Luk 9

Jisu Pethakelie Kerekenie Ketsekeshü

(Mat 10:5-15; Mark 6:7-13)

1Süsie puo kerekenieko kie kengulie di uko bu terhuokesuo kheko whuolie kevi tsiu kechükenyüko chü keshürholie kevi kekuo siro ahza khapie uko tsü, 2sidi puo uko bu Ukepenuopfü kedi dze pupie pethashünu mu mia chü keshürhoshünu ketseshü. 3Sidi puo uko ki, “Nieko rüve nu kethe morei likhuo morei niekhrüda morei shükeiraka morei boulie kerükrü rei se hiecie. 4Siro ki kehoupuo nu le shierei sünu ba zo vo tuo lakecü tsocie. 5Siro kehourapuorei mia nie peso mvü ro, rüna sünunu tuo la kepra ki uko kepejo zasi nie phi geinu nyopheko rei kepfhüshüwalie,” sishü. 6Süsie uko tuo vo di rüna neiüko nu dieliekeviu pie petha mu kechükenyümia rei chü keshürhoshü.

Herod Puo Nou Mecaketa

(Mat 14:1-12; Mark 6:14-29)

7Siro Herod kezhau mha süko dze pete sishü di puo noumecata, kekreilamonyü themiako huomia Johan mia dzülukepfüu kesia nunu rheisietaü, 8mu huomia Elija vortaü, tsiu kekreimiako sie thiedzü ketuo siedzekesiko mia puo rhei la vortaü puketa la. 9Sitse Herod sie, “Johan we a puo tsü ziewate, derei a puo dze kesi hau supuote mu?” Sidi puo ze kesetuoü puo pfhü vo.

Jisu Mia Nyie Pengou Vachükeshü

(Mat 14:13-21; Mark 6:30-44; Joh 6:1-14)

10Siro apostelko la vor di uko mhachükelie dzeko pete Jisu ki pushü. Sitse puo uko ze krei Bethsaida ükecü nu vota. 11Siro themia krodiu süu dze silie tse, uko puo medzita; tsiu puo uko zelie di Kepenuopfü kedi dze pupie uko kie, mu kechükenyü chü keshürho morosuoketako chü keshürhoshü.

12Süsie teisozhau votazhü tse kerekenieko puo ki vor di sie, “Themiako ketsewacie, sidi uko bu haki keba rünako tsiu lieko nu vo di kecüca mu kebakezhü chü pfhülietacie, úko mia lhouya kemo chü puo nu tuoketa la.” 13Derei puo uko ki “Nieko thuo uko vachüshücie.” Sitse uko sie, “Hie bu vo themia hako pete la kecüca khrülie zo kemosie, hieko niekhrüda pengou mu khuo kenie zie tuo mote.” 14Süko thepfumia mia nyie pengou mese tuokecü la! Sitse puo sie puoe pethakelieko ki, “Themiako bu mia hiepengoungou di ke baliecie.” 15Süla uko sükemhie chü di peteko bu balie. 16Sitse puo niekhrüda pengouko mu khuonie chü pielie, sidi tosie teigei meho di japie süko gei shü, di süko bietshielie, sidi pie themiako tsütuoü pethakelieko tsüshü. 17Siro peteko rei cü di pevülie mu cü kepeshako puose khopenuo kerekenie kengulie.

Pitor Jisu Dze Phrakeshü

(Mat 16:13-19; Mark 8:27-29)

18Va puo Jisu puo thuo puo rübei kecha chü ba mu pethakelieko rei puo khieki ba, sitse puo uko ki, “Themia kro-u a üse supuo üya ga?” idi ketso. 19Sitse uko sie, “Johan mia dzülukepfüu üya; derei huomia we Elija üya; mu kekreiko we thiedzütho ketuo siedzekesiko mia puo rhei la vorketa puo üya.” 20Sitse puo uko ki, “Di siro nieko a üse supuo üya mu?” Sitse Pitor puo die kela di sie, “Kepenuopfü Khristau zo.”

Jisu Puo Se Dze Pukeshü

(Mat 16:20-28; Mark 8:30—9:1)

21Siro Jisu uko bu hau pie mia puo ki rei pu hienu kha bei 22di, “Themia Nuou kemezhie phi morosuo, siro phichüko mu zievokezhako, tsiu thezhokepethako bu puo meliewatuo, sidi puo dukhriwatuo, derei zha se nhie puo rheilasielietuo.”

23Süsie puo uko pete ki, “Kehoupuorei a siemedzi kenyümia puo thuo puo meliewa mu teisonhie puo thuo puo krus pie di a siemedziliecie. 24Kekreilamonyü kehoupuorei puo thuo puo phou kelalie nyüyakezhau süu pejüwatuo, derei kehoupuorei a la puo phou pejükeshüu süu kelalietuo. 25Siro mia puoe kijü pete prapie puo vie chülie zorei puo phou pejüwa liro, puo kedipuo kepra ngulietuo ga? 26Siro kehoupuorei a la mu a dieko la mengataya liro, Themia Nuou rei puo zayie tsiu Puou mu kemesa dielieko zayie se zayie chü kevor nhie puo la mengatatuo. 27Derei a nieko ki pu toushütuo, haki ketha huomia Ukepenuopfü kedi ngu kemochie siatalie lho zokecü kro puo tha zo.”

Jisu Kelhou Chü Pekreikeshü

(Mat 17:1-8; Mark 9:2-8)

28Puo die hako pukeshü zha thetha sie, Pitor, Johan mu Jakob uko zelie di kecha chütuoü kijüthou puo gei khota. 29Siro puo cha keba ki, puo zie puorhi kreita, tsiu puo pfheneiko rei krapie vavai zota. 30Sitse ukoe mia kenie, Mosa mu Elija unie puo ze kerüchü ketha ngu. 31Unie-e zayie chü vor sidi puo Jerusalem nunu mhachü tseishü di tuotaketuo dzeko kerüchü. 32Süki Pitor mu puo zenie ze nyü sezhü, derei uko zeta mo di ba tse, puo zayieu mu mia kenie puo ze ketha ngulie. 33Siro sünie puo kinu tuotazhü tse, Pitor sie Jisu ki, “Kepethau, úko keze haki ba tse vi zotuo; úko pru#9:33 Moro dzüpfheki. se chülie khe, puo n la, puo Mosa la mu puo Elija la,” sita, puoe mhale di die süko pu tha mota. 34Siro puo die hako pu thaluocü nu kimhou puo shü vor uko zepfülieta; mu uko michie phita. 35Sitse kimhou geinu mhapfhe puo, “Hauha a Nuou, a puo kedakelieu; nieko puo die rünyüliecie,” isi vor. 36Siro die süu pu kevor ki Jisu rübei tha di kengu zota. Süsie uko mha pu mo zeita, mu puotei sükiko uko mha kenguko puorei se mia puo ki rei pu mo.

Jisu Kesuo Ruopfü Ze ketuo Yopuo Chü Pevikeshü

(Mat 17:14-18; Mark 9:14-27)

37Süsienhie uko kijüthou geinu kerlie tse mia krodi puo vor puo ze kese. 38Süki mia puoe krodiu donunu shiekhoui di, “Kepethau, a n bu a nuou mehoshünu di a mezhiemeloya; a nuo puo rübei zo. 39Tsiekenuo ruopfü puoe puo kebilietataya, sitse puo kra ruorüitaya. Süsie puo ketarere di puo mhitsie meluobvübvütaya; siro puo bie pesuo sekewa sie rei puo khawa mvü beitayalie. 40A noe pethakelieko bu süu whuowanu cha, derei uko chülie kenjüte.” 41Sitse Jisu sie, “Nie kepele kejü tsiu mia rei nu tuoyakemoko, a bu kedithechiepuo nieko ze shügeshühie ba zotuo ga? N nuou ze haki vorlie.” 42Siro unuoyo phirzhü tse, terhuokesuou puo pfü kelhoupie kijü vapiezhüwa, di puo bu puo ketarerepfü zhüta. Derei Jisu mesa kemo ruopfüu kechüwa di unuoyo chü pevishü, sidi puo khapie puo puo tsüwa. 43Siro Kepenuopfü mhatho kezha hau la themiako pete u ngo phita.

Jisu Puo Se Dze Pu Lakeshü

(Mat 17:22-23; Mark 9:30-32)

Siro puo mhathoko la themiako u ngopfü thaluocü nu puoe pethakelieko ki, 44“Die hako bu nie nyie nu le chüsechüliecie: Themia Nuou tepie mia dzie nu shüwatuoü bate.” 45Derei uko puo die pukeshü hau ca lelie mota; uko bu süu ca lelie kelho chüwacü la uko süu ca lelie mota. Siro uko puo ki süu dze ketso michieta.

Suomia Üse Kezhathotie Shi

(Mat 18:1-5; Mark 9:33-37)

46Siro uko donu suomia üse kezhatho chütie shikecü pu kemeü sieta. 47Derei Jisu uko noule silieta, süla puo nhicunuomia yopuo ze vor puo khieki thalie, 48sidi uko ki, “Themia kehoupuorei a za nunu nhicunuo hayo zekeliemia a zelieta zo, mu kehoupuorei a zekelieu a ketsekeshüu rei zelieya; kekreilamonyü nieko donu kecütho-ue kezhatho-u zo,” sita.

U Ngumvükemomia U Kitsa Zo

(Mark 9:38-40)

49Süsie Johan la sie, “Niepuu, hieko mia puo n za se terhuokesuo whuo ketuo ngu, mu puo hie ze kesiedziliekemo la hie puo khawate,” sita. 50Derei Jisu sie puo ki, “Nieko puo kha hiecie, kekreilamonyü kehoupuorei nie petsouyakemo-u sü nie kitsa zo.”

Samariamia Rüna Puo nu Jisu Melieketa

51Siro puo ze khotaketuo tei penuo teitazhü tse puoe Jerusalem nu khoketuo la dojülie. 52Sidi puo pedzüperie chaliemia ketseshüwa. Siro süko puo la mha pete kesetuo üdi tuo Samariamia rüna puo nu le; 53derei uko puo ze mvüta, puo Jerusalem nu votuoü tuocü la. 54Sitse puoe pethakelie Jakob mu Johan unie hau ngulie di sie, “Niepuu, no hie bu teigei nu mi chashü di uko pekawa nyü me?”#9:54 Leshü kewe huo nu Elija chükeshü mhie icü sa. 55Derei puo reipra di unie kerhieta. 56Sidi uko tuo rüna kekrei puo nu vota.

Jisu Siedzikechü

(Mat 8:19-22)

57Siro uko cha nu tuo vozhü tse, mia puoe puo ki, “No kehoura vo rei a rei n siemedzi votuolie.” 58Sitse Jisu puo ki, “Meseruko u ki nyi, tsiu teirako rei u kru nyi, derei Themia Nuou we puo tsü pie kezhü chü rei jü.” 59Siro puo kekreimia puo ki, “No a siemedziliecie,” ishü. Derei puo sie, “Niepuu, a bu vo di a puo khruwa periecie,” sita. 60Derei Jisu puo ki, “Kesiako bu kesiako khruwalie, derei no we vo di Ukepenuopfü kedi dze pushücie,” sita. 61Siro kekreimia puo la sie, “Niepuu, a rei n siemedzituo, derei a bu vo a kinuko ze kesewa riecie.” 62Sitse Jisu puo ki, “Kehoupuorei duca thezese tha di rürei la puo sietsa meho ro Ukepenuopfü kedi themia chülie sü mo,” sita.

Currently Selected:

Luk 9: ANBRBSI

Highlight

Copy