Luk 10

Jisu Mia Hiethenie Ketsekeshü

1Mha hako sie Niepuu mia kekrei hiethenie kedalie di süko mia kenienie di ketsepie puo votuo ükeba rüna mu thechü kheko nu shü. 2Sidi puo uko ki, “Lieyie we krathorzhü zo, derei liethomia we tsa, süla nieko lieyie Niepuu bu mhathomia ketsepie puo lieyie nu shülieketuo la puo ki chaliecie. 3Nieko tuoshülie. Harie, tekuoe socie donu kevo tuoi a nieko ketseshüzhie. 4Nieko priesabou morei likhuo morei phikou puorei se hie; siro chala nu miapuorei kelu tha hie. 5Siro nieko ki kehoupuo nu le rei, ‘Nouneu ki hanu baliecie!’ idi pushü rielie. 6Mu noune lielieyakezha nuo sünu ba ro, nie nouneu bu süu gei balietuo, moliro nouneu la nie gei vortatuo. 7Siro lekelie kiu nu ba zolie, sidi mia mha khakeshüko cü mu krielie, mhakechümia puo zha ngu zhü zocü la. Ki puo nu ba di rüdi la ki kekrei puo nu vota hie. 8Nieko rüna kehoupuo nu rei kele ki mia nieko zelie ro, mia mha kesekeshüko cüliecie; 9tsiu rüna süu nu kechükenyüko chü keshürhoshülie, mu uko ki, ‘Ukepenuopfü kedi vor nie penuo batewe,’#10:9 Moro u dzieki bate. idi pushülie. 10Derei nieko rüna kehoupuo nu rei lecü ki mia nieko ze mvüta ro, chaüko nu par di, 11‘Nie rüna nunu nyophe hie phi gei pfüketako zorei kepfhü lapie nie gei shüya. Sirei hau we siliecie: Ukepenuopfü kedi vor penuo bate.’ 12A nieko ki pu toushütuo, sünhie rüna süu rüli ki rei Sodom rüli we hiepfü rüükuotuo.

Pele Kemvü Rünako

(Mark 11:20-24)

13“Ce, Korasin, no we chülietie! Ce, Bethsaida, no rei chülietie! Mhanuü nnie gei chükeshü ungomhathoko Tur mu Sidon-nie gei chüshücü siewe thiedzütho rüna sünie nu themiako gakhropfhe dzie, tsiu migepie u kenhepfü di u nou kedilietieciü. 14Süla ketsokecü nhie unie ki Tur mu Sidon-nie rüli we hiepfü rüükuotuo. 15Siro no Kapernaum,

n thuo n chü kerükrie se kho tei thutuoü ba me?

N chü kerünuopie Hades nu tsuwatuo.

16“Themia kehoupuorei nie pfhe rünyükezhau a pfhe rünyüya; tsiu kehoupuorei nie melieyakezhau a melieya mu a ketsekeshüu rei meliewaya.”

Mia Hiethenieko La Kevor

17Süsie hiethenieko#10:17 Leshü kewe huo nu hiethenie-e kenie si. u nei phi di la vor di sie, “Niepuu, terhuokesuoko zorei n zanu hieko die zeliewe!”

18Süsie puo uko ki, “Satan teigei nu teikemela tuoi te tsurketa a ngu ho. 19Harie, a nieko bu tinyhü siro seba kedelieketuo tsiu ngumvüu kekuo pete penyülieketuo mu mhapuorei bu nie pechüwalie kelho kekuo khashü nie tsüwate. 20Sirei ruopfüko nie die zeketa la nieko nei hieü, nie za thupie teigei zhüketa la nie neiliecie.”

Jisu Puo Neikecü

(Mat 11:25-27; 13:16-17)

21Süki Jisu Kemesa Ruopfüu nunu puo nei di sie, “Apuo, tei mu kijü chükeshüu, a n tsheya, no mhakesikeleko ki we mha hako kevie se tuo di pie nuoranuoko pesikeshü la; ketho, Apuo, mha hau n mhodzüki we n nei n medote. 22A Puou thuo mha peteko khapie a dzie nu shüwate, Puou zo kemosie miapuorei Nuou supuo shi siya mo, sütuoi Nuou mu Nuo süu thuo thapie kiekeshüu zo kemosie miapuorei Puou supuo shi siya mo.”

23Süsie Jisu reipra pethakelieko meho di pekhre uko ki “Nie nguyakezhako ngukecü mhiko we thejakepfütho! 24Kekreilamonyü a nieko ki pushütuo, siedzekesimia mu kedimia kekra rei nie kenguko ngu nyü phi vor, derei ngulie mo, nie kerünyüko rünyü nyü phi vor, derei rünyülie mote.”

Samaria Keviu Dze Dievi

25Siro thezhokesimia puo sier Jisu kedo di sie, “Kepethau, a bu kechachie kerhei ngulieketuo la kedipuo chülie morosuo ga?” 26Sitse puo sie puo ki, “Thezho-u nu kedipuo thupie zhü ga? No kimhie di süko phrüya ga?” 27Sitse puo sie, “No n melou pete, n kerheiro pete, n kekuo pete tsiu n nou pete se Niepuu n Kepenuopfü khrietuo, mu n siezanuomia khriepie n thuo n kekhrie mhietuo.” 28Sitse Jisu sie puo ki, “No kela toushüte, no hau chülie, silie liro no rheilietuo,” sishü.

29Derei puo thuo puoü mezhülie nyü di sie Jisu ki, “Siro supuo a zanuou ga?” 30Sitse Jisu sie, “Mia puo Jerusalem nunu rüve Jeriko nu kezhü ru sekecümia kro puo bu puo telie, puo pfheneiko rhuowa, mu puo vüpie puo bu siatanuo di khapie zhüwa di tuota. 31Siro thekhrüchü zievomia puo cha süu ze ker, themia süu ngucü ki puo khie rho kekreitsa vota. 32Süsütuoi Levimia puo rei süki ker ru themia süu ngucü ki cha khie rho kekreitsa prata. 33Derei Samariamia puo rüve tuo di puo kezhü chü ki vor; ru puoe puo ngushücü ki puo noumezhieta. 34Tsiu puo tuo süu ki phi di tier mu khubezu rupie thepfüko vashü di phashü; sidi puo gada geinu puo pfü rüsoki nu vo di puo theke bata. 35Siro süsienhie puo denari kenie chüpie rüsoki kepfheu tsü di sie, ‘No puo theke balie; siro no ha kezie peprawa zorei, a la kevor ki khapie n tsüwatuo.’ 36Ki-a, n kele ki hako seko donu kiu mia bu puo vükewau zanuomia ücü le ga?” 37Sitse puo sie, “Puo ngumezhiekeshüu zo,” sita. Süla Jisu sie puo ki, “No rei vo di sükemhie chüliecie.”

Jisu Martha mu Maria Kinu Kevo

38Süsie uko cha nu vozhü tse puo rüna puo nu le; sitse puo za Martha ücüpfü puoe puo ki nu puo pesolie. 39Siro süpfü puo siezepfü puo ba, mu puo za Maria ru süpfüsü Niepuu phi nu ba di puo die rünyü ba. 40Derei Martha we mhaneiüko chü merei ba zo, süla hapfü puo ki par di sie, “Niepuu, a siezepfü tuota di a bu a rübei merei bakecü ha no n nounyü mo zo me? No puo ketseshü di puo bu vor a khruohishücie.” 41Derei Niepuu puo ki, “Martha, Martha, no we mhaneiüko chü di n nounyü mu n nou kemezhie chüzhie, 42derei chü kezhütho-u we mhapuo rübei zo. Maria we mha kevitho-u, mhakipuorei puo dzie nunu sesetalie kelho-u kedaliete.”

Currently Selected:

Luk 10: ANBRBSI

Highlight

Copy