Jakob 3

Utie Kekhalie Morokesuo

1A siezedzürieko, nie mia kekra kepetha chüta hie, we mia kepetha chüyakezhako kekreimia ki rei u ketso menuokuoketuo nie si ba zocü la. 2We mha kekra nu kekrütayacü la. Derei mia puoe puo diepuko nu kekrütaya moro puo vi tsei zo, mu puoe puo kelhou peteu rei kekhalie vi. 3We mha kecü yopuo se kier me doulie di puo bu u die zelie, di puo ze u medora volieya. 4Morei rou puo dze leshü phi: Süu zha phi tsiu teikhrie bu hepie lutsahatsa va tuo zorei routhusei kecü yopuo se süu shü kewhipie u thuo u medora volieya. 5Sütuoi umeüe u gei zatho kecü yopuo zorei se di kemelha sekecü die pulieya.

Mi kecü yopuo zorei ketsa kedithede thewaya mu! 6Tsiu umeüe mi puo zo. U gei zatho kekreikecüko donu khakeshü u meüe kephouma kijü zo; süu umo pete chü perhuwaya, sidi u kelhou zho theshüya, mu süue mizie miü nu thewaya. 7Themiae nhachü mu pera, gou tuoyakezha khunuo siro dzükezha khunuo neiüko kekhalie vi mu kekhalieya, 8derei miapuorei umeü ha kekhalie mo, süue bajülieya kemo mha kesuo puo, mia reikhriwalie kevipfü therei thuo tshu zo. 9We süu se Niepuu mu u Puou thezieya tsiu we süu se Ukepenuopfü rhi nunu chükelie themia rei rüsetaya. 10Tie puo nunu japie mia ketsü mu mia rüsekecü rei parya. A kezeko, hau hi zhü mo zo. 11Dzüluoki puo nunu dzü krie kevi rei mu kepfhü rei parlieya me? 12A kezenuoko, chiedebo geinu olivsi, morei khubebo geinu chiedesi vülieya me? Kezie dzüluo nunu dzü krie kevi parlieya mo zo.

Peso geinu Kevor Mhasiu

13Nie donu supuonie mhasi mu mhalekelie ba ga? Puo bu puo kelhou zho kevi, siro puo mhathomhachü kevi, süu mhasi geinu kepar üse pekieshülie. 14Derei mia ngu nie ro sekecü mu kengukemvü nie nou ba ro, nie mhasiu se kemelha di ketho-u se kecürü hie. 15Sikecü mhasi we teigei nu vor mo, derei kijü hanu vie zo, süu chüüphou mu terhuokesuou kitsa nu zo. 16Mia ngu u ro tsiu kengukemvü kebara, kebvükecü mu mha kesuo neiü bayacü la. 17Derei peso geinu kevor mhasiu we therieu mesa, süsie kezekevi, u zho kevi, kediezelie kerüü, mia ngumezhie sekecü mu mhatho kevi kra phicü, u nei si krei kemo, morei kethera kemo. 18Siro kezeviyakezhako kezevi di kemiatho siu leishüya.

Currently Selected:

Jakob 3: ANBRBSI

Highlight

Copy