Jakob 2

Huomia Rhu Pekreita Hienukecü

1A kezeko, zayie kechü u Niepuu Jisu Khrista pelekelie nu nie huomia khrie pekreitaya me?#2:1 Moro u nei si kreita mo di zayie kechü Niepuu Jisu Khrista kepeleu thezelie. 2Miapuonie suna dziekha nyü mu pfhemenei kevi se di nie kehou nu vor siro mhakejümia puo pfhemenei kesuo se di vor; 3mu süki nie puo pfhenei kevi keseu si krei di sie, “N pezie rei theba hanu baliecie,” ita, siro mhakejüu ki, “Cüki thalie,” morei “A phi ki balie,”#2:3 Gk Ke a phipra ki balie. isita ro, 4nie thuo nie donu themia kho kekrei mu nie nou puotou mo di capi chüta mo üme? 5A khrieko, rünyüliecie. Ukepenuopfüe kijü hanu mhakejüko kedapie uko bu kepeletsa mhakenyimia mu puo khrieyakezhako la phrapie kezhü kedirüvieu kayiemia chülieta mo üme? 6Derei nie kejümiako peseya. Kenyiko thuo nieko peseya mo üme? Nie merhashü ze dienyaki nu kevoko süko thuo mo üme? 7Theza kevitho pie nie tsüwaketa zatho süu uko thuo pu pesuoya mo üme?

8Kethodie nu thupie kezhü ngukelie kedi zho-u, “No n siezanuomia khriepie n thuo n kekhrie mhieliecie,” ikecüu dieze chü tseilie ro, no vi zo. 9Derei nie huomia khrie pekreita ro, nie kephouma chüta zo mu thezho-u bu nieko pejopie thezho varhuokezhamia chü bate. 10Siro kehoupuorei thezho-u pete zeya zorei ca puo nu tso mota ro, pete nu puoe jotaya. 11Siro “Pieü chü lho” idi pukeshü “Mia dukhri lho,” ikecü rei pu sashü zo. Tsiu no pieü chü mo zorei mia dukhriya üro, no thezho-u varhuoyakezhamia chüte. 12Süla u shüphrakeshü zho-u bu u capi chüketuo le di die pu mu mhachü zoliecie. 13Derei mia ngumezhieya kemomia we ngumezhie mo di puo nyie kecütuo, sirei ngukemezhie-e dienya nu kuolietuo.

Kepele mu Mhatho

14A kezeko, miapuonie puo kepele nyi rei puo mhatho jü liro kedipuo kemevi ba ga? Kepele puo kelashülie vi me? 15Mhanuü nie siezedzürie morei nie üpfünuo huo methuo mu thiethie va rei jü tuo, 16mu nie mia puoe sie puo ki, “Nie nou mene di tuolie; mi peguolie siro mhacü pevüliecie,” ishü, derei nie mhapuorei pie u mo va kemeteishü moliro, süu la kedipuo kemevi ba ga? 17Sütuoi kepele rei puo mhatho jü liro kesia zo.

18Derei huomia sie, “No n kepele nyi mu a we mhatho nyi,” isituo. N mhatho sa mo di n kepele balie vi ükecüu tha a pekiecie, siro a a mhatho geinu a kepele pekieshütuo. 19No rei Ukepenuopfü puo ba zo ücü peleya; süu vi zo. Terhuokesuoko rei süu peleya mu michie di pe baya. 20Derei mhalekemo-u, kepele puo mhatho sa kemosie kemethuo zo ükecü no silietuo mo mo ga? 21U puou Abraham puo nuo Isak pie ruosuoba gei keshü la puo mhatho geinu puo ü mezhülie üta mo me? 22No rei si batuo, puo kepele tsiu puo mhatho kedziese tou di mhachü; mu puo mhatho geinu puo kepele chüpie vi tseikelie zo. 23Kethodie-e pukeshü, “Abraham Ukepenuopfü pelelie, mu süu la puo ü miatho üta,” ikeshü chü tseilie, sidi puo ü Ukepenuopfü zeu üta. 24No rei si batuo themia puoe puo kepele la rübei monyü puo mhatho rei sakecü la mezhülieya. 25Sütuoi Rahab thethenupfü zorei thiedzü mia lie chü kevornie pesolie di unie ketsepie cha kekreitsa shükewa mhatho-u la mezhülieta mo üme? 26Themo ha ruopfü sa moro kesia zocü la, sütuoi kepele rei mhatho sa moro kesia zo.

Currently Selected:

Jakob 2: ANBRBSI

Highlight

Copy