zhülie lho; kekreilamonyü no Ukepenuopfü n pfhü kevor teiu silie moketa la.”

Jisu Kerüsuokiu Chü Kemesakecü

(Mat 21:12-17; Mark 11:15-19; Joh 2:13-22)

45Süsie puo kerüsuokiu nu le di sünu mhaze kebako whuovü; 46sidi puo sie,

“A ki üse kechaki chütuo,

derei nieko süu chüpie mia vie sekecümia ki puo chüwate,” idi thupie zhü.

47Siro puo teisonhie kerüsuokiu nunu mia petha. Siürei zievokezhako, thezhokepethako mu themia krüta chüyakezhako puo dukhriwaketuo cha pfhüta; 48derei uko süu chülieketuo puocha ngulie mota, kekreilamonyü themiako pete puo khashü mo di puo dieko rünyü terüpfü baketa la.

Currently Selected:

Luk 19: ANBRBSI

Highlight

Copy