Keriekitho 33

Jakob mu Esau Unie Kesekecü

1Jakob-e tosie mehoshü ru, harie, Esau vorzhü ngulie, mia krie dia ze di, süla puo nhicuko kezapie Leah, Rachel mu kituopfü nie tsüwa. 2Puo kituopfünie mu unie nuonuoko bu rielie, süsie, Leah mu puo nuonuoko, tsiu Rachel mu Josef bu kenuotholie. 3Sidi puo thuo uko mhodzü vota; sidi va thenie nuke kijü tsushü di puo dzürieu penuo volie kemochie tuo vor.

4Derei Esau puo ze kesetuo üdi ta vor, sidi puo ciepielie mu puo vo krapfü di puo mebo, tsiu unie krata. 5Siro Esau tosiecü ki thenuko mu nhicuko ngulie sitse puo sie, “N ze ketuo hako suomia ga?” Sitse Jakob sie, “Ukepenuopfü ngukemezhie nunu khapie n kituou ketsü nuonuokolie.” 6Süsie kituopfünie mu unie nuonuoko tuo penuo vor di nerhutsuta. 7Sütuoi Leah mu puo nuonuoko vorlie di nerhutsushü; thela nu Rachel mu Josef unie penuo vorlie di nerhutsushü. 8Sitse Esau sie, “A bu puo kro kekreikrei di ze kesekecü ha no kedipuo le di hai ga?” Sitse Jakob puo die kela di sie, “A niepuu nei chütuo üdi lie.” 9Derei Esau sie, “A siezeu, a kelhuo bawe, n vie kebako bu n vie chü zolie.” 10Sitse Jakob sie, “Simowe, a n neipfülie üro, n pezie rei a dzie nunu a mha khakeshüko lieliecie; a n zie kengu ha Ukepenuopfü zie kengu mhieta zo, no rei n nei di a zeliete ru. 11A n ki chaya, a mha se n ki kevorko lieliecie, kekreilamonyü Ukepenuopfü a ngumezhie phishüte, mu a a kemengu pete nyite.” Sidi pu beitacü puo rei lielie.

12Süsie Esau sie, “Úko rüve chau nu tuoshü khe, mu a n mhodzü rielietuo.” 13Derei Jakob sie puo ki; “A niepuu si ba, nhicuko metei mo, siro tekuo mu mithu kroko a ze ketuoko unuonuo nuyacü la a uko ze menuo morosuo; mu mhanuü khunhie puo uko whuo keyieshü ro, thukro pete siatatie ru. 14A niepuu bu puo kituou mhodzü votaliecie, sitse periko mu nhicuko chatuo ki ze Seir nu a niepuu ki vor tsolie kemochie a rülili di uko taze vorlietuo.”

15Sitse Esau sie, “A bu a ze ketuo themia huo khapie n ze tuotacie.” Derei puo sie, “Kedipuo se sa ta? A bu a niepuu neipfülie üthienyü,” ita. 16Süla Esau sünhie puo cha ze Seir nu la vota. 17Derei Jakob tuo Sukot#33:17 Puoca Pruko. nu volie, sidi puo thuo puo la ki puo chülie, mu puo riko la pruko chülie. Süla thechü süu za pie Sukot chüta.

Jakob Vor Shekem Tsokelie

18Siro Jakob-e mha kere puorei dzüwa mo di Padan-aram nunu Kanan kijü nu keba Shekem nadiu nu vorlie; sidi nadiu mhodzüki nu razhü chü bata. 19Siro puo Shekem-nuo puo Hamor kinu kijü yopuo raka krie puo pie khrükelie nu puo pfheki pethoulie. 20Siro sükisünu ruosuoba chülie di süu üse El-Elohe-Israel#33:20 Süu Ukepenuopfü, Israel Kepenuopfü. üta.

Currently Selected:

Keriekitho 33: ANBRBSI

Highlight

Copy